TANAJ 17
¿Achike runaʼoj ri Jesús?
Toq nqetamaj achike xubʼän chuqaʼ achike xubʼij ri Jesús toq xkʼojeʼ chuwäch ri Ruwachʼulew, nqʼalajin chi qawäch ri naʼoj ri nubʼän chi qe chi yojjel más apo rikʼin rijaʼ chuqaʼ rikʼin ri Rutataʼ, Jehová. ¿Achike jujun chi ke ri jebʼël taq naʼoj nukʼüt ri Jesús? ¿Achike ütz nqabʼän richin nqakʼäm qanaʼoj chi rij?
1. ¿Achike nbʼanon chi ri Jesús junan rikʼin ri Rutataʼ?
Ri Jesús kan kʼïy chik retaman chi rij ri Rutataʼ ruma pa millón chi junaʼ kʼo wi rikʼin chi laʼ chi kaj. Ruma riʼ ri nuchʼöbʼ, ri nunaʼ chuqaʼ ri nubʼän kan achiʼel wi nubʼän ri Rutataʼ (tasikʼij Juan 5:19). Ruma ri Jesús kan junan runaʼoj rikʼin ri Rutataʼ xubʼij: «Ri tzʼeteyon wichin yin, rutzʼeton kʼa chuqaʼ ri Nataʼ» (Juan 14:9). Ruma riʼ, we rat jebʼël xtawetamaj ruwäch ri Jesús, chuqaʼ xtawetamaj más ruwäch ri Jehová. Jun tzʼetbʼäl, ri rubʼanik ri Jesús xujoyowaj kiwäch ri winaqiʼ, nukʼüt ri nunaʼ ri Jehová chawij rat.
2. ¿Achike rubʼanik xukʼüt ri Jesús chi nrajoʼ ri Rutataʼ?
Ri Jesús xubʼij: «Ri ninbʼän, kan ja ri nataʼ ri xitaqon pe chi rubʼanik richin chi ri winaqiʼ [...] tketamaj chi yin ninwajoʼ ri nataʼ» (Juan 14:31). Toq ri Jesús xkʼojeʼ chuwäch ri Ruwachʼulew, xukʼüt chi janila xrajoʼ ri Rutataʼ ruma xunimaj rutzij stapeʼ xukʼowisaj kʼïy kʼayewal. Chuqaʼ, ri Jesús ütz nunaʼ ntzijon chi rij ri Rutataʼ chuqaʼ nuyaʼ kitoʼik ri chʼaqa chik richin yeʼok rachibʼil ri Dios (Juan 14:23).
3. ¿Achike rubʼanik nukʼüt ri Jesús chi yerajoʼ ri winaqiʼ?
Ri Biblia nubʼij chi ri Jesús yerajoʼ konojel ri winaqiʼ (Proverbios 8:31). Xukʼüt chi yerajoʼ ri winaqiʼ ruma xuyaʼ kitoʼik chuqaʼ xukuqubʼaʼ kikʼuʼx. Xerubʼän milagros ri man xa xe ta xkikʼüt chi kʼo ruchuqʼaʼ, chuqaʼ xkikʼüt chi xujoyowaj kiwäch ri winaqiʼ (Marcos 1:40-42). Janila ütz runaʼoj chuqaʼ man xeruchaʼ ta ri winäq. Ronojel ri xubʼij kan xukuqubʼaʼ kikʼuʼx ri xkiyaʼ kixkïn chi re rijaʼ. Chuqaʼ, xutïj poqön y xkäm ruma yerajoʼ ri winaqiʼ, ja kʼa más yerajoʼ ri nkinimaj ri xukʼüt kan rijaʼ (tasikʼij Juan 15:13, 14).
TQANIKʼOJ RIJ
Tqetamaj más chi rij ri runaʼoj ri Jesús chuqaʼ tqatzʼetaʼ achike ütz nqabʼän richin yojajowan chuqaʼ yojsipan achiʼel xubʼän rijaʼ.
4. Ri Jesús nrajoʼ ri Rutataʼ
Rikʼin ri rukʼaslem, ri Jesús xukʼüt chi qawäch achike rubʼanik nqakʼüt chi nqajoʼ ri Dios. Tisikʼij Lucas 6:12 chuqaʼ Juan 15:10 y 17:26. Toq xikʼis yan rusikʼixik jujun texto, kixchʼon chi rij reʼ:
-
Rikʼin ri xubʼän ri Jesús, ¿achike rubʼanik nqakʼüt chi nqajoʼ ri Jehová?
