Ri kʼlan taq winäq ri nkitolaʼ kiʼ chkiwäch, ye achiʼel jun winäq ri nkʼwan avión chqä rachiʼil. Ma xa xuʼ ta ryeʼ nkiquʼ qa kiʼ, xa kan nkiquʼ rij achkë utzil nkïl che kaʼiʼ, yajün taq kʼo kʼayewal nkïl.

RI NAʼOJ NUYAʼ LE BIBLIA: «Ma yë kaʼiʼ ta chik, xa jun chʼakulaj chik kibʼanon» (Mateo 19:6).

«Ri kʼlan taq winäq nkʼatzin nkitolaʼ kiʼ chkiwäch rchë ütz yebʼä pa kikʼlajil» (Christopher).

Taq ri kʼlan ta winäq ma nkitolaʼ ta kiʼ chkiwäch, taq nkïl jun kʼayewal, xa chrij kikʼlaj nkesaj wä kiyowal y, pa rukʼisbʼäl, xa más nüm xkiʼän che rä ri kʼayewal riʼ.

«Kan nkʼatzin nqatolaʼ qiʼ pa qakʼlajil. Xa ta ri wachjïl y rïn ma ta nqatolaʼqi, xa yoj achiʼel ta qachiʼil qiʼ chpan jun jay: kaʼiʼ winäq ri ye kʼo junan, ye kʼa ma junan ta nuʼän kiwäch taq kʼo jun nkichaʼ nkiʼän» (Alexandra).

TAQUʼ KIJ RE KʼUTUNÏK REʼ

• ¿Naquʼ rït chë ri päq nachʼäk xa xuʼ awchë rït?

• ¿Nanaʼ rït chë taq majun ta akʼlaj awkʼë ya riʼ taq yakowin yatuxlan jbʼaʼ?

• ¿Ma kan ta nakʼwaj awiʼ rkʼë ru-familia akʼlaj tapeʼ ryeʼ kan junan rubʼanon kiwäch?

RCHË YIXTZJON CHIWÄCH

• ¿Ajän riʼ taq junan nuʼän qawäch pa qakʼlajil?

• ¿Achkë nqkowin más ütz nqaʼän che rä?

• ¿Achkë ütz nqaʼän rchë nqatolaʼ más qiʼ chqawäch?

RI ÜTZ NAʼÄN

• Taquʼ na peʼ chë rït chqä akʼlaj achiʼel ta yïx kʼo chpan jun atzʼanen. ¿Achkë ütz niʼän rchë iwachiʼil iwiʼ yixetzʼan y ma nijäch ta iwiʼ?

• Pa rukʼexel naquʼ achkë rubʼanik xkachʼakon rït, taquʼ achkë rubʼanik yixchʼakon chixkaʼiʼ.

«Ri kʼo más ruqʼij chpan jun kʼlanen, ya riʼ taq ri achï chqä ri ixöq junan rubʼanon kiwäch» (Ethan).

RI NAʼOJ NUYAʼ LE BIBLIA: «Ma tiʼän ta xa xuʼ ri nkʼatzin chiwä rïx, xa tibʼanaʼ chqä ri nkʼatzin chkë ri nkʼaj chik» (Filipenses 2:3, 4).