XA TA rït xabʼä chpan ri koʼöl isla Sangir Besar (Indonesia) jojun junaʼ qa, rkʼë jbʼaʼ xeʼakʼül ta oxiʼ qachʼalal ixoqiʼ chuchiʼ ri yaʼ. Tapeʼ re qachʼalal reʼ tamatäl kiwäch chë yekitoʼ ri winäq rchë nqʼax chkiwäch ri nuʼij le Biblia, ryeʼ ma najin ta wä nkitzjoj le Biblia chuchiʼ ri yaʼ. ¿Achkë kʼa najin nkiʼän?

Naʼäy, ryeʼ yeʼok äl pa yaʼ rchë yekikanuj nmaʼq taq abʼäj, achiʼel jun pelota, y yekesaj pä chuchiʼ ri yaʼ. Chrij riʼ yetzʼyeʼ pa ruwiʼ jun chʼakät ri bʼanon rkʼë cheʼ, yekipaxij ri abʼäj rkʼë jun martillo y nkesaj koköj taq abʼäj che rä ri más ye koköj chwäch jun saqmoloʼ. Chrij riʼ, yekiyaʼ äl ri abʼäj riʼ chkipan jojun kach y yejoteʼ äl pa ruwiʼ jojun escaleras rchë yekikʼwaj äl chkachoch. Ryeʼ yekikʼöl ri abʼäj riʼ chkipan nmaʼq taq costales. Pa rukʼisbʼäl, jojun camiones yekikʼwaj äl ri costales riʼ rchë yeksäx ri abʼäj rchë yebʼan bʼey.

Jun chkë ri qachʼalal riʼ ya riʼ ya Hulda. Ryä ütz wä nuʼän chwäch njeʼ qa más tiempo chpan rusamaj chkiwäch ri nkʼaj chik. Rkʼë ri ntoj che rä kimä ri abʼäj, ryä nkowin wä nutoʼ ru-familia rkʼë päq. Ye kʼa komä kʼo jun nrajoʼ nulöqʼ rkʼë rurajil: jun tablet rchë nkowin ntok chpan ri aplicación JW Library^®. Ya Hulda retaman wä chë ri videos chqä ri naʼoj ri ye kʼo chpan ri aplicación riʼ xttoʼ rchë más ütz rubʼanik xttzjoj le Biblia chqä rchë más xtqʼax chwäch ri naʼoj ye kʼo chpan.

Ya Hulda jun ikʼ rkʼë nkʼaj xsamäj kaʼiʼ horas ronojel nmaqʼaʼ, y xkowin xnujsaj jun koʼöl camión kikʼë ri abʼäj ri xerupaxij. Rkʼë riʼ xchʼäk rurajil rchë xlöqʼ ru-tablet.

Ya Hulda xuʼij: «Kantzij na wä chë kan kowan xikos chqä xtiʼon nchʼakul rma xenpaxij abʼäj. Ye kʼa taq ya kʼo chik n-tablet wkʼë y xintzʼët chë yikowin nksaj rchë más ütz rubʼanik ntzjoj le Biblia chqä rchë más chanin ntjoj wiʼ chkij ri qamoloj, xmestäj ri kosïk chwä». Ryä chqä xuʼij chë ru-tablet kowan xtoʼ taq xchapatäj ri pandemia, taq jontir xa pa videoconferencia chik xqaʼän wä. ¡Kan kiʼ qakʼuʼx chë ya Hulda xkowin xlöqʼ ri xrajoʼ!