1, 2. ¿Achike kʼayewal yebʼanon chi qe chi nqatïj poqonal, chuqaʼ achike kʼutunïk yekibʼän e kʼïy winäq?

JUN tinamït ri ruyon oyowal (chʼaʼoj) nbʼanatäj chuwäch, pa mil ixoqiʼ chuqaʼ akʼwalaʼ xekäm chupam jun chi ke ri oyowal riʼ. Konojel ri winäq riʼ xemuqüx qa junan pa jun jül. Pa ruwiʼ ri jül xecholobʼäx kan cruz ri nkibʼij: «¿Achike ruma xbʼanatäj reʼ?». Ja kʼutunïk reʼ ri más nkibʼän ri winäq toq nkïl jun nïm kʼayewal pa kikʼaslem. Rikʼin bʼis nkibʼän re kʼutunïk reʼ toq nkäm jun kachʼalal ruma jun oyowal, jun kaqʼiqʼ jöbʼ, jun yabʼil o rikʼin bʼaʼ xkamisäx. Chuqaʼ toq ntzaq kachoch o achike chik na jun kʼayewal ri npe pa kiwiʼ. Ri winäq nkajoʼ nketamaj achike ruma yebʼanatäj ri kʼayewal.

² ¿Achike ruma ri Jehová ruyaʼon qʼij chi kʼo ri tijoj poqonal? Ri Jehová ronojel ntikïr nubʼän, najowan, kʼo runaʼoj chuqaʼ pa ruchojmil nubʼän ronojel. We rijaʼ ke riʼ, ¿achike ruma kʼo ri itzelal chi Ruwachʼulew? ¿La abʼanon rat re kʼutunïk reʼ?

3, 4. a) ¿Achike kʼutunïk xubʼän ri Habacuc chi re ri Jehová? b) ¿Achike nutzʼët ri Jehová ri itzelal chuqaʼ ri tijoj poqonal?

³ ¿Xajan nqakʼutuj achike ruma ri Dios ruyaʼon qʼij chi kʼo ri tijoj poqonal? E kʼo yebʼin chi toq nabʼän re kʼutunïk reʼ choj nakʼüt chi majun akuqubʼabʼäl kʼuʼx ta chuqaʼ  chi man nayaʼ ta ruqʼij ri Dios. Chupam ri Biblia nqatzʼët chi ri ojer kan e kʼo rusamajelaʼ ri Dios xekibʼän kʼutunïk achiʼel riʼ. Achiʼel ri profeta Habacuc xubʼij chi re ri Jehová: «¿Achike ruma ayaʼon qʼij chi röj kʼa nqatïj na poqön? [...] Kan xa xe kʼa ri kamïk y ri wululen ri kʼo xa bʼa akuchi. Xa bʼa akuchi yetzʼukutäj wi el oyowal y chʼojinïk» (Habacuc 1:3).

⁴ ¿Xpe royowal ri Jehová chi re ri Habacuc ruma xubʼän re kʼutunïk reʼ? Manäq, pa rukʼexel riʼ xuyaʼ qʼij chi xetzʼibʼatäj kan ri rutzij chupam ri Biblia. Chuqaʼ xutoʼ richin xqʼax más chuwäch achike ruma e kʼo ri kʼayewal chuqaʼ richin xkʼojeʼ más rukuqubʼabʼäl kʼuʼx. Ri Jehová nrajoʼ chuqaʼ nuyaʼ re toʼïk reʼ chawe rat. Toqa pa ajolom chi ri Biblia nubʼij chi ri Dios ‹yojruchajij› (1 Pedro 5:7). Ri Jehová itzel nutzʼët ri itzelal chuqaʼ ri qʼaxomal nuyaʼ. Rijaʼ ri más itzel ntzʼeton chuwäch xa bʼa achike winäq (Isaías 55:8, 9). We ke riʼ, ¿achike ruma janila tijoj poqonal kʼo?

5. ¿Achike ruma kʼo ri tijoj poqonal nkibʼij ri winäq, ja kʼa achike nubʼij ri Biblia?

