Toq jun xtän chuqaʼ jun alaʼ yekʼuleʼ, nkitikirisaj el jun kʼakʼaʼ familia. Stapeʼ majubʼey xkeʼamestaj ta kan ri ateʼ atataʼ, wakami ri winäq más ruqʼij chawäch ja ri akʼulaj. Rikʼin bʼaʼ e kʼo awachʼalal kʼayew nubʼän nqʼax chi kiwäch riʼ. Ri naʼoj kʼo chupam ri Biblia yarutoʼ richin ütz nakʼwaj awiʼ kikʼin ri awachʼalal chuqaʼ rikʼin ri akʼulaj.

RI NUBʼIJ RI BIBLIA: «Tiyaʼ kiqʼij ri iteʼ itataʼ» (Efesios 6:2). Jampeʼ na ri ajunaʼ, nkʼatzin chi nayaʼ kiqʼij ri ateʼ atataʼ. Chuqaʼ man tamestaj chi ri akʼulaj kʼo chi nujäm ruramaj richin nkʼojeʼ kikʼin ri ruteʼ rutataʼ. «Ri ajowabʼäl manäq xochʼinïk» rikʼin. Ruma kʼa riʼ toq akʼulaj nbʼe kikʼin ri rachʼalal, mani nachʼöbʼ chi achiʼel ta xkarumalij kan (1 Corintios 13:4, CR; Gálatas 5:26).

RI ÜTZ NABʼÄN:

• Mani yeʼabʼij tzij achiʼel reʼ: «Ri awachʼalal jantapeʼ itzel yechʼon chwij» o «Ri ateʼ majubʼey nqa ta chuwäch ri achike ninbʼän»

• Takanoj rubʼanik chi nqʼax chawäch ri nunaʼ ri akʼulaj

RI NUBʼIJ RI BIBLIA: «Ri achin nuchʼär pe riʼ kikʼin ri ruteʼ rutataʼ, y rikʼin chik ri rixjayil xtukʼwaj wi riʼ, richin chi kan xtkichʼakulaj kiʼ chi e kaʼiʼ» (Génesis 2:24). Stapeʼ xakʼuleʼ yan, rikʼin bʼaʼ, ri ateʼ atataʼ kʼa kʼo pa kanima chi yatkichajij, ruma riʼ nkijuʼ kiʼ chi ikojöl rikʼin ri akʼulaj.

Chiwäch rïx kʼo wi ri achike xtiqʼät chi kiwäch ri iteʼ itataʼ chuqaʼ ri rubʼanik xtibʼij chi ke. Man nkʼatzin ta rikʼin oyowal nibʼij chi ke ri niwajoʼ (Proverbios 15:1). Ri naqasaj awiʼ, ri chʼuchʼuj awanima chuqaʼ ri yatoyobʼen, xkarutoʼ richin ütz xtakʼwaj awiʼ kikʼin ri awachʼalal chuqaʼ richin «xtikochʼolaʼ [...] iwiʼ» (Efesios 4:2, CO).

RI ÜTZ NABʼÄN:

• We itzel nanaʼ ruma ri iwachʼalal janila nkijuʼ kiʼ chi ikojöl, titzijoj rikʼin ri akʼulaj toq majun oyowal chiwäch

• Tiyaʼ chiwäch achike rubʼanik xtisöl ri kʼayewal riʼ