Ri Jesús kan janila wi nrajoʼ ri Rutataʼ chuqaʼ jutaqïl nchʼon rikʼin.
5. Ri Jesús nujoyowaj kiwäch ri nkʼatzin kitoʼik
Ri Jesús xerunaʼ más ri winaqiʼ chuwäch ri xunaʼ qa riʼ rijaʼ. Stapeʼ janila kosnäq, rijaʼ xuyaʼ ruramaj chuqaʼ ruchuqʼaʼ richin xerutoʼ ri chʼaqa chik. Tisikʼij Marcos 6:30-44 chuqaʼ kixchʼon chi ri rij reʼ:
-
Achiʼel ri xqasikʼij, ¿achike rubʼanik xukʼüt ri Jesús chi yerunaʼ ri chʼaqa chik? (Titzʼetaʼ ri versículos 31, 34, 41 chuqaʼ 42).
-
¿Achike ruma ri Jesús xerutoʼ ri winaqiʼ riʼ? (Titzʼetaʼ ri versículo 34).
-
Ruma rikʼin ri Jesús nqatzʼët ri runaʼoj ri Rutataʼ, ¿achike nukʼüt ronojel reʼ chi rij ri Jehová?
-
Achiʼel xubʼän ri Jesús, ¿achike rubʼanik nqakʼüt chi nqajoyowaj kiwäch ri chʼaqa chik?
6. Ri Jesús janila nsipan
Stapeʼ ri Jesús man kan ta kʼïy achike kʼo rikʼin rijaʼ janila xsipan, chuqaʼ nrajoʼ chi röj ke riʼ chuqaʼ nqabʼän. Tisikʼij Hechos 20:35 chuqaʼ kixchʼon chi rij reʼ:
-
Achiʼel xubʼij kan ri Jesús, ¿achike nubʼän chi yojkikot?
Titzʼetaʼ ri VIDEO chuqaʼ kixchʼon chi rij reʼ:
-
¿Achike chʼaqa chik rubʼanik yojsipan stapeʼ man kan ta kʼïy kʼo qikʼin?
¿La awetaman rat reʼ?
Ri Biblia nukʼüt chi kʼo chi nqabʼän ri qachʼonïk chi re ri Jehová pa rubʼiʼ ri Jesús (tisikʼij Juan 16:23, 24). Ke riʼ nqakʼüt chi nqayaʼ rejqalem ri rubʼanon kan ri Jesús richin yojtikïr yojok rachibʼil ri Jehová.
E KʼO JUJUN NKIBʼIJ REʼ: «Majun achike ta chuwäch ri Dios we ri winaqiʼ yetijon poqön».
-
Ruma rikʼin ri Jesús nqʼalajin ri runaʼoj ri Rutataʼ, ¿achike rubʼanik nukʼüt ri rutzʼetbʼäl chi oj kʼo pa ranima ri Jehová?
TQAKAMULUJ
Ri Jesús nrajoʼ ri Jehová chuqaʼ yerajoʼ ri winaqiʼ. Ruma rijaʼ kan achiʼel ri Rutataʼ, toq más xtawetamaj ruwäch ri Jesús, ke riʼ chuqaʼ más xtawetamaj ruwäch ri Jehová.
Ri xawetamaj
-
Rikʼin ri xqatzʼët kan chi rij ri Jesús, ¿achike rubʼanik nqakʼüt chi nqajoʼ ri Jehová?
-
Rikʼin ri xqatzʼët kan chi rij ri Jesús, ¿achike rubʼanik nqakʼüt chi yeqajoʼ ri winaqiʼ?
-
¿Achike ri más nqa chawäch chi rij ri runaʼoj ri Jesús?
RICHIN NAWETAMAJ MÁS
Tatzʼetaʼ kayoxiʼ runaʼoj ri Jesús ri ütz nqabʼän chuqaʼ.
«Tqakʼamaʼ qanaʼoj chi rij ri Jesús» (Jesús: el camino, la verdad y la vida, ruxaq 317)
Tatzʼetaʼ achike ruma kʼo janila rejqalem ri Jesús toq yojchʼon rikʼin ri Dios.
«¿Achike ruma nqabʼän qachʼonïk pa rubʼiʼ ri Jesús?» (La Atalaya, 1 de febrero de 2008)
¿La nubʼij ri Biblia achike rubʼanik titzʼun ri Jesús?
¿Achike nqetamaj chi rij ri runaʼoj xubʼän ri Jesús kikʼin ri ixoqiʼ?
«Ri Dios man nuqasaj ta kiqʼij ri ixoqiʼ» (La Atalaya, 1 de septiembre de 2012)
