1, 2. ¿Achike kʼutunïk ütz nabʼän qa chawäch toq xayaʼ yan kan ri a-religión, chuqaʼ achike ruma ütz nabʼän ri kʼutunïk riʼ?

¿ACHIKE kami xtabʼän rat, xa ta nawetamaj chi kʼo jun winäq pa ewatäl nuyaʼ veneno chupam ri yaʼ ri napon pa atinamit? Ronojel ri tinamït kʼo ri yaʼ riʼ, we rat xtatïj, rikʼin bʼaʼ xkakäm. ¿Achike xtabʼän? Rikʼin bʼaʼ yatel el chupam ri tinamït. Stapeʼ yabʼe, rat xtabʼij wi qa: «¿Manäq kami ri veneno pa nuchʼakul?».

² Ri religión man qitzij ta achiʼel ta ke riʼ chuqaʼ rubʼanon. Ri Biblia nubʼij chi rutzʼilbʼisan riʼ rikʼin itzel taq naʼoj chuqaʼ tzʼil taq bʼanobʼäl (2 Corintios 6:17). Ruma riʼ nkʼatzin yatel pe chupam ri «nimaläj Babilonia» (Apocalipsis 18:2, 4, CR). ¿Xatel yan pe rat? We ke riʼ, ütz ri xabʼän. Ja kʼa toq nayaʼ kan jun religión man xa xe ta man yabʼe ta chik o nayaʼ kan rutzijol chi yatel el. Rat kʼo chi nakʼutuj qa chawäch: «¿Kʼa nukʼwan na ri rubʼanobʼal?». Tqatzʼetaʼ jujun tzʼetbʼäl.

3. a) ¿Achike ruma e kʼïy winäq kʼayew nubʼän chi kiwäch yekiyaʼ kan ri tyoxiʼ? b) ¿Achike nukʼüt ri Biblia chi rij ri yeʼakusaj tyoxiʼ richin nayaʼ ruqʼij ri Dios?

³ E kʼo winäq ojer yan riʼ e kʼo pe tyoxiʼ pa kachoch. ¿Rat jun chi ke ri winäq riʼ? We ke riʼ rikʼin bʼaʼ man ütz ta nanaʼ majun ta achike natzʼët apo toq yachʼon rikʼin ri Jehová. Chuqaʼ rikʼin bʼaʼ kan rukʼamon awäch chi kij ri atyoxiʼ. Ja kʼa, toqa chawe chi ja ri Jehová ri nbʼin achike rubʼeyal nrajoʼ nqayaʼ ruqʼij. Ri Biblia nubʼij chi man nrajoʼ ta yeqakusaj ri tyoxiʼ (tasikʼij Éxodo 20:4, 5; Salmo 115:4-8; Isaías 42:8; 1 Juan 5:21). Ruma riʼ richin nayaʼ ruqʼij achiʼel nrajoʼ rijaʼ, nkʼatzin chi nachüp ruwäch ronojel ri kʼo awikʼin ri xa kichin ri religiones ri man e qitzij ta. Ri Jehová itzel yerutzʼët ronojel riʼ, ke riʼ chuqaʼ keʼatzʼetaʼ rat (Deuteronomio 7:26).

4. a) ¿Achike ruma man ütz ta nqayaʼ kiqʼij ri kaminaqiʼ? b) ¿Achike ruma ri Jehová man xuyaʼ ta qʼij chi ke ri israelitas xekibʼanalaʼ itzinïk?

⁴ Jun chik bʼanobʼäl nkibʼän ri religiones ri man e qitzij  ta ja ri nkiyaʼ kiqʼij ri kaminaqiʼ. E kʼo winäq toq kʼa majani wi tketamaj ta ri nubʼij ri Biblia, kiniman wi chi toq yekäm ri winäq yebʼekʼaseʼ jukʼan chik, chuqaʼ chi yekitoʼ o yekitzelaj pe ri winäq. Rikʼin bʼaʼ rat xakanolaʼ rubʼeyal richin xaköl awiʼ chi kiwäch. Achiʼel xawetamaj chupam ri tanaj 6, ri kaminaqiʼ majun akuchi (apeʼ) ta yebʼekʼaseʼ wi. Ruma riʼ majun ruma nakanoj rubʼanik yachʼon kikʼin. Toq nbʼïx chi kʼo rutaqon pe rubʼixik jun awachʼalal ri kaminäq chik, xa ja ri itzel taq espíritus e bʼanayon pe. Ruma riʼ ri Jehová man xuyaʼ ta qʼij chi ke ri israelitas xechʼon kikʼin ri kaminaqiʼ o xekibʼanalaʼ ta itzinïk (tasikʼij Deuteronomio 18:10-12).

