Ri Jehová man ütz ta nutzʼët ri naqʼöl jun winäq (Malaquías 2:16). Ri man naqʼöl ta ri akʼulaj, kʼo ruqʼij pa kiwiʼ ri kʼulan taq winäq, ruma nubʼän chi nkikuqubʼaʼ más kikʼuʼx chi kiwäch. Ri nakuqubʼaʼ akʼuʼx chi rij ri akʼulaj, nubʼän chi ri ajowabʼäl nkʼiyïr más.

Wakami, xa bʼa akuchi natzʼët chi ri winaqiʼ nkikanoj rukʼexel ri kikʼulaj. Richin man nabʼän ta rat riʼ, kʼo kaʼiʼ naʼoj ri ütz yeʼasamajij.

RI NUBʼIJ RI BIBLIA: «[Tatzʼetaʼ] achike ri kan kʼo [más] kejqalem» (Filipenses 1:10). Ri akʼaslem rikʼin ri akʼulaj, jun chi ke ri kʼo más kejqalem. Ruma riʼ nkʼatzin nayaʼ pa nabʼey.

Ri Jehová nrajoʼ chi nayaʼ awanima chi rij ri akʼulaj chuqaʼ chi junan yixkikot pa ikʼaslem (Eclesiastés 9:9). Ri Jehová nrajoʼ chi jantapeʼ at kʼo rikʼin ri akʼulaj chuqaʼ nakanoj rubʼanik chi nkikot (1 Corintios 10:24). Ri akʼulaj tunaʼ chi nkʼatzin kʼo pe awikʼin chuqaʼ chi nayaʼ ruqʼij.

RI ÜTZ NABʼÄN:

• Tajamaʼ awäch richin yakʼojeʼ rikʼin ri akʼulaj, tawakʼaxaj ri nubʼij chuqaʼ tatzʼetaʼ achike ri nkʼatzin chi re

• Tkʼojeʼ pa awanima chi man ayon ta chik at kʼo

RI NUBʼIJ RI BIBLIA: «Xa bʼa achike kʼa achin ri nutzuʼ jun ixöq y kan nurayij ruwäch [...], pa ranima xa kan xmakun yan kʼa rikʼin ri jun ixöq riʼ» (Mateo 5:28, CO). Toq jun winäq man nrelesaj ta el pa rujolom jun tzʼiläj bʼanobʼäl, xa achiʼel ta najin chik nuqʼöl ri rukʼulaj.

Ri Jehová nubʼij chi nkʼatzin nqachajij ri qanima (Proverbios 4:23; Jeremías 17:9). Richin yojtikïr nqabʼän riʼ, kʼo chi nqachajij qiʼ rikʼin ri achike yeqatzʼët (Mateo 5:29, 30). Takʼamaʼ anaʼoj chi rij ri Job, rijaʼ xuyaʼ rikʼin ranima chi majubʼey xtutzʼët ta apo jun ixöq ruma jun tzʼil rayinïk (Job 31:1). Tayaʼ rikʼin awanima chi majun xkeʼatzʼët ta tzʼiläj taq bʼanobʼäl. Majubʼey tayaʼ qʼij chi nbʼe awanima chi rij jun winäq we man akʼulaj ta.

RI ÜTZ NABʼÄN:

• Tabʼanaʼ chi ri winaqiʼ tketamaj chi rat man nawajoʼ ta naqʼöl ri akʼulaj

• Tayaʼ rejqalem ri achike nunaʼ ri akʼulaj, ke riʼ mani chik yatzijon rikʼin jun winäq ri nutzʼët rijaʼ chi xa achiʼel ta nakanoj rukʼexel