1, 2. a) ¿Achkë nutzʼët Jehová taq pa millón winäq nkimöl kiʼ rchë nkinataj rukamik rukʼajol? (Tatzʼetaʼ ri achbʼäl ri kʼo pä chwäch re revista reʼ). b) ¿Achkë xtqatzʼët chpan re tzijonem reʼ?

¿ACHKË komä nutzʼët Jehová taq pa millón winäq nkimöl kiʼ chwäch ronojel le Ruwachʼulew rchë nkinataj rukamik rukʼajol? Ryä ma xa xuʼ ta pa molaj ri winäq yertzʼët, ryä kan yertzʼët jojun chkë ri winäq ri yeʼapon. Chkikojöl ri winäq riʼ, rkʼë jubʼaʼ ye kʼo jojun ri yeʼapon tapeʼ yaʼon kʼayewal pa kiwiʼ. Jojun chik, tapeʼ ma yeʼapon ta pa moloj ri yebʼan ronojel semanas, ye kʼa kan nkinaʼ chë kʼo ruqʼij yebʼä chpan ri moloj rchë nkinataj rukamik Jesús. Jehová nutzʼët ronojel riʼ, yajün ri kʼa naʼäy mul yeʼapon tapeʼ xa xuʼ chë nbʼekitzʼetaʼ achkë nbʼan chpan ri moloj riʼ.

² Kantzij na wä chë Jehová kan janina kiʼkʼuxlal nunaʼ taq nutzʼët chë kan ye kʼïy winäq nkinataj rukamik rukʼajol (Luc. 22:19). Tapeʼ ke riʼ, Jehová ma yë ta ri jaruʼ winäq yeʼapon nuyaʼ más ruqʼij, ryä más nuloqʼoqʼej ri achkë rma yeʼapon ri winäq chpan ri moloj riʼ. Chpan re tzijonem reʼ xtqaqʼalajsaj jun kʼutunïk ri janina rejqalen: ¿Achkë rma nqatäj qaqʼij rchë nqbʼä chkipan jontir moloj yebʼan ronojel semanas, y ma xa xuʼ ta chpan ri moloj chrij Runataxik Rukamik Jesús? Tqatzʼetaʼ achkë naʼoj xkojkitoʼ rchë ma xkeqayaʼ ta qa ri qamoloj.

3, 4. a) ¿Achkë rma nqbʼä chkipan ri moloj? b) ¿Achkë naʼoj nqakʼüt taq nqbʼä pa taq moloj? c) Achiʼel nuʼij chpan 1 Corintios 11:23 kʼa 26, ¿achkë rma ütz nqayaʼ chwäch qan nqbʼä pa moloj chrij Runataxik Rukamik Jesús?

³ Röj nqbʼä pa taq moloj rma ya riʼ jun rubʼanik rchë nqayaʼ ruqʼij Dios. Chqä nqbʼä chkipan ri moloj rma Jehová nqrtjoj chriʼ. Ri winäq ri janina nkinimirsaj kiʼ ma nkajoʼ ta yetoʼöx kimä nikʼaj chik (3 Juan 9). Ye kʼa röj janina nqä chqawäch chë Jehová chqä rutinamit yojkitjoj (Is. 30:20; Juan 6:45).

