Jontir röj nkʼatzin njeʼ qakʼuqbʼäl kʼuʼx rchë Jehová ütz nqrtzʼët. Ye kʼa le Biblia nuʼij chë «ma jontir ta winäq nkikʼuqbʼaʼ kikʼuʼx chrij Dios» (2 Tes. 3:2). Taq ri apóstol Pablo xertzʼibʼaj re tzij reʼ, najin wä ntzjon chkij ri winäq ri xkiyaʼ kʼayewal pa rwiʼ. Ryä xuʼij chë nkʼatzin nkol pa kiqʼaʼ ri «itzel taq winäq» riʼ. Ye kʼa ri xuʼij ryä chrij ri kʼuqbʼäl kʼuʼx ütz chqä nksäx chkij nkʼaj chik winäq. Jojun tzʼetbʼäl. Ye kʼo jojun ma nkajoʼ ta nkinmaj chë kʼo jun Dios xbʼanö jontir ri kʼo (Rom. 1:20). Ye kʼo chik jojun xa xuʼ nkiʼij chë rkʼë jbʼaʼ kʼo jun xbʼanö jontir ri nqatzʼët. Ye kʼa ma xa xuʼ ta ya riʼ nkʼatzin rchë nqaʼij chë kʼo qakʼuqbʼäl kʼuʼx.

Rchë Dios kiʼ rkʼuʼx nuʼän qkʼë, röj nkʼatzin nqanmaj chë ryä kantzij kʼo chqä chë nuyaʼ rajäl rkʼexel chkë ri nkikʼuqbʼaʼ kikʼuʼx chrij ryä (Heb. 11:6). Ri loqʼoläj rchqʼaʼ Dios ya riʼ nbʼanö chqë chë nqakʼuqbʼaʼ qakʼuʼx chrij Dios. We röj nqajoʼ chë Jehová nuyaʼ pä ri loqʼoläj rchqʼaʼ pa qawiʼ, nkʼatzin nqakʼutuj che rä (Luc. 11:9, 10, 13). Chqä kan kowan nkʼatzin nqaskʼij rwäch le Biblia, rma ri Loqʼoläj Wuj riʼ tzʼibʼan qa rkʼë rtoʼik ri loqʼoläj rchqʼaʼ Dios. Ye kʼa ma xa xuʼ ta nkʼatzin nqaskʼij rwäch, xa nkʼatzin chqä nqchʼobʼon chrij ri nqaskʼij chqä nqatäj qaqʼij rchë nqasmajij pa qakʼaslemal. We xtqaʼän riʼ, ri loqʼoläj rchqʼaʼ Dios xtqrtoʼ rchë xtqakʼuqbʼaʼ qakʼuʼx chrij Jehová kan achiʼel nqä chwäch ryä.