5. ¿Achike xkatoʼon richin man nayaʼ ta chik kiqʼij tyoxiʼ chuqaʼ kaminaqiʼ?

⁵ ¿Achike xtabʼän we ri religión at kʼo wi yerukusaj tyoxiʼ o nuyaʼ kiqʼij ri kaminaqiʼ? Ütz nasikʼij textos ri nkiqʼalajrisaj achike nubʼij ri Dios chi rij riʼ. Chuqaʼ qʼij qʼij kachʼon rikʼin ri Jehová, tabʼij chi re chi nawajoʼ nayaʼ ruqʼij achiʼel nrajoʼ rijaʼ. Chuqaʼ takʼutuj atoʼik chi re richin nakʼäm anaʼoj chi rij (Isaías 55:9).

6, 7. a) ¿Achike nkibʼij ri winäq chi rij runimaqʼijuxik ri Alaxbʼäl, chuqaʼ la xkibʼän ri nabʼey taq nimanelaʼ riʼ? b) Ri pa kiqʼij kan ri nabʼey taq nimanelaʼ, ¿achike wi nyaʼöx kiqʼij toq ri winäq nkinimaqʼijuj ri kiqʼij?

⁶ Ri rubʼeyal nqayaʼ ruqʼij ri Jehová rikʼin bʼaʼ nqatzʼilbʼisaj we yeqabʼän nimaqʼij ri yebʼan pa taq religiones ri man e qitzij ta. Jun chi ke reʼ ja ri Alaxbʼäl. Nbʼïx chi re nimaqʼij reʼ nunimaqʼijuj ralaxik ri Jesús, e kʼïy religiones nkibʼän re nimaqʼij reʼ. Ja kʼa majun pruebas chi ri nabʼey taq nimanelaʼ xkibʼän re nimaqʼij reʼ. Ri wuj Los orígenes sagrados de las cosas profundas nubʼij: «Chupam ri kaʼiʼ ciento junaʼ toq xaläx yan ri Jesús majun achike ta etamayon ri qʼij toq  xaläx rijaʼ, chuqaʼ ri winäq majun wi achike ta chi kiwäch ri man ketaman ta riʼ».

⁷ Stapeʼ ri nabʼey taq nimanelaʼ xketamaj ta ri qʼij toq xaläx ri Jesús, manäq ta chuqaʼ xkinimaqʼijuj ri qʼij riʼ. ¿Achike ruma? Ruma chi kiwäch rijeʼ «ri nimaqʼij riʼ petenäq kikʼin ri ojer taq religiones ri man e qitzij ta» (Las cosas nuestras de cada día). Ri Biblia xa xe kaʼiʼ winäq nutzijoj chi xkinimaqʼijuj ri kiqʼij. Rijeʼ e qʼatöy taq tzij ri man xkiyaʼ ta ruqʼij ri Jehová (Génesis 40:20; Marcos 6:21). Chuqaʼ re nimaqʼij reʼ xbʼan richin xyaʼöx kiqʼij ri tyoxiʼ. Achiʼel ri romanos nkinimaqʼijuj wi ralaxik ri diosa Diana ri 24 de mayo. Y ri pa rukaʼn qʼij nkinimaqʼijuj wi ruqʼij ri Apolo ri dios del Sol. Ruma riʼ toq ri winäq nkinimaqʼijuj ri qʼij xeʼaläx, kan ja wi ri tyoxiʼ nkiyaʼ kiqʼij.

8. ¿Achike ruma rukʼwan riʼ ri nanimaqʼijuj aqʼij rikʼin ri itzinïk?

⁸ Jun chik ruma toq ri nabʼey taq nimanelaʼ kan majun wi xkinimaqʼijuj ta ralaxik ri Jesús ja reʼ: rikʼin bʼaʼ rijeʼ ketaman wi chi ri nanimaqʼijuj ruqʼij jun winäq rukʼwan riʼ kikʼin ri itzinïk. Ri ojer kan, e kʼïy winäq aj Roma chuqaʼ aj Grecia nkibʼij wi chi konojel winäq kʼo jun espíritu nchajin kichin. Ri chajinel riʼ kʼo apo toq naläx ri winäq y rijaʼ ri xtchajin ronojel rukʼaslem ri winäq. «Re jun espíritu reʼ nbʼïx chi nchʼon rikʼin ri dios ri nnimaqʼijüx ruqʼij chupam ri qʼij toq xaläx ri winäq» (La tradición de los cumpleaños, reʼ jun wuj pa inglés). Ri Jehová man ütz ta nutzʼët jun nimaqʼij ri nutun ri Jesús rikʼin ri itzinïk (Isaías 65:11, 12). We ke riʼ, ¿achike ruma e kʼïy winäq nkinimaqʼijuj ri Alaxbʼäl?