 ⁴ Taq nqbʼä chkipan ri moloj, nqakʼüt chë nqaqasaj qiʼ chqä chë nqayaʼ qʼij che rä Jehová rchë nqrtjoj. Röj nqbʼä chpan ri moloj chrij Runataxik Rukamik Jesús, ma rma ta chë kʼo nqchaqtiʼin, nqbʼä rma ri qasanriʼïl nuʼän chqë rchë nqajoʼ nqanmaj ri xuʼij qa Jesús. Ryä xuʼij: «Tibʼanaʼ kʼa reʼ rchë natabʼäl wchë rïn» (taskʼij ruwäch 1 Corintios 11:23-26 *). Ri moloj ri nbʼan rchë nnatäx rukamik Jesús nukowirsaj ri qakʼuqbʼäl kʼuʼx chqä nunataj chqë chë Jehová janina nqrajoʼ. Ye kʼa ryä retaman chë ma xa xuʼ ta jmul pa jun junaʼ nkʼatzin nkʼuqbʼäx qakʼuʼx. Rma riʼ, rubʼanon chë ronojel semanas ye kʼo moloj, y ryä nuʼij chqë chë tqapon chkipan ri moloj riʼ. We nqanmaj rutzij Dios xtqakʼüt chë nqaqasaj qiʼ. Reʼ xtuʼän chë xtqajäm qawäch rchë ütz ütz xtqatjoj äl qiʼ chqä xtqapon chkipan ri qamoloj.

5. ¿Achkë rma ri winäq ri nkiqasaj kiʼ nkikʼän ri invitación ri nuyaʼ Jehová chkë?

⁵ Ronojel junaʼ, ye kʼïy winäq ri nkiqasaj kiʼ nkikʼän ri invitación ri nuyaʼ Jehová chkë rchë nkitamaj más ruwäch (Is. 50:4). Kʼïy mul, ri winäq riʼ, naʼäy yeʼapon chpan ri moloj chrij Runataxik Rukamik Jesús, y chrij riʼ nkichäp yebʼä pa moloj ri yebʼan ronojel semanas (Zac. 8:20-23). Kantzij na wä chë röj chqä ri kʼakʼakʼ rutzeqelbʼëy Jesús kan janina nqaloqʼoqʼej ri naʼoj yeruyaʼ Jehová chqë. Ri naʼoj riʼ yojkitoʼ chqä yojkiköl (Sal. 40:17). Jesús, ri rukʼajol Dios, nqrtjoj chqä chkipan ri moloj riʼ (Mat. 17:5; 18:20; 28:20). ¿Kʼo komä jun ri kʼo ta más ruqʼij chwäch ri nqayaʼ qʼij chkë ryeʼ chë yojkitjoj?

6. ¿Achkë rubʼanik xutoʼ jun achï ri qasanriʼïl rchë xbʼä pa moloj chrij Runataxik Rukamik Jesús?

⁶ Ronojel junaʼ nqatäj qaqʼij rchë yeqaʼän invitar ronojel winäq rchë yeʼapon chpan ri moloj chrij Runataxik Rukamik Jesús. Ye kʼïy winäq kilon utzil rma yeʼapon chpan ri moloj riʼ. Tqatzʼetaʼ jun tzʼetbʼäl. Ojer qa jubʼaʼ, jun qachʼalal achï xuyaʼ jun invitación che rä jun achï, ye kʼa ri achï riʼ xuʼij chë ma ütz ta xtuʼän chwäch xtapon. Ri aqʼaʼ taq xbʼan ri moloj, ri qachʼalal kan xel rukʼuʼx rma xutzʼët chë ri achï riʼ xok apü pa Salón del Reino. Ri achï kan janina xqä chwäch ri rukʼulik xbʼan, y riʼ xuʼän chë ronojel semanas xbʼä pa taq moloj. Chpan jun junaʼ, ri achï riʼ xa xuʼ chkipan oxiʼ moloj ma xbʼä ta. ¿Achkë xbʼanö chë xujäl runaʼoj chqä xchäp xbʼä pa jontir moloj? Ri qachʼalal ri xyaʼö ri invitación che rä, xuʼij: «Ryä jun achï ri kan nuqasaj riʼ». Nqʼalajin kʼa chë yë Jehová ri xbʼanö che ri achï riʼ xok jun rusamajel. Komä, ryä jun testigo de Jehová chik (2 Sam. 22:28; Juan 6:44).

7. ¿Achkë rubʼanik yojkitoʼ rchë nqaqasaj qiʼ ri naʼoj yeqatamaj chkipan ri qamoloj chqä ri nqaskʼij chpan le Biblia?

