Chupam konojel ri religiones yeʼawïl winaqiʼ ri choj kanima. Kʼo jun utziläj rutzijol chi ke ri winaqiʼ riʼ, chi ri Dios nuyaʼ kiqʼij chuqaʼ nrajoʼ ri ütz pa kiwiʼ. Ja kʼa, e kʼo kikusan ri religiones richin nbʼan itzelal (2 Corintios 4:3, 4; 11:13-15). E kʼo religiones kijuʼun kiʼ kikʼin ri e bʼanöy nimaʼq taq kamisanïk, oyowal chuqaʼ kitzelaxik akʼwalaʼ. Ronojel riʼ rumalin kikʼuʼx ri choj kanima. Tasikʼij Mateo 24:3-5, 11, 12.

Ri qitzij religión nuyaʼ ruqʼij ri Jehová, ja kʼa ri man e qitzij ta, xa nkiqasaj ruqʼij. Chuqaʼ nkikʼüt tzʼukun taq naʼoj chi rij ri Dios, chi kij ri kaminaqiʼ, yekikʼüt chuqaʼ chʼaqa chik naʼoj ri man yerusikʼij ta ri Biblia. Ri Jehová nrajoʼ kʼa chi ri winaqiʼ nketamaj ri qitzij chi rij rijaʼ. Tasikʼij Ezequiel 18:4; 1 Timoteo 2:3-5.

Ri Dios man nqʼolotäj ta pa kiqʼaʼ ri winaqiʼ ri nkibʼij chi nkajoʼ rijaʼ ja kʼa najin nkiyaʼ ruqʼij ri ruqʼatbʼäl tzij ri Satanás (Santiago 4:4). Konojel ri man e qitzij ta religiones «nimaläj tinamït Babilonia» nubʼij ri Biblia chi ke. Ri Babilonia rubʼiʼ jun ojer tinamït ri akuchi xtikïr pe ri man qitzij ta religión toq xqʼax ri Kamïk Jöbʼ pa ruqʼij kan ri Noé. Xa bʼaʼ chik apo, ri Dios xtukʼïs kiwäch ri religiones yeqʼolon chuqaʼ yeʼitzelan ri winaqiʼ. Tasikʼij Apocalipsis 17:1, 2, 5, 16, 17; 18:8.

Ri Dios e kʼo pa ranima ri utziläj taq winäq e kʼo chupam ri man e qitzij ta religiones, ruma riʼ najin yerumöl. ¿Achike rubʼanik nubʼän chi ke? Nukʼüt ri qitzij chi kiwäch. Tasikʼij Miqueas 4:2, 5.

Ri Jehová yerajoʼ ri winaqiʼ ri nkajoʼ nketamaj ri qitzij chuqaʼ nkibʼän ri ütz. Ruma riʼ nubʼij chi ke chi keʼel pe chupam ri man qitzij ta religión. We rijeʼ qitzij nkajoʼ ri Dios, xtkijäl rubʼanik ri kikʼaslem richin xtkibʼän ri nqa chuwäch rijaʼ. Tasikʼij Apocalipsis 18:4.

Chupam ri nabʼey 100 taq junaʼ, kʼïy winaqiʼ ri choj kanima xekikot xkikʼül ri naʼoj xekikʼüt ri apóstoles chi kiwäch. Ri Jehová xukʼüt jun kʼakʼaʼ rubʼanik kʼaslem chi kiwäch ri winaqiʼ riʼ, jun kʼaslem ri nuyaʼ kikotem, nubʼän chawe chi kʼo ruma at kʼäs chuqaʼ kʼo awoyobʼen apo. Achiʼel rijeʼ, röj chuqaʼ kʼo chi nqabʼän pa qakʼaslem ri naʼoj yeruyaʼ ri Biblia, ntel chi tzij nqayaʼ pa nabʼey ri Jehová. Tasikʼij 1 Tesalonicenses 1:8, 9; 2:13.

Ri Jehová yerukʼül ri winaqiʼ nkiyaʼ kan ri man qitzij ta religión richin yekʼojeʼ chupam ri qitzij. Konojel rijeʼ ütz nkikʼwaj kiʼ rikʼin ri Jehová, yekʼojeʼ chupam jun nimaläj familia chuqaʼ yetikïr nkïl ri kʼaslem man kʼisel ta. ¿Narayibʼej rat ri jun rubʼanik kʼaslem riʼ? Tasikʼij Marcos 10:29, 30; 2 Corintios 6:17, 18.

Toq ri Jehová xtukʼïs kiwäch ri religiones ri man e qitzij ta xtkʼojeʼ uxlanem chi Ruwachʼulew. Ke riʼ ri religiones ri man e qitzij ta majun chik xkekiqʼol ta ri winaqiʼ chuqaʼ majun chik xkekijäch ta. Konojel ri winaqiʼ xa xe ri Jehová, ri qitzij Dios, xtkiyaʼ ruqʼij. ¿Pejaʼ chi reʼ jun utziläj rutzijol? Tasikʼij Apocalipsis 18:20, 21; 21:3, 4.