Stapeʼ akanon rubʼanik chi kʼo kikotem chiwäch rikʼin ri akʼulaj chuqaʼ awalkʼwal, kʼo mul pajalaʼ yeʼawïl kʼayewal ri nkibʼän chi npoʼ akʼuʼx (Eclesiastés 9:12). Toq nqïl jun kʼayewal, ri Dios yojrutoʼ richin yojqʼax chuwäch. We nisamajij pa ikʼaslem ri naʼoj yeruyaʼ ri Biblia, xkixtikïr xtiköchʼ jun nimaläj kʼayewal.

RI NUBʼIJ RI BIBLIA: «Tiyaʼ kʼa pa ruqʼaʼ ri Dios ronojel ri iqʼaxoʼn, ruma rijaʼ kan yixruchajij wi» (1 Pedro 5:7). Toqa chawe chi man rumak ta ri Dios ri nawïl kʼayewal (Job 34:12). We yajel apo rikʼin ri Jehová, rijaʼ xtutzʼët achike toʼïk ri más ütz xtuyaʼ chawe (Isaías 41:10). «Titzijoj chi re ronojel ri kʼo pa iwanima» (Salmo 62:8).

Jun chik toʼïk richin nakuqubʼaʼ akʼuʼx, ja ri nasikʼij qʼij qʼij ri Biblia. We nabʼän riʼ, xtanaʼ chi ri Jehová kan qitzij wi nukuqubʼaʼ akʼuʼx toq at kʼo pa tijoj poqonal (2 Corintios 1:3, 4; Romanos 15:4). Rijaʼ nubʼij chi xtuyaʼ «ri uxlanem ri npe rikʼin ri Dios» pa qanima (Filipenses 4:6, 7).

RI ÜTZ NABʼÄN:

• Takʼutuj atoʼik chi re ri Jehová richin chʼuchʼuj xtubʼän ri awanima chuqaʼ richin ütz rubʼanik yachʼobʼon

• Tatzʼetaʼ ri jalajöj rubʼanik rusolik ri akʼayewal, ke riʼ nabʼän ri más ütz nubʼän chawäch

RI NUBʼIJ BIBLIA: «Ri winäq ri kan nowinäq ranima, kan xtuqʼiʼ kʼa qʼanej ri naʼoj; [...] ri winaqiʼ e aj naʼoj, kan nqa wi chi kiwäch nketamaj más» (Proverbios 18:15). Keʼatzʼetaʼ chi kijujunal ri awachʼalal, ke riʼ nqʼalajin chawäch achike ri nkʼatzin chi ke. Katzijon kikʼin chuqaʼ tayaʼ axkïn chi re ri nkibʼij (Proverbios 20:5).

¿We nkäm jun winäq ri janila nawajoʼ? Mani yakʼïx yatoqʼ. Toqa chawe chi «ri Jesús xoqʼ» chuqaʼ (Juan 11:35; Eclesiastés 3:4). Xkarutoʼ chuqaʼ ri xkatuxlan chuqaʼ ri yawär kʼïy ramaj (Eclesiastés 4:6). Ke riʼ, man kan ta kʼayew xkaqʼax chuwäch ri akʼayewal.

RI ÜTZ NABʼÄN:

• Tukʼuluj chawe yatzijon rikʼin ri awixjayil chuqaʼ ri awalkʼwal. Ke riʼ, we niwïl jun kʼayewal, man kʼayew ta xtubʼän chi kiwäch xketzijon awikʼin

• Katzijon kikʼin winaqiʼ ri kiqʼasan chik jun kʼayewal achiʼel ri awilon rat

RI NUBʼIJ RI BIBLIA: «Ri winäq ri kan qitzij achibʼil, kan nrajoʼ wi ri rachibʼil stapeʼ kʼo pa rutzil o rukʼayewal» (Proverbios 17:17). Qitzij na wi, ri awachibʼil xtkajoʼ xkatkitoʼ, xa xe man ketaman ta achike rubʼanik. Ruma riʼ, tabʼij chi ke achike toʼïk nawajoʼ (Proverbios 12:25). Chuqaʼ takʼutuj atoʼik kikʼin ri winaqiʼ ri kʼo ketamabʼal chi rij ri Biblia. Ri atoʼik xtkiyaʼ rikʼin ri Biblia, xtubʼän chi xkatel chuwäch ri kʼayewal (Santiago 5:14).

We yeʼawachibʼilaj winaqiʼ ri qitzij kikuqubʼan kikʼuʼx chi rij ri Dios chuqaʼ chi rij ronojel rusujun rijaʼ, xtawïl ri toʼïk nkʼatzin chawe. Chuqaʼ xtukuqubʼaʼ akʼuʼx ri xkeʼatoʼ ri winaqiʼ ri poynäq kikʼuʼx. Tatzijoj ri Jehová chi ke chuqaʼ ri rusujun chi qawäch apo. Takanoj rubʼanik yeʼatoʼ ri chʼaqa chik winaqiʼ chuqaʼ mani najäch el awiʼ kikʼin ri winaqiʼ yatkajoʼ chuqaʼ nkajoʼ ri utzil pa awiʼ (Proverbios 18:1; 1 Corintios 15:58).

RI ÜTZ NABʼÄN:

• Kachʼon rikʼin jun awachibʼil chuqaʼ tayaʼ qʼij chi re chi yarutoʼ

• Jikïl rubʼanik kachʼon chuqaʼ kan ja ri toʼïk ri nkʼatzin chawe ja riʼ ri takʼutuj