⁷ Ri yeqatamaj chkipan ri qamoloj chqä ri nqaskʼij chpan le Biblia yojkitoʼ rchë nqaqasaj qiʼ. Taq xa jun kayoxiʼ semanas xtrajoʼ rchë xtbʼeqä ri moloj chrij Runataxik Rukamik Jesús, chkipan ri qamoloj xtqankʼuj rukʼaslemal Jesús chqä ri rubʼanik xukʼüt chë xuqasaj riʼ taq xuyaʼ rukʼaslemal pa qawiʼ röj. Chqä taq xa jubʼaʼ chik qʼij xtrajoʼ rchë xtbʼeqä ri moloj riʼ, ütz tqaskʼij ri textos yaʼon pä ri nkitzjoj achkë xebʼanatäj taq majanä tkäm chqä taq ya xkʼasöx yän rma Dios. Ronojel ri xtqatamaj xkojkitoʼ rchë más xtqaloqʼoqʼej ri xuʼän Jesús pa qawiʼ. Riʼ xtuʼän chë más xtqajoʼ xtqakʼän qanaʼoj chrij chqä rchë xtqayaʼ chwäch qan chë, tapeʼ yeyaʼöx kʼayewal pa qawiʼ, xtqaʼän ri nrajoʼ Jehová (Luc. 22:41, 42).

8. ¿Achkë rubʼanik xukʼüt Jesús chë ma xuxiʼij ta riʼ?

⁸ Jesús chöj xukʼüt chë ma xuxiʼij ta riʼ, ke riʼ xuyaʼ qa jun utziläj tzʼetbʼäl chqawäch. Qchʼobʼon chrij ri xbʼanatäj taq xkichäp äl rchë nkikamsaj. Ryä retaman wä chë ri winäq ri itzel nkinaʼ che rä  xtkitzäq rukʼïx, xtkichʼäy chqä xtkikamsaj (Mat. 20:17-19). Tapeʼ ke riʼ, ryä kuw xupabʼaʼ riʼ chkiwäch ri kʼayewal. Taq jubʼaʼ nrajoʼ rchë nkichäp äl, xuʼij reʼ chkë ri ru-apóstoles ri ye kʼo wä rkʼë pa jardín rchë Getsemaní: «Kixkatäj, joʼ äl. ¡Titzʼetaʼ! Ri xikʼayin pa kiqʼaʼ ri winäq ya xpë» (Mat. 26:36, 46). Y taq jun molaj winäq ri kikʼwan wä samajbʼäl rchë chʼaʼoj pa kiqʼaʼ xeʼapon rchë nkikʼwaj äl, ryä ma xuxiʼij ta riʼ xukʼüt apü riʼ chkiwäch, chqä xuʼij chkë ri soldados chë tkiyaʼ qʼij chë kebʼaʼ äl ru-apóstoles (Juan 18:3-8). ¡Kan jun utziläj tzʼetbʼäl xuyaʼ qa! Komä, jontir ri cristianos, ri yechaʼon rchë yebʼä chkaj chqä ri xkekanaj chwäch le Ruwachʼulew, nkitäj kiqʼij rchë nkikʼän kinaʼoj chrij Jesús. ¿Achkë rubʼanik nkikʼüt riʼ?

9. a) ¿Achkë rma nkʼatzin kuw nqapabʼaʼ qiʼ chkiwäch ri kʼayewal rchë nqbʼä pa qamoloj ronojel semanas? b) ¿Achkë rubʼanik yerutoʼ ri qachʼalal ri ye kʼo pacheʼ taq nkitamaj chë qatjon qaqʼij rchë nqayaʼ ruqʼij Dios?