9. ¿Achike ruma xchaʼöx ri 25 de diciembre richin nnimaqʼijüx ralaxik ri Jesús?

⁹ Pa ciento yan junaʼ tpe ri Jesús chi Ruwachʼulew  toq xchaʼöx ri 25 de diciembre richin nnimaqʼijüx ri ralaxik. Ri Jesús man xaläx ta ri ikʼ riʼ, * rijaʼ achiʼel ta pa octubre xaläx. ¿Achike ruma xchaʼöx ri qʼij riʼ? Ruma e kʼo winäq xkajoʼ «xkiyaʼ kan pa kikʼexel ri nimaqʼij e petenäq chi kij religiones ri man e qitzij ta, jun nimaqʼij kichin runimanelaʼ ri Jesús nkibʼij rijeʼ. [...] Ri pa Roma ri 25 de diciembre, ri winäq nkinimaqʼijuj wi» ralaxbʼäl ri Qʼij (Enciclopedia de la Religión Católica). Ri pa ruqʼijul jöbʼ toq ri Qʼij majun kan ta ruchuqʼaʼ, ri winäq yekibʼanalaʼ wi xukulem richin ntzolin pe ri Qʼij, chuqaʼ richin nuyaʼ pe ri säq y ri kʼatän. Nkibʼij wi chi ri 25 de diciembre ri Qʼij nutikirisaj chik pe rubʼey. Ri ukʼwäy taq bʼey pa taq religiones xkikʼäm apo re nimaqʼij reʼ richin ta xeʼok qa nimanelaʼ ri winäq, ke riʼ xkibʼän qa chi re achiʼel ta kichin runimanelaʼ ri Jesús. *

10. ¿Achike ruma e kʼo winäq man xkinimaqʼijuj ta ri Alaxbʼäl ojer kan?

¹⁰ Ojer yan riʼ etaman chi ri Alaxbʼäl man chupam ta ri Biblia petenäq wi. Ruma riʼ ri pa taq junaʼ 1600 kʼa 1700 ri pa Inglaterra chuqaʼ jujun tinamït pa Estados Unidos, man xyaʼöx ta chik qʼij xbʼan re nimaqʼij reʼ. Ri winäq ri man nbʼe ta wi pa rusamaj ri qʼij riʼ nkʼutüx wi pwäq chi re. Man kʼïy ta junaʼ chi rij riʼ, ri winäq  xkibʼän chik qa re nimaqʼij reʼ chuqaʼ xkiyaʼ chik más rikʼin. Ri Alaxbʼäl jun chik nimaläj nimaqʼij xubʼän qa, wakami kʼïy tinamït kʼa ja riʼ na nkibʼän. Ri winäq nkajoʼ nkiyaʼ ruqʼij ri Jehová nqʼax chi kiwäch chi ri Alaxbʼäl man rikʼin ta ri Biblia petenäq wi. Rijeʼ man yekibʼän ta nimaqʼij ri xa chi kij religiones ri man e qitzij ta e petenäq wi. *

11. Tabʼij achike ruma ri winäq yekibʼän jujun nimaqʼij, chuqaʼ achike kʼo ta chi nqayaʼ más rejqalem.

¹¹ E kʼïy winäq ketaman chi kan e kʼo wi nimaqʼij e petenäq chi kij religiones ri man e qitzij ta, achiʼel ri Alaxbʼäl. Stapeʼ ketaman, nkibʼij chi man itzel ta yeʼabʼän, ri winäq man nkitzʼët ta chik akuchi (apeʼ) e petenäq wi. Chuqaʼ xa jun rubʼanik namöl awiʼ kikʼin ri awachʼalal. ¿Ke riʼ chuqaʼ chawäch rat? We ke riʼ, nel chi tzij chi xa ja ri awajowabʼäl chi kij ri awachʼalal y man ja ta ri a-religión, ri nbʼanon chawe chi man nayaʼ ta ruqʼij ri Jehová achiʼel nrajoʼ rijaʼ. Ri Jehová, ri xtikirisan ri familia, nrajoʼ chi rat ütz nakʼwaj awiʼ kikʼin ri awachʼalal. Rat yatikïr nabʼän riʼ chuqaʼ nayaʼ ruqʼij ri Jehová. Ri apóstol Pablo xubʼij achike kʼo chi nqayaʼ más rejqalem: «Titijaʼ kʼa iqʼij [...] chi nibʼän ri nqa chuwäch ri Dios» (Efesios 5:10).

