Ri pa chʼaʼäl hebreo ma xa xuʼ ta jun ntel wä ri naʼäy tzij nqïl chpan ri versículo 12. Rma riʼ, ri xtqatzjoj qa xtqʼalajsaj chqawäch achkë nrajoʼ nuʼij.

1. Tqatzʼetaʼ ri nkiʼij ri nikʼaj chik versículos. Rma xkusäx ri tzij «rma riʼ» chpan ri versículo 12, nuʼän chë ri utzil nkitzjoj ri versículos 12 kʼa 14, pa kiwiʼ ri utziläj taq winäq yeqa wä. Ri winäq riʼ, ya riʼ ri najin nkikʼutuj kitoʼik rchë kekol chkiwäch ri itzel taq winäq (versículo 11). Re naʼoj reʼ nqïl chqä chpan ri versículo 15. Taq chriʼ nuksaj kaʼiʼ mul ri tzij «kiʼ kikʼuʼx», nchʼö chqä chkij ri utziläj taq winäq, «ri yë Jehová ri ki-Dios».

2. Re naʼoj reʼ rukʼwan riʼ kikʼë ri nikʼaj chik versículos ri ye kʼo chpan le Biblia, ri akuchï nqïl chqä ri nutzüj Dios chkë ri winäq ri nkiyaʼ ruqʼij. Re Salmo reʼ nukʼüt rukʼuqbʼäl kʼuʼx David rkʼë Jehová chë taq xkeruköl ri israelitas chkiwäch ri itzel taq winäq, xtuyaʼ na wä kiʼkʼuxlal chqä utzil pa kiwiʼ (Levítico 26:9, 10; Deuteronomio 7:13; Salmo 128:1-6). Jun tzʼetbʼäl, ri Deuteronomio 28:4 nuʼij: «Kan xtinyaʼ utzil pa kiwiʼ ri awalkʼwal, pa ruwiʼ ri atikoʼn, pa kiwiʼ ri alajiʼ taq awakx chqä pa kiwiʼ ri alajiʼ taq akarneʼl». Kantzij na wä, pa ruqʼatbʼäl tzij Salomón, ri rukʼajol David, ri israelitas xkʼojeʼ uxlanen kikʼë chqä kan pa rukʼiyal ri achkë jun xkʼojeʼ kikʼë ri majun bʼey tzʼeton ta. Kʼïy ri xetzʼetetäj qa chpan ri qʼij riʼ, xa xuʼ xuyaʼ pä jujun retal ri xkebʼanatäj taq Jesús xtqʼatö tzij (1 Reyes 4:20, 21; Salmo 72:1-20).

Jontir ri xqatzʼët qa, nkikʼüt chqawäch chë ronojel ri nuʼij chpan Salmo 144 ya riʼ ri kiyoʼen apü ri nkiyaʼ ruqʼij Jehová. Ri winäq riʼ kiyoʼen ri qʼij taq Jehová xtuqʼät tzij pa kiwiʼ ri itzel taq winäq chqä taq xtukʼän pä uxlanen chqä utzil pa kiwiʼ ri nkinmaj rutzij (Salmo 37:10, 11).