Jun chi ke ri kan nqʼaxon awikʼin nbʼanatäj ja ri nawakʼaxaj chi jun awachʼalal o jun awachibʼil kʼo chi xtelesäx kan ri pa congregación ruma man ntzolin ta pe rukʼuʼx chi re ri rumak. Ri Loqʼoläj Wuj nubʼij achike xtqabʼän toq nbʼanatäj riʼ. Ri xtqabʼän o manäq ri nubʼij, nuqʼalajrisaj jarupeʼ ri qajowabʼäl chi rij ri Jehová chuqaʼ we yojniman tzij o manäq. * Ruma riʼ tqatzʼetaʼ kʼïy chi ke ri nkikʼüt pe kiʼ.

¿La ütz xkojchʼon rikʼin jun winäq ri xelesäx kan pa congregación? «Man tiwachibʼilaj jun achin o jun ixöq ri xa nkikanolaʼ kiʼ richin yemakun, stapeʼ nkibʼij chi kan e qachʼalal. Y ke riʼ chuqaʼ ri yeʼajowan chi ronojel kikʼin ta rijeʼ kʼo wi, ri kʼa nkiyaʼ na kiqʼij chʼaqa chik dios, ri yeyoqʼon, ri yeqʼabʼär, y ri yeʼelëqʼ. Re winaqiʼ reʼ, ni man rukʼamon ta richin yixwaʼ kikʼin» (1 Corintios 5:11). Ri Loqʼoläj Wuj nubʼij chuqaʼ: «Xa bʼa achike winäq ri nel el chupam ri qitzij [...] man kʼa tikʼül ta pa iwachoch [...]. Ruma [...] kan xtiwejqalej chuqaʼ rïx ri itzelal ri yerubʼanalaʼ» (2 Juan 9-11, CO). Ruma riʼ, jun winäq ri xa elesan kan pa congregación, man xtqachibʼilaj ta chik chuqaʼ man xtqatzijoj ta chik ri Loqʼoläj Wuj rikʼin. Ri vLa Atalaya, 15 de noviembre, junaʼ 1981, ruxaq 19, nubʼij chi «xa rikʼin nabʼij ‹¡Seqër!› chi re jun winäq, nubʼän chi xkatzijon qa rikʼin chuqaʼ rikʼin bʼaʼ yatok rachibʼil. ¿Nqajoʼ röj nqabʼän ke riʼ rikʼin jun winäq ri elesan kan pa congregación?».

¿Nel chi tzij chi kan majun chik tzij (o kan luwaloʼ) nqabʼän rikʼin? Jaʼ, kʼïy ruma. Nabʼey, man nqajoʼ ta nqaxolqʼotij rutzij ri Jehová. Janila nqajoʼ ruma riʼ jantapeʼ (o chi jumul) nqajoʼ nqabʼän ri nubʼij, stapeʼ kʼayew nubʼän chi qawäch. Chuqaʼ qetaman chi rijaʼ pa ruchojmil nsamäj chuqaʼ yojrajoʼ. Ri rupixaʼ xa utzil nkikʼäm pe pa qawiʼ (Isaías 48:17; 1 Juan 5:3). Rukaʼn, ri makunel ri man tzolojnäq ta pe rukʼuʼx yerutzäq ri chʼaqa  chik qachʼalal. Ri man yojchʼon ta chik rikʼin, jun rubʼanik nqachajij qiʼ chuqaʼ ri qachibʼilanïk rikʼin ri Jehová. Chuqaʼ ke riʼ yojtoʼon chi chʼajchʼöj ri congregación chuqaʼ chi majun achike ta nchʼon pe itzel chi rij (1 Corintios 5:6, 7). Rox, nukʼäm pe utzil pa ruwiʼ ri makunel. ¿Achike rubʼanik? We nqabʼän ri nubʼij ri Loqʼoläj Wuj chuqaʼ yojniman chuwäch ri xuchʼöbʼ o xunojij ri comité judicial, rikʼin bʼaʼ xtubʼän chi ri makunel xtitzolin pe rukʼuʼx chuqaʼ xtukʼäm kitoʼik ri ukʼwäy taq bʼey. Chuqaʼ rikʼin bʼaʼ xtubʼän chi xtuqasaj riʼ, ke riʼ xtujäl ri runaʼoj. Chuqaʼ toq xtutzʼët chi ri rachʼalal man junan ta chik ri kinaʼoj rikʼin, rikʼin bʼaʼ, ‹xtoqa chukʼuʼx› chi man ütz ta ri rubʼanon chuqaʼ chi xtukanoj rubʼanik xttzolin chik rikʼin ri Jehová (Lucas 15:17, CR).

¿We kan jun qachʼalal pa qachoch ri nelesäx kan? Toq jun qachʼalal pa qachoch ri xtelesäx kan xtqanaʼ chi xtitojtobʼëx ri qajowabʼäl chi rij ri Jehová. ¿Achike qanaʼoj xtqabʼän rikʼin ri qachʼalal? Man yojtikïr ta yojchʼon chi rij ronojel ri nukʼäm pe, ruma riʼ xa xe xkojchʼon chi kij kaʼiʼ.

Kʼo mul, ri winäq nelesäx kan pa congregación kan kikʼin ri rachʼalal kʼo qa. Ri nelesäx kan jun winäq pa congregación, man nel ta chi tzij chi ri rachʼalal pa rachoch man e rachʼalal ta chik. Ruma riʼ man xtkiqʼät ta chuwäch xtchʼon kikʼin o xkerubʼän apo ri samaj pa jay. Ja kʼa ruma man nkajoʼ ta nkiqʼäj rutzij ri Jehová, man xtkitzijoj ta chik rikʼin ri achike yebʼanatäj ri pa rutinamit ri Jehová. Rijeʼ man junan ta chik kiwäch ri pa ruchʼabʼäl ri Dios. Rikʼin bʼaʼ xtkʼojeʼ apo toq xtkiyaʼ ruqʼij ri Dios pa kachoch, ja kʼa man xtchʼon ta apo. ¿We kʼa majani rujunaʼ ta ri qachʼalal ri xelesäx kan ri pa congregación? Toq ke riʼ, ri teʼej tataʼaj ütz nkiyaʼ na rutijonïk ruma pa kiwiʼ rijeʼ kʼo ri rupixabʼanik (Proverbios 6:20-22; 29:17). *

¿We ri nelesäx kan pa congregación man junan ta chik jay kʼo kikʼin ri rachʼalal? Toq ke riʼ, ri nimanelaʼ xa xe xkechʼon rikʼin toq nkʼatzin. Majun xtkikanoj ta rubʼanik chi xtkimöl kiʼ  rikʼin. Ruma ri kajowabʼäl chi rij ri Jehová chuqaʼ ri rutinamit, xtkibʼän ri nubʼij ri Loqʼoläj Wuj chi rij ri nelesäx kan jun winäq. We xketaqen tzij, rikʼin bʼaʼ ja riʼ xtbʼanon chi xttzolin pe rukʼuʼx ri makunel (Hebreos 12:11). *