1. ¿Achike xebʼanon ri winäq, ri chikopiʼ chuqaʼ ronojel ri kʼo?

RI Jehová ja riʼ ri «qitzij Dios» chuqaʼ «kʼaslïk Dios», xubʼij ri profeta Jeremías (Jeremías 10:10). Ri winäq, ri chikopiʼ y ronojel ri kʼo kikʼaslem ja ri Jehová e bʼanayon. Ja riʼ xubʼij jun molaj taqoxelaʼ chi kaj: «Qajaw Dios, [...] ja rat kʼa xabʼanon ronojel ri kʼo y xeʼakʼiytisaj, ruma kan ja riʼ ri arayibʼal» (Apocalipsis 4:11). Chuqaʼ ri David, chupam jun rubʼix, xubʼij chi re ri Jehová: «Awikʼin rat kʼo wi ri tzʼukubʼäl [...] kʼaslem» (Salmo 36:9). Ruma riʼ, ri kʼaslem jun rusipanïk ri Jehová.

2. ¿Achike nqabʼän richin nqanaʼ rukiʼil ri kʼaslem?

² Richin oj kʼäs, ri Jehová ruyaʼon ronojel ri nkʼatzin chi qe (Hechos 17:28). Ruyaʼon qaway, qayaʼ, quxlaʼ chuqaʼ ri Ruwachʼulew richin yojkʼojeʼ chuwäch (tasikʼij Hechos 14:15-17). Ja kʼa richin nqanaʼ rukiʼil ri kʼaslem, nkʼatzin nqetamaj rupixaʼ ri Dios chuqaʼ nqasamajij (Isaías 48:17, 18).

3. ¿Achike xutzʼët ri Dios ri xkamisäx ri Abel?

³ Ri Jehová nrajoʼ nqayaʼ ruqʼij ri qakʼaslem chuqaʼ  kikʼaslem ri más winäq. Jun tzʼetbʼäl. Ri Caín, ri rukʼajol ri Adán, xyakatäj royowal chi rij ri Abel, ri ruchaqʼ. Ri Jehová xubʼij chi re ri Caín chi tujalaʼ ri runaʼoj, ja kʼa rijaʼ man xniman ta. Ri royowal xubʼän chi «xyakatäj chi rij» ri Abel, ke riʼ «xukamisaj» (Génesis 4:3-8). Ri Biblia nubʼij chi ri Jehová xuyaʼ kʼayewal pa ruwiʼ ri Caín ruma xukamisaj ri ruchaqʼ (Génesis 4:9-11).

4. ¿Achike rubʼanik nukʼüt ri Dios chi ri kʼaslem kʼo ruqʼij?

⁴ Pa mil junaʼ chi rij riʼ, ri Jehová xuyaʼ rupixaʼ pa kiwiʼ ri israelitas richin xkiyaʼ ruqʼij achiʼel nrajoʼ rijaʼ. Ruma pa ruqʼaʼ ri Moisés xerujäch wi, rupixaʼ ri Moisés nbʼïx chi ke. Jun chi ke ri pixaʼ nubʼij: «Man tibʼän [...] kamïk» (Deuteronomio 5:17). Rikʼin re pixaʼ reʼ ri Dios xukʼüt chi nuyaʼ ruqʼij kikʼaslem ri winäq. Chuqaʼ chi konojel tkiyaʼ ruqʼij kikʼaslem ri más winäq.

5. ¿Achike ruma man ütz ta yebʼan ri tzaqonïk?

⁵ ¿Achike nubʼij ri Dios chi kij ri neneʼ ri kʼa majani keʼaläx ta? Ri pixaʼ nubʼij chi man ütz ta yekamisäx. Nubʼij: «We kʼo ta achiʼaʼ ri nkichʼayalaʼ kiʼ chi kiwäch y nkisök jun ixöq ri royobʼen akʼwal chuqaʼ nkibʼän chi naläx ri ral, [...] ri makunel kʼo chi xtutöj ri rumak. [...] Ja kʼa we kʼo jun nkäm, ri makunel xtkamisäx chuqaʼ» (tasikʼij Éxodo 21:22, 23, TNM; Salmo 127:3). Rikʼin re texto reʼ ri Jehová nubʼij chi man ütz ta yeqabʼän ri tzaqonïk.

