Ri apóstol Pablo xuʼij reʼ chkë ri cristianos aj Tesalónica: «We kʼo jun ri ma nusmajij ta ri najin nqaʼij äl chpan re wuj reʼ, tiyaʼ retal achkë nbʼanö riʼ» (2 Tes. 3:14). Rbʼanon qa, nqaʼij chë yë ri ukʼwäy taq bʼey nkʼatzin yesmajin reʼ. Nqaʼij wä chë we jun qachʼalal ma nrajoʼ ta nusmajij ri naʼoj ye kʼo chpan le Biblia tapeʼ kʼïy chik mul yaʼon rtoʼik, ri ukʼwäy taq bʼey ütz wä nkiyaʼ jun tzijonem chpan ri congregación ri akuchï nkiʼij chkë qachʼalal chë tkichajij kiʼ. Taq ryeʼ nkiʼän wä ya riʼ, ri qachʼalal ma nkikʼwaj ta wä chik kiʼ rkʼë ri winäq riʼ we ma pa qareunión ta o taq nqatzjoj le Biblia.

Ye kʼa komä nqʼax chqawäch chë chkijujnal ri ye kʼo pa congregación nkʼatzin nkismajij ri naʼoj xyaʼ Pablo. Rma riʼ, ma nkʼatzin ta chë ri ukʼwäy taq bʼey nkiyaʼ jun tzijonem ri akuchï nkiʼij che rä ri congregación chë tchajij riʼ. ¿Achkë rma xjalatäj rbʼanik nqʼax pa qajolon re texto reʼ? Tqatzʼetaʼ rcontexto.

Pablo xuʼij chë chpan ri congregación ye kʼo wä qachʼalal ri «ma yenman ta tzij». Ntel chë tzij, ma najin ta wä nkismajij ri naʼoj xyaʼ äl chkë ri resan wä chpan ri Rchʼaʼäl Dios. Nqaʼij riʼ, rma taq xapon naʼäy mul kikʼë, ryä xuʼij reʼ chkë: «We kʼo jun ma nrajoʼ ta nsamäj, ma twaʼ ta chqä». Tapeʼ ke riʼ, ye kʼo wä jojun ri ma nkajoʼ ta yesamäj rchë nkitzüq kiʼ tapeʼ yekowin yesamäj. Ryeʼ chqä najin wä nkinïm kiʼ pa kikʼaslemal ri nkʼaj chik. ¿Achkë wä kinaʼoj nkʼatzin nkiʼän ri qachʼalal kikʼë ri ma yenman ta wä tzij? (2 Tes. 3:6, 10-12).

Pablo xuʼij: «Tiyaʼ retal achkë nbʼanö riʼ». Pa chʼaʼäl griego, re tzij reʼ ntel chë tzij: natzʼët achkë winäq ma nman ta tzij chqä nachajij awiʼ rchë ma nakʼän ta apü rnaʼoj. Ri xuʼij Pablo, che rä jontir ri congregación xuʼij wä, ma xa xuʼ ta chkë ri ukʼwäy taq bʼey (2 Tes. 1:1; 3:6). Rma riʼ, chkijujnal ri cristianos nkʼatzin wä nkiyaʼ chkiwäch ma nkikʼwaj ta chik kiʼ rkʼë jun ri ma najin ta nusmajij ri naʼoj ye kʼo chpan Rchʼaʼäl Dios.

¿Ntel chë tzij reʼ chë ri cristianos jnan wä kinaʼoj nkʼatzin nkiʼän rkʼë re winäq reʼ achiʼel nkiʼän rkʼë jun ri xesäx qa pa congregación? Manä, rma Pablo xuʼij chqä reʼ: «Ma tiyaʼ ta qa rtoʼik kan achiʼel niʼän rkʼë jun iwachʼalal». Rma riʼ, ri cristianos xtkikʼwaj na wä kiʼ rkʼë ri winäq riʼ chkipan ri reuniones chqä taq yeʼel chutzjoxik Rchʼaʼäl Dios, ye kʼa we xa ma rma ta riʼ, ryeʼ ma xtkikʼwaj ta kiʼ rkʼë. ¿Achkë rma? Pablo xuʼij: «Rchë ke riʼ xtkʼïx». Taq ri cristianos ma nkikʼwaj ta kiʼ rkʼë jun ri ma nman ta tzij, ya riʼ rkʼë jbʼaʼ nuʼän chë ri winäq riʼ nkʼïx rma ri najin nuʼän y rma riʼ nujäl rnaʼoj (2 Tes. 3:14, 15).

¿Y röj? ¿Achkë rbʼanik nqasmajij re naʼoj reʼ? Naʼäy, nkʼatzin nqatzʼët chë ri winäq riʼ kantzij ma najin ta nunmaj tzij, achiʼel xuʼij Pablo. Ryä ma najin ta wä ntzjon chkij qachʼalal ri kʼo jun nkiʼän ri rkʼë jbʼaʼ xa xuʼ röj ma nqä ta chqawäch ye kʼa ma nuqʼäj ta jun naʼoj kʼo chpan le Biblia. Chqä ma najin ta wä ntzjon chkij qachʼalal ri rkʼë jbʼaʼ xojkisök. Ryä najin wä ntzjon chkij qachʼalal ri yaʼon naʼoj chkë ri yelesan chpan le Biblia ye kʼa ma nkajoʼ ta nkismajij.

We nqatzʼët chë jun qachʼalal kan chubʼanik nuʼän ma nusmajij ta jun naʼoj kʼo chpan le Biblia, a chqajujnal röj xtqayaʼ chqawäch ma nqakʼwaj ta qiʼ rkʼë we ma pa qareunión ta o taq nqatzjoj le Biblia. Rma chqajujnal röj nqtzʼetö we nqaʼän riʼ, ma xtqaʼij ta chkë ri nkʼaj chik achkë xqachʼöbʼ nqaʼän we ma ye qafamilia ta ri ye kʼo pa qachoch. Ye kʼa xtqakʼwaj na qiʼ rkʼë taq yoj kʼo chkipan ri qareuniones chqä taq nq·el chutzjoxik le Biblia. Taq xtjäl rnaʼoj, jnan chik jmul xtuʼän qawäch rkʼë.