Ri utziläj rutzijol chi ri winaqiʼ xkekʼaseʼ richin jantapeʼ chi Ruwachʼulew tzʼibʼatäl chupam ri Biblia (Salmo 37:29). Chupam ri Biblia e kʼo 66 wuj. E 40 achiʼaʼ xerukusaj ri Dios richin xkitzʼibʼaj. Ri woʼoʼ nabʼey taq wuj 3.500 junaʼ yan ketzʼibʼäx, ja ri Moisés xerutzʼibʼaj. Ri rukʼisibʼäl wuj 1.900 yan junaʼ titzʼibʼäx, ja ri apóstol Juan xutzʼibʼaj. ¿Achike naʼoj xekitzʼibʼaj ri achiʼaʼ xetzʼibʼan ri Biblia? Ri Dios xukusaj ri loqʼoläj ruchuqʼaʼ richin xeruyaʼ pe ri runaʼoj chi ke ri tzʼibʼanelaʼ (2 Samuel 23:2). Ruma riʼ ja ri runaʼoj ri Dios ri xekitzʼibʼaj man ja ta ri kinaʼoj rijeʼ. Ke riʼ, ri rajaw ri Biblia ja ri Jehová. Tasikʼij 2 Timoteo 3:16; 2 Pedro 1:20, 21.

Tatz’eta’ ri video ¿Achike xbʼanon ri Biblia?

Ruma ronojel ri rubʼin pe ri Biblia jaʼ ntel, qetaman chi rikʼin ri Dios petenäq wi. Majun jun ta winäq ntikïr nbʼanon riʼ (Josué 23:14). Xa xe ri Dios ntikïr nbʼin achike xtbʼanatäj chi qawäch apo. Tasikʼij Isaías 42:9; 46:10.

Ruma rikʼin ri Dios petenäq ri Biblia majun jun ta wuj njunumatäj rikʼin. Ri Biblia pa kʼïy chʼabʼäl elesan chuqaʼ pa millón e jachon el. Stapeʼ ojer wuj, toq nchʼon chi rij ri kʼaslem chuqaʼ ri Ruwachʼulew, jaʼ ntel. Ri naʼoj xekitzʼibʼaj ri 40 tzʼibʼanelaʼ jebʼël nkixïm kiʼ *. Chuqaʼ man xa xe ta kʼa riʼ, ri Biblia kʼo ri nimaläj rajowabʼäl ri Dios chupam chuqaʼ ntikïr nuchojmirisaj kikʼaslem ri winaqiʼ. Ronojel riʼ rubʼanon chi pa millón ri winaqiʼ kiniman chi ri Biblia kan Ruchʼabʼäl wi ri Dios. Tasikʼij 1 Tesalonicenses 2:13.

Tatz’eta’ ri video ¿Achike ruma ütz nqakuqubʼaʼ qakʼuʼx chi ri Biblia qitzij ri nubʼij?

Ri Biblia nchʼon chi rij ri rurayibʼal ri Dios pa kiwiʼ ri winaqiʼ, jun utziläj rutzijol. Chuqaʼ nutzijoj achike ruma ri winaqiʼ man e kʼo ta chuwäch jun tikʼasäs ulew wakami chuqaʼ achike rubʼanik ri Ruwachʼulew tikʼasäs chik xtubʼän. Tasikʼij Apocalipsis 21:4, 5.

Ri Biblia e kʼo pixaʼ chuqaʼ naʼoj chupam. Chuqaʼ nubʼij ri rubʼanik xukʼwaj riʼ ri Dios kikʼin ri winaqiʼ. Ronojel riʼ nukʼüt ri rubʼanik ri runaʼoj rijaʼ. Ruma riʼ ri Biblia yarutoʼ richin nawetamaj ruwäch ri Dios. Chuqaʼ nubʼij achike rubʼanik yojok rachibʼil. Tasikʼij 2 Crónicas 20:7; Salmo 19:7, 11; Santiago 4:8.

Richin xqʼax chi kiwäch ri winaqiʼ ri «tzʼibʼatäl kan» chupam ri Biblia, ri Jesús xerusikʼij chuqaʼ xeruqʼalajrisaj ri textos. Re wuj reʼ ke riʼ chuqaʼ nubʼän richin nqʼax chi qawäch ri naʼoj nuyaʼ ri Biblia. Tasikʼij Lucas 24:27, 45.

Ri utziläj taq rutzijol majun achike ta nilon ruqʼij. Stapeʼ janila ruqʼij, e kʼo winaqiʼ man nkiyaʼ ta rejqalem; e kʼo chik chʼaqa, npe koyowal natzijoj apo chi ke. Man tpoʼ qa akʼuʼx. Ri awetamabʼal chi rij ri Dios xtubʼän chawe chi xtawïl akʼaslem man kʼisel ta. Tasikʼij Juan 17:3.