6. ¿Achike ruma kʼo chi nqelesaj el pa qanima ri itzelal nqanaʼ chi kij ri winäq?

⁶ Chuqaʼ richin nqayaʼ ruqʼij ri kʼaslem, kʼo chi yeqajoʼ konojel ri winäq. Ri Biblia nubʼij: «Ri nritzelaj ri rachʼalal xa achiʼel jun kamisanel. Y rïx iwetaman, chi ri kamisanel manäq rukʼaslem ri man kʼisel ta» (1 Juan 3:15). We nqajoʼ nqïl apo ri kʼaslem riʼ, kʼo chi nqelesaj el pa qanima ri itzelal nqanaʼ chi kij ri winäq. Ruma kʼïy mul ja riʼ nbʼanon chi yebʼanatäj ri kamïk (1 Juan 3:11, 12). Ruma riʼ ütz tqakʼwaj qiʼ chi qawäch.

7. ¿Achike bʼanobʼäl ri man nkiyaʼ ta ruqʼij ri kʼaslem?

 ⁷ ¿Achike rubʼeyal nqayaʼ ruqʼij ri qakʼaslem? Röj winäq man nqajoʼ ta yojkäm. Stapeʼ ke riʼ e kʼo winäq nkinïm kiʼ pa kamïk xa ruma jun kʼastajinem. Achiʼel ri yesikʼan, yekikächʼ may o yekitïj droga. Ronojel re bʼanobʼäl reʼ nkitzelaj qachʼakul o yojkikamisaj. Ri winäq nbʼanon riʼ man nuyaʼ ta ruqʼij ri kʼaslem. Chuwäch ri Dios e tzʼil re bʼanobʼäl reʼ (tasikʼij Romanos 6:19; 12:1; 2 Corintios 7:1). Ruma riʼ richin nqayaʼ ruqʼij ri Dios achiʼel nrajoʼ rijaʼ, kʼo chi yeqayaʼ kan. Rikʼin bʼaʼ kʼayew xtubʼän chi qawäch, toqa pa qajolom chi ri Jehová xkojrutoʼ. Rijaʼ nuyaʼ ruqʼij ri nqachajij ri qakʼaslem, ri nimaläj rusipanïk.

8. ¿Achike ruma ütz nqabʼän chi re ronojel ri kʼo qikʼin?

⁸ We nqayaʼ ruqʼij ri kʼaslem, pa ruchojmil xtqabʼän chi re ronojel chuqaʼ man xtqanïm ta qiʼ pa kamïk ruma jun kʼastajinem. Man xtqajininej ta rukʼwaxik jun chʼichʼ chuqaʼ man xkeqabʼän ta etzʼanem ri xa rikʼin bʼaʼ yojsokotäj o yojrukamisaj (Salmo 11:5). Jun chi ke ri pixaʼ xuyaʼ ri Jehová pa kiwiʼ ri israelitas nubʼij: «Toq kʼo jun chiwe rïx nupabʼaʼ qʼanej jun rachoch y taqʼaj ruwiʼ nubʼän chi re, kʼo chi nubʼän jun tzʼaq chi rij [...] ruwiʼ ri jay, richin ke riʼ we kʼo ta jun ntzaq pe y nkäm, ri rajaw majun rumak» (Deuteronomio 22:8). Re jun pixaʼ reʼ nubʼij chi ütz tqabʼanaʼ chi re ronojel. We ri qachoch e kʼo ru-gradas, kʼo ta chi jutaqïl ütz rubʼanon. We kʼo qachʼichʼ tqanikʼoj chi ütz rubʼanon ronojel. Man tqabʼän chi ri qachoch o ri qachʼichʼ nukʼäm pe sokotajïk pa qawiʼ chuqaʼ pa kiwiʼ ri más winäq.

9. We nqayaʼ ruqʼij ri kʼaslem, ¿achike man xtqabʼän ta chi ke ri chikopiʼ?

⁹ ¿Achike rubʼanik nutzʼët ri Dios kikʼaslem ri chikopiʼ? Chuwäch rijaʼ kʼo ruqʼij ri kikʼaslem. Rijaʼ nuyaʼ qʼij yekamisäx richin yetïj (yekʼuxüx) o richin yebʼan tzyäq. Chuqaʼ toq xa kʼo sokotajïk o kamïk nkikʼäm pe pa qawiʼ (Génesis 3:21; 9:3; Éxodo 21:28). Chuqaʼ xajan nayaʼ pa tijoj poqonal  jun chiköp o nakamisaj ruma kʼastajinem. Ri ke riʼ nabʼän, man nayaʼ ta ruqʼij ri kʼaslem (Proverbios 12:10).