12. ¿Achike tzʼetbʼäl nqʼalajrisan chi nkʼatzin yeqayaʼ kan ri nimaqʼij ri man nukʼüt ta ri Biblia?

¹² Rikʼin bʼaʼ rat nabʼij chi wakami jun chik ruma toq yebʼan re nimaqʼij reʼ, man achiʼel ta chik ri ojer kan. ¿Kʼo rejqalem nawetamaj ri kixeʼel? Jaʼ kʼo. Reʼ achiʼel toq natzʼët jun kabʼ pa rubʼey ri tzʼil taq yaʼ. ¿Xtatzʼübʼ qa re kabʼ reʼ? Manäq na wi, xa tzʼil. Achiʼel re kabʼ reʼ e kʼo nimaqʼij ri ütz yeʼatzʼët apo, ja kʼa xa tzʼil achoj kikʼin e petenäq wi. We röj nqajoʼ nqayaʼ ruqʼij ri Jehová achiʼel nrajoʼ rijaʼ, kʼo chi  nqabʼän ri xubʼij kan ri profeta Isaías: «Man keʼichäp ri man e chʼajchʼöj ta» (Isaías 52:11).

13. ¿Achike kʼayewal rikʼin bʼaʼ xkepe chawij ruma e kʼo nimaqʼij man xkeʼabʼän ta?

¹³ Rikʼin bʼaʼ e kʼo kʼayewal xkepe chawij toq xkeʼayaʼ kan ri nimaqʼij. Achiʼel toq ri awachibʼil pa samaj man nqʼax ta chi kiwäch achike ruma e kʼo nimaqʼij man xkeʼabʼän ta. Toq ke riʼ, ¿achike xtabʼän? Chuqaʼ we kʼo ta jun nyaʼon jun asipanïk pa Alaxbʼäl, ¿la itzel xtakʼäm? ¿Achike xtabʼän we man junan ta a-religión rikʼin ri akʼulaj? ¿Achike xtabʼän richin chi ri awal o awalkʼwal man itzel ta xtkinaʼ ruma kʼo nimaqʼij man xtabʼän ta kikʼin?

14, 15. ¿Achike nabʼän toq jun winäq nubʼij chawe chi ütz ta awäch xtaqʼasaj jun nimaqʼij o nrajoʼ nuyaʼ jun asipanïk?

¹⁴ Nkʼatzin nakusaj ri anaʼoj richin nawetamaj achike xtabʼän toq nkikʼüt pe kiʼ reʼ. Achiʼel toq jun winäq nrajoʼ chi ütz ta awäch xtaqʼasaj jun nimaqʼij, ütz xa xe nabʼij matyox chi re. We jun winäq ri qʼij qʼij natzʼët achiʼel jun awachibʼil pa samaj, ri xtbʼin chawe, rikʼin bʼaʼ ütz natzijoj chi re achike ruma man nabʼän ta ri nimaqʼij. Xa bʼa achike na kʼa, rat choj pa rubʼeyal kachʼon. Ri Biblia nubʼij: «Kan ta achiʼel toq kʼo atzʼan rikʼin ri iqʼutuʼn, ke riʼ ta ri ichʼabʼäl [...] nibʼij chi ke konojel ri kʼo nkikʼutuj chiwe» (Colosenses 4:6). Taqʼalajrisaj pa rubʼeyal achike ruma e kʼo nimaqʼij man yeʼabʼän ta chuqaʼ chi ütz nayaʼ jun sipanïk o namöl awiʼ jun chik qʼij.

¹⁵ ¿Achike xtabʼän we kʼo ta jun winäq nrajoʼ nuyaʼ jun asipanïk? Majun achike ta nubʼän xa xe natzʼët achike ruma nuyaʼ chawe. Rikʼin bʼaʼ nubʼij: «Wetaman chi rat man nabʼän ta re nimaqʼij reʼ; stapeʼ wetaman, ninwajoʼ ninyaʼ reʼ chawe». Rikʼin bʼaʼ xtakʼäm ri sipanïk ruma xtqʼax chawäch chi man ruma ta riʼ at ajun rat nabʼän ri nimaqʼij.  Toq ri winäq man retaman ta chi rij ri nanimaj, ütz natzijoj chi re chi man nabʼän ta re nimaqʼij reʼ. Rikʼin riʼ nabʼij achike ruma man xtayaʼ ta chik el rukʼexel ri rusipanïk. E kʼo más winäq nkiyaʼ asipanïk xa xe richin nkibʼij chi rikʼin jun sipanïk rat naqʼäj rutzij ri Dios; toq ke riʼ, tatzʼetaʼ ütz ütz we nakʼäm ri sipanïk o manäq.

