Ri Jehová * xukʼulubʼaʼ ri nabʼey kʼulaj winäq xkʼojeʼ chi Ruwachʼulew. Ri Biblia nubʼij chi rijaʼ xubʼän ri nabʼey ixöq, ke riʼ «xujäch kʼa chi re» ri achin. Ri Adán janila xkikot, xubʼij: «Reʼ kan [...] nubʼaqil nubʼochʼil wi yin» (Génesis 2:22, 23). Ri Jehová nrajoʼ chi yekikot ri kʼulan taq winäq.

Toq jun kʼulaj winäq yekʼuleʼ, rikʼin bʼaʼ nkibʼij chi ronojel ütz xtel chi kiwäch. Ja kʼa man qitzij ta, ruma stapeʼ janila nkajoʼ kiʼ ri kʼulaj, yekïl kʼayewal (1 Corintios 7:28). Chupam re wuj reʼ xtawïl kʼïy naʼoj ri yeruyaʼ ri Biblia. Ri naʼoj riʼ xkarutoʼ richin xtawïl kikotem rikʼin ri akʼulaj chuqaʼ ri awalkʼwal (Salmo 19:8-11).

RI NUBʼIJ RI BIBLIA: Ja ri achijil ri xtukʼwan bʼey pa jun jay (Efesios 5:23).

We rat ri at achijil, ri Jehová nrajoʼ chi nachajij ri awixjayil rikʼin ajowabʼäl (1 Pedro 3:7). Ri Jehová xubʼän ri ixöq richin yarutzʼaqatisaj, ruma riʼ nrajoʼ chi nayaʼ ruqʼij chuqaʼ nawajoʼ (Génesis 2:18). Ri awajowabʼäl chi rij ri awixjayil, kʼo ta chi nubʼän chawe chi ja ri rurayibʼal rijaʼ, ja riʼ ri nayaʼ más ruqʼij (Efesios 5:25-29).

We rat ri at ixjayil, ri Jehová nrajoʼ chi nayaʼ ruqʼij ri awachijil chuqaʼ natoʼ rikʼin ri samaj yaʼon pa ruwiʼ (1 Corintios 11:3; Efesios 5:33). We kʼo jun nunojij o nuchʼöbʼ nubʼän, tatoʼ rikʼin ronojel awanima (Colosenses 3:18). We xtabʼän riʼ, rijaʼ chuqaʼ ri Jehová janila xkekikot awikʼin (1 Pedro 3:1-6).

RI ÜTZ NABʼÄN:

• Takʼutuj chi re ri akʼulaj achike ütz nabʼän richin xkatok jun utziläj achijil o ixjayil. Tayaʼ axkïn chi re ri xtubʼij chuqaʼ takanoj rubʼanik chi xtabʼän riʼ

• Man tpoʼ akʼuʼx. Richin nawetamaj achike ri nqa chiwäch, nukʼwaj na ramaj

RI NUBʼIJ RI BIBLIA: Nkʼatzin nayaʼ rejqalem ri nrajoʼ ri akʼulaj (Filipenses 2:3, 4). Ütz anaʼoj tabʼanaʼ rikʼin. Toqa chawe chi ri Jehová nrajoʼ chi ri rusamajelaʼ ütz nkikʼwaj kiʼ chi kiwäch (2 Timoteo 2:24). Ruma riʼ, tatzʼetaʼ ri rubʼanik yachʼon apo. Ri Biblia nubʼij: «E kʼo winaqiʼ ri man nkipoqonaj ta yechʼon [...] xa yesokon achiʼel espada; ja kʼa ri [...] kʼo wi naʼoj kikʼin, ri chʼabʼäl ri yekibʼij kan yeʼaqʼoman» (Proverbios 12:18). Ri Jehová xkarutoʼ rikʼin ru-espíritu richin pa rubʼeyal xkachʼon (Gálatas 5:22, 23; Colosenses 4:6).

RI ÜTZ NABʼÄN:

• Toq kʼo jun achike nawajoʼ natzijoj rikʼin ri akʼulaj, nabʼey takʼutuj atoʼik chi re ri Jehová richin choj pa rubʼeyal xkatzijon rikʼin chuqaʼ xtayaʼ axkïn chi re ri nubʼij

• Tatzʼetaʼ ri achike xtabʼij chuqaʼ ri rubʼanik xtabʼij

RI NUBʼIJ RI BIBLIA: Toq jun kʼulaj winäq yekʼuleʼ «xa jun [...] xtkibʼän» (Mateo 19:5, CO). Stapeʼ xa jun nkibʼän, rijeʼ e kaʼiʼ winaqiʼ ri man junan ta rubʼanik yechʼobʼon. Ruma kʼa riʼ, rïx nkʼatzin niwetamaj junan nibʼän chi re ri ichʼobʼonïk chuqaʼ ri ninaʼ (Filipenses 2:2). Ri junan nibʼän chi re ri ichʼobʼonïk, xtkʼatzin chiwe toq kʼo jun achike xtiwajoʼ xtibʼän. Ri Biblia nubʼij: «Takʼutuj kʼa anaʼoj [...] richin chi ronojel ütz yeʼel chawäch» (Proverbios 20:18). Toq kʼo jun niwajoʼ nibʼän chuqaʼ chi ix kaʼiʼ najin nichʼöbʼ rij, tiyaʼ qʼij chi ja ri Biblia tbʼin achike xtibʼän (Proverbios 8:32, 33).

RI ÜTZ NABʼÄN:

• Ronojel tatzijoj chi re ri akʼulaj, tatzijoj ri achike nanaʼ

• Toq kʼo jun achike nawajoʼ nabʼän, nabʼey takʼulbʼej ri akʼulaj