⁹ Rkʼë jubʼaʼ ye kʼo kʼayewal ri nkiʼän chqë rchë ma nqbʼä ta pa qamoloj. We ke riʼ, nkʼatzin kuw nqapabʼaʼ qiʼ chkiwäch ri kʼayewal. Ye kʼo jojun qachʼalal ri kilon yabʼil, kʼo jun nimaläj bʼis pa kan o nkinaʼ ryeʼ chë majun ta ruqʼij ri nkiʼän. Ye kʼo chik jojun nyaʼöx kʼayewal pa kiwiʼ kimä ri kichʼalal pa kachoch o kimä ri qʼatbʼäl taq tzij xa rma nkiyaʼ ruqʼij Dios. Qchʼobʼon jubʼaʼ chkij ri yeyaʼon pacheʼ xa rma ye rusamajelaʼ Dios. ¿Yerutoʼ komä ryeʼ taq nkitamaj chë röj qatjon qaqʼij rchë nqayaʼ ruqʼij Dios tapeʼ qlon kʼayewal? (Heb. 13:3). Jaʼ yerutoʼ. Taq ryeʼ nkitamaj riʼ, más kuw yepaʼeʼ chkiwäch ri kʼayewal, más kuw nuʼän ri kikʼuqbʼäl kʼuʼx chqä más nkitäj kiqʼij rchë ma nkiqʼäj ta rupixaʼ Jehová. Ya riʼ xbʼanatäj rkʼë ri apóstol Pablo. Taq kʼo wä pacheʼ chlaʼ Roma, kan nukʼuqbʼaʼ wä rukʼuʼx taq nukʼoxaj chë ri cristianos rkʼë ronojel kan najin wä nkiyaʼ ruqʼij Dios (Filip. 1:3-5, 12-14). Taq jubʼaʼ nrajoʼ rchë ntel äl pacheʼ o kan xa xuʼ xel äl, ryä xtzʼibʼaj ri carta chkë ri Hebreos. Chriʼ xuʼij chkë ri cristianos chë ma tkiyaʼ ta qa ri kimoloj chqä chë ma tkʼis ta ri ajowabʼäl chkiwäch (Heb. 10:24, 25; 13:1).

10, 11. a) ¿Achkë kʼo chë yeqaʼän invitar chpan ri moloj chrij Runataxik Rukamik Jesús? b) Achiʼel nuʼij chpan Efesios 1:7, ¿achkë rma nqaʼän riʼ?

¹⁰ Nqakʼüt chqä chë ma nqaxiʼij ta qiʼ taq yeqaʼän invitar ri qachʼalal, ri qachiʼil pa samaj o ri qa-vecinos rchë yebʼä pa moloj chrij Runataxik Rukamik Jesús. ¿Achkë rma nqaʼän riʼ? Rma janina nqamatyoxij ri xuʼän Jehová chqä Jesús pa qawiʼ. Chqä nqajoʼ chë ri winäq riʼ tkitamaj achkë rubʼanik nkïl ri utzil nuyaʼ Jehová pa qawiʼ rma rukʼaslemal xuyaʼ Jesús pa kamïk (taskʼij ruwäch Efesios 1:7 *; Rev. 22:17).

¹¹ Ye kʼa kʼo chik jun utziläj naʼoj nqakʼüt taq nqbʼä pa qamoloj. Chqä ri naʼoj riʼ kan chöj nqʼalajin chkij Jehová chqä Jesús.

12. a) ¿Achkë rma ri moloj nkikowirsaj ri qajowabʼäl chrij Jehová chqä Jesús? b) Achiʼel nqatzʼët chpan 2 Corintios 5:14 chqä 15, ¿achkë rubʼanik nqakʼän qanaʼoj chrij Jesús?