10. ¿Achike rubʼeyal xukʼüt ri Jehová chi ri kʼaslem kʼo chupam ri kïkʼ?

¹⁰ Toq ri Caín xukamisaj yan ri Abel, ri Jehová xubʼij chi re: «Ri rukikʼel ri achaqʼ [...] nchʼon pe wikʼin» (Génesis 4:10). Toq ri Jehová xubʼij ri «rukikʼel ri achaqʼ», xrajoʼ xubʼij rukʼaslem ri Abel. Ri Jehová xuyaʼ kʼayewal pa ruwiʼ ri Caín ruma xukamisaj ri ruchaqʼ. Ri naʼoj chi ri kʼaslem kʼo chupam ri kïkʼ xqʼalajin chik toq xbʼanatäj yan ri Kamïk Jöbʼ. Ri pa nabʼey, ri winäq xa xe wi ruwäch tikoʼn yekitïj. Toq xqʼax yan ri Kamïk Jöbʼ xjalatäj. Ri Jehová xubʼij chi re ri Noé: «Ütz yeʼitïj ri kitijul [kichʼakul] ri chikopiʼ». Chuqaʼ xubʼij: «Ja kʼa ri tiʼij ri kʼa kʼo kïkʼ rukʼwan man titïj, ruma chi riʼ kʼo wi ri rukʼaslem» (Génesis 1:29; 9:3, 4). Chuwäch ri Jehová ri kʼaslem kʼo chupam ri kïkʼ.

11. ¿Achike xubʼij ri Dios chi re ri rutinamit chi rij ri kïkʼ?

¹¹ Jun rubʼanik nqakʼüt chi nqayaʼ ruqʼij ri kïkʼ, ja ri man nqatïj ta. Chupam ri pixaʼ xuyaʼ ri Jehová pa kiwiʼ ri israelitas, rijaʼ xubʼij: «Xa bʼa achike kʼa chi ke ri iwinaq [...] nukamisaj jun chiköp o jun aj xikʼ chiköp richin tijel, xtrelesaj kʼa kan ri rukikʼel y xtumüq kan rikʼin ulew. [...] Man titïj ri tiʼij ri xa kʼa rukʼwan na kïkʼ» (Levítico 17:13, 14). Stapeʼ xqʼax yan jun 800 junaʼ tubʼij ri Jehová chi re ri Noé chi man tutïj kïkʼ, xubʼij chik chi ke ri israelitas. Rikʼin riʼ nqʼalajin chi rijaʼ man rujalon ta runaʼoj chi rij ri kïkʼ. Ri chikopiʼ ütz yetïj (yekʼuxüx) xa xe nelesäx kan kikikʼel y nyaʼöx kan pa ulew, ke riʼ achiʼel ta ntzolïx el ri kikʼaslem chi re ri Dios.

12. ¿Achike xbʼïx chi rij ri kïkʼ ruma ri loqʼoläj espíritu, chuqaʼ ri kʼa kʼo pa qawiʼ röj wakami?

¹² Wakami, ri Dios ruyaʼon chuqaʼ jun pixaʼ pa qawiʼ röj chi rij ri kïkʼ. Ri pa nabʼey siglo, ri apóstoles chuqaʼ ri más  ukʼwäy taq bʼey pa kiwiʼ runimanelaʼ ri Jesús, xkimöl kiʼ richin xkitzʼët achike pixaʼ kʼo chi nkitaqej. Ja reʼ xqʼalajin chi kiwäch: ‹Ri nrajoʼ ri Loqʼoläj Espíritu, ja chuqaʼ riʼ ri nqajoʼ röj chiwe, [...] kan xa xe kʼa ri más nkʼatzin, ja riʼ tibʼanaʼ, chi man titïj ri [...] yaʼon chik chi kiwäch chʼaqa chik dios. Man chuqaʼ titïj tiʼij kichin ri chikopiʼ ri xejiqʼ, ni man kʼa chuqaʼ titïj kïkʼ. Chuqaʼ ri winaqiʼ e kʼulan man tkikanolaʼ kiʼ richin yemakun› (Hechos 15:28, 29; 21:25). Ruma riʼ man ‹tqatïj kïkʼ›. Chuwäch ri Dios ri natïj kïkʼ, jun mak junan rikʼin ri nayaʼ kiqʼij ri tyoxiʼ chuqaʼ yeʼabʼän ri tzʼiläj taq bʼanobʼäl.

