Qonojel nqajoʼ ri mero richin nqayaʼ ri achike nkʼatzin chi ke ri qachʼalal pa qachoch (Proverbios 30:8). Qitzij na wi, ri mero «jun tobʼäl» pa qakʼaslem (Eclesiastés 7:12). Kʼo mul, kʼayew na wi nubʼän yachʼon chi rij rukusaxik ri mero. Man kʼa tayaʼ qʼij chi nuyaʼ kʼayewal chiwäch rikʼin ri akʼulaj (Efesios 4:32). Ütz nikuqubʼaʼ ikʼuʼx chiwij, ke riʼ niyaʼ chiwäch achike xtilöqʼ rikʼin ri imero.

RI NUBʼIJ RI BIBLIA: «Toq kʼo jun chiwe rïx ri nrajoʼ nubʼän jun jay nïm ¿man kami ntzʼuyeʼ ta jubʼaʼ richin nuchʼöbʼ jampeʼ xtkʼatzin chi re, y we kan kʼo ronojel rikʼin richin nukʼïs rubʼanik?» (Lucas 14:28). Janila rejqalem ri niyaʼ chiwäch achike rubʼanik xtikusaj ri imero (Amós 3:3, Traducción del Nuevo Mundo). Titzʼetaʼ achike nkʼatzin chi niloqʼ chuqaʼ jampeʼ mero ütz nikusaj (Proverbios 31:16). Ri kʼo mero awikʼin richin nalöqʼ xa bʼa achike na jun, man nel ta chi tzij chi kʼo chi nalöqʼ. Tikanoj rubʼanik richin man yixok ta pa kʼas, tikusaj xa xe ri kʼo iwikʼin (Proverbios 21:5; 22:7).

RI ÜTZ NABʼÄN:

• We kʼa kʼo bʼaʼ mero xtkʼojeʼ kan toq xtkʼis ri ikʼ, tiyaʼ chiwäch achike rubʼanik xtikusaj

• We man yixrubʼän ta ri imero, titzʼetaʼ achike rubʼanik niqasaj raqän ri iloqʼoj. Jun rubʼanik, ja ri xa xe niloqʼ ri kan qitzij nkʼatzin chiwe

RI NUBʼIJ RI BIBLIA: «Kixchʼon qitzij kikʼin ri iwachpochel» (Zacarías 8:16). Tabʼij chi re ri akʼulaj jampeʼ mero nachʼäk chuqaʼ ri nakusaj.

Majubʼey tabʼän jun nïm loqʼoj we man akʼulbʼen ta ri akʼulaj (Proverbios 20:18). Ri man niwewaj ta chiwäch ri rubʼanik nikusaj ri mero yixrutoʼ richin ütz nikʼwaj iwiʼ. Tayaʼ rikʼin awanima chi ri mero nachʼäk; man xa xe ta awichin rat, kichin chuqaʼ ri awalkʼwal chuqaʼ awixjayil (1 Timoteo 5:8).

RI ÜTZ NABʼÄN:

• Tiyaʼ chiwäch rikʼin ri akʼulaj jampeʼ mero ütz nikusaj chi ijujunal ri man nkʼatzin ta nikʼulbʼej iwiʼ chiwäch

• Mani niwoyobʼej chi kʼa xtukʼüt na pe riʼ jun kʼayewal chi rij ri mero kʼa riʼ xkixtzijon qa chi rij