TANAJ 01
¿Achike rubʼanik yarutoʼ ri Biblia?
Kʼïy chi qe röj yeqabʼän kʼutunïk chi rij ri kʼaslem, ri tijoj poqonal, ri kamïk chuqaʼ ri xtbʼanatäj chi qawäch apo. Chuqaʼ nupoysaj qakʼuʼx ri achike yebʼanatäj qʼij qʼij, achiʼel ri achike rubʼeyal nqachʼäk qamero ri nkʼatzin chi qe o ri ütz nqabʼän richin yojkikot pa qachoch. Kʼïy winaqiʼ nqʼalajin chi kiwäch chi ri Biblia ntikïr nusöl ronojel ri kʼutunïk riʼ chuqaʼ nuyaʼ utziläj taq naʼoj ri yojtikïr nqakusaj qʼij qʼij. ¿Nabʼij rat chi ri Biblia ntikïr nutoʼ jun winäq ri rat awetaman ruwäch?
1. ¿Achike jujun kʼutunïk yeruqʼalajrisaj ri Biblia?
Ri Biblia yerusöl ri kʼutunïk ri kʼo janila kejqalem achiʼel reʼ: ¿la kʼo jun oj bʼanayon?, ¿achike ruma oj kʼäs?, ¿achike ruma yetijon poqön ri utziläj taq winäq?, ¿akuchi yojbʼe wi toq yojkäm?, we man nqajoʼ ta ri oyowal ¿achike ruma e kʼo nimaʼq taq oyowal? y ¿la kʼo jun qʼij xtkʼis ruwäch ri Ruwachʼulew? Chupam ri Biblia yeqïl kiqʼalajrisaxik re kʼutunïk reʼ y pa millón chi winäq yekikot ruma ketaman reʼ.
2. ¿Achike rubʼanik yojrutoʼ ri Biblia richin yojkikot pa qakʼaslem qʼij qʼij?
Ri Biblia nuyaʼ utziläj taq naʼoj chi qe. Jun tzʼetbʼäl, nukʼüt chi qawäch achike rubʼanik kan qitzij wi yojkikot pa qachoch. Chuqaʼ nubʼij achike rubʼanik nqelesaj ri nipoysan qakʼuʼx chuqaʼ ri rubʼanik yojkikot rikʼin ri qasamaj. Toq junan xtqatijoj qiʼ chi rij re wuj reʼ rat xtawetamaj achike nubʼij ri Biblia chi rij reʼ chuqaʼ chʼaqa chik naʼoj. Qitzij na wi xtqʼax chawäch chi «ronojel ri tzʼibʼatäl» nel chi tzij ronojel ri e kʼo chupam ri Biblia nuyaʼ kan qanaʼoj (2 Timoteo 3:16).
Re wuj reʼ man nuqasaj ta ruqʼij ri Biblia. Pa rukʼexel riʼ xkarutoʼ richin ütz nawetamaj rupam. Ruma riʼ nqajoʼ chi rat nasikʼij ronojel ri textos yaʼon kan chupam jujun taq tanaj chuqaʼ richin najunumaj ri nubʼij ri textos riʼ rikʼin ri najin nawetamaj.
TQANIKʼOJ RIJ
Tqatzʼetaʼ achike rubʼanik xujäl ri Biblia ri kikʼaslem kʼïy winaqiʼ, achike yojtikïr nqabʼän richin ütz nqanaʼ nqasikʼij ri kʼo chupam ri Biblia chuqaʼ achike utzil rukʼamon pe ri kʼo jun yojrutoʼ richin nqʼax chi qawäch ri nubʼij.
3. Ri Biblia nukʼwaj qabʼey
Ri Biblia achiʼel jun qʼaqʼ ri janila ruchuqʼaʼ ri ntikïr nusaqirisaj ri qabʼey. Yojtikïr nqakusaj richin nqachaʼ achike xtqabʼän pa qakʼaslem chuqaʼ richin nqetamaj achike xkebʼanatäj chi qawäch apo.
Tisikʼij ri Salmo 119:105 chuqaʼ kixchʼon chi rij reʼ:
-
¿Achike xuchʼöbʼ chi rij ri Biblia ri xtzʼibʼan re salmo reʼ?
-
¿Achike nabʼij rat chi rij ri Biblia?
4. Ri Biblia yeruqʼalajrisaj ri qakʼutunïk
Jun ixöq xrïl ri qitzij chi rij ri rukʼutunïk chupam ri Biblia ri kʼïy junaʼ rupoysan wi rukʼuʼx. Titzʼetaʼ ri VIDEO chuqaʼ kixchʼon chi rij reʼ:
-
¿Achike chi kʼutunïk xerubʼän ri ixöq ri xel pa video?
