1, 2. ¿Achkë tzʼetbʼäl nqtoʼö rchë nqʼax pa qajolon ri nuʼij chpan 1 Pedro 2:21?

TQABʼANAʼ che rä chë yoj bʼenäq pa bʼyajen kikʼë nkʼaj chik winäq chpan jun mamaʼ kʼechelaj ri kan nxiʼin yabʼä chpan. Tapeʼ ke riʼ, bʼenäq äl jun winäq qkʼë ri retaman achkë bʼey kʼo chë nqakʼwaj. Re winäq reʼ kʼo äl chqawäch, ye kʼa chaq kʼateʼ ma nqatzʼët ta chik. Tapeʼ ke riʼ, ma nqaxiʼij ta qiʼ rma kʼo qa retal raqän chpan ri bʼey ri chʼabʼäq rubʼanon. Rma riʼ, röj chqä ri winäq ri ye kʼo qkʼë kan nqatzeqelbʼej äl retal raqän ri achï riʼ.

² Le ruwachʼulew reʼ ütz nqajnamaj rkʼë ri kʼechelaj riʼ ri kan nxiʼin yabʼä chpan. Y röj, ri kantzij taq cristianos, kan achiʼel ta yoj bʼenäq chpan ri bʼey riʼ. Tapeʼ ke riʼ, Jehová ruyaʼon qa Jesús, ri Rukʼajol, rchë nukʼüt chqawäch achkë bʼey kʼo chë nqakʼwaj. Ye kʼa nkʼatzin chë röj kan achiʼel ta nqatzeqelbʼej ri retal raqän ruyaʼon qa ryä, ntel chë tzij, nqaʼän kan achiʼel xuʼän Jesús (1 Ped. 2:21). Jun wuj ri nutzjoj rij le Biblia nuʼij chë Pedro xjnamaj Jesús rkʼë jun achï ri nukʼüt kibʼey ri nkʼaj chik. Achiʼel ri achï ri xqatzjoj qa chpan ri tzʼetbʼäl, Jesús achiʼel ta ruyaʼon qa retal raqän rchë röj nqkowin nqatzeqelbʼej. Rma riʼ keqaqʼalajsaj re kʼutunïk reʼ: ¿Achkë tzʼetbʼäl xyaʼ qa Jesús chqawäch ri kʼo chë nqatzeqelbʼej? ¿Achkë rma kʼo chë nqaʼän riʼ? Y, ¿achkë rubʼanik xtqaʼän riʼ?

3. ¿Achkë ntel chë tzij ri achiʼel ta natzeqelbʼej retal raqän jun winäq?

³ ¿Achkë ntel chë tzij ri achiʼel ta natzeqelbʼej retal raqän jun winäq? Chpan le Biblia, ri tzij nbʼiyïn kʼo mul nukʼambʼej tzij ri nuʼän jun winäq chpan rukʼaslemal (Gén. 6:9; Prov. 4:26). Ri tzʼetbʼäl nuyaʼ jun winäq ütz njnamäx rkʼë retal raqän ri nuyaʼ qa  taq nbʼiyïn. Rma riʼ, ri natzeqelbʼej retal raqän jun winäq ntel chë tzij nakʼän anaʼoj chrij.

4. ¿Achkë tzʼetbʼäl xyaʼ qa Jesús ri ütz nqatzeqelbʼej?

⁴ Rma riʼ, we röj nqatzeqelbʼej ri tzʼetbʼäl xyaʼ qa Jesús, reʼ ntel chë tzij chë achiʼel ta kan najin nqatzeqelbʼej ri retal raqän. ¿Achkë tzʼetbʼäl xyaʼ qa chqawäch? Chpan ri texto rchë re tjonïk reʼ, ri apóstol Pedro xtzjoj rij ri utziläj tzʼetbʼäl xyaʼ qa Jesús chqawäch taq xköchʼ ri tijöj poqonal. Ye kʼa kan kʼo kʼïy ri achoq chrij ütz nqakʼän wä qanaʼoj chrij Jesús (1 Ped. 2:18-25). Ütz nqaʼij chë jontir ri xuʼän chqä ri xuʼij Jesús chpan rukʼaslemal kan jun utziläj tzʼetbʼäl chqawäch.

