»Ri Testigos ma xa xuʼ ta kikʼë ri winäq ütz kinaʼoj nkiʼän, xa kan ke riʼ chqä xkiʼän kikʼë ri kaʼiʼ taq ntzʼiʼ. Kʼo jun qʼij, jun ixöq ri rubʼiniʼan Elaine, kʼo wä chrij ri exhibidor. Ryä xyaʼ jojun galletas chkë. Rma riʼ, ronojel mul taq nqqʼax wä chriʼ, ri taq ntzʼiʼ yinkikʼwaj wä kʼa akuchï kʼo wä ri exhibidor rchë nyaʼöx ki-galletas.

»Xeqʼax ri ikʼ, y taq ntzʼiʼ kan kiʼ wä kikʼuʼx rma nyaʼöx ki-galletas, y rïn chqä kiʼ nkʼuʼx rma ri nqatzjoj kikʼë ri Testigos. Ye kʼa ma nwajoʼ ta wä kan kowan yitzjon kikʼë, rma chkipan ri qʼij riʼ, rïn más wä chik 70 njunaʼ y ma kan ta ntaman wä achkë nkinmaj ri Testigos. Rma kʼïy iglesias kan xkiyüj nkʼuʼx, xinquʼ chë más ütz nyonïl ntjoj wiʼ chrij le Biblia.

»Chkipan ri qʼij riʼ, xintzʼët chë ye kʼo más Testigos chkij ki-exhibidores chpan ri tinamït. Ryeʼ chqä kan ütz kinaʼoj. Y ronojel mul yekiqʼalajsaj wä nkʼutunik rkʼë le Biblia. Ya riʼ xuʼän chë xinkʼuqbʼaʼ más nkʼuʼx chkij.

»Kʼo jun qʼij, ya Elaine xkʼutuj ya reʼ chwä: ‹¿Naquʼ rït chë ri taq chköp jun spanïk ruyaʼon pä Dios chqë?›. Rïn xinbʼij: ‹Jaʼ, ya riʼ nquʼ rïn›. Chrij riʼ, ryä xskʼij Isaías 11:6-9 chi nwäch. Kan chpan qa ri qʼij riʼ, rïn kan xinwajoʼ xintamaj más chrij ri nukʼüt le Biblia, tapeʼ ma kan ta nwajoʼ wä yenkʼwaj äl publicaciones.

»Chrij ri qʼij riʼ, ri xqatzjoj ri nkʼaj chik qʼij rkʼë ya Elaine chqä Brent, ri rachjil, kan xqä chi nwäch, tapeʼ ma kan ta yalöj wä nqtzjon. Ryeʼ xkiʼij chwä chë ütz nskʼij ruwäch Mateo kʼa Hechos rchë nqʼax chi nwäch achkë ntel chë tzij naʼän kan achiʼel xuʼän Cristo. Y kan xinbʼän riʼ. Rma riʼ jbʼaʼ chrij riʼ, xinwajoʼ chë Brent chqä ya Elaine xinkitjoj chrij le Biblia. Ya riʼ xbʼanatäj taq yoj bʼenäq wä pa nkʼaj che rä ri junaʼ 2016.

»Ronojel semanas kan nrayij wä nkʼül ntjonik chrij le Biblia chqä yibʼä chkipan ri moloj pa Salón del Reino. Kan kiʼ nkʼuʼx xinnaʼ chqä kan xityoxin rma najin wä ntamaj ri nukʼüt le Biblia. Más jbʼaʼ jun junaʼ chrij riʼ, xiqasäx pa yaʼ. Komä 79 chik njunaʼ, y kan yityoxin rma xinwïl ri religión ri nqä chwäch Dios. Jehová kan kʼïy utzil ruyaʼon pä pa nwiʼ. Jun chkë riʼ ya riʼ ruyaʼon qʼij chwä rchë yïn kʼo chpan rutinamit, ri achiʼel jun familia ri kan junan nkiyaʼ ruqʼij».