13. ¿Achike ruma ri nimanelaʼ man nkajoʼ ta nyaʼöx kïkʼ pa kichʼakul?

¹³ Ri pixaʼ nubʼij chi man ütz ta nqatïj kïkʼ, ¿la nchʼon chuqaʼ reʼ chi rij ri nyaʼöx kïkʼ chawe? Jaʼ, xa junan. Reʼ achiʼel toq jun aqʼomanel nubʼij chi re jun tijöy yaʼ chi mani chik nutïj, ¿la ütz kami nyaʼöx pa ribʼochʼil? Man ütz ta. Ke riʼ chuqaʼ chi rij ri kïkʼ, toq nbʼïx chi man tqatïj, nel chi tzij majun rubʼanik tapon pa qachʼakul. Ruma riʼ richin nqataqej ri pixaʼ, man tqayaʼ qʼij nyaʼöx kïkʼ chi qe.

14, 15. Ri nimanelaʼ nqayaʼ ruqʼij ri kʼaslem, ja kʼa, ¿achike ruma man xtqaqʼäj ta rupixaʼ ri Dios richin yojkʼaseʼ chik bʼaʼ?

¹⁴ ¿Achike xtubʼän jun rusamajel ri Jehová toq nrïl jun nimaläj sokotajïk o nbʼïx chi re chi nbʼan operar? Rikʼin bʼaʼ ri aqʼomanelaʼ nkibʼij chi xtkäm we man xtyaʼöx ta kïkʼ chi re. Ja kʼa ri rusamajel ri Jehová man nrajoʼ ta nkäm. Ruma nuyaʼ ruqʼij ri kʼaslem, rijaʼ xtukʼutuj jun chik rubʼeyal aqʼomanïk. Man xtukʼäm ta jun aqʼomanïk ri man nuyaʼ ta ri qitzij rejqalem ri kïkʼ. Rijaʼ xtukʼäm jun chi ke ri aqʼomanïk yeʼukusäx pa rukʼexel ri kïkʼ.

¹⁵ Chi kiwäch ri nimanelaʼ kʼo más rejqalem nkitaqej rutzij ri Jehová chi rij ri kïkʼ, ke chuwäch yekʼaseʼ jun chik kayoxiʼ junaʼ. Ri Jesús xubʼij chi ri winäq nrajoʼ nuköl rukʼaslem «man xtkʼojeʼ ta jun qitzij rukʼaslem. Ja kʼa ri man  nupoqonaj ta riʼ, xtpe y napon pa kamïk wuma rïn, kan xtrïl wi kʼa ri qitzij rukʼaslem» (Mateo 16:25). Majun chi qe röj nqajoʼ yojkäm. We nqajoʼ nqaköl ri qakʼaslem stapeʼ nqaqʼäj rutzij ri Dios, rikʼin bʼaʼ ruma riʼ man xtqïl ta chik ri kʼaslem man kʼisel ta. Toq nqabʼän ri nubʼij ri pixaʼ, ütz yojbʼe pa qakʼaslem. We xkojkäm, ri Dios xtuyaʼ chik ri qakʼaslem toq xkekʼasöx ri kaminaqiʼ (Juan 5:28, 29; Hebreos 11:6).

16. ¿Achike nubʼän jun runimanel ri Jesús toq nsujüx kïkʼ chi re?

¹⁶ Ri qitzij taq rusamajelaʼ ri Dios, man kaʼiʼ ta kikʼuʼx nkitaqej ri pixaʼ chi rij ri kïkʼ. Ruma riʼ man nkitïj ta chuqaʼ man nkikusaj ta richin aqʼomanïk. * Rijeʼ ketaman chi ri Dios, ri bʼanayon ri kïkʼ, retaman achike ri más ütz pa kiwiʼ. ¿Ke riʼ chuqaʼ chawäch rat?

17. ¿Achike rubʼanik nukusäx ri kïkʼ xubʼij ri Jehová chi ke ri israelitas ojer kan?