5. Taqʼalajsaj achkë rma nqaʼij chë jontir röj, tapeʼ xa yoj ajmakiʼ, nqkowin nqaʼän kan achiʼel xuʼän Jesús.

⁵ Ye kʼa, ¿nqkowin röj nqatzeqelbʼej ri tzʼetbʼäl xyaʼ qa Jesús tapeʼ xa yoj ajmakiʼ? Jaʼ, nqkowin. Tqʼax pa qajolon chë ri apóstol Pedro ma xuʼij ta chë kʼo chë «kan ma nqsach ta» taq nqatzeqelbʼej rij Jesús. Pa rukʼexel riʼ, ryä xuʼij chë «tqabʼanaʼ kan achiʼel xuʼän ryä». We nqatäj qaqʼij rchë nqatzeqelbʼej ri tzʼetbʼäl xyaʼ qa Jesús, xtqakʼüt chë najin nqasmajij ri naʼoj xyaʼ qa ri apóstol Juan taq xuʼij chë tqabʼanaʼ kan achiʼel xuʼän Jesús (1 Juan 2:6).

6, 7. ¿Achkë rma nqaʼij chë xtqjelun rkʼë Jehová we xtqatzeqelbʼej ri tzʼetbʼäl xyaʼ qa Jesús chqawäch?

⁶ We nqatzeqelbʼej rij ri tzʼetbʼäl xyaʼ qa Jesús, riʼ xtuʼän chë xtqjelun rkʼë Jehová. ¿Achkë rma nqaʼij riʼ? Naʼäy, Jesús xyaʼ qa jun utziläj tzʼetbʼäl chqawäch chrij ri rubʼanik nqakʼwaj jun kʼaslemal ri nqä chwäch Dios (Juan 8:29). Rma riʼ, we röj nqatzeqelbʼej rij Jesús, Jehová kiʼ rukʼuʼx xtuʼän qkʼë. Chqä ütz nqayaʼ chwäch qan chë ri utziläj Qatataʼ kʼo chkaj xtjelun kikʼë ri winäq ri nkajoʼ yeʼok rachiʼil (Sant. 4:8).

⁷ Rukaʼn, Jesús kan tzʼaqät rubʼanik xkʼüt runaʼoj Rutataʼ. Rma riʼ, ryä xkowin xuʼij: «Ri yirutzʼeton rïn rutzʼeton ri Ntataʼ chqä» (Juan  14:9). Xtqʼalajin chqij chë qakʼamon qanaʼoj chrij Jehová we xtqakʼüt runaʼoj Jesús. Jojun tzʼetbʼäl. Jesús kan ütz runaʼoj xuʼän rkʼë jun winäq ri kʼo lepra chrij, xkʼüt chë xnaʼ ri xnaʼ jun ixöq ri rlon jun itzel yabʼil chqä xkʼüt chë kan xjyowaj kiwäch ri winäq ri xkäm jun kichʼalal (Mar. 1:40, 41; 5:25-34; Juan 11:33-35). Taq más nqatäj qaqʼij rchë nqakʼän runaʼoj Jehová, más naqaj xtqjeʼ wä che rä.

8. Taqʼalajsaj achkë rma ri nqatzeqelbʼej rij ri tzʼetbʼäl xyaʼ qa Jesús xtqrtoʼ rchë nqchʼakon chrij le ruwachʼulew.

⁸ We nqatzeqelbʼej rij ri tzʼetbʼäl xyaʼ qa Jesús, ma xtbʼä ta qakʼuʼx chrij jontir ri nutzüj le ruwachʼulew. Ri rukʼisbʼäl aqʼaʼ xjeʼ kikʼë ri rutzeqelbʼëy, Jesús xuʼij reʼ: «Rïn xichʼakon chrij le ruwachʼulew» (Juan 16:33). Kikʼë re tzij reʼ, Jesús xuʼij chë ryä ma xyaʼ ta qʼij chë le ruwachʼulew xuʼän ta chë ma ta xyaʼ ran chrij rusamaj Jehová o xjäl ta ri rubʼanik xchʼobʼon o ri rubʼanobʼal xeruʼän. Ryä majun bʼëy xmestaj ta chë xtaq pä chwäch le Ruwachʼulew rchë nuchʼajchʼobʼej rubʼiʼ Jehová. Ye kʼa, ¿achkë xtqaʼän röj? Chwäch le ruwachʼulew kan kʼo kʼïy ri rkʼë jbʼaʼ nkiʼän chë ma nqayaʼ ta chik qan chrij rusamaj Jehová. Ye kʼa we nqayaʼ qan chbʼanik ruraybʼal Jehová, kan achiʼel xuʼän Jesús, röj chqä xtqkowin xtchʼakon chrij le ruwachʼulew (1 Juan 5:5).