⁵ E kʼïy winäq ri jalajöj ki-religiones kikʼutun chi ke  ri ukʼwäy taq bʼey achike ruma kʼo ri tijoj poqonal. E kʼïy ukʼwäy taq bʼey kibʼin chi ja riʼ nrajoʼ ri Dios chuqaʼ chi kan rubʼin chik pe chi ke riʼ xtbʼanatäj. E kʼïy winäq bʼin chi ke chi xa xe ri Dios etamayon achike ri nubʼän pa qawiʼ. Chuqaʼ bʼin chi ke chi ri Dios yerukʼwaj ri winäq richin yekʼojeʼ rikʼin chi kaj, ajun ri akʼwalaʼ. Ja kʼa röj qetaman chi ri Jehová majun kʼayewal ta nuyaʼ pa kiwiʼ ri winäq. Ri Biblia nubʼij: «Ri Dios kan majubʼey kʼa xtubʼän ta jun itzel bʼanobʼäl; ri Dios ri kʼo ronojel uchuqʼaʼ pa ruqʼaʼ majubʼey xtubʼän ta jun bʼanobʼäl ri man pa ruchojmil ta» (Job 34:10).

6. ¿Achike ruma e kʼïy winäq nkiqʼabʼaj chi rij ri Dios ri tijoj poqonal kʼo chi Ruwachʼulew?

⁶ ¿Awetaman achike ruma ri winäq chi rij ri Dios kiqʼabʼan ri tijoj poqonal? Ruma e kʼïy yebʼin chi rijaʼ ri nqʼaton tzij pa ruwiʼ ri Ruwachʼulew. Ri Biblia man ke riʼ ta nubʼij. Chupam ri tanaj 3, rat xawetamaj yan pe chi ri nqʼaton tzij wakami pa ruwiʼ ri Ruwachʼulew, ja ri Satanás.

7, 8. a) ¿Achike rubʼeyal kikʼamon apo kinaʼoj ri winäq chi rij ri Satanás? b) ¿Achike chik más ruma nqïl ri tijoj poqonal?

⁷ Ri Biblia nubʼij chi ri winäq pa ruqʼaʼ ri Satanás e kʼo wi (1 Juan 5:19). Reʼ nuqʼalajrisaj achike ruma kʼo ri tijoj poqonal. Ri winäq kikʼamon apo kinaʼoj chi rij ri Satanás, ri «nqʼolon kichin konojel winaqiʼ» (Apocalipsis 12:9). Ri Satanás itzel yerutzʼët ri winäq, nutzʼük tzij chuqaʼ yerubʼanalaʼ itzelal. Ri winäq e kʼo pa ruqʼaʼ, ja riʼ chuqaʼ nkibʼän. Ja riʼ ri nabʼey ruma kʼo ri tijoj poqonal chi Ruwachʼulew.

⁸ Ri rukaʼn ruma, xqetamaj chupam ri tanaj 3, ri winäq xeʼitzelatäj chuqaʼ xeʼok aj mak kan xa xe toq ri nabʼey taq winäq xkiqʼäj rutzij ri Jehová pa Edén. Kan xa xe riʼ ri winäq nkajoʼ yekʼojeʼ pa kiwiʼ ri más winäq, nkikanoj rubʼanik richin nkïl ri nkajoʼ. Ronojel ri nkibʼän, rukʼamon pe oyowal (chʼaʼoj) chuqaʼ tijoj poqonal (Eclesiastés 4:1; 8:9). Ri rox ruma kʼo tijoj poqonal, ja reʼ: «Röj man qetaman  ta achike xtubʼän ri qakʼaslem chi qawäch apo». Toq nqanaʼ chaq kʼateʼ yepe ri kʼayewal pa qawiʼ (tasikʼij Eclesiastés 9:12). Ruma riʼ xa bʼa achike ramaj chuqaʼ xa bʼa akuchi (apeʼ) na kʼo jun winäq, kʼo mul kʼo nukʼulwachij pa rukʼaslem.

