Taq xuʼän pä jun 13 njunaʼ, eqal eqal xchaʼ chiʼ ri wachbʼilanïk rkʼë Jehová. Chi nwäch rïn, ri wachiʼil pa tijobʼäl nkiʼän wä jontir ri nkajoʼ. Rïn chqä xinwajoʼ xinbʼän riʼ. Rma riʼ xinnaʼ chë ri nteʼ ntataʼ chqä ri naʼoj ye kʼo chpan le Biblia kan majun ta wä nkiyaʼ qʼij chwä rchë nbʼän. Chqä xintzʼët chë ri ruyaʼik ruqʼij Dios achiʼel ta xa jun ejqaʼn. Tapeʼ ronojel mul xinmaj chë Jehová kʼo, ye kʼa xinnaʼ chë kʼa näj kʼo wä chwä.

Majun bʼëy xikanaj ta qa, ye kʼa ma kan ta kʼïy chik xinbʼän chutzjoxik le Biblia. Taq yinel wä chbʼanik ri samaj riʼ, ma ntjoj ta wä äl wiʼ. Rma riʼ kan kʼayewal xuʼän chi nwäch xitzjon kikʼë ri winäq. Reʼ xuʼän chë ri winäq ma xkajoʼ ta xinkamluj kichʼbʼexik o xkitjoj ta kiʼ chrij le Biblia wkʼë. Rma riʼ ma kan ta jaʼäl chik xinnaʼ xinel chutzjoxik le Biblia. Riʼ xuʼän chë kan más na chik ma xqä ta chi nwäch xinbʼän ri samaj riʼ. Nbʼij wä qa chi nwäch: «¿Achkë rubʼanik nuʼän jun winäq re samaj reʼ, si kowan kʼayewal rubʼanik?».

Taq xuʼän pä 17 njunaʼ, kʼo ta xinwajoʼ rïn chë ma ta yïn kʼo ta chik chriʼ chwachoch. Rma riʼ, xinmöl äl ntzyaq chqä xibʼä Australia. Tapeʼ ri nteʼ  ntataʼ kan xebʼison qa, ryeʼ kan kikʼuqbʼan wä kikʼuʼx chë rïn ma xtinyaʼ ta qa Jehová.

Taq yïn kʼo wä chik Australia, kan ma xinyaʼ ta chik wan chrij ruyaʼik ruqʼij Jehová. Ma yibʼä ta wä chik chkipan jontir ri qamoloj chqä xenwachbʼilaj jojun qʼopojiʼ kʼojolaʼ ri junan wä qabʼanik kikʼë; jun qʼij nqbʼä wä pa moloj, y ri jun chik, nqbʼä wä jukʼan chik rchë nqbʼexajö chqä rchë nqabʼetjaʼ yaʼ. Komä kʼa riʼ nqʼax chi nwäch chë xa kaʼiʼ wä rubʼanik kʼaslemal xinkʼwaj. Tapeʼ ke riʼ, ma kiʼ ta wä nkʼuʼx.

Jun kaʼiʼ junaʼ chrij riʼ xintamaj ruwäch jun qachʼalal ixöq ri, rkʼë ri xeruʼän, xirutoʼ rchë xintzʼët achkë najin nbʼän rkʼë nkʼaslemal. Chpan ri jay ri akuchï yïn kʼo wä, yoj kʼo wä yoj woʼoʼ qʼopojiʼ ri ma yoj kʼlan ta. Röj xqaʼij che rä ri ukʼwäy bʼey ri nbʼechʼaʼen kichë ri congregaciones chqä che rä ya Tamara, ri rixjayil, chë kekanaj qa jun semana qkʼë. Loman ri ukʼwäy bʼey nutzʼët achkë nkʼatzin chpan ri congregación, ya Tamara njeʼ wä qa qkʼë röj chqä kan xa xuʼ tzeʼen nqaʼän. ¡Ya riʼ kan xqä chi nwäch! Majun bʼëy xinquʼ ta rïn chë jun winäq ri kʼuqül rukʼuʼx pa ruchʼaʼäl Dios kowan jaʼäl runaʼoj chqä ma kʼayewal ta yatzjon rkʼë.

Ya Tamara kan kowan wä nuloqʼoqʼej ri naʼoj ye kʼo chpan le Biblia chqä kan nqä wä chwäch yerutzjoj ri naʼoj riʼ chkë ri winäq, y kan nuʼän wä chë ke riʼ chqä nanaʼ rït. Ryä kan kiʼ wä rukʼuʼx rma najin nuyaʼ ri más ütz kʼo rkʼë che rä Jehová, ye kʼa rïn xa yibʼison rma xa jbʼaʼ wä najin nbʼän. Ri runaʼoj xkʼüt taq nuyaʼ ruqʼij Jehová kan janina xirutoʼ. Ryä xuʼän chë xnatäj pä jun naʼoj chwä ri kan janina rejqalen, ya riʼ chë Jehová nrajoʼ chë kan kiʼ qakʼuʼx nqayaʼ ruqʼij (Sal. 100:2).

