Naküy rumak jun winäq taq namestaj ri xuʼän chawä chqä ma nkanaj ta jun kʼïx pan awan chrij. Reʼ ma ntel ta chë tzij chë ri xbʼanatäj majun ta ruqʼij o naʼän chë majun bʼëy xbʼanatäj ta.

RI NAʼOJ NUYAʼ LE BIBLIA: «Ronojel mul tikochʼolaʼ iwiʼ chqä ma tikʼewaj ta tikuyulaʼ imak chiwäch. Tibʼanaʼ riʼ tapeʼ kʼo rma yixchʼojin chrij jun chik» (Colosenses 3:13).

«Taq nawajoʼ jun winäq, ma xa xuʼ ta natzʼët ri ma ütz ta yeruʼän, xa kan nayaʼ awan chrij ri ütz ri najin nuʼän» (Aaron).

Taq ma yakyun ta xa nawïl ayabʼil chqä yabʼison, y rkʼë jbʼaʼ xa xtatzʼlaʼ akʼlanen.

«Kʼo jmul, ri wachjil xkʼutuj kuyubʼäl rumak chwä rma kʼo jun ri xuʼän chwä ri kan kowan poqän xnaʼ wan. Tapeʼ kan kʼayewal xuʼän chi nwäch, xinküy rumak. Ri nyaʼö bʼis pa wan ya riʼ chë ma xinküy ta chanin rumak. Ke riʼ ma ta xqïl jojun kʼayewal pa qakʼlajil» (Julia).

TAQUʼ RIJ YA REʼ

Taquʼ rij reʼ taq ri akʼlaj kʼo jun nuʼän chawä ri kan poqän nunaʼ awan rma:

• ¿Kan chanin poqän nunaʼ awan taq kʼo jun nbʼan chawä?

• ¿Kan nkʼatzin nkʼutüx kuyubʼäl mak chawä, o ma kʼayewal ta nuʼän chawäch namestaj ri xbʼan chawä?

RCHE YIXTZJON CHIWÄCH

• ¿Jaruʼ tiempo nukʼwaj chqawäch nqakuyulaʼ qiʼ?

• ¿Achkë nkʼatzin nqaʼän rchë kan chanin nqakuyulaʼ qiʼ?

RI ÜTZ NAʼÄN

• Taq ri akʼlaj yatursök, ma taquʼ ta chë kan chubʼanik xuʼän chawä.

• Ma chanin ta tpë ayowal che rä, tnatäj chawä chë «qonojel röj kan kʼïy mul nqsach» (Santiago 3:2).

«Ma kʼayewal ta nuʼän chqawäch nqkyun taq chöj kaʼiʼ yoj ajmak. Ye kʼa kan más na chik kʼayewal naʼän riʼ taq xa xuʼ jun ajmak. Rchë nqkyun, nkʼatzin ma nqanaʼ ta qiʼ» (Kimberly).

RI NAʼOJ NUYAʼ LE BIBLIA: «Tatjaʼ aqʼij rchë nasöl yän ri akʼayewal» (Mateo 5:25).