¿Ütz runukʼuxik abʼanon chkë ri wuj Ri Chajinel ri ye alenäq pä chpan re junaʼ reʼ? Tatzʼetaʼ we yakowin yeʼaqʼalajsaj re kʼutunïk reʼ:

¿Achkë qanaʼoj kʼo chë nqaʼän kikʼë ri yechaʼon rchë yebʼä chkaj?

Röj nqaloqʼoqʼej ri samaj nkiʼän, ye kʼa ma nqʼax ta ruwiʼ ri jaʼäl qanaʼoj nqaʼän kikʼë. Röj ma yë ta jun winäq nqatzeqelbʼej (Jud. 16, nota). Chqä ma nqakʼutuj ta chkë achkë rubʼanik xechaʼöx rchë yebʼä chkaj (w20.01, ruxaq 28 y 29).

¿Achkë rma ütz nqayaʼ chwäch qan chë chqajujnal röj kan kʼo qaqʼij chwäch Jehová?

Le Biblia nuʼij chë tapeʼ majanä tqaläx, Jehová ya najin wä chik nqrtzʼët pä. Chqä nuʼij chë ronojel mul nqrkʼoxaj taq nqchʼö qʼanäj rkʼë. Ryä chqä retaman achkë kʼo pa qan chqä achkë yeqachʼöbʼ. Chqä nuʼij chë ri qabʼanobʼal nkiʼän chë Jehová nunaʼ kiʼkʼuxlal o nbʼison ran (1 Crón. 28:9; Prov. 27:11). Ryä chqä xyaʼ qʼij chqë rchë xq-ok chpan rutinamit (w20.02, ruxaq 12).

¿Ajän riʼ taq ütz nqtzjon chqä ajän riʼ taq ma ütz ta nqtzjon?

Röj kan jaʼäl nqanaʼ taq nqatzjoj chrij Jehová chkë ri winäq. Chqä kʼo chë nqtzjon taq nqatzʼët chë jun qachʼalal ya xa ntzaq pa jun mak. Ri ukʼwäy taq bʼey yekipixabʼaj ri qachʼalal taq nkʼatzin nbʼan riʼ kikʼë. Röj ma nqaʼän ta kʼutunïk chqä ma nqatzjoj ta achkë rubʼanik ntzjöx le Biblia chpan jun tinamït ri akuchï qʼaton wä ri samaj riʼ. Y taq qataman chë kʼo najin nbʼanatäj chpan ri congregación ri ma ütz ta ntel rutzjol, röj ma nqesaj ta rutzjol (w20.03, ruxaq 20 y 21).

¿Achkë jalatajnäq chpan ri profecía chkij ri xiʼl ri kʼo chpan ri capítulo 2 rchë Joel chqä ri kʼo chpan ri capítulo 9 rchë Apocalipsis?

Joel 2:20 kʼa 29 nuʼij chë Jehová yerukʼwaj äl näj ri xiʼl chqä nuʼij chë xtchojmij ronojel ri kʼayewal nkiʼän. Chrij riʼ, xtyaʼ pä ri loqʼoläj ruchqʼaʼ. Reʼ xbʼanatäj taq ri babilonios xeʼok apü chwäch Israel chqä kʼa xbʼanatäj na kʼïy junaʼ chkiwäch apü. Apocalipsis 9:1 kʼa 11 nutzjoj kij ri cristianos ri yechaʼon rchë yebʼä chkaj ri ye kʼo pa qaqʼij komä. Ryeʼ yejnamäx kikʼë xiʼl rma nkitzjoj chkë ri winäq ri kʼayewal xtkʼäm pä Dios pa kiwiʼ. Riʼ nuʼän chë ri winäq riʼ ma kan ta kiʼ kikʼuʼx kikʼë (w20.04, ruxaq 3 kʼa 6).

¿Achkë riʼ ri qʼatöy tzij ri kʼo pa norte pa qaqʼij komä?

Rusia chqä ri rachiʼil. Ryeʼ ma nkiyaʼ ta qʼij chë ntzjöx ri Ruchʼaʼäl Dios chkë ri winäq chqä itzel yekitzʼët ri Testigos. Ri qʼatöy tzij ri kʼo pa norte rubʼanon chʼaʼoj rkʼë ri qʼatöy tzij ri kʼo pa sur (w20.05, ruxaq 13).

¿Xa xuʼ komä ri 9 naʼoj ri nuʼij chpan Gálatas 5:22 chqä 23 yewachin rkʼë ri loqʼoläj ruchqʼaʼ Dios?

Manä. Ri loqʼoläj ruchqʼaʼ Dios nqrtoʼ chqä rchë yewachin nkʼaj chik naʼoj qkʼë, achiʼel ri chojmilal (Efes. 5:8, 9) (w20.06, ruxaq 17).

¿Achkë rma kʼo chë nqachajij qiʼ taq nqajtobʼaʼ qa-fotos, videos o nqatzʼibʼaj comentarios chqij röj chkipan ri redes sociales?

Ri nqajtobʼaʼ chkipan ri redes sociales rkʼë jbʼaʼ nkikʼüt chë xa najin nqanaʼ qiʼ, pa rukʼexel nkikʼüt chë najin nqaqasaj qiʼ (w20.07, ruxaq 6 y 7).

¿Achkë nqatamaj qa chkij ri utziläj ajchapöy taq kär?

Ri utziläj ajchapöy taq kär yesamäj taq yeʼel pä ri kär chqä yebʼä kʼa akuchï ye kʼo wä ri kär, kan pa rubʼeyal yekiksaj kisamajbʼal chqä ma nkixiʼij ta kiʼ tapeʼ kʼo kʼayewal npë chkij. Röj chqä ütz nqaʼän riʼ taq nqatzjoj le Biblia chkë ri winäq (w20.09, ruxaq 5).

¿Achkë rubʼanik yeqatoʼ ri qatijoxelaʼ rchë nnmär más kajowabʼäl chrij Jehová?

Ütz nqaʼij chkë chë tkiskʼij ruwäch le Biblia ronojel qʼij, keqatoʼ rchë yechʼobʼon chkij ri naʼoj yekitamaj chqä tqakʼutuʼ chkiwäch achkë rubʼanik yechʼö qʼanäj rkʼë Jehová (w20.11, ruxaq 4).

¿Achkë ye kʼo chpan ri tzij xuʼij qa Pablo «rma Cristo, jontir xtkïl kʼaslemal»? (1 Cor. 15:22).

Ri apóstol Pablo ma xrajoʼ ta xuʼij chë jontir winäq xkekʼasöx pä. Taq xksaj ri tzij «jontir», ryä najin wä ntzjon chkij ri cristianos ri yechaʼon rchë yebʼä chkaj, ri xechʼajchʼobʼëx rma junan rubʼanon kiwäch rkʼë Cristo Jesús (1 Cor. 1:2; 15:18) (w20.12, ruxaq 5 y 6).

¿Achkë samaj xtkibʼebʼanaʼ ri cristianos ri yechaʼon rkʼë ri loqʼoläj ruchqʼaʼ Dios taq xkekʼasöx chlaʼ chkaj chqä taq xtqʼajan ri rukʼisbʼäl trompeta? (1 Cor. 15:51-53).

Ryeʼ xtkitoʼ Jesús rchë xkekiyuqʼuj ri tinamït rkʼë jun vara ri bʼanon rkʼë chʼichʼ (Apoc. 2:26, 27) (w20.12, ruxaq 12 y 13).