9. ¿Achike ruma nqabʼij chi ri Jehová kʼo ruma ruyaʼon qʼij chi kʼo ri tijoj poqonal?

⁹ Janila nukuqubʼaʼ qakʼuʼx nqetamaj chi man ja ta ri Dios nyaʼon ri tijoj poqonal. Man rumak ta rijaʼ yebʼanatäj ri oyowal, kamisanïk, kaqʼiqʼ taq jöbʼ chuqaʼ ri más kʼayewal e kʼo pa qawiʼ. Stapeʼ xqetamaj qa reʼ, kʼa majani tqaqʼalajrisaj ta achike ruma ri Dios ruyaʼon qʼij yebʼanatäj ri kʼayewal. Ri Dios ronojel ntikïr nubʼän, ruma riʼ ntikïr na wi nuchüp ruwäch ri kʼayewal. ¿Achike ruma man ruchupun ta? Röj qetaman chi ri Jehová yojrajoʼ, ruma riʼ nqabʼij chi kʼo ruma ruyaʼon qʼij chi kʼo ri tijoj poqonal (1 Juan 4:8).

10. ¿Achoj chi rij xchʼon ri Satanás chuqaʼ achike rubʼanik xubʼän chi re?

¹⁰ Richin nqetamaj achike ruma ruyaʼon qʼij ri Dios chi kʼo ri tijoj poqonal, nkʼatzin nqetamaj achike rubʼanik xtikïr pe ri kʼayewal. Toq ri Satanás xubʼän chi ri Adán y Eva xkiqʼäj rutzij ri Jehová, xtzʼukutäj pe jun kʼayewal. Ri Satanás, ruma retaman wi chi ri Jehová man kʼisel ta ruchuqʼaʼ, majun achike ta xubʼij chi rij riʼ. Rijaʼ chi rij ri ruqʼatbʼäl tzij ri Jehová xchʼon wi. Toq ri Satanás xubʼij chi ri Dios ntzʼukun tzij chuqaʼ man nuyaʼ ta qʼij chi ke ruwinaq nkibʼän ri nkajoʼ, xrajoʼ xubʼij chi ri Dios jun itzel qʼatöy tzij (tasikʼij Génesis 3:2-5). Chuqaʼ xrajoʼ xubʼij chi ri winäq más ütz yebʼe pa kikʼaslem we rijaʼ nqʼaton tzij pa kiwiʼ. Ja riʼ rubʼanik xutzʼük tzij chi rij ruqʼatbʼäl tzij ri Jehová.

11. ¿Achike ruma ri Jehová man xuchüp ta kiwäch ri makunelaʼ pa Edén?

 ¹¹ Toq ri Adán y Eva xkiqʼäj rutzij ri Jehová, achiʼel ta xkibʼij: «Man nkʼatzin ta ruqʼatbʼäl tzij ri Jehová chi qe. Röj yojtikïr nqachaʼ ri nqajoʼ nqabʼän». ¿Achike rubʼanik xusöl ri Jehová re kʼayewal reʼ? ¿Achike rubʼeyal nuqʼalajrisaj chi kiwäch ri taqoxelaʼ chuqaʼ ri winäq chi ri makunelaʼ majun kinaʼoj ta? Chuqaʼ ¿chi ri rubʼanik nqʼaton tzij rijaʼ ja riʼ ri más ütz? E kʼo yebʼin chi ri Dios jumul ta xuchüp kiwäch ri makunelaʼ, ke riʼ xubʼän ta chik jun kʼulaj winäq. Ja kʼa ri Dios xubʼij yan chi nrajoʼ nkotzʼijäx ruwäch ri Ruwachʼulew chuqaʼ chi ri Adán yekʼojeʼ ralkʼwal, ke riʼ nkinojisaj ruwäch (Génesis 1:28). Qetaman chi ronojel ri nubʼij ri Jehová kan nubʼän wi (Isaías 55:10, 11). Xa ta xchup kiwäch ri makunelaʼ pa Edén, man nsolotäj ta ri kʼayewal chi rij ri ruqʼatbʼäl tzij.

