Tapeʼ ke riʼ, Jehová nrajoʼ chë röj ma nikʼo ta qakʼuʼx nqayoʼej ri qʼij taq ryä xtuʼän ri ruchʼobʼon. ¿Achkë rma Jehová nrajoʼ chë röj nqaʼän riʼ? Y ¿achkë xtqtoʼö rchë kiʼ qakʼuʼx xtqaʼän loman nqayoʼej Jehová?

¿ACHKË RMA JEHOVÁ NRAJOʼ CHË RÖJ NQYOʼEN?

Tqatzʼetaʼ ri nuʼij le Biblia: «Jehová ma nikʼo ta rukʼuʼx nyoʼen rchë nuyaʼ utzil pan iwiʼ, y xtkatäj pä rchë xkixurtoʼ rma nupoqonaj iwäch. Rma Jehová ya riʼ jun Dios ri kan pa rubʼeyal nuʼän che rä jontir. Kiʼ kikʼuʼx ri winäq ri nkiyoʼej ryä» (Is. 30:18). Isaías xuʼij re tzij reʼ chkë ri judíos ri ma nkinmaj ta wä rutzij Dios (Is. 30:1). Ye kʼa chkipan ri qʼij riʼ kan ye kʼo wä chqä judíos ri nkajoʼ Jehová. Ri xuʼij Isaías kan kowan xkʼuqbʼaʼ kikʼuʼx ri judíos riʼ, y röj chqä kan nukʼuqbʼaʼ qakʼuʼx.

Rma riʼ, ¿achkë rma nkʼatzin ma nikʼo ta qakʼuʼx nqyoʼen? Rma Jehová ma najin ta nikʼo rukʼuʼx nyoʼen. Ryä ruchaʼon chik ri qʼij chqä ri hora taq xtchüp ruwäch jontir ri ma ütz ta kʼo komä y najin nuyoʼej chë nbʼeqä yän ri qʼij riʼ (Mat. 24:36). Taq xtbʼeqä ri qʼij riʼ, kan xtqʼalajin chë jontir ri xqʼabʼaj ri Diablo chrij Jehová chqä chkij rusamajelaʼ ma tzij ta. Rma riʼ Jehová xtchüp ruwäch Satanás chqä jontir ri yetoʼö rchë. Ye kʼa ryä rubʼin chkë rusamajelaʼ chë xkerutoʼ pä rma nupoqonaj kiwäch.

Loman nqayoʼej chë nbʼeqä ri qʼij riʼ, rkʼë jbʼaʼ Jehová ma xtresaj ta jontir ri kʼayewal chqij. Ye kʼa ryä nuʼij chqë chë nqkowin kiʼ qakʼuʼx nqaʼän. Rma riʼ achiʼel xuʼij Isaías, röj nqkowin kiʼ qakʼuʼx nqaʼän loman xtbʼeqä ri qʼij taq xtqakʼül jontir ri utzil qayoʼen (Is. 30:18). a ¿Achkë xtqtoʼö rchë kiʼ qakʼuʼx xtqaʼän? Tqatzʼetaʼ kajiʼ ri xtqtoʼö.

¿ACHKË RUBʼANIK KIʼ QAKʼUʼX NQAʼÄN LOMAN NQYOʼEN?

Tqatzʼetaʼ ri ütz yebʼanatäj pa qakʼaslemal. Ri qʼatöy tzij David xtzʼët jontir ri itzelal ri yekiʼän wä ri winäq (Sal. 37:35). Tapeʼ ke riʼ, ryä xuʼij reʼ: «Majun taʼij ta chwäch Jehová y kan rkʼë ronojel awan tayoʼej wä. Ma tkatäj ta ayowal xa kimä ri winäq ri ütz ntel chkiwäch ri itzelal kichʼobʼon pä nkiʼän» (Sal. 37:7). Kan ya riʼ xuʼän David. Ryä majun bʼëy xmestaj ta chë Jehová xuʼij che rä chë xtköl chqä kan xloqʼoqʼej jontir ri xuʼän Jehová rma ryä (Sal.  40:5). We röj chqä nqatzʼët jontir ri ütz yebʼanatäj pa qakʼaslemal, y ma nqayaʼ ta qan chrij ri ma ütz ta yebʼanatäj, ma kʼayewal ta más xtuʼän chqawäch xtqayoʼej Jehová.

