CHKË RI QʼOPOJIʼ KʼOJOLAʼ
10. Tabʼanaʼ chë ri nkʼaj chik nkikʼuqbʼaʼ kikʼuʼx chawij
¿ACHKË NTEL CHË TZIJ?
Ri winäq ri kan ütz nakʼuqbʼaʼ akʼuʼx chrij, kan nuʼän ri nbʼix che rä, nuʼän ri nutzüj y ronojel mul kantzij ntzjon. Rma riʼ ruteʼ rutataʼ, ri rachiʼil chqä ri ru-jefe kan nkikʼuqbʼaʼ kikʼuʼx chrij.
¿ACHKË RMA KAN KOWAN RUQʼIJ RE NAʼOJ REʼ?
Rchë nyaʼöx más qʼij chawä rchë naʼän ri nawajoʼ, kʼo chë nakʼüt chë ütz nkikʼuqbʼaʼ kikʼuʼx chawij.
«Rchë ateʼ atat nkikʼuqbʼaʼ kikʼuʼx chawij, nkʼatzin nanmaj tzij, ye kʼo o ma ye kʼo ta awkʼë» (Sarahi).
RI NAʼOJ NUYAʼ LE BIBLIA: «Chaq taqïl titzʼetaʼ achkë inaʼoj najin nikʼüt» (2 Corintios 13:5).
¿ACHKË ÜTZ NAʼÄN?
Ri naʼoj ye kʼo chpan re peraj reʼ xkatkitoʼ rchë ri ateʼ atat xtkikʼuqbʼaʼ chik jmul kikʼuʼx chawij o rchë xtkikʼuqbʼaʼ más kikʼuʼx chawij.
Kantzij katzjon. We rït xa natzʼük tzij, ri winäq ma xtkikʼuqbʼaʼ ta kikʼuʼx chawij. Ye kʼa, we kantzij yatzjon, yajün taq kʼo akuchï yasach wä, ri nkʼaj chik xtkikʼuqbʼaʼ kikʼuʼx chawij.
«Ma kʼayewal ta nuʼän chawäch kantzij yatzjon taq xa kʼo nawajoʼ, ye kʼa ri winäq más xtkikʼuqbʼaʼ kikʼuʼx chawij we kantzij yatzjon tapeʼ kʼo kʼayewal xtkʼäm pä pan awiʼ» (Caiman).
RI NAʼOJ NUYAʼ LE BIBLIA: «Ma nqajoʼ ta nqatzʼük tzij rkʼë xa bʼa achkë nqaʼän» (Hebreos 13:18).
Tabʼanaʼ ri nbʼix chawä. Jun estudio ri xbʼan chlaʼ Estados Unidos, nuʼij chë ri 78% chkë ri yesamäj chrij recursos humanos nkiʼij chë ri naʼän ri nbʼix chawä ya riʼ «jun chkë ri oxiʼ naʼoj ri najowatäj rchë nawïl xa bʼa achkë samaj». Ri natamaj naʼän ri nbʼix chawä komä, ya riʼ xkaturtoʼ chpan akʼaslemal.
«Taq rïn kan nbʼän jun samaj y ri nteʼ ntataʼ ma nkʼatzin ta chë kan kʼïy bʼyaj nkiʼij chwä, ryeʼ kan nkitzʼët riʼ. Taq nbʼän ri nbʼix chwä, ryeʼ más nkikʼuqbʼaʼ kikʼuʼx chwij» (Sarah).
RI NAʼOJ NUYAʼ LE BIBLIA: «Rïn ntaman chë rït xtanmaj ntzij, [...] y ma xa xuʼ ta xtaʼän ri xinbʼij äl chawä, xa kan kʼo chik nkʼaj xtaʼän» (Filemón 21, nota).
Ma tikʼo ta akʼuʼx. Kan chaq bʼaʼ nqʼalajin taq jun winäq njalatäj rubʼanik, ye kʼa nukʼwaj tiempo rchë natzʼët chë jun winäq ya kʼo chik runaʼoj.
«Ri ateʼ atataʼ chqä ri nkʼaj chik winäq ma chaq bʼaʼ ta nkikʼuqbʼaʼ kikʼuʼx chawij, ye kʼa we kan naʼän ri nbʼix chawä, ryeʼ xtkikʼuqbʼaʼ más kikʼuʼx chawij» (Brandon).
RI NAʼOJ NUYAʼ LE BIBLIA: «Titamaj yixyoʼen» (Colosenses 3:12).
