Kikʼutunik ri yeskʼin rwäch qawuj
¿Achkë rbʼanik kʼo chë nqʼax chqawäch ri nuʼij ri Salmo 12:7?
Ri nkʼaj chik versículos ri ye kʼo chpan re salmo reʼ nkikʼüt chë re versículo reʼ najin ntzjon chkij winäq.
Salmo 12:1-4 nuʼij ya reʼ: «Ya xekʼis ri winäq ri kan ütz nakʼuqbʼaʼ akʼuʼx chkij». Tqatzʼetaʼ komä achkë nkiʼij ri versículos ri kikʼwan kiʼ rkʼë ri kʼutunïk: Salmo 12:5-7.
«Ya reʼ nuʼij Jehová: ‹Rïn xkentoʼ ri winäq ri najin nkitäj poqän rma yaʼon kʼayewal pa kiwiʼ
chqä ri najin yebʼison
rma ma kan ta achkë kʼo kikʼë;
rïn xkenköl pa kiqʼaʼ ri winäq ri itzel kinaʼoj nkiʼän kikʼë›.
Rtzij Jehová kan ye chʼajchʼöj;
kan ye achiʼel ta plata ri qʼaxan chik pa jun horno ri bʼanon rkʼë ilew chqä 7 mul bʼanon chik chʼajchʼöj che rä.
Nimaläj Jehová, rït xkeʼachajij ryeʼ;
kan kikʼë re sol winäq reʼ xtachäp äl kichajixik chkijujnal chqä majun bʼëy xtayaʼ ta qa rbʼanik riʼ».
Ri versículo 5 nuʼij chë Dios xkerköl ri winäq ri najin nkitäj poqän.
Ri versículo 6 nuʼij chik ya reʼ: «Rtzij Jehová kan ye chʼajchʼöj; kan ye achiʼel ta plata ri qʼaxan chik pa jun horno». Y röj, ri cristianos, kan ke riʼ chqä nqaquʼ (Sal. 18:30; 119:140).
Chpan jojun Biblias, ri Salmo 12:7 ke reʼ rbʼanik bʼanon qa che rä: «Rït xkeʼachajij». Rma ri versículo 6 najin ntzjon chrij «rtzij Jehová», ye kʼo jojun nkiquʼ chë ri versículo 7 nrajoʼ nuʼij chë Dios yerchajij rtzij. Y, kantzij na wä chë Dios rchajin pä le Biblia chkiwäch ye kʼïy rkʼulel ri xkikanuj rbʼanik rchë ma xskʼïx ta rwäch chqä rchë xkichüp rwäch (Is. 40:8; 1 Ped. 1:25).
Ye kʼa achiʼel nuʼij ri versículo 5, Jehová chqä yertoʼon chqä yerkolon «ri winäq ri nkitäj poqän» rma yaʼon kʼayewal pa kiwiʼ y ma xtyaʼ ta qa rbʼanik riʼ (Job 36:15; Sal. 6:4; 31:1, 2; 54:7; 145:20).
Rma riʼ, rkʼë ri nuʼij ri versículo 7, ¿achkë yerchajij Jehová: ri winäq o rtzij?
Ri nkiʼij ri nkʼaj chik versículos chpan re salmo reʼ nkikʼüt chë chkij winäq najin ntzjon wä.
Salmo 12:1 ntzjon chkij jojun rsamajelaʼ Jehová ri yeqʼolon kimä itzel taq winäq. Chrij riʼ, chpan ri versículo 3, nuʼij chë Jehová xtkatäj pä chkij ri xa xuʼ ri ma ütz ta nkitzjoj. Re salmo reʼ nukʼüt chqawäch chë Dios xttoʼ rtinamit rma rtzij ryä kan ye chʼajchʼöj.
Rma riʼ, ri xkerchajij Jehová, achiʼel nuʼij chpan ri versículo 7, ya riʼ ri winäq ri najin nkitäj poqän pa kiqʼaʼ ri itzel taq winäq.
Ye kʼa ¿achkë rma chpan jojun Biblias ke reʼ rbʼanik bʼanon qa che rä re versículo reʼ: «Rït xkeʼachajij»? Rma xbʼan copiar kan achiʼel nuʼij chpan ri Escrituras Hebreas. Ye kʼa ri Septuaginta yerksaj re tzij reʼ: «Ryä xtqrchajij». Ya reʼ nukʼüt chë najin ntzjon chkij rsamajelaʼ Dios ri najin nkitäj poqän pa kiqʼaʼ nkʼaj chik. Ryeʼ xkechajïx chkiwäch «re sol winäq reʼ» ri nkiʼän chë ri nkʼaj chik kan nqʼax rwiʼ ri itzelal nkiʼän (Sal. 12:7, 8). Jun peraj rchë ri Escrituras Hebreas ri qʼaxan pa chʼaʼäl arameo, ke reʼ bʼanon qa che rä ri versículo 7: «Nimaläj AJAW, rït xkeʼachajij ri kikʼwan jun jïk kʼaslemal chawäch, kan kikʼë re sol winäq reʼ ri kan itzel kinaʼoj xtachäp äl kichajixik chqä majun bʼëy xtayaʼ ta qa rbʼanik riʼ». Ya reʼ nukʼüt chë ri Salmo 12:7 ma najin ntzjon chrij rtzij Dios.
Rkʼë jontir reʼ nqʼalajin chqawäch chë ri versículo 7 nukʼuqbʼaʼ kikʼuʼx rsamajelaʼ Dios, rma ryä kan xkertoʼ chqä xkerköl.
