Achiʼel ri xatzʼët pe chupam re wuj reʼ, ri Biblia kʼo kʼïy naʼoj chupam ri yarutoʼ rat chuqaʼ ri awachʼalal. Ri Jehová nrajoʼ chi rïx yixkikot pa ikʼaslem. Chuqaʼ we rïx xtiyaʼ pa nabʼey ri ruyaʼik ruqʼij ri Dios, rijaʼ «xtuyaʼ kʼa pe ronojel ri nkʼatzin chiwe» (Mateo 6:33, CO). Ri Dios nrajoʼ yatok rachibʼil. Ruma riʼ takanoj rubʼanik richin nayaʼ más ruchuqʼaʼ ri awachibʼilanik rikʼin rijaʼ. Ri achibʼilanïk rikʼin Dios, ja riʼ ri bʼeyomäl más ruqʼij nkʼojeʼ awikʼin (Mateo 22:37, 38).

RI NUBʼIJ RI BIBLIA: «Yin xkinok kʼa tataʼaj iwichin rïx y rïx xkixok numiʼal nukʼajol, nchaʼ ri ajaw» (2 Corintios 6:18). Ri Jehová nrajoʼ yatok rachibʼil. Ri chʼonïk rikʼin rijaʼ jun rubʼanik richin yajel apo rikʼin. Ri Biblia nubʼij: «Jantapeʼ kixchʼon rikʼin ri Dios» (1 Tesalonicenses 5:17). Ri Jehová nqa chuwäch chi rat natzijoj ri akʼayewal chuqaʼ ronojel ri kʼo pa awanima chi re (Filipenses 4:6). We rat junan kikʼin ri awachʼalal yachʼon rikʼin ri Dios, rijeʼ xtkitzʼët chi ri Dios jun qitzij winäq chawäch rat.

Man xa xe ta kʼa yachʼon rikʼin ri Dios, chuqaʼ kʼo chi nawakʼaxaj rijaʼ. ¿Achike rubʼanik? Ja ri nasikʼij ri Biblia chuqaʼ ri qawuj ri kikʼwan naʼoj ri e kʼo chupam ri Biblia (Salmo 1:1, 2). Kachʼobʼon chi rij ri achike yeʼasikʼij (Salmo 77:11, 12). Chuqaʼ nkʼatzin yabʼe ri pa taq qamolojriʼïl (Salmo 122:1-4).

Jun chik rubʼanik nayaʼ más ruchuqʼaʼ ri awachibʼilanik rikʼin ri Jehová, ja ri natzijoj rijaʼ chi ke chʼaqa chik winaqiʼ. Toq más nabʼän riʼ, xtanaʼ chi más yajel apo rikʼin (Mateo 28:19, 20).

RI ÜTZ NABʼÄN:

• Tajamaʼ awäch richin yachʼon rikʼin ri Dios chuqaʼ qʼij qʼij tasikʼij ri Biblia

• Keʼatoʼ ri awachʼalal richin niyaʼ pa nabʼey ri nqa chuwäch ri Jehová man ja ta ri kʼastajinïk

RI NUBʼIJ RI BIBLIA: «Kixjel apo rikʼin ri Dios, y rijaʼ chuqaʼ xtjel pe iwikʼin» (Santiago 4:8). Tachaʼ jun qʼij chuqaʼ jun ramaj richin niyaʼ ruqʼij ri Jehová pa iwachoch (Génesis 18:19). Nkʼatzin chi qʼij qʼij nabʼän pa akʼaslem ri nqa chuwäch ri Dios. Chuqaʼ keʼatoʼ ri awachʼalal richin man nkiyaʼ ta kan ri Dios. Ri Biblia nubʼij chi tatzijoj ri Jehová pa ‹awachoch, pa taq bʼey, toq yakotzʼeʼ qa chuqaʼ toq yayakatäj el› (Deuteronomio 6:6, 7). Kan xtabʼän ta kʼa achiʼel xubʼän ri Josué, toq xubʼij: «Yin y ri e aj pa wachoch kan ja kʼa ri Jehová ri xtqasamajij» (Josué 24:15).

RI ÜTZ NABʼÄN:

• Tatzʼibʼaj ri achike xtakʼüt chi kiwäch ri awachʼalal. Ri tijonïk xtayaʼ ja ri natzʼët ri nkʼatzin pa kiwiʼ chi kijujunal rijeʼ