12, 13. ¿Achike ruma ri Jehová ruyaʼon qʼij chi ri Satanás nqʼaton tzij, chuqaʼ chi ri winäq nkiqʼät qa tzij pa kiwiʼ?

¹² Jun tzʼetbʼäl chi rij reʼ. Jun tijonel nukʼüt rusolik jun kʼayewal chi rij jun ajlanïk. Toq ri tijonel nchʼon, jun tijoxel  ri kʼo retamabʼal ja kʼa itzel runaʼoj, nubʼij apo chi man ütz ta ri rubʼanik nsolöx ri kʼayewal. Rikʼin ri nubʼij, nrajoʼ nubʼij chi ri tijonel man retaman ta nuyaʼ tijonïk. Ri tijoxel nubʼij chi kʼo jun rubʼanik más ütz nsolöx ri kʼayewal. Jujun chi ke ri rachibʼil nkinimaj ri nubʼij, ruma riʼ nkitzeqelibʼej apo. ¿Achike xtubʼän ri tijonel? Rijaʼ ntikïr yerelesaj el ri itzel taq tijoxelaʼ, ja kʼa ¿achike kami xtkibʼij ri más tijoxelaʼ? Rikʼin bʼaʼ xtkibʼij chi ri kachibʼil chuqaʼ ri xetzeqelibʼen richin, qitzij ri nkibʼij. Chuqaʼ man xtkinimaj ta chik ri kitijonel y xtkibʼij chi nuxibʼij riʼ xtqʼalajin chi qitzij man retaman ta nuyaʼ tijonïk. Wakami tqabʼanaʼ chi re chi ri tijonel nuyaʼ qʼij chi re ri tijoxel nusöl rijaʼ ri kʼayewal chi kiwäch ri rachibʼil.

¹³ Ri Jehová achiʼel ta ke riʼ xubʼän. Toqa chawe chi ri xeyakatäj pe chi rij ri Jehová pa Edén man xa xe ta rijeʼ e kʼo. Pa millón ri taqoxelaʼ najin wi nkitzʼët achike nbʼanatäj (Job 38:7; Daniel 7:10). Rijeʼ kʼo chi nketamaj achike nbʼin ri qitzij, ja ri Jehová o ja ri Satanás. Chuqaʼ xtqʼalajin achike qʼatbʼäl tzij ri más ütz. Ruma riʼ ri Jehová ruyaʼon qʼij chi ri Satanás nukʼüt ri rubʼeyal nqʼaton tzij pa kiwiʼ ri winäq. Chuqaʼ ruyaʼon qʼij chi ke ri winäq chi rijeʼ yeqʼaton qa tzij pa kiwiʼ rikʼin rutoʼik ri Satanás.

14. ¿Achike ruma ri Jehová xuyaʼ na qʼij chi ri winäq nkiqʼät tzij pa kiwiʼ?

¹⁴ Ri tijonel xqatzijoj kan retaman chi ri itzel taq tijoxelaʼ majun kinaʼoj ta. We nuyaʼ qʼij chi ri tijoxel nusöl ri kʼayewal, achiʼel nubʼij ri tijoxel, konojel ri tijoxelaʼ xtqʼalajin chi kiwäch achike nbʼin ri qitzij. Toq xtqʼalajin chi man qitzij ta ri nkibʼij ri itzel taq tijoxelaʼ, ri más tijoxelaʼ xtqʼax chi kiwäch chi xa xe ri tijonel kʼo retamabʼal richin yerutijoj. Chuqaʼ xtqʼax chi kiwäch achike ruma ri tijonel xkerelesaj el ri itzel taq tijoxelaʼ. Ke riʼ chuqaʼ chi rij ri Jehová, rijaʼ retaman chi ri taqoxelaʼ y ri utziläj taq winäq, xtqʼax chi kiwäch chi ri Satanás y ri rachibʼil man qitzij ta  ri nkibʼij. Chuqaʼ chi ri winäq man yetikïr ta nkiqʼät tzij pa kiwiʼ. Xtqʼalajin chi kiwäch ri nubʼij ri profeta Jeremías toq xubʼij: «Röj [winäq] man ja ta röj oj rajaw ri qakʼaslem y qayon röj man yojtikïr ta nqachojmirisaj ri qakʼaslem» (Jeremías 10:23).

