Achiʼel ta manä. Taq ri Diablo xuʼij che rä Eva chë ttjaʼ ruwäch ri cheʼ ri xbʼix chkë rma Dios chë ma tkitäj ta, ryä ma xuʼij ta che rä Eva chë xtkäm ruchʼakul y ri ru-espíritu xtbʼä chik jukʼan. Satanás xksaj ri kumätz rchë xuʼij che rä Eva chë ma xtkäm ta. Ri xrajoʼ xuʼij Satanás kikʼë ri tzij riʼ ya riʼ chë Eva xtkʼaseʼ na chqä chë más ütz xtbʼä pa rukʼaslemal tapeʼ xtyaʼ qa Jehová (Gén. 2:17; 3:3-5).

Rma riʼ, we ma pa Edén ta xtzʼuktäj wä ri naʼoj ri nuʼij chë jun winäq ma nkäm ta ran, ¿ajän kʼa xtzʼuktäj pä? Ma kan ta qataman. Ye kʼa qataman chë ri religiones ri ma pa rubʼeyal ta xkiyaʼ ruqʼij Dios xchuptäj kiwäch chpan ri Nimaläj Jöbʼ pa ruqʼij qa Noé. Jontir ri itzel taq naʼoj xchuptäj chqä kiwäch rma xa xuʼ Noé chqä ri ru-familia, ri ye rusamajelaʼ wä Dios, xekolotäj qa.

Reʼ nukʼüt chqawäch chë ri naʼoj ri nuʼij chë jun winäq ma nkäm ta ran xtzʼuktäj pä chrij ri Nimaläj Jöbʼ. Taq Dios xjäl kichʼaʼäl ri winäq pa Babel chqä ri winäq xkikraj kiʼ chwäch le Ruwachʼulew, xkikʼwaj äl ri naʼoj riʼ kikʼë (Gén. 11:8, 9). Tapeʼ ma kan ta qataman ajän xtzʼuktäj pä ri itzel naʼoj riʼ, qataman chë rkʼë Satanás xtzʼuktäj wä pä chqä chë kan kiʼ rukʼuʼx rma xtzʼët chë ri naʼoj riʼ xkraj riʼ chwäch le Ruwachʼulew (Juan 8:44).