9. ¿Achkë nkʼatzin nqaʼän rchë ma nq-el ta qa chpan ri bʼey ri nqrkʼwaj chpan ri kʼaslemal ri majun bʼëy xtkʼis ta?

⁹ We nqatzeqelbʼej rij ri tzʼetbʼäl xyaʼ qa Jesús, xtqïl ri kʼaslemal ri majun bʼëy xtkʼis ta. Taq jun bʼeyon achï xkʼutuj che rä Jesús achkë kʼo chë nuʼän rchë nrïl ri kʼaslemal ri majun bʼëy xtkʼis ta, ryä xuʼij reʼ che rä: «Katok nutzeqelbʼëy» (Mat. 19:16-21). Jesús xuʼij reʼ chkë jojun judíos ri ma xkinmaj ta chë yë wä ryä ri Cristo: «Ri nkarneʼl [...] yinkitzeqelbʼej. Rïn nyaʼ kikʼaslemal ri majun bʼëy xtkʼis ta» (Juan 10:24-29). Y che rä Nicodemo, jun chkë ri kʼo pa Sanedrín ri xrajoʼ xtamaj achkë nukʼüt Jesús, xuʼij che rä chë ri xkekʼtü chë kikʼuqbʼan kikʼuʼx chrij xtkïl ri kʼaslemal ri majun bʼëy xtkʼis ta (Juan 3:16). Xtqakʼüt chë qakʼuqbʼan qakʼuʼx chrij Jesús taq nqasmajij ri xkʼüt qa ryä rkʼë ri xuʼij chqä ri xuʼän. We xtqaʼän riʼ, ma xtq-el ta qa chpan ri bʼey ri nqrkʼwaj chpan ri kʼaslemal ri majun bʼëy xtkʼis ta (Mat. 7:14).

10. ¿Achkë kʼo chë nqaʼän rchë nqatamaj más ruwäch Jesús? (Juan 17:3).

¹⁰ Rchë xtqkowin xtqaʼän kan achiʼel xuʼän Jesús, naʼäy kʼo chë nqatamaj ruwäch (taskʼij ruwäch Juan 17:3). Rchë nqatamaj ruwäch Jesús kʼo chë chaq taqïl nqatamaj más chrij ryä. Röj kʼo chë nqatäj qaqʼij rchë ronojel mul nqatamaj más ruwäch, ntel chë tzij, nqatamaj achkë naʼoj ye kʼo rkʼë, ri rubʼanik nchʼobʼon chqä achkë pixaʼ yeruyaʼon qa. Xa bʼa jaruʼ na kʼa junaʼ yoj kʼo chpan rutinamit Jehová, jontir röj kʼo ta chë nqatäj qaqʼij rchë nqatamaj más ruwäch Jehová chqä Jesús.

11. ¿Achkë nqïl chkipan ri kajiʼ Evangelios?

 ¹¹ Jehová kowan nqrajoʼ. Rma riʼ xyaʼ qa ri kajiʼ Evangelios chpan Ruchʼaʼäl rchë röj nqatamaj ruwäch Rukʼajol. Chkipan reʼ, nqatzʼët achkë rubʼanik Jesús xuʼän rusamaj Dios chqä achkë chik nkʼaj xeruʼän pa rukʼaslemal. Chqä nkitzjoj chqë achkë xuʼij, xuʼän chqä xnaʼ Jesús. Re kajiʼ wuj reʼ yojkitoʼ rchë nqaquʼ rij achkë tzʼetbʼäl xyaʼ qa Jesús chqawäch (Heb. 12:3). Rma riʼ, ütz nqaʼij chë chkipan re wuj reʼ achiʼel ta nqatzʼët ri retal raqän Jesús. We nqanukʼuj kiwäch ri Evangelios, röj xtqkowin xtqatamaj más ruwäch Jesús rchë xtqaʼän kan achiʼel xuʼän ryä.

12. ¿Achkë kʼo chë nqaʼän rchë kan kʼo xtqatamaj qa taq xtqanukʼuj kiwäch ri Evangelios?

¹² Rchë kan kʼo nqatamaj qa chkij ri kajiʼ Evangelios, ma xa xuʼ ta nkʼatzin nqaskʼij kiwäch. Röj kʼo chë nqajäm qawäch rchë nqanukʼuj kiwäch chqä rchë nqchʼobʼon chkij (tajnamaj rkʼë Josué 1:8). Keqatzʼetaʼ kaʼiʼ naʼoj ri xkojkitoʼ rchë xtqchʼobʼon chkij ri xtqaskʼij kiwäch chkipan ri Evangelios chqä rchë xkeqasmajij ri naʼoj riʼ pa qakʼaslemal.

13. ¿Achkë nkʼatzin nqaʼän rchë kan achiʼel ta najin nbʼanatäj ri nqaskʼij ruwäch chkipan ri Evangelios?

¹³ Naʼäy, tqabʼanaʼ chë kan achiʼel ta najin nbʼanatäj ri nqaskʼij ruwäch chkipan ri Evangelios. Tqatjaʼ qaqʼij rchë achiʼel ta kan nqatzʼët, nqakʼoxaj chqä nqanaʼ ri xbʼanatäj chkipan ri qʼij riʼ. Ri publicaciones ri ruyaʼon pä rutinamit Jehová janina xkojkitoʼ rchë xtqaʼän riʼ. Tqatzʼetaʼ achkë ru-contexto ri peraj najin nqanukʼuj ruwäch. Tqakanuj más naʼoj chkij ri winäq, ri tinamït chqä chrij ri achkë xbʼanatäj chpan ri tiempo riʼ. We ri peraj ri najin nqaskʼij ruwäch kʼo chqä chkipan ri nkʼaj chik Evangelios, tqajnamaj kikʼë ri peraj riʼ. Reʼ xtuʼän chë xkeqïl naʼoj ri rkʼë jbʼaʼ kʼo chpan jun Evangelio ye kʼa majun ta chpan jun chik.

14, 15. ¿Achkë kʼo chë nqaʼän rchë yeqasmajij ri naʼoj yeqïl chkipan ri Evangelios?

¹⁴ Rukaʼn, keqasmajij ri naʼoj yeqïl chkipan ri Evangelios (Juan 13:17). Taq xqaskʼij yän ruwäch jun peraj chkë ri Evangelios, tqakʼutuj qa reʼ chqawäch: «¿Achkë nukʼüt qa re peraj reʼ chi nwäch? ¿Achkë rubʼanik nksaj re naʼoj reʼ rchë  yentoʼ ri nkʼaj chik?». Tqaquʼ rij jun winäq ri qataman ruwäch, y taq ütz xtuʼän, tqaʼij che rä ri naʼoj xqatamaj, ye kʼa kan tqakanuj na rubʼanik rchë nqaʼij ri naʼoj riʼ che rä.

¹⁵ Tqatzʼetaʼ jun tzʼetbʼäl ri xtqrtoʼ rchë xtqatzʼët achkë rubʼanik yeqasmajij re kaʼiʼ naʼoj reʼ. Xtqatzjoj rij ri malkaʼn ixöq ri xtzʼet rma Jesús taq kʼo pa templo.