¹⁷ Ri pixaʼ xyaʼöx chi re ri Moisés nuqʼalajrisaj achike rubʼeyal nukusäx ri kïkʼ. Toq ri Jehová xuqʼalajrisaj chi kiwäch ri israelitas ri rubʼeyal nyaʼöx ruqʼij, rijaʼ xubʼij: «Ri kïkʼ richin ri kamelabʼäl [sacrificio], kʼo chi nyaʼöx pa ruwiʼ ri porobʼäl». Ri kïkʼ ja riʼ nbʼanon chi nkuyutäj ri mak. Ruma riʼ, ri kïkʼ xyaʼöx  pa ruwiʼ ri porobʼäl xa richin nkuyutäj kimak ri israelitas (Levítico 17:11). Rijeʼ nkikʼwaj wi jun chiköp pa tabernáculo. Ke riʼ nyaʼöx apo jubʼaʼ rukikʼel ri chiköp pa ruwiʼ ri porobʼäl. Reʼ kʼa xkibʼän na ri israelitas chupam ri templo ri xubʼän ri Salomón. Xa xe wi riʼ rubʼanik xukusäx ri kïkʼ.

18. ¿Achike utzil chuqaʼ urtusanïk nqïl ruma ri Jesús xuyaʼ rukikʼel quma röj?

¹⁸ Ri nimanelaʼ man yaʼon ta chik ri pixaʼ pa kiwiʼ ri xyaʼöx pa kiwiʼ ri israelitas ojer kan. Ruma riʼ man yekikʼwaj ta chik chikopiʼ chuqaʼ ri rukikʼel pa ruwiʼ jun porobʼäl chuwäch ri Dios (Hebreos 10:1). Ri rubʼeyal xkikusaj ri kïkʼ ri israelitas, xukʼambʼej ri kʼaslem xuyaʼ ri Jesucristo pa kamïk. Achiʼel xqetamaj chupam ri tanaj 5, ri Jesús xuyaʼ ri rukikʼel quma röj toq xkamisäx. Chi rij riʼ xbʼe chi kaj y xuyaʼ apo chuwäch ri Dios rajïl ri rukikʼel xuyaʼ quma röj. Reʼ xa xe jun mul xujäch apo chuqaʼ richin  jantapeʼ (chi jumul) (Hebreos 9:11, 12). Ja riʼ rubʼanik nqïl rukuyutajik ri qamak, chuqaʼ xujäq ri bʼey richin nqïl ri kʼaslem man kʼisel ta (Mateo 20:28; Juan 3:16). Ri rubʼanik xukusaj ri Jesús ri rukikʼel janila rejqalem (1 Pedro 1:18, 19). Yojkolotäj we nqakuqubʼaʼ qakʼuʼx chi rij ri xubʼän ri Jesús.

19. ¿Achike nubʼän jun runimanel ri Jesús richin man xtchʼojïx ta kikʼaslem ri winäq pa ruqʼaʼ?

¹⁹ Ri qakʼaslem, ¡jun nimaläj sipanïk ri ruyaʼon ri Dios chi qe! Jun rubʼanik nqamatyoxij, ja ri nqabʼij chi ke ri winäq chi tkikuqubʼaʼ kikʼuʼx chi rij ri kʼaslem xuyaʼ ri Jesús pa kamïk, ke riʼ rijeʼ chuqaʼ xtkïl kikʼaslem man kʼisel ta. Re samaj reʼ rikʼin ronojel qanima xtqabʼän, ruma achiʼel ri Jehová, chi qawäch röj kʼo ruqʼij ri kikʼaslem ri winäq (tasikʼij Ezequiel 3:17-21). We ke riʼ xtqabʼän, xtqabʼij achiʼel ri apóstol Pablo: «Man numak ta rïn we e kʼo ri xkebʼeqaqa [...] chupam ri rukʼayewal. Ruma kan majun ri xinwewaj, [...] xa kan ronojel ri ruchʼobʼon ri Dios pa qawiʼ röj winaqiʼ xinbʼij chiwe» (Hechos 20:26, 27). Jun rubʼanik nqakʼüt chi nqayaʼ ruqʼij ri kʼaslem chuqaʼ ri kïkʼ, ja ri nqatzijoj ri Jehová chuqaʼ ri xtubʼän pa qawiʼ.