-
¿Achike toʼïk xrïl toq xutijoj riʼ chi rij ri Biblia?
Ri Biblia nubʼij chi keqabʼanaʼ kʼutunïk. Tisikʼij Mateo 7:7 chuqaʼ kixchʼon chi rij reʼ:
-
¿Nabʼij rat chi ri Biblia yerusöl kayoxiʼ kʼutunïk ri abʼanon qa rat? We ke riʼ, taqʼalajrisaj jujun.
5. Ri rusikʼixik ri Biblia nukikotisaj ri qanima
E kʼïy winäq kan nqa chi kiwäch nkisikʼij ri Biblia chuqaʼ kilon utzil chupam. Titzʼetaʼ ri VIDEO chuqaʼ kixchʼon chi rij reʼ:
-
¿Achike nkibʼij ri xtaniʼ alabʼoniʼ ri xeʼel pe chupam ri video chi rij ri rusikʼixik ruwäch wuj?
-
¿Achike ruma man junan ta ri nkibʼij chi rij ri rusikʼixik ri Biblia?
Ri nukʼüt ri Biblia nukuqubʼaʼ qakʼuʼx chuqaʼ nuyaʼ uxlanem pa qanima. Tisikʼij Romanos 15:4 chuqaʼ kixchʼon chi rij reʼ:
-
¿Narayij nawetamaj más chi rij ri rubʼanik nukuqubʼaʼ akʼuʼx ri Biblia chuqaʼ nuyaʼ uxlanem pa awanima?
6. Rikʼin rutoʼik jun winäq jebʼël xtqʼax chi qawäch ri nubʼij ri Biblia
Kʼïy kiyon nkisikʼij ri Biblia ja kʼa kitzʼeton chi janila utzil rukʼamon pe toq jun chik winäq ntoʼon kichin. Tisikʼij Hechos 8:26-31 chuqaʼ kixchʼon chi rij reʼ:
-
¿Achike nkʼatzin richin nqʼax chi qawäch ri nubʼij ri Biblia? (Tisikʼij ri versículos 30 chuqaʼ ri 31).
Ri achin aj Etiopía xrajoʼ chi xtoʼöx richin nqʼax pa ruwiʼ ri Ruchʼabʼäl ri Dios. Wakami kʼïy winaqiʼ nkajoʼ chi kʼo jun ntoʼon kichin richin nqʼax pa kiwiʼ ri nubʼij ri Biblia.
E KʼO JUJUN NKIBʼIJ REʼ: «Majun ruqʼij ta ri natijoj awiʼ chi rij ri Biblia».
-
¿Achike nabʼij rat chi rij reʼ? ¿Achike ruma nachʼöbʼ ke riʼ?
TQAKAMULUJ
Ri Biblia qʼij qʼij yojrutoʼ pa qakʼaslem, nuqʼalajrisaj nimaʼq taq kʼutunïk, nukuqubʼaʼ qakʼuʼx chuqaʼ nuyaʼ uxlanem pa qanima.
Ri xawetamaj
-
¿Achike chi naʼoj yeqïl chupam ri Biblia?
-
¿Achike chi kʼutunïk yerusöl ri Biblia?
-
¿Achike nawajoʼ rat chi ri Biblia nuqʼalajrisaj ta chawäch?
RICHIN NAWETAMAJ MÁS
Tawetamaj achike ruma ri naʼoj e kʼo chupam ri Biblia yojkitoʼ pa qakʼaslem wakami.
«Ri utziläj taq naʼoj e kʼo chupam ri Biblia man e kʼisel ta» (La Atalaya, núm. 1 2018)
Tatzʼetaʼ achike rubʼanik ri Biblia xutoʼ jun achin chi toq kʼa akʼwal na majun kiʼ ta rukʼuʼx.
Ri Biblia nuyaʼ utziläj taq naʼoj richin yojkikot rikʼin ri qa-familia, tawetamaj achike naʼoj reʼ.
«12 naʼoj richin yakikot pa awachoch» (¡Despertad!, núm. 2 2018)
Kʼïy winaqiʼ majun ketaman ta achike qas ri nqʼaton tzij pa ruwiʼ ri Ruwachʼulew, tawetamaj achike rubʼanik ri Biblia nuqʼalajrisaj ri naʼoj riʼ.
¿Achike ruma nqatijoj qiʼ chi rij ri Biblia? (Nïm raqän) (3:14)