15, 16. a) ¿Achike ruma ri Jehová ruyaʼon qʼij chi kʼïy yan junaʼ kʼo ri tijoj poqonal? b) ¿Achike ruma ri Jehová man ruqʼaton ta chi yebʼanatäj ri kamisanïk chuqaʼ ri más kʼayewal?

¹⁵ ¿Achike ruma ri Jehová ruyaʼon qʼij chi kʼïy yan junaʼ kʼo ri tijoj poqonal? ¿Achike ruma nuyaʼ qʼij yepe kʼayewal pa kiwiʼ ri winäq? Richin nqetamaj, kojchʼon chik chi rij ri tijonel. Rijaʼ man xtuqʼät ta chuwäch ri tijoxel rusolik ri kʼayewal, chuqaʼ man xtutoʼ ta chi rusolik. Ke riʼ chuqaʼ ri Jehová, rijaʼ man xuqʼät ta chuwäch ri Satanás chuqaʼ ri rachibʼil chi nkikʼüt we qitzij ri nkibʼij. Ruma riʼ ruyaʼon qʼij chi e qʼaxnäq pe kʼïy junaʼ. Ronojel ri junaʼ e kʼo pe ri winäq, kikusan pe jalajöj kiwäch qʼatbʼäl taq tzij, chuqaʼ kʼiyirnäq pe ketamabʼal chi rij ronojel. Stapeʼ ke riʼ e kʼo más winäq ri majun kʼo kikʼin, kʼo más oyowal chuqaʼ más itzelal. Ruma riʼ xqʼalajin yan chi ri winäq majun yetikïr ta nkiqʼät tzij pa kiwiʼ.

¹⁶ Ri Jehová man rutoʼon ta ri Satanás richin nuqʼät tzij pa kiwiʼ ri winäq. Xa ta rijaʼ nuqʼät ri kamisanïk chuqaʼ ri más kʼayewal, ¿man nel chi tzij riʼ chi nutoʼ ri Satanás? Xa ta majun itzelal yebʼanatäj, ¿pejaʼ xtqabʼij chi röj winäq jebʼël qetaman yojqʼaton tzij? We ri Jehová nutoʼ ri Satanás, nel chi tzij chi ajun rijaʼ nutzʼük tzij junan rikʼin ri Satanás. Ri Jehová man nubʼän ta riʼ, rijaʼ man nutzʼük ta tzij (Hebreos 6:18).

17, 18. ¿Achike rubʼanik xtubʼän chik utzil ri Jehová ronojel ri xritzelaj ri Satanás?

¹⁷ ¿Achike nqabʼij chi rij ronojel ri itzelal bʼanatajnäq pe ruma ri Satanás chuqaʼ ri itzel taq winäq? Ri Jehová kʼo  ruchuqʼaʼ chuqaʼ nrajoʼ nubʼän chik utzil ronojel ri itzelan. Achiʼel qetaman pe, ri Ruwachʼulew xtbʼan chik utzil, ke riʼ jun kotzʼijaläj ulew xtubʼän. Ri kikuqubʼan kikʼuʼx chi rij ri rukʼaslem xuyaʼ pa kamïk ri Jesús, xkekolotäj chuwäch ri mak. Chuqaʼ ri kaminaqiʼ xkekʼastäj chik. Ja riʼ rubʼanik ri Dios xtukusaj ri Jesús richin ‹xtuyöj rusamaj ri Itzel Winäq› (1 Juan 3:8). Ri Jehová ruchaʼon chik ri qʼij richin xtubʼän ronojel reʼ. Nqamatyoxij chi ri Jehová majani tuchüp ta ruwäch ri itzelal, ke riʼ, kʼa yojtikïr na nqetamaj ri qitzij chuqaʼ nqabʼän ri nrajoʼ rijaʼ (tasikʼij 2 Pedro 3:9, 10). Wakami, ri Dios najin yerukanoj winäq ri nkajoʼ nkiyaʼ ruqʼij, chuqaʼ yerutoʼ richin nkiköchʼ ronojel ri kʼayewal (Juan 4:23; 1 Corintios 10:13).