¹² Ri ajowabʼäl nqanaʼ chrij Jehová chqä Jesús nuʼän chqë rchë nqbʼä pa qamoloj. Y ri nqatamaj chkipan ri qamoloj nkiʼän chë ri qajowabʼäl chkij  ryeʼ más nkʼïy. ¿Achkë rma? Rma chriʼ chaq taqïl nnatäx chqë achkë kibʼanon pä ryeʼ pa qawiʼ (Rom. 5:8). Ri moloj chrij Runataxik Rukamik Jesús nnataj chqë ri nimaläj ajowabʼäl nkinaʼ Jehová y Jesús chkij ri winäq, yajün ri ma nkiyaʼ ta na ruqʼij ri rukʼaslemal xuyaʼ Jesús pa kamïk. Röj nqanaʼ jun nimaläj ajowabʼäl chkij y rma riʼ nqatäj qaqʼij rchë nqasmajij pa qakʼaslemal ri tzʼetbʼäl xuyaʼ qa Jesús (taskʼij ruwäch 2 Corintios 5:14, 15 *). Chqä kan pa qan naläx wä nqayaʼ ruqʼij Jehová rma xuyaʼ rukʼaslemal rukʼajol pa qawiʼ. Jun rubʼanik rchë nqakʼüt riʼ ya riʼ taq yeqayaʼ ri qa-comentarios pa taq moloj.

13. Taʼij achkë rubʼanik nqakʼüt chkiwäch Jehová chqä Jesús ri ajowabʼäl nqanaʼ chkij.

¹³ Nqakʼüt chë janina nqajoʼ Jehová chqä Jesús taq nqaʼän ri nkajoʼ ryeʼ y ma yë ta ri nqajoʼ röj. Kʼïy mul, rchë chë nqbʼä pa qamoloj rkʼë jubʼaʼ kʼo chë ma nqaʼän ta ri nqajoʼ röj o ri nqä chqawäch. Jojun tzʼetbʼäl. Kʼïy congregaciones nkiʼän ri moloj Vida y Ministerio taq ya ntok qa aqʼaʼ. Riʼ nuʼän chë ye kʼïy ri yeʼapon pa moloj rkʼë jubʼaʼ ya ye kosnäq chik rma xesamäj jun qʼij. Y ri jun chik moloj, nbʼan pa taq sábados o domingos taq kan ronojel bʼaʼ winäq najin yeʼuxlan. ¿Nutzʼët komä Jehová taq nqapon pa qamoloj tapeʼ janina yoj kosnäq? Jaʼ nutzʼët. Taq más nqatäj qaqʼij rchë nqaʼän ri nuʼij chqë, ryä más nuyaʼ ruqʼij ri ajowabʼäl nqakʼüt chwäch (Mar. 12:41-44).

14. ¿Achkë utziläj tzʼetbʼäl xuyaʼ qa Jesús chqawäch?

¹⁴ Jesús xuyaʼ qa jun utziläj tzʼetbʼäl chqawäch chrij ri yeʼawajoʼ ri nikʼaj chik. Ryä ma xa xuʼ ta xukʼüt ri naʼoj riʼ taq xuyaʼ rukʼaslemal pa kiwiʼ ri rutzeqelbʼëy. Ryä kan ronojel qʼij xukʼüt ri ajowabʼäl, rma, pa rukʼexel xuʼän ri nrajoʼ wä ryä, xa xutzʼët achkë wä nkʼatzin chkë ri rutzeqelbʼëy. Jun tzʼetbʼäl chrij riʼ, ya riʼ taq, tapeʼ kosnäq chqä nbʼison wä, xjäm ruwäch rchë xerutoʼ ri rutzeqelbʼëy (Luc. 22:39-46). Chqä xuyaʼ ran chrij ri achkë rubʼanik yerutoʼ ri nikʼaj chik, y ma xyoʼej ta chë ri winäq nkitzolij rukʼexel che rä (Mat. 20:28). We ri qajowabʼäl chrij Jehová chqä chkij ri qachʼalal pa congregación junan rkʼë rajowabʼäl Jesús, xtqatäj qaqʼij rchë xtqbʼä pa moloj chrij Runataxik Rukamik Jesús chqä pa qamoloj ri yebʼan ronojel semanas.

15. ¿Achoq chkij nqayaʼ wä más qan rchë yeqatoʼ?

¹