Ri Qatataʼ Jehová, ri xojrubʼän, man xa bʼaʼ ta retamabʼal chi qawäch röj winaqiʼ. Chuqaʼ yojrajoʼ, nrajoʼ chi ütz yojbʼe pa qakʼaslem. Rijaʼ man xubʼän ta chi qe chi qayon nqakʼwaj qabʼey (Jeremías 10:23). Achiʼel ri koʼöl taq akʼwalaʼ nkʼatzin chi ja ri kiteʼ kitataʼ nukʼwan kichin, röj winaqiʼ nkʼatzin chi ja ri Dios nukʼwan qabʼey (Isaías 48:17, 18). Ri naʼoj yeruyaʼ ri Biblia e rusipanïk ri Dios. Tasikʼij 2 Timoteo 3:16.

Ri pixaʼ chuqaʼ ri naʼoj yeruyaʼ ri Jehová nkikʼüt chi qawäch achike rubʼanik ütz yojbʼe pa qakʼaslem chuqaʼ nkikʼüt ri rubʼanik nqïl urtusanïk chi qawäch apo. Ruma ja ri Jehová oj bʼanayon, kʼo ta chi nqayaʼ qʼij chi nukʼwaj qabʼey. Tasikʼij Salmo 19:7, 11; Apocalipsis 4:11.

E kʼo naʼoj chupam ri Biblia ri nkikʼüt chi qawäch achike nrajoʼ ri Dios chi nqabʼän toq nukʼüt pe riʼ xa bʼa achike kʼayewal. Chuqaʼ e kʼo ri kan jumul nkibʼij pe achike nqabʼän chi rij jun kʼayewal (Deuteronomio 22:8). Richin nqʼax chi qawäch achike rubʼanik nqasamajij pa qakʼaslem jujun naʼoj nuyaʼ ri Biblia, kʼo chi nqakusaj ri qanaʼoj (Proverbios 2:10-12). Jun tzʼetbʼäl chi rij reʼ. Ri Biblia nubʼij chi ri kʼaslem jun rusipanïk ri Dios. Re naʼoj reʼ yojrutoʼ pa qasamaj, pa qachoch chuqaʼ toq yojbʼebʼiyaj richin nqatzʼët achike rubʼanïk nqachajij qakʼaslem chuqaʼ kikʼaslem ri chʼaqa chik. Tasikʼij Hechos 17:28.

Ri Jesús xuyaʼ kejqalem kaʼiʼ naʼoj. Ri nabʼey nuqʼalajrisaj achike ruma oj kʼo. Nubʼij chi oj kʼo richin nqetamaj ruwäch ri Dios, nqayaʼ ruqʼij chuqaʼ nqajoʼ. Toq kʼo jun achike nqajoʼ nqabʼän kʼo chi nqanataj ri naʼoj riʼ  (Proverbios 3:6). Ri winaqiʼ nkisamajij pa kikʼaslem ri naʼoj riʼ xkeʼok rachibʼil ri Dios, xtkïl kikʼaslem man kʼisel ta chuqaʼ kikotem. Tasikʼij Mateo 22:36-38.

Ri rukaʼn naʼoj yojrutoʼ richin ütz nqakʼwaj qiʼ kikʼin ri chʼaqa chik winaqiʼ (1 Corintios 13:4-7). Ri nqasamajij pa qakʼaslem ri naʼoj riʼ nqakʼäm qanaʼoj chi rij ri Dios. Tasikʼij Mateo 7:12; 22:39, 40.

Ri naʼoj yeruyaʼ ri Biblia nubʼän chi ri familias nkajoʼ kiʼ chuqaʼ ütz nkikʼwaj kiʼ pa kachoch (Colosenses 3:12-14). Jun chi ke ri naʼoj riʼ yeruchajij ri familias ruma nubʼij chi ri kʼulubʼïk richin jantapeʼ. Tasikʼij Génesis 2:24.

Ri nqabʼän pa qakʼaslem ri naʼoj yeruyaʼ ri Biblia yojrutoʼ rikʼin ri rukusaxik ri mero chuqaʼ richin nqanaʼ kikotem. Achiʼel chi rij ri samaj, e kʼïy winaqiʼ xa xe yekajoʼ ri samajelaʼ ri nkibʼän ri nubʼij ri Biblia, ri samajelaʼ ri man yeʼeleqʼ ta chuqaʼ kuqül kikʼuʼx pa kisamaj (Proverbios 10:4, 26; Hebreos 13:18). Chuqaʼ ri Biblia yojrutoʼ richin yojkikot stapeʼ xa xe kʼo qikʼin ri nkʼatzin pa qakʼaslem chuqaʼ ri nqayaʼ pa nabʼey ri qachibʼilanik rikʼin ri Dios chuwäch ri bʼeyomäl. Tasikʼij Mateo 6:24, 25, 33; 1 Timoteo 6:8-10.

Ri naʼoj yeruyaʼ ri Biblia yojrutoʼ chuqaʼ richin ütz qawäch. Achiʼel ri naʼoj chi rij ri qʼabʼarïk yojrutoʼ chi kiwäch yabʼil, sokotajïk o kamïk (Proverbios 14:30; 22:24, 25; 23:20). Chuwäch ri Jehová man xajan ta naqum yaʼ (o bebidas alcohólicas) toq man nikʼo ta ruwiʼ nabʼän chi re (Salmo 104:15; 1 Corintios 6:10). Ri naʼoj yeruyaʼ ri Biblia nubʼän chi qe chi nqachajij ri qabʼanobʼal chuqaʼ ri rubʼanik yojchʼobʼon (Salmo 119:97-100). Ri qitzij taq nimanelaʼ yeqanimaj ri naʼoj yeruyaʼ ri Biblia ruma nqajoʼ nqayaʼ ruqʼij ri Qatataʼ Jehová ri kʼo chi kaj y man xa xe ta ruma ri utzil nukʼäm pe pa qawiʼ. Tasikʼij Mateo 5:14-16.