¹⁸ E kʼo yebʼin chi majun ta ri tijoj poqonal xa ta ri Dios xubʼän ta chi re ri Adán y Eva chi man yetikïr ta nkiqʼäj tzij. Richin nqetamaj achike ruma man ke riʼ ta kibʼanik xubʼän ri Dios, toqa pa ajolom ri jun nimaläj sipanïk ruyaʼon ri Dios chi qe.

19. ¿Achike nimaläj sipanïk ruyaʼon ri Dios chi qe, chuqaʼ achike ruma nqamatyoxij?

¹⁹ Achiʼel xqetamaj chupam ri tanaj 5, röj winäq bʼanon chi qe chi yojtikïr nqachaʼ achike nqajoʼ nqabʼän. ¿Nqʼax chawäch rejqalem re jun sipanïk reʼ? Ri Dios kʼïy chikopiʼ e rubʼanon. Ja kʼa rijeʼ man ketaman ta nkitzʼët achike ri ütz chuqaʼ ri man ütz ta. ¿Ütz ta kami nqanaʼ röj we ke riʼ ta bʼanon chi qe? Manäq. Ruma riʼ janila nqamatyoxij chi yojtikïr nqachaʼ  achike qanaʼoj nqabʼän, achike kʼaslem nqakʼwaj chuqaʼ achike winäq yeqachibʼilaj. Ri Dios nrajoʼ chi yojkikot rikʼin ri sipanïk ruyaʼon chi qe.

20, 21. ¿Achike rubʼanik pa rubʼeyal nqakusaj ri sipanïk yaʼon chi qe, chuqaʼ achike ruma kʼo ta chi ja riʼ nqajoʼ nqabʼän?

²⁰ Ri Jehová nrajoʼ chi naläx pa qanima ri nqayaʼ ruqʼij (2 Corintios 9:7). Toq jun akʼwal nubʼij chi re ruteʼ o rutataʼ: «Janila yatinwajoʼ». ¿Achike más ütz nrakʼaxaj ri teʼej o tataʼaj? ¿Ja ri toq ri akʼwal nubʼij reʼ ruma kʼo taqchiyon pe o nubʼij reʼ ruma xaläx pe pa ranima? Ruma riʼ ütz nqakʼutuj qa chi qawäch: «¿Achike rubʼanik xtinkusaj ri sipanïk ruyaʼon ri Dios chwe?». Ri Satanás, ri Adán chuqaʼ ri Eva man ütz ta rukusaxik xkibʼän chi re ri sipanïk xyaʼöx chi ke. Rijeʼ xa xkimalij kan ri Jehová. Ja kʼa rat, ¿achike xtabʼän?

²¹ Rat yatikïr pa rubʼeyal nakusaj ri sipanïk yaʼon chawe. Ütz yakʼojeʼ kikʼin ri winäq ri nkiyaʼ ruqʼij ri Jehová. Ri winäq riʼ nkikotisaj ranima ri Jehová, ruma rikʼin ri kibʼanobʼal nkikʼüt chi ri Satanás jun tzʼuküy tzij chuqaʼ man ütz ta ri ruqʼatbʼäl tzij (Proverbios 27:11). Rat yatikïr nabʼän riʼ, we xtachaʼ ri utziläj rubʼeyal kʼaslem. Chupam ri jun chik tanaj, xtqetamaj achike ri utziläj kʼaslem riʼ.