TANAJ 8
¿Achike ruma ri Dios ruyaʼon qʼij chi kʼo ri tijoj poqonal?
1. ¿Achike rubʼanik xtikïr pe ri itzelal?
Ri ruyaʼon qʼij ri Dios chi ri winaqiʼ nkiqʼät qa tzij pa kiwiʼ rukʼutun chi man yetikïr ta nkisöl ri kʼayewal
Ri itzelal xtikïr pe toq ri Satanás xubʼän ri nabʼey tzʼukun tzij. Rijaʼ jun wi utziläj chuqaʼ tzʼaqät ángel, ja kʼa «man kʼa xkʼojeʼ ta chik chupam ri qitzij» (Juan 8:44). Xuyaʼ qʼij chi xwachin pe pa ranima ri nyaʼöx ruqʼij. Qetaman chi xa xe ri Dios rukʼamon nyaʼöx ruqʼij. Rikʼin jun tzʼukun tzij xubʼän chi ri Eva, ri nabʼey ixöq, xunimaj apo rutzij rijaʼ, pa rukʼexel rutzij ri Dios. Ri Adán junan xubʼän qa rikʼin ri rixjayil, xeqʼajon tzij. Ri xkibʼän xukʼäm pe qʼaxomal chuqaʼ kamïk. Tasikʼij Génesis 3:1-6, 19.
Ri Satanás kan xa xe toq xubʼän chi ri Eva xuqʼäj rutzij ri Dios, xutikirisaj el jun oyowal. Ruma ri Jehová nimaläj pa ruwiʼ ronojel, rukʼamon chi xa xe rijaʼ nqʼaton tzij. Ri Satanás man xrajoʼ ta xuyaʼ ruqʼij ri ruqʼatbʼäl tzij ri Jehová. Ri kan konojel bʼaʼ winaqiʼ xkiyaʼ kan ruqʼatbʼäl tzij ri Dios xubʼän chi ja ri Satanás «chapayon ri Ruwachʼulew» wakami. Tasikʼij Juan 14:30; 1 Juan 5:19.
2. ¿La man jaʼ ta xubʼän chi re rusamaj ri Dios?
Ri rusamaj ri Jehová tzʼaqät rubʼanon chi ke. Ri nabʼey taq winäq chuqaʼ ri ángeles jebʼël wi yetikïr nkibʼän ronojel ri nubʼij ri Jehová (Deuteronomio 32:4, 5). Rijaʼ xubʼän chi qe chi yojtikïr nqachaʼ nqabʼän ri ütz o ri man ütz ta. Ri ke riʼ rubʼanon chi qe, nubʼän chi yojtikïr nqabʼän rikʼin ajowabʼäl ri nubʼij rijaʼ. Tasikʼij Santiago 1:13-15; 1 Juan 5:3.
3. ¿Achike ruma ri Dios ruyaʼon qʼij chi kʼo ri tijoj poqonal?
Ri Jehová xa xe jubʼaʼ ramaj ruyaʼon qʼij chi ri winaqiʼ kʼa kipabʼan na pe kiʼ chuwäch ri ruqʼatbʼäl tzij. ¿Achike ruma? Richin nqʼalajin chi ri qʼatbʼäl taq tzij ri man rukʼwan ta kibʼey rijaʼ, man yetikïr ta nkiyaʼ ri nkajoʼ ri winaqiʼ (Eclesiastés 7:29; 8:9). Rikʼin ri 6.000 junaʼ e kʼo pe ri winaqiʼ chi Ruwachʼulew xqʼalajin yan chi ri qʼatöy taq tzij man yetikïr ta nkikʼäm el ri itzelal, ri nimaʼq taq oyowal chuqaʼ ri yabʼil. Tasikʼij Jeremías 10:23; Romanos 9:17.
Ri nqayaʼ qʼij chi ja ri Dios nqʼaton tzij pa qawiʼ kʼo utzil xtqïl (Isaías 48:17, 18). Xa bʼaʼ chik apo, ri Jehová xtukʼïs kiwäch ri qʼatöy taq tzij. Ke riʼ xa xe ri nkiyaʼ ruqʼij ri ruqʼatbʼäl tzij rijaʼ xkekʼojeʼ kan (Isaías 11:9). Tasikʼij Daniel 2:44.
4. ¿Achike utzil ruyaʼon pa qawiʼ ri nkochʼon ri Dios?
Ri Satanás rubʼin chi röj nqayaʼ ruqʼij ri Dios ruma ütz oj bʼenäq pa qakʼaslem. Ruma rukochʼonïk ri Jehová, rikʼin ri qabʼanobʼal nqakʼüt chi ri Satanás jun tzʼukunel tzij chuqaʼ chi ja ri ruqʼatbʼäl tzij ri Dios ri nqajoʼ y man ja ta ri kiqʼatbʼäl tzij ri winaqiʼ. Tasikʼij Job 1:8-12; Proverbios 27:11.
5. ¿Achike rubʼanik nqakʼüt chi nqajoʼ ruqʼatbʼäl tzij ri Dios?
Rikʼin ri yeqabʼän nqakʼüt chi nqajoʼ o manäq ri ruqʼatbʼäl tzij ri Dios
Nabʼey, kʼo chi nqetamaj achike rubʼanik nrajoʼ rijaʼ nqayaʼ ruqʼij chuqaʼ nqakanoj ri qitzij religión. Ri qitzij religión chupam ri Biblia nukʼäm el ri nukʼüt (Juan 4:23). We röj nqakʼäm qanaʼoj chi rij ri Jesús, man xtqajuʼ ta qiʼ pa política nixta pa taq oyowal, ke riʼ xtqakʼüt chi man nqajoʼ ta ri ruqʼatbʼäl tzij ri Satanás. Tasikʼij Juan 17:14.
Ri Satanás nubʼän chi ri winaqiʼ yekibʼän itzelal. Ri man yeqabʼän ta ri bʼanobʼäl riʼ, rikʼin bʼaʼ, ri qachibʼil o ri qachʼalal xkojkiyoqʼ o xkojkiyaʼ pa kʼayewal (1 Pedro 4:3, 4). We ja riʼ xtbʼan chi qe, keqakanoj ri yeʼajowan ri Jehová chuqaʼ tqabʼanaʼ ri nkibʼij ri rupixaʼ. Ke riʼ xtqakʼüt chi ri Satanás xa xtzʼukun tzij toq xubʼij chi majun winäq ta xtyaʼon ruqʼij ri Dios toq kʼo pa kʼayewal. Tasikʼij 1 Corintios 6:9, 10; 15:33.
Ri rajowabʼäl ri Jehová nukʼüt chi xtukʼïs ri tijoj poqonal chuqaʼ ri itzelal. Ri kiyaʼon pa kanima chi ja riʼ ri xtbʼanatäj, xkekʼojeʼ jantapeʼ chi Ruwachʼulew. Tasikʼij Juan 3:16.
