Chupam ri 1 Corintios 6:1-8, ri apóstol Pablo xchʼon chi kij ri oyowal nbʼanatäj chi kiwäch ri nimanelaʼ ruma jun kʼayij. Nabʼey, xubʼij chi man nqa ta chuwäch chi e kʼo jujun nimanelaʼ aj Corinto ri xa «kikʼin qʼatöy taq tzij ri man kitzeqelibʼen ta ri Dios» yekisöl ri kikʼayewal (versículo 1). Chi rij riʼ, xubʼij chi ri oyowal kʼo chi nkanöx kisolik pa congregación, man chi kiwäch ta ri qʼatbʼäl taq tzij. Tqatzʼetaʼ chupam ri ruwuj achike ruma kʼo chi ja riʼ ri nqabʼän. Chuqaʼ tqatzʼetaʼ jampeʼ toq rikʼin bʼaʼ man xtqanimaj ta ri rutzij.

Toq kʼo oyowal nbʼanatäj chi kiwäch ri nimanelaʼ ruma jun kʼayij, ri Jehová nrajoʼ chi yechojmirisäx achiʼel rubʼanik nrajoʼ rijaʼ, man achiʼel ri nqajoʼ röj (Proverbios 14:12). Ri Jesús xubʼij chi más ütz aninäq nqasöl jun qakʼayewal, ke riʼ man nqayaʼ ta qʼij ninimïr (Mateo 5:23-26). E kʼo jujun nimanelaʼ ri man nkajoʼ ta pa ruchojmil nkisöl jun kʼayewal, ke riʼ yebʼe ri pa qʼatbʼäl taq tzij. Ri Pablo xubʼij chi toq yojsujun o kʼo «chʼojikïl» chi qawäch kʼo nukʼäm pe. ¿Achike ruma? Nabʼey, rikʼin bʼaʼ, ruma riʼ e kʼo xkechʼon itzel chi rij rubʼiʼ ri qa-Dios chuqaʼ chi rij ri congregación. Richin man nbʼanatäj ta riʼ kʼo chi nqabʼän ri nubʼij ri Pablo: «¿Man más ta kami ütz chi man jun ta nibʼän rïx toq kʼo ri nbʼïx y kʼo ri nbʼan chiwe?» (versículo 7).

Ri Pablo xubʼij chuqaʼ chi ri Tataʼixel rukanon rubʼanik chi yesolotäj ri kʼayewal. Nubʼij chi ri pa taq congregaciones e kʼo achiʼaʼ ri kan kʼo kinaʼoj ruma ri ketamabʼal chi rij ri Loqʼoläj Wuj. Qitzij na wi, ri ukʼwäy taq bʼey yetikïr ‹yekichojmirisaj› ri jalajöj taq kʼayewal yebʼanatäj chi qawäch (versículos 3-5). Ri Jesús xubʼij chuqaʼ chi richin yesolotäj ri nimaʼq taq oyowal —achiʼel ri qʼabʼan taq tzij o ri qʼoloj— kʼo oxiʼ xak nayaʼ. Ri nabʼey, yachʼon rikʼin ri winäq achoj rikʼin xabʼän oyowal richin nichojmirisaj pa iyonil ri ikʼayewal. We rikʼin riʼ man xsolotäj ta, ri rukaʼn xak; yachʼon chik rikʼin ri winäq chuwäch jun o e  kaʼiʼ winäq. We nixta rikʼin riʼ, ri rukʼisibʼäl; ja ri yabʼe kikʼin ri ukʼwäy taq bʼey pa congregación (Mateo 18:15-17).

Ri ukʼwäy taq bʼey man nkʼatzin ta chi kan e abogados o e yaʼöl taq naʼoj chi kij kʼayij, chuqaʼ man tkibʼän ke riʼ chi re ri kinaʼoj. Chuqaʼ rijeʼ man xtkibʼij ta achike kʼo chi nbʼan richin nsolotäj jun kʼayewal chi rij kʼayij chi kikojöl kaʼiʼ winäq. Ri kisamaj rijeʼ ja ri yekitoʼ chi e kaʼiʼ richin nkisamajij ri naʼoj nuyaʼ ri Loqʼoläj Wuj. Ke riʼ pa ruchojmil nkisöl ri kikʼayewal. We ri kʼayewal kan nïm, rikʼin bʼaʼ, xtkikʼulbʼej na ri ukʼwäy bʼey richin circuito o ri sucursal kichin ri ruqʼalajrisanelaʼ ri Jehová. Wakami, kʼo kʼa jujun kʼayewal ri akuchi (o apeʼ) man xkojtikïr ta xtqasamajij ri naʼoj xeruyaʼ ri Pablo. Tqatzʼetaʼ kʼïy chi ke.

Ri nakʼwaj pa qʼatbʼäl tzij jun kʼayewal man ronojel ta mul itzel. Rikʼin bʼaʼ yabʼe ruma ja riʼ rubʼanik chʼajchʼöj nubʼän kan rusolïk jun kʼayewal. Achiʼel toq nawajoʼ nachüp ruwäch ri akʼulubʼik, richin nyaʼöx pa awiʼ kichajixik ri awal o awalkʼwal, richin nbʼan ruchojmil ri pwäq xtyaʼöx richin kilixik ri awal, richin ntoj jun seguro chawe, richin netamäx chi chawe rat xtyaʼöx jun pwäq ri xttzolïx o richin nbʼan ruchojmil jun wujil. Chuqaʼ rikʼin bʼaʼ richin xtabʼeqʼataʼ kan jun sujunïk ri bʼanon chawij. *

Ri nimanel ri nbʼe pa qʼatbʼäl tzij kuma ri kʼayewal riʼ man nuqʼäj ta ri tzij xutzʼibʼaj ri Pablo, we man richin ta oyowal o chʼaʼoj ri nubʼän. * Man kʼa tqamestaj ri kʼo chi nqayaʼ rejqalem: nqachʼajchʼojrisaj rubʼiʼ ri Jehová chuqaʼ ri ütz nqakʼwaj qiʼ ri pa congregación. Ri qetal ri oj rutzeqelibʼey ri Cristo, pa ruwiʼ ronojel, ja ri ajowabʼäl. Jun ajowabʼäl ri «man nubʼän ta chi xa xe röj nqachʼöbʼ [o nqanaʼ] qa qiʼ» (1 Corintios 13:4, 5; Juan 13:34, 35).