TANAJ 6
¿La kʼo utzil xtbʼan pa kiwiʼ ri kaminaqiʼ?
1. ¿Achike utzil xtbʼan pa kiwiʼ ri kaminaqiʼ?
Toq ri Jesús xkʼojeʼ chi Ruwachʼulew xkäm ri Lázaro, jun achin ri kan ütz xukʼwaj riʼ rikʼin. Ri Lázaro xkʼojeʼ rachoch pa Betania, jun aldea chunaqaj ri Jerusalén. Toq ri Jesús xapon chi riʼ kajiʼ yan qʼij tkäm ri Lázaro. Ri Jesús rachibʼilan ri Marta chuqaʼ ri María, ri kaʼiʼ ranaʼ ri Lázaro, xbʼe akuchi muqül ri anima. Toq xa kʼa riʼ tapon, xkimöl kiʼ ri winaqiʼ. ¡Jun na wi nimaläj kikotem xunaʼ ri Marta chuqaʼ ri María toq xkitzʼët chi ri Jesús xukʼasoj ri kixibʼal! Tasikʼij Juan 11:21-24, 38-44.
Jun chi ke ri utziläj taq rutzijol nuyaʼ ri Biblia ja ri xkekʼastäj chik ri kaminaqiʼ. Ri Marta retaman wi chi ri Jehová rubʼin chi xkerukʼasoj chik ri kaminaqiʼ richin xkekʼojeʼ chik chi Ruwachʼulew. Tasikʼij Job 14:14, 15.
2. ¿Achike kibʼanon ri kaminaqiʼ?
Ri Dios xubʼij chi re ri Adán: «Xkatok chik jun bʼey ulew [...] ruma kan at ulew wi» (GÉNESIS 3:19).
Röj winaqiʼ rikʼin poqolaj oj bʼanon (Génesis 2:7; 3:19). Man oj espíritus ta ri choj ta oj kʼo chupam jun chʼakul. Röj oj winaqiʼ, kʼo qachʼakul. Toq yojkäm, majun chik jun ta kʼaslem ntikïr el chi qij. Ri qawiʼ man nsamäj ta chik ruma riʼ majun achike ta chik nqachʼobʼ. Ke riʼ ri kaminaqiʼ majun chik achike ta nkinaʼ. Toq ri Lázaro xkʼastäj majun achike ta xutzijoj chi rij ri ramaj toq xkʼojeʼ pa jül. Tasikʼij Salmo 146:4; Eclesiastés 9:5, 6, 10.
E kʼo yebʼin chi ri Dios yeruyaʼ pa qʼaqʼ ri winaqiʼ yekäm, riʼ man qitzij ta. Achiʼel qetaman pe, ri kaminaqiʼ majun chik achike ta nkinaʼ. Ruma kʼa riʼ ri naʼoj chi yebʼe pa qʼaqʼ ri winaqiʼ xa tzʼukun tzij chuqaʼ nchʼon itzel chi rij ri Jehová. Ri Jehová kan itzel nrakʼaxaj ri naʼoj nyaʼöx pa qʼaqʼ jun winäq. Tasikʼij Jeremías 7:31.
3. ¿La yojtikïr yojchʼon kikʼin ri kaminaqiʼ?
Ri kaminaqiʼ majun yetikïr ta yechʼon chuqaʼ man nkakʼaxaj ta (Salmo 115:17). E kʼo kʼa itzel taq ángeles ri yetikïr yechʼon kikʼin ri winaqiʼ, nkibʼän achiʼel ta ja ri kaminaqiʼ ri yechʼon pe (2 Pedro 2:4). Ruma riʼ ri Jehová itzel nutzʼët ri nqakanoj rubʼanik richin yojchʼon kikʼin ri kaminaqiʼ. Tasikʼij Deuteronomio 18:10, 11.
4. ¿Achike winaqiʼ ri xkekʼastäj chik?
Pa millón ri winaqiʼ e kaminäq el xkekʼastäj chik, ke riʼ xkekʼojeʼ chik chi Ruwachʼulew. Chuqaʼ e kʼo chi ke ri winaqiʼ ri man xketamaj ta el ruwäch ri Jehová chuqaʼ xa itzel taq bʼanobʼäl xekibʼän el, xkekʼastäj chik. Tasikʼij Salmo 37:29; Hechos 24:15.
Ri winaqiʼ ri xkekʼastäj xtketamaj ri qitzij chi rij ri Dios chuqaʼ we rijeʼ xtkinimaj rutzij ri Jesús xtkikʼüt ri kikuqubʼabʼäl kʼuʼx chi rij rijaʼ (Apocalipsis 20:11-13). We xtkibʼän riʼ xtkʼojeʼ kikʼaslem man kʼisel ta chi Ruwachʼulew. Tasikʼij Juan 5:28, 29.
5. ¿Achike nubʼij chi rij ri Jehová chi xkekʼastäj chik ri kaminaqiʼ?
Ri xkekʼasöx chik ri kaminaqiʼ nukʼüt chi qe ri rajowabʼäl ri Jehová chuqaʼ chi ütz runaʼoj qikʼin. Ruma ri Jehová xutäq pe ri Rukʼajol richin xuyaʼ ri rukʼaslem quma röj, xkeqatzʼët chik ri winaqiʼ e kaminäq el. Toq xtbʼanatäj riʼ, ¿achike winäq narayibʼej rat xtawetamaj ruwäch? Tasikʼij Juan 3:16; Romanos 6:23.