16. ¿Achike rubʼeyal nakʼüt chi nakusaj ri anaʼoj toq e kʼo nimaqʼij yebʼan?

¹⁶ ¿Achike xtabʼän we ri awachʼalal man nqa ta chi kiwäch ri nanimaj? Toq ke riʼ takusaj ri anaʼoj richin natzʼët achike xtabʼän. Majun ruma nabʼän oyowal chi rij jujun bʼanobʼäl o nimaqʼij ri nkajoʼ nkibʼän rijeʼ. Tayaʼ qʼij chi ke, achiʼel nawajoʼ nkibʼän rijeʼ awikʼin rat (tasikʼij Mateo 7:12). Xa xe tachajij awiʼ rikʼin ri achike yeʼabʼän, richin man tqʼax chi kiwäch ri a-familia chi at ajun rat nabʼän apo ri nimaqʼij. Ronojel ri achike nabʼän tubʼanaʼ chawe chi chʼajchʼöj ri awanima chuwäch ri Dios (tasikʼij 1 Timoteo 1:18, 19).

17. ¿Achike xtabʼän richin chi ri awal o awalkʼwal man itzel ta xtkinaʼ ruma e kʼo nimaqʼij man xkeʼabʼän ta kikʼin?

¹⁷ ¿Achike xtabʼän richin chi ri awal o awalkʼwal man itzel ta xtkinaʼ ri man xkeʼabʼän ta ri nimaqʼij ri man yerukʼüt ta ri Biblia? Ja ri nabʼän rat kikʼin richin yekʼastan. E kʼo teʼej tataʼaj nkikanoj jun chik qʼij richin nkiyaʼ kisipanïk ri kalkʼwal. Jun sipanïk ri nimaläj ruqʼij, ja ri yeʼawajoʼ chuqaʼ najäm awäch richin yakʼojeʼ kikʼin.

18. ¿Achike rubʼanik yatkitoʼ ri molojriʼïl richin nayaʼ ruqʼij ri Jehová achiʼel nrajoʼ rijaʼ?

¹⁸ Richin ütz nutzʼët ri Dios ri nabʼän, kʼo chi nayaʼ kan ri religión ri man qitzij ta, ke riʼ nayaʼ ruqʼij achiʼel nrajoʼ rijaʼ. ¿Achike rubʼanik nabʼän reʼ? Ri Biblia nubʼij:  «Tqakanoj kʼa achike rubʼanik [...] nqatolaʼ qiʼ qonojel, richin nqetamaj yojajowan, y más ta nqarayij nqabʼän ri utziläj taq bʼanobʼäl [...]. Xa kan nkʼatzin chi nqamöl qiʼ, richin nqakuqubʼalaʼ qakʼuʼx chi qachibʼil qiʼ. Y ja riʼ ri más nkʼatzin [...] nqabʼän ruma qetaman chi napon yan ri qʼij» (Hebreos 10:24, 25). Ri yojbʼe pa molojriʼïl nuyaʼ kikotem y yojtikïr nqayaʼ ruqʼij ri Jehová achiʼel nrajoʼ rijaʼ (Salmo 22:22; 122:1). Chi kipam re molojriʼïl reʼ ri winäq nkitoʼ kiʼ «richin nkuqür» kikʼuʼx (Romanos 1:12).

19. ¿Achike ruma kʼo rejqalem natzijoj ri xawetamaj yan chupam ri Biblia?

¹⁹ Jun chik rubʼanik nayaʼ ruqʼij ri Dios achiʼel nrajoʼ rijaʼ, ja ri natzijoj ri xawetamaj yan chupam ri Biblia kikʼin ri ruqʼalajrisanelaʼ ri Jehová. E kʼïy winäq yebʼison y yejilon ruma ri itzelal najin. Rikʼin bʼaʼ e kʼo winäq awetaman kiwäch ri ke riʼ kibʼanon. ¿Achike ruma man natzijoj ta chi ke ri xtubʼän ri Jehová pa qawiʼ? Mani nayaʼ kan rutzijoxik ri Biblia chuqaʼ ütz yabʼe pa kimolojriʼïl ri qitzij taq nimanelaʼ. We nabʼän reʼ eqal xkeʼayaʼ kan ri bʼanobʼäl ri yekibʼän ri religiones ri man e qitzij ta. We rat xtayaʼ ruqʼij ri Jehová achiʼel nrajoʼ rijaʼ, xkakikot chuqaʼ kʼïy urtusanïk xtakʼül (Malaquías 3:10).