¿Yakowin komä yeʼaqʼalajsaj re kʼutunïk reʼ ri ye alenäq pä chkipan ri wuj Ri Chajinel, 2019?

¿Achkë ntel chë tzij ri xtzüj qa Dios kikʼë re tzij reʼ: «Xa bʼa achkë na kʼa samajbʼäl rchë chʼaʼoj xtkiksaj chawij, ma xkechʼakon ta»? (Is. 54:17).

Röj ütz nqakʼuqbʼaʼ qakʼuʼx chë Jehová xtqrtoʼ chkiwäch ri winäq ri itzel nkinaʼ chqë (Is. 25:4, 5). Ri qakʼulel majun bʼëy xkekowin ta xtkiʼän chqë chë ma ta xtqïl ri kʼaslemal ri ma nkʼis ta (w19.01, ruxaq 6, 7).

¿Achkë rubʼanik xkʼüt ri ruchojmilal Dios rkʼë ri xuʼän kikʼë ri cananeos chqä ri israelitas ri ma xkinmaj ta rutzij?

Dios xyaʼ kʼayewal pa kiwiʼ ri winäq ri xekiʼän tzʼil taq bʼanobʼäl chqä ri ma pa rubʼeyal ta xkiʼän kikʼë ri ixoqiʼ chqä ri akʼalaʼ. Ye kʼa xyaʼ utzil pa kiwiʼ ri winäq ri xkinmaj rutzij chqä ri xkikʼüt chojmilal (w19.02, ruxaq 22, 23).

¿Achkë xtqaʼän we jun winäq ri ma Testigo ta nuʼän jun chʼonïk chqawäch?

Ütz chë majun nqaʼij ta chqä tqakʼutuʼ chë kʼo kiqʼij ri winäq chqawäch, ye kʼa ma xtqaʼij ta «amén» chqä ma xtqachäp ta chë kiqʼaʼ ri nkʼaj chik. Rkʼë jbʼaʼ ütz nqaʼän jun chʼonïk pa qan (w19.03, ruxaq 31).

¿Achkë rma kan jun nimaläj mak nuʼän ri winäq ri yeruʼän tzʼil taq bʼanobʼäl rkʼë jun akʼal?

Ri winäq riʼ najin nuʼän jun nimaläj mak che rä ri akʼal, che rä ri congregación, chkiwäch ri qʼatbʼäl taq tzij chqä chwäch Jehová. Chkipan ri tinamït akuchï ye kʼo leyes chrij ri yatetzjun chkiwäch ri qʼatöy taq tzij chrij jun winäq ri xeruʼän tzʼil taq bʼanobʼäl rkʼë jun akʼal, ri ukʼwäy taq bʼey nkismajij ri leyes riʼ (w19.05, ruxaq 9, 10).

¿Achkë rubʼanik nqajäl ri chʼobʼonïk ri nsmajin ri qajolon?

Kʼo oxiʼ ri kan kʼo kejqalen nqaʼän: nqchʼö rkʼë Jehová, nqchʼobʼon rchë nqanukʼuj achkë qäs kʼo pa qan chqä ütz ütz yeqachaʼ ri qachiʼil (w19.06, ruxaq 11).

¿Achkë ütz nqaʼän rchë nqatjoj apü qiʼ rchë kuw xtqpaʼeʼ taq xkeyaʼöx kʼayewal chqij?

Kʼo chë nqakowirsaj ri qachbʼilanïk rkʼë Jehová, nqayaʼ chwäch qan chë ryä janina nqrajoʼ y chë majun bʼëy xtqryaʼ ta qa, nqaskʼij ruwäch le Biblia ronojel qʼij chqä chaq taqïl qchʼö rkʼë. Kʼo chë nqayaʼ chwäch qan chë ri utzil xtkʼän pä ri Ruqʼatbʼäl Tzij Dios kantzij xkebʼanatäj chqä keqayaʼ pa qajolon ri textos ri más yeqä chqawäch y ri bʼix ri ruyaʼon pä rutinamit Jehová chqë (w19.07, ruxaq 2-4).

¿Achkë ütz nqaʼän rchë yeqatoʼ ri qachʼalal pa qachoch rchë xtkïl kolotajïk?

Janina rejqalen nqakʼüt chë nqʼax chqawäch ri nkinaʼ, chë nqayaʼ qʼij chë ri qanaʼoj nuʼän chë ütz yechʼö chrij Jehová, chë ma nikʼo ta qakʼuʼx kikʼë chqä chë jaʼäl qanaʼoj nqaʼän kikʼë (w19.08, ruxaq 15-17).

Achiʼel nuʼij Mateo 11:28, ¿achkë rubʼanik nqanaʼ uxlanen rma Jesús?

Ye kʼo utziläj ukʼwäy taq bʼey pa qawiʼ, utziläj taq qachiʼil chqä yaʼon pa qaqʼaʼ jun samaj ri janina ruqʼij (w19.09, ruxaq 23).

¿Achkë rubʼanik nqrtoʼ Jehová rchë rkʼë ronojel qan nqaʼän rusamaj? (Filip. 2:13).

Taq nqaskʼij ruwäch le Biblia chqä nqchʼobʼon chrij, Dios xtuʼän chë xtqarayij xtqaʼän ri ruraybʼal chqä xtyaʼ qachqʼaʼ rchë xtqaʼän riʼ. Ryä chqä xtyaʼ ri loqʼoläj ru-espíritu pa qawiʼ rchë xtqkowin xtqaʼän jun samaj (w19.10, ruxaq 21).

¿Achkë ütz nqaʼän taq kʼo jun ri kan kʼo rejqalen nkʼatzin nqachaʼ?

Kʼo woʼoʼ ri ütz nqaʼän: nqakʼutuj qanaʼoj che rä Dios, ütz ütz nqanukʼuj rij ri xqachʼöbʼ nqaʼän, nqatzʼët achkë rma nqajoʼ nqaʼän ri xqachʼöbʼ, nqatzʼët achkë nkʼatzin nqaʼän chqä nqʼax chqawäch chë ma ronojel ta nqkowin nqaʼän (w19.11, ruxaq 27-29).

¿Rkʼë komä ri xuʼij Satanás che rä Eva xtzʼuktäj wä pä ri naʼoj chë ri winäq ma nkäm ta kan?

Achiʼel ta manä. Satanás ma xuʼij ta che rä Eva chë xa xuʼ ruchʼakul xtkäm. Ryä chöj xuʼij che rä chë kan ma xtkäm ta. Jontir ri itzel taq naʼoj xchup kiwäch chpan ri Nimaläj Jöbʼ. Rma riʼ, ri naʼoj chë jun winäq ma nkäm ta ran rkʼë jbʼaʼ xtzʼuktäj pä taq Dios majanä kerukraj ri winäq ri najin wä nkiyäk ri mamaʼ jay pa Babel (w19.12, ruxaq 15).