Rïn nwajoʼ wä chë kiʼ nkʼuʼx nbʼän kan achiʼel ya Tamara. Ye kʼa rchë xbʼanatäj riʼ xkʼatzin kʼo xinjäl pa nkʼaslemal. Tapeʼ xkʼwaj tiempo chi nwäch, eqal eqal xikowin xinbʼän riʼ. Ntjoj wä äl wiʼ taq yinel chutzjoxik le Biblia chqä jojun mul xinbʼän n-precursorado auxiliar. Reʼ xirutoʼ rchë ma kan ta xinxiʼij chik wiʼ xitzjon kikʼë ri winäq. Y rma nksaj wä más le Biblia kikʼë ri winäq, riʼ xuʼän chë kan más  kiʼ nkʼuʼx xinbʼän. Jbʼaʼ chrij riʼ xinchäp ri precursorado auxiliar ronojel ikʼ.

Rïn chqä xenkanuj wachiʼil ri jalajöj kijunaʼ ri kʼuqül kikʼuʼx pa ruchʼaʼäl Dios chqä ri kan kiʼ wä kikʼuʼx nkiyaʼ ruqʼij Jehová. Riʼ xirutoʼ rchë xintzʼët achkë najin nyaʼ más rejqalen chpan nkʼaslemal chqä rchë xinskʼij ruwäch le Biblia ronojel qʼij. Eqal eqal más jaʼäl xinnaʼ xinel chutzjoxik le Biblia. Rma riʼ xinchäp ri precursorado regular. Xqʼax na kʼïy junaʼ rchë kiʼ chik jmul nkʼuʼx xinbʼän pa congregación.

Jun junaʼ chrij riʼ xintamaj ruwäch Alex, jun qachʼalal ri kan jaʼäl runaʼoj. Ryä kan kowan wä nrajoʼ Jehová chqä kan nqä wä chwäch nutzjoj le Biblia. Ryä toʼonel wä pa congregación y rukʼwan wä 6 junaʼ pa precursorado. Chqä bʼenäq wä jojun ikʼ Malaui, ri akuchï nkʼatzin wä más toʼïk chrij rutzjoxik le Biblia. Chriʼ xjeʼ kikʼë jojun misioneros ri kan xkiyaʼ qa jun utziläj tzʼetbʼäl chwäch chqä xkitoʼ rchë yë ri Ruqʼatbʼäl Tzij Dios xyaʼ naʼäy pa rukʼaslemal.

Pa junaʼ 2003, Alex chqä rïn xqkʼleʼ, y chöj kaʼiʼ ma xqayaʼ ta qa ri precursorado. Kan kʼïy utziläj taq naʼoj qataman pä chqä Jehová kan kʼïy rubʼanik ruyaʼon pä utzil pa qawiʼ.

Pa junaʼ 2009, xbʼix chqë chë xtq-ok misioneros pa Timor Oriental, jun koʼöl tinamït ri kʼo chnaqaj Indonesia. Röj kan xel qakʼuʼx chqä xqayoʼej apü ri qʼij riʼ, ye kʼa qaxiʼin wä jbʼaʼ qiʼ. Woʼoʼ ikʼ chrij riʼ xqapon Dili, jun tinamït rchë Timor Oriental.

Ri kʼaslemal xqakʼwaj chpan ri tinamït riʼ chöj ma junan ta wä rkʼë ri xqakʼwaj rubʼanon qa. Kʼo chë xkʼluj chqë ri ki-costumbres ri winäq, ri rukïl wäy nkitäj, ri rubʼanik kikʼaslemal, chqä kʼo chë xqatamaj kichʼaʼäl. Taq nq-el wä chutzjoxik le Biblia, chaq taqïl wä yeqïl winäq ri ye kʼo pa mebʼaʼïl, ri xebʼä jbʼaʼ pa tijobʼäl o kan ma xebʼä ta, chqä ri kan ma pa rubʼeyal ta nbʼan kikʼë. Y xqatamaj kiwäch ye kʼïy winäq ri kilon wä kʼayewal chqä  chaq nkixiʼij wä kiʼ rma ri chʼaʼoj bʼanatajnäq pa kitinamit chqä kimä ri itzel taq winäq. *

