TANAJ 10
¿Achike rubʼanik nawetamaj achike ri qitzij religión?
1. ¿La xa xe jun qitzij religión kʼo?
«Tichajij iwiʼ chi kiwäch ri man e qitzij ta qʼalajrisanelaʼ» (MATEO 7:15).
Ri Jesús chuqaʼ ri rutzeqelibʼey xkisamajij ri qitzij religión. Ri Jesús xujunumaj ri qitzij religión rikʼin jun bʼey ri yarukʼwaj chupam ri kʼaslem man kʼisel ta, chuqaʼ xubʼij chi xa e bʼaʼ ok yeʼilon (Mateo 7:14). Ri Dios xa xe nqa chuwäch ri religión ri nuyaʼ ruqʼij rijaʼ achiʼel nubʼij ri Biblia. Ri yebʼanon riʼ e kʼo chupam ri qitzij religión. Tasikʼij Juan 4:23, 24; 14:6; Efesios 4:4, 5.
2. ¿Achike rubʼin pe ri Jesús chi kij ri man e qitzij taq nimanelaʼ?
«Nkibʼij chi ketaman ruwäch ri Dios, ja kʼa [...] man qitzij ta, ruma ri itzel ri nkibʼän» (TITO 1:16).
Ri Jesús xubʼij chi xkekʼojeʼ winaqiʼ ri xtkitzelaj ri naʼoj nukʼüt ri qitzij religión. Ri xubʼij, qitzij xbʼanatäj. Kʼïy religiones nkibʼij chi nkisamajij ri religión ri xukʼüt kan ri Jesús chuqaʼ chi kʼo ri qitzij kikʼin. Xa yekiqʼol kʼa ri winaqiʼ. Wakami yojtikïr nqetamaj achike ri qitzij religión ruma ri kibʼanobʼal ri winaqiʼ e kʼo chupam. Tasikʼij Mateo 7:13-23.
3. ¿Achike winaqiʼ yesamajin ri qitzij religión?
Keqatzʼetaʼ woʼoʼ ketal:
-
Chi kiwäch rijeʼ ri Biblia kan Ruchʼabʼäl wi ri Dios. Pa rukʼexel nkinimaj apo kinaʼoj ri winaqiʼ, ri qitzij taq nimanelaʼ nkibʼän ri nubʼij ri Biblia (Mateo 15:7-9). Chuqaʼ nkibʼän ri nkitzijoj. Tasikʼij Juan 17:17; 2 Timoteo 3:16, 17.
-
Nkiyaʼ ruqʼij rubʼiʼ ri Dios, Jehová. Ri Jesús xutzijoj rubʼiʼ ri Rutataʼ, ja riʼ rubʼanik xuyaʼ ruqʼij ri bʼiʼaj riʼ. Chuqaʼ xutzijoj ri Rutataʼ chi ke ri winaqiʼ chuqaʼ xukʼüt chi kiwäch achike rubʼanik nkikʼutuj chi re ri Rutataʼ chi tnimirsäx ri rubʼiʼ (Mateo 6:9). ¿Achike religión nkʼutun rubʼiʼ ri Dios pa atinamit? Tasikʼij Juan 17:26; Romanos 10:13, 14.
-
Nkitzijoj ri ru-Reino ri Dios. Ri Jesús xtaq pe chi Ruwachʼulew richin xutzijoj ri Reino, ri xtsolon ri kʼayewal pa kiwiʼ ri winaqiʼ. Xuyaʼ kan rutzijoxik kʼa toq xkäm na (Lucas 4:43; 8:1; 23:42, 43). We kʼo jun winäq napon awikʼin y nutzijoj ri ru-Reino ri Dios chawäch, ¿achike ta kʼa ru-religión ri winäq riʼ xtabʼij rat? Tasikʼij Mateo 24:14.
-
Man nkijuʼ ta kiʼ rikʼin ri achike yekibʼän ri winaqiʼ. Ri rutzeqelibʼey ri Jesús man nkijuʼ ta kiʼ pa política, chuqaʼ man e bʼenäq ta kikʼin ri winaqiʼ nkibʼän protestas toq kʼo jun man nqa ta chi kiwäch (Juan 17:16; 18:36). Chuqaʼ man nkikʼäm ta apo kinaʼoj chuqaʼ ri kibʼanobʼal ri winaqiʼ. Tasikʼij Santiago 4:4.
-
Kʼo ajowabʼäl chi kiwäch. Ri Biblia rukʼutun chi kiwäch chi xa bʼa achike na rutinamit jun winäq kʼo chi nkiyaʼ ruqʼij. Ri man qitzij ta religiones e toynäq el chi ke ri oyowal yebʼanatäj, ri qitzij taq nimanelaʼ man nkibʼän ta riʼ (Miqueas 4:1-3). Pa rukʼexel, rijeʼ yetoʼon el, kiyaʼon kiramaj chuqaʼ ri achike kʼo kikʼin richin yekitoʼ chuqaʼ nkikuqubʼaʼ kikʼuʼx ri winaqiʼ. Tasikʼij Juan 13:34, 35; 1 Juan 4:20.
4. ¿La nqʼalajin achike ri qitzij religión?
¿Achike religión chupam ri Biblia rukʼamon el ri nukʼüt, nuyaʼ ruqʼij ri rubʼiʼ ri Dios chuqaʼ nutzijoj chi xa xe ri ru-Reino xtusöl kikʼayewal ri winaqiʼ? ¿Achike religión qitzij nkajoʼ kiʼ ri ruwinaq chuqaʼ man yebʼe ta pa taq oyowal? ¿Achike religión nbʼanon riʼ nabʼij rat? Tasikʼij 1 Juan 3:10-12.