Tqakanuj rubʼanik rchë ronojel mul nqayaʼ ruqʼij Jehová. Ri xtzʼibʼan ri Salmo 71 —rkʼë jbʼaʼ David— xuʼij reʼ che rä Jehová: «Rïn ma xtikʼo ta nkʼuʼx xkiyoʼen; xa kan más xtinyaʼ aqʼij» (Sal. 71:14). ¿Achkë rubʼanik ri salmista xyaʼ ruqʼij Jehová? Taq xtzjoj chrij Jehová chkë ri nkʼaj chik chqä taq xbʼixan che rä (Sal. 71:16, 23). Röj chqä nqkowin nqaʼän achiʼel xuʼän David y nqayaʼ ruqʼij Dios taq nqatzjoj le Biblia chkë ri winäq, taq nqatzjoj chrij Jehová chkë qamigos chqä qafamiliares chqä taq nqbʼixan che rä. Rma riʼ, taq rït xtabʼixaj jun chkë ri qabʼix, tatzʼetaʼ achkë nuʼij ruletra. Jontir reʼ xtqrtoʼ rchë kiʼ qakʼuʼx xtqaʼän loman nqayoʼej chë Jehová xtuʼän ri ruchʼobʼon.

Tqajamaʼ qawäch rchë nqjeʼ kikʼë qachʼalal. Taq David xeruqʼaxaj kʼayewal, ryä xuʼij reʼ che rä Jehová: «Chkiwäch ri yeyaʼö aqʼij, rïn xtinkʼuqbʼaʼ nkʼuʼx chrij abʼiʼ» (Sal. 52:9). Achiʼel xuʼän David, ri xkʼwaj riʼ kikʼë nkʼaj rusamajelaʼ Jehová ri xkikʼuqbʼaʼ rukʼuʼx, röj chqä nqkowin nqjeʼ kikʼë qachʼalal taq nqamöl qiʼ pa qaSalón, taq nq·el chutzjoxik le Biblia o xa bʼa akuchï nqajoʼ wä röj (Rom. 1:11, 12).

Tqakʼuqbʼaʼ más qakʼuʼx chrij ri qayoʼen apü. Salmo 62:5 nuʼij: «Tapeʼ ma yiqʼajan ta, rïn nyoʼen ntoʼik rkʼë Dios». Kan kowan nkʼatzin chë röj nqanmaj chë kantzij xtqïl ri qayoʼen apü, y más taq nqatzʼët chë ma nbʼeqä ta na ruqʼij Jehová. Tapeʼ xa bʼa jaruʼ xtkʼatzin xtqayoʼej, röj kʼo chë nqayaʼ chwäch qan chë Jehová xtuʼän ri rutzjun chqë. ¿Achkë ütz nqaʼän rchë nqakʼuqbʼaʼ más qakʼuʼx chrij riʼ? Ri ütz nqaʼän ya riʼ nqatjoj qiʼ chrij Ruchʼaʼäl Dios. Rchë nqaʼän riʼ, nkʼatzin nqaquʼ kij ri profecías, nkʼatzin nqatzʼët achkë rubʼanik kikʼwan kiʼ ri naʼoj ye kʼo chpan le Biblia chqä nqaquʼ achkë nkikʼüt qa chqawäch chrij Jehová ri nqaskʼij chpan (Sal. 1:2, 3). Chqä kʼo chë nqchʼö rkʼë Jehová y nqakʼutuj ri loqʼoläj ruchqʼaʼ rchë nqrtoʼ rchë junan nuʼän qawäch rkʼë ryä, loman nqayoʼej chë xtyaʼ ri kʼaslemal ri rutzjun chqë (Jud. 20, 21).

Achiʼel xuʼij ri qʼatöy tzij David, röj chqä nqkowin nqayaʼ chwäch qan chë Jehová ruyaʼon ruwäch chkij ri nkiyoʼej ri qʼij ri xtuʼän ri rutzjun chkë chqä xtkʼüt chkiwäch chë yerajoʼ (Sal. 33:18, 22). Rma riʼ, rchë kiʼ qakʼuʼx nqaʼän loman nqayoʼej ri qʼij taq Jehová xtuʼän ri ruchʼobʼon, tqatzʼetaʼ ri ütz yebʼanatäj pa qakʼaslemal, tqayaʼ ruqʼij Dios, qjeʼ kikʼë qachʼalal y tqakʼuqbʼaʼ más qakʼuʼx chrij ri qayoʼen apü.