TANAJ 5
¿Achike rurayibʼal ri Dios pa ruwiʼ ri Ruwachʼulew?
1. ¿Achike ruma ri Dios xubʼän ri Ruwachʼulew?
Ri Jehová xubʼän ri Ruwachʼulew richin yojkʼojeʼ chuwäch. Ruma kʼa riʼ ri nabʼey taq winäq, Adán chuqaʼ Eva, xebʼan richin yekʼojeʼ chi Ruwachʼulew, man chi laʼ ta chi kaj. Toq xebʼan rijeʼ e kʼo chik ri ángeles richin yekʼojeʼ chi kaj (Job 38:4, 7). Ri Jehová xuyaʼ ri nabʼey achin chuwäch jun tikʼasäs ulew pa Edén (Génesis 2:15-17). Ri Jehová xrajoʼ xuyaʼ jun utziläj kʼaslem chi re ri Adán chuqaʼ ri ralkʼwal, jun kʼaslem man kʼisel ta chi Ruwachʼulew. Tasikʼij Salmo 37:29; 115:16.
Ri pa nabʼey, xa xe wi ri tikʼasäs ulew pa Edén ri kotzʼijan ruwäch. Ri nabʼey taq winäq kʼo wi chi nkʼojeʼ kalkʼwal richin nkinojisaj ri Ruwachʼulew. Ke riʼ rijeʼ wi ri yekʼojeʼ pa ruwiʼ ri Ruwachʼulew richin tikʼasäs nkibʼän chi re ronojel (Génesis 1:28). Ri Ruwachʼulew majubʼey xtkʼis ta ruwäch, jantapeʼ xkekʼojeʼ winaqiʼ chuwäch. Tasikʼij Salmo 104:5.
Tatz’eta’ ri video ¿Achike ruma ri Dios xubʼän ri Ruwachʼulew?
2. ¿Achike ruma man tikʼasäs ulew ta rubʼanon ri Ruwachʼulew wakami?
Ri Adán chuqaʼ ri Eva xkiqʼäj rutzij ri Dios, ruma riʼ xerelesaj pe ri pa Edén. Ri Tikʼasäs Ulew xkʼis ruwäch. Wakami majun winäq ta ntikïr rubʼanon chik jun. Ruma kʼa riʼ ri Biblia nubʼij chi ronojel «Ruwachʼulew yaʼon pa ruqʼaʼ ri itzel winäq» (Job 9:24, TNM). Tasikʼij Génesis 3:23, 24.
¿Xumalij kan ri nrajoʼ wi ri Jehová pa ruwiʼ ri Ruwachʼulew? Manäq. Rijaʼ ronojel ntikïr nubʼän ruma kʼo ronojel uchuqʼaʼ pa ruqʼaʼ (Isaías 45:18). Ri chi qawäch apo, ri Jehová xtubʼän chi ri kikʼaslem ri winaqiʼ xtubʼän achiʼel xrajoʼ rijaʼ ri pa nabʼey. Tasikʼij Salmo 37:11, 34.
3. ¿Achike rubʼanik xtkʼojeʼ chik ri Tikʼasäs Ulew?
Ri Tikʼasäs Ulew xtbʼekʼojeʼ chik toq ri Jesús xtqʼaton pe tzij ri Ruwachʼulew. Chupam jun oyowal rubʼiʼ Armagedón, ri Jesús kikʼin ri ángeles xtkichüp kiwäch ri man nkinimaj ta rutzij ri Dios. Chi rij riʼ ri Jesús xtuxïm mil junaʼ ri Satanás, ri itzel ángel ri xbʼanon chi ri Adán y Eva xkiqʼäj tzij. Ri rusamajelaʼ ri Jehová xkekolotäj ruma ri Jesús xkeruchajij chuqaʼ xtukʼwaj kibʼey. Rijeʼ xkekʼojeʼ chuwäch ri Tikʼasäs Ulew chi Ruwachʼulew. Tasikʼij Apocalipsis 20:1-3; 21:3, 4.
4. ¿Jampeʼ xtkʼis ri tijoj poqonal?
¿Jampeʼ xtukʼïs ruwäch ri itzelal ri Dios? Ri Jesús xuyaʼ jun «retal» toq xa xtkʼis yan ruwäch. Ri yebʼanatäj chi Ruwachʼulew wakami, nkikʼüt chi oj kʼo pa «rukʼisibʼäl [taq] qʼij». Ri yebʼanatäj ruyaʼon kʼayewal pa qawiʼ. Tasikʼij Mateo 24:3, 7-14, 21, 22.
Chupam ri mil junaʼ xtqʼaton pe tzij ri Jesús pa ruwiʼ ri Ruwachʼulew xtukʼïs ruwäch ri tijoj poqonal (Isaías 9:6, 7; 11:9). Ri Jesús xtok jun nimaläj sacerdote ri xtukʼäm el kimak konojel ri yeʼajowan ri Dios. Ri Jehová xtukusaj ri Jesús richin xtukʼäm el ri yabʼil, ri rijixïk chuqaʼ ri kamïk. Tasikʼij Isaías 25:8; 33:24.
5. ¿Achike ri xkekʼojeʼ chuwäch ri kʼakʼaʼ Tikʼasäs Ulew?
Ri pa Nimajay richin Molojriʼïl xtawetamaj kiwäch winaqiʼ ri yeʼajowan ri Dios chuqaʼ nkajoʼ nkibʼän ri nqa chuwäch rijaʼ
Ri nkinimaj rutzij ri Dios xkekʼojeʼ chuwäch ri Tikʼasäs Ulew (1 Juan 2:17). Ri Jesús xerutäq ri rutzeqelibʼey richin xebʼekikanoj ri winaqiʼ choj kanima, ke riʼ xkikʼüt chi kiwäch ri rubʼanik nkibʼän ri nqa chuwäch ri Dios. Wakami, ri Jehová pa millón chi winaqiʼ yerutijoj richin xkekʼojeʼ chuwäch ri Tikʼasäs Ulew (Sofonías 2:3). Ri yeʼapon pa Nimajay richin Molojriʼïl kichin ri testigos de Jehová man xa xe ta nketamaj achike rubʼanik yeʼok utziläj taq achijil, ixjayil chuqaʼ teʼej tataʼaj, rijeʼ chuqaʼ nketamaj ri utziläj taq rutzijol ri e kʼo chupam ri Biblia. Tasikʼij Miqueas 4:1-4.
