PA MILLÓN chi winäq nkiyaʼ ruqʼij ri cruz. Ri Enciclopedia Hispánica nubʼij chi ri cruz «ketal ri religiones ri nkibʼij chi e runimanelaʼ ri Cristo». ¿La ütz nkikusaj ri cruz ri qitzij taq runimanelaʼ ri Jesús?

Richin nqabʼij jaʼ o manäq, ütz nqetamaj chi ri Jesús man chuwäch ta jun cruz xkäm wi. Ri tzij griego staurós, ri kʼïy biblias «cruz» kibʼanon qa chi re, nchʼon chi rij «jun raqän cheʼ». Ri tzij staurós majubʼey «nchʼon ta chi kij kaʼiʼ cheʼ ri kikʼwan kiʼ, jun qʼeʼël chuwäch ri jun paʼäl. Chupam ri tanaj chi re ri Biblia, ri xtzʼibʼäx pa griego, majun nawïl ta jun texto ri nubʼij kaʼiʼ cheʼ» (The Companion Bible).

E kʼo achiʼaʼ ri xetzʼibʼan ri Biblia toq xkisikʼij ri cheʼ achoj chuwäch xkamisäx ri Jesús, xkikusaj ri tzij griego xýlon. Re tzij  reʼ xa «siʼ o cheʼ», nrajoʼ nubʼij (Gálatas 3:13). Chuqaʼ ri más biblias «cheʼ» chuqaʼ kibʼanon qa chi re ri tzij xýlon toq kiqʼasan pa kaxlan chʼabʼäl (Hechos 5:30; 10:39, Traducción del Nuevo Mundo, Reina Valera chuqaʼ Biblia Latinoamericana; Hechos 13:29; 1 Pedro 2:24, Reina Valera).

Kʼo jun achin rubʼiʼ Hermann Fulda, nuqʼalajrisaj achike ruma xa jun raqän cheʼ xukusäx richin xekamisäx ri winäq. Ja reʼ nubʼij: «Ri ulew e chaʼon richin yekamisäx ri itzel taq winäq, man kan ta yeʼawïl cheʼ chuwäch. Ruma riʼ xa choj wi nyaʼöx qa jun raqän cheʼ pa ulew. Chuwäch ri cheʼ riʼ yeyutüx o yebʼajïx kiqʼaʼ kaqän ri winäq yekamisäx» (Das Kreuz und die Kreuzigung [La cruz y la crucifixión]).

Ri jebʼël nqʼalajrisan chi qawäch reʼ ja ri Ruchʼabʼäl ri Dios. Ri apóstol Pablo xubʼij: «Ri Cristo xojruköl chuwäch ri rukʼayewal ri nqaqa pa qawiʼ [...]. Kan pa ruwiʼ rijaʼ xqaqa wi ri rukʼayewal ri xa pa qawiʼ ta röj rukʼamon chi xqaqa wi, ruma ri ruchʼabʼäl ri Dios nubʼij chi kan itzel ruwaruqʼij ri winäq ri ntzeqebʼäx chuwäch jun cheʼ» (Gálatas 3:13). Ri xubʼij ri Pablo, chupam ri Deuteronomio 21:22, 23 xrelesaj wi. Re texto reʼ jun cheʼ ri nubʼij y man jun cruz ta. Ri cheʼ retal chi ri xkamisäx chuwäch, «itzel ruwaruqʼij». Ruma riʼ ri runimanelaʼ ri Jesús, man ütz ta nkiyaʼ pa taq kachoch ruwachibʼäl ri Cristo bʼajin chuwäch jun cruz.

¿Achike xbʼanatäj toq xkäm yan ri Jesús? Chupam ri 300 junaʼ toq xkäm yan ri Jesús, ri runimanelaʼ man xkikusaj ta ri cruz richin xkiyaʼ ruqʼij ri Jehová. Majun jun ta wuj nbʼin chi xkikusaj ta ri cruz. Ja kʼa toq xqʼax yan más 300 junaʼ tkäm ri Jesús, ri Constantino, jun qʼatöy tzij, xujäl ru-religión. Rijaʼ xok apo chupam jun chik, ri nubʼij chi runimanel ri Jesús. Ja riʼ toq rijaʼ xukusaj ri cruz richin xok retal ri ru-religión. Qetaman o manäq achike ruma ke riʼ xubʼän ri Constantino, ri Jesucristo man chuwäch ta jun cruz xkäm wi. Ri cruz xa chi kij ri religiones man e qitzij ta petenäq wi. Jun wuj católico, nubʼij: «Ri cruz xukusäx pa taq tinamït ri xekʼojeʼ toq kʼa majani tutïk ta ri Jesús ri qitzij religión, chuqaʼ ri tinamït man nkinimaj ta ri Jesús» (New Catholic Encyclopedia). Chuqaʼ e kʼo ukʼwäy taq bʼey nkibʼij chi ri cruz, petenäq chi rij ri bʼanobʼäl richin nyaʼöx ruqʼij ri Qʼij. Chuqaʼ chi kij ri ojer taq bʼanobʼäl xekibʼän ri winäq richin nkʼojeʼ kalkʼwal.

 We ri cruz man chi rij ta ri qitzij religión petenäq wi, ¿achike ruma e kʼïy winäq yeʼukusan? Rikʼin bʼaʼ ri ukʼwäy taq bʼey xkibʼij chi ke riʼ man kʼayew ta yeʼok apo ri winäq chupam ri religión nubʼij chi runimanel ri Jesús. Ri Biblia nuqʼalajrisaj chi man ütz ta nyaʼöx kiqʼij ketal ri religiones (2 Corintios 6:14-18). Chuqaʼ nubʼij chi man ütz ta nyaʼöx kiqʼij ri tyoxiʼ (Éxodo 20:4, 5; 1 Corintios 10:14). Ruma riʼ ri qitzij taq runimanelaʼ ri Jesús man nkikusaj ta ri cruz richin nkiyaʼ ruqʼij ri Dios. *