Rïn kan xqä chi nwäch xintzjoj le Biblia chpan ri tinamït riʼ. Kʼo jun qʼij xinwïl jun ti qʼopoj ri 13 wä rujunaʼ rubʼiniʼan María. * Ti qʼopoj riʼ kan kowan wä nbʼison. Ruteʼ kamnäq wä pa jun kayoxiʼ junaʼ qa, y rma ma junan ta kʼo rkʼë rutataʼ, ma kan ta más nutzʼët ruwäch. Y achiʼel wä ri nkʼaj chik akʼalaʼ ri junan rujunaʼ kikʼë, María ma retaman ta wä achkë xtuʼän rkʼë rukʼaslemal. Nnatäj chwä chë kʼo jmul kan rkʼë oqʼej xuʼij chwä achkë wä nunaʼ. Ye kʼa rïn ma xqʼax ta chi nwäch ri xuʼij chwä rma kʼa majanä wä yikowin ta yitzjon ruchʼaʼäl. Rma riʼ xichʼö rkʼë Jehová chqä xinbʼij che rä chë kirutoʼ pä rchë yikowin nkʼuqbʼaʼ rukʼuʼx, ya riʼ taq xinskʼij jojun textos chwäch. Taq xeqʼax jojun junaʼ, xintzʼët achkë rubʼanik ri naʼoj ye kʼo chpan le Biblia xkijäl runaʼoj, ri rubʼanik nuwäq riʼ chqä rukʼaslemal María. Ryä xqasäx pa yaʼ chqä komä najin chik yerutjoj nkʼaj winäq chrij le Biblia. Ryä xok chpan ru-familia Jehová y kan nunaʼ chë najowäx.

Kantzij na wä chë Jehová najin nuyaʼ utzil pa ruwiʼ ri samaj najin nbʼan chrij rutzjoxik le Biblia pa Timor Oriental. Chkipan ri 10 junaʼ ri ye qʼaxnäq pä kan konojel bʼaʼ chkë ri publicadores yeqasan pa yaʼ. Kʼïy chkë ryeʼ ye oknäq precursores, ye toʼonelaʼ o ye ukʼwäy bʼey pa congregación. Ye kʼo chik jojun yesamäj pa Oficina de Traducción rchë nkiqʼaxaj ri qa-publicaciones chkipan ri chʼaʼäl ri yetzjon ri winäq chkipan ri tinamït riʼ. Kan jaʼäl nnaʼ wan taq nkʼoxaj chë yebʼixan che rä Jehová chkipan ri moloj, taq ntzʼët chë kiʼ kikʼuʼx chqä chë najin nkʼuqeʼ pä kikʼuʼx pa ruchʼaʼäl Dios.

Ri rubʼanik kʼaslemal xqakʼwaj pa Timor Oriental kan ma junan ta wä rkʼë ri xqakʼwaj pa Australia. Ye kʼa majun ta chik jun akuchï ri más ta kiʼ nkʼuʼx xinbʼän. Kʼo mul, nqbʼä wä chpan jun chʼichʼ ri ye kʼo winäq chpan ri yetzolin wä pä pa kʼaybʼäl y rma riʼ kikʼwan äl kär o verduras. Kʼo jojun qʼij yeqatjoj wä ri winäq chrij le Biblia chkipan koköj taq jay ri xa ulew kipan chqä kowan kʼatän kipan, y chaq ye kʼo wä äkʼ ri yebʼiyaj pä chriʼ. Tapeʼ kʼo mul kʼayewal jbʼaʼ xuʼän, kʼïy mul xinquʼ: «¡Kan jaʼäl nnaʼ yïn kʼo aweʼ!».

Taq nquʼ rij jontir ri xinqʼaxaj pä, kan yityoxin rma ri nteʼ ntataʼ xkitäj kiqʼij rchë xkikʼüt chrij Jehová chi nwäch chqä rma ronojel mul xinkitoʼ, tapeʼ kan kʼayewal xuʼän chkiwäch taq xikʼïy qʼanäj. Ri tzij ye kʼo chpan Proverbios 22:6 kan xetzʼaqät chpan nkʼaslemal. Ri nteʼ ntataʼ kan ütz kitzʼeton chë Jehová najin nqrksaj chpan rutinamit, rma riʼ kan kiʼ kikʼuʼx kibʼanon qkʼë. Kan pa junaʼ 2016 kʼa komä, Alex chqä rïn najin yeqabʼechʼaʼej ri congregaciones ri ye kʼo chpan ru-territorio ri sucursal kʼo Australasia.

Kan ma nqʼax ta chi nwäch achkë rma xintzʼët ri rutzjoxik le Biblia achiʼel ta jun ejqaʼn, rma komä ¡kan nqä chi nwäch nbʼän re samaj reʼ! Xqʼax chi nwäch chë, we nwajoʼ kiʼ nkʼuʼx nbʼän, nkʼatzin nyaʼ ruqʼij Jehová rkʼë ronojel wan tapeʼ nqaqʼaxaj xa bʼa achkë kʼayewal. Rïn nnaʼ chë kan kowan kiʼ nkʼuʼx nbʼanon pä chkipan ri 18 junaʼ ri junan qayaʼon pä ruqʼij Jehová rkʼë Alex. Komä ntzʼët chë David kan kʼo wä rma xuʼij reʼ che rä Jehová: «Jontir ri nkitoʼ kiʼ awkʼë kan kiʼ kikʼuʼx xtkiʼän; kan ronojel mul xtkiräq kichiʼ rma ri kiʼkʼuxlal xtkinaʼ [...], y ri nkajoʼ ri abʼiʼ kan kiʼ kikʼuʼx xtkiʼän awumä rït» (Sal. 5:11).