16. Tatzjoj achkë xbʼanatäj chpan ri peraj ri kʼo chpan Marcos 12:41.

¹⁶ Tqabʼanaʼ chë kan achiʼel ta najin nbʼanatäj ri najin nqaskʼij ruwäch (taskʼij ruwäch Marcos 12:41). Tqaquʼ rij ri xbʼanatäj ri qʼij riʼ. Tqabʼanaʼ che rä chë yoj kʼo chpan ri qʼij 11 de Nisán rchë ri junaʼ 33. Jbʼaʼ ma jun semana nrajoʼ rchë nkamsäx Jesús, ye kʼa ryä kʼo pa templo chqä najin nukʼüt ruchʼaʼäl Dios chkiwäch ri winäq. Ri ukʼwäy taq bʼey judíos ri itzel nkinaʼ che rä najin nkikanuj rubʼanik rchë kʼo nkiqʼabʼaj chrij. Rma riʼ, ye kʼo jojun najin nkikʼutuj che rä achkë yayon ri uchqʼaʼ pa ruqʼaʼ rchë nuʼän ri samaj ri najin nuʼän. Ye kʼo chik jojun najin nkiʼän kʼutunïk che rä ri nkiquʼ ryeʼ chë Jesús ma nkowin ta nuqʼalajsaj (Mar. 11:27-33; 12:13-34). Ya riʼ taq Jesús nbʼä jukʼan chik peraj che rä ri templo, rkʼë jbʼaʼ chpan ri peraj ri nbʼix ri ruwajay kichë ri ixoqiʼ che rä. Chriʼ Jesús yerutzʼët apü ri kax ri ye kʼo chuxkïn ri tzʼaq ri akuchï nkiyaʼ wä qa kikchaj ri winäq. Ya riʼ taq ntzʼyeʼ qa chqä yerutzʼët apü ri winäq ri nkiyaʼ qa kikchaj. Ryä chqä nutzʼët chë kan ye kʼïy bʼeyomaʼ nkiyaʼ qa kʼïy päq chkipan ri kax. Rkʼë jbʼaʼ, rma kan naqaj kʼo wä chkë ri kax kan nukʼoxaj ri päq yeqä qa.

17. ¿Achkë xuʼän ri malkaʼn ixöq ri kʼo pa mebʼaʼïl ri ntzjöx rij chpan Marcos 12:42?

¹⁷ (Taskʼij ruwäch Marcos 12:42). Jbʼaʼ chrij riʼ Jesús nutzʼët apü jun malkaʼn ixöq ri kʼo pa mebʼaʼïl (Luc. 21:2). Ryä kan kʼayewal rubʼanon rukʼaslemal chqä majun ta rurajil rchë nulöqʼ ri achkë nkʼatzin che rä. Tapeʼ ke riʼ ryä eqal njelun apü rkʼë jun kax y nuyaʼ qa kaʼiʼ taq päq ri rkʼë jbʼaʼ kan ma yeqʼajan ta taq yeqä qa. Ye kʼa Jesús retaman chë ri ixöq riʼ xyaʼ qa kaʼiʼ leptones, ri päq ri chöj majun ta kiqʼij chkipan ri qʼij riʼ. Rkʼë ri päq riʼ kan ma yakowin ta wä nalöqʼ jun tzʼkïn (gorrión), jun chkë ri ajxikʼ taq chköp ri yetej wä kimä ri winäq ri majun ta kirajil.

18. Rkʼë ri nuʼij chpan Marcos 12:43 chqä 44, ¿achkë xuʼij Jesús chrij ri kchaj xyaʼ ri malkaʼn ixöq?

¹⁸ (Taskʼij ruwäch Marcos 12:43, 44). Jesús kan nqä chwäch ri najin nuʼän re malkaʼn ixöq reʼ. Rma riʼ yeruskʼij ri rutzeqelbʼëy, nukʼüt apü ri ixöq chkiwäch chqä nuʼij reʼ chkë: «Re malkaʼn ixöq reʼ, ri kʼo pa mebʼaʼïl, kan más kʼïy xyaʼ qa chkipan ri kax chkiwäch ri nkʼaj chik». Chrij riʼ, xuʼij reʼ chkë: «Jontir ryeʼ [más ri ye bʼeyomaʼ] nkiyaʼ ri ma nkʼatzin ta chik chkë; ye kʼa re ixöq reʼ, tapeʼ kan kʼo pa mebʼaʼïl, xyaʼ qa chpan ri kax jontir ri kʼo rkʼë». Rkʼë ri xuʼän, ri ixöq riʼ xkʼüt chë rukʼuqbʼan rukʼuʼx chë xtyaʼöx pä ri nkʼatzin che rä rma Jehová (Sal. 26:3).

19. ¿Achkë utziläj naʼoj nqatamaj qa chrij ri xuʼij Jesús chrij ri malkaʼn ixöq?

¹⁹ Tqasmajij ri naʼoj nqatamaj. Tqakʼutuj qa reʼ chqawäch: «¿Achkë naʼoj ntamaj qa chrij ri xuʼij Jesús chrij ri malkaʼn ixöq?». Tqaquʼ rij ri ixöq riʼ, kantzij na wä chë ryä kʼo ta xrajoʼ xyaʼ más che rä Jehová. Tapeʼ ke riʼ, ryä xyaʼ ri jaruʼ xkowin, ntel chë tzij, xyaʼ che rä Jehová ri más ütz kʼo rkʼë. Y Jesús retaman wä chë ri kchaj xyaʼ ri ixöq riʼ kan kowan xtloqʼoqʼëx rma Rutataʼ kʼo chkaj. Reʼ nukʼüt qa jun utziläj naʼoj chqawäch: chë Jehová nqä chwäch chë röj nqayaʼ che rä ri más ütz kʼo qkʼë, ntel chë tzij, chë kan rkʼë ronojel qan tqayaʼ ruqʼij (Mat. 22:37; Col. 3:23). Jehová kan kiʼ rukʼuʼx nuʼän taq röj nqaʼän jontir ri kʼo pa qaqʼaʼ rchë nqayaʼ ruqʼij, achiʼel taq nqaksaj qachqʼaʼ chqä qa-tiempo chutzjoxik le Biblia chqä taq nqbʼä pa qamoloj.

20. ¿Achkë rubʼanik nqasmajij ri naʼoj xqatamaj qa chrij ri xbʼanatäj rkʼë ri malkaʼn ixöq? Tayaʼ jun tzʼetbʼäl.

 ²⁰ ¿Achkë rubʼanik nqasmajij ri naʼoj xqatamaj qa chrij ri xbʼanatäj rkʼë ri malkaʼn ixöq? Tqaquʼ kij jojun qachʼalal ri rkʼë jbʼaʼ nkʼatzin nnatäx chkë chë Jehová kan kiʼ rukʼuʼx rkʼë ri najin nkiʼän. Jun tzʼetbʼäl. We qataman ruwäch jun qachʼalal ixöq ri, rma kʼo chik rujunaʼ, nunaʼ chë majun chik nkʼatzin wä o ntiʼon ran rma ma jaruʼ ta chik nkowin nuʼän chutzjoxik le Biblia achiʼel wä rubʼanon qa, ¿achkë ütz nqaʼän? ¿O achkë ütz nqaʼän we qataman ruwäch jun qachʼalal achï ri rlon jun itzel yabʼil, y nbʼison rma ma nkowin ta nbʼä chkipan jontir ri qamoloj? Röj ütz yeqatoʼ ri qachʼalal riʼ taq yeqaʼij tzij chkë ri nukʼuqbʼaʼ kikʼuʼx (Efes. 4:29). Tqatzjoj ri naʼoj chkë ri xqatamaj qa chrij ri xbʼanatäj rkʼë ri malkaʼn ixöq. Ri xtqaʼij chkë xtnataj chkë chë Jehová kan kiʼ rukʼuʼx nuʼän we röj nqaʼän jontir ri kʼo pa qaqʼaʼ rchë nqayaʼ ruqʼij (Prov. 15:23; 1 Tes. 5:11). Taq nqaʼij chkë ri nkʼaj chik chë kan ütz ri najin nkiʼän rma nkiʼän jontir ri yekowin pa rusamaj Jehová —tapeʼ nkinaʼ ryeʼ chë ma kan ta kʼïy—, xtqakʼüt chë najin nqatzeqelbʼej ri tzʼetbʼäl xyaʼ qa Jesús.

21. ¿Achkë ayaʼon rït chwäch awan naʼän?

²¹ Kan nqtyoxin rma chë ri Evangelios kan kʼïy nkikʼüt qa chqawäch chrij Jesús. Reʼ nqrtoʼ rchë röj nqkowin nqaʼän kan achiʼel xuʼän ryä. Kantzij na wä chë kan kowan xtqrtoʼ ri xtqanukʼuj kiwäch ri Evangelios pa qayonïl o rkʼë qa-familia. Rchë kan kʼo nqatamaj qa taq nqanukʼuj kiwäch re wuj reʼ, nkʼatzin nqaʼän chë achiʼel ta kan najin nbʼanatäj ri najin nqaskʼij ruwäch chqä yeqasmajij ri naʼoj yeqatamaj. Tapeʼ nkʼatzin nqaʼän kan achiʼel xuʼän Jesús, kan kʼo chqä rejqalen nqayaʼ qaxkïn chkë ri xeruʼij qa. Chpan ri jun chik tjonïk xtqatzʼët achkë nqatamaj qa chkij ri tzij xeruʼij Jesús taq tzeqebʼan wä chwäch ri cheʼ.