Chi ke konojel ri yeʼajowan ri Jehová:

Ri Jesús xubʼij: «[Rïx] xtiwetamaj [...] ri qitzij, y riʼ xtubʼän chiwe chi yixtotäj» (Juan 8:32). ¡Janila nkikuqubʼaʼ qakʼuʼx re tzij reʼ! Stapeʼ oj kʼo pa «rukʼisibʼäl taq qʼij» y ruyon tzʼukun taq tzij chuqaʼ itzelal e kʼo, röj yojtikïr nqetamaj ri qitzij (2 Timoteo 3:1). Noqa na wi pa qajolom ri kikotem xqanaʼ toq xqetamaj ri qitzij chupam ri Loqʼoläj Wuj. ¡Janila xojkikot!

Man xa xe ta kʼa nqetamaj ri qitzij chuqaʼ nqatzijoj, chuqaʼ kʼo chi nqasamajij pa qakʼaslem. Nel chi tzij, kʼo chi yojkʼojeʼ pa rajowabʼäl ri Dios. ¿Achike rubʼanik nqabʼän riʼ? Ri Jesús xuyaʼ ruqʼalajrisaxik ri rukʼisibʼäl aqʼaʼ chi re ri rukʼaslem, toq xubʼij: «We rïx nibʼän ri yenbʼij chiwe, kan xkixkʼaseʼ kʼa rikʼin ri wajowabʼäl, achiʼel rïn ri kan ninbʼän ri yerubʼij ri nataʼ, y ruma riʼ in kʼäs rikʼin ri rajowabʼäl rijaʼ» (Juan 15:10).

¿Nqʼax chi qawäch achike rubʼanik xtikïr xkʼojeʼ ri Jesús pa rajowabʼäl ri Rutataʼ? Xubʼän ri nkibʼij ri rupixaʼ. Kʼo ta chi ja riʼ ri nqabʼän röj. Richin yojkʼojeʼ pa rajowabʼäl ri Dios, kʼo chi jantapeʼ (o chi jumul) nqabʼän ri nubʼij ri qitzij. Chupam ri aqʼaʼ riʼ ri Jesús xubʼij chuqaʼ: «We rïx kan xiwetamaj [...] ronojel reʼ y kan nibʼän [...], kan jebʼël kʼa ruwaʼiqʼij» (Juan 13:17, CO).

Kan janila kʼa nqarayibʼej chi re wuj reʼ qonojel ta yojrutoʼ richin man nqayaʼ ta kan rusamajixik ri qitzij, ke riʼ yojkʼojeʼ ri pa ‹rajowabʼäl ri Dios, rokik [...] qoyobʼen apo ri kʼaslem man kʼisel ta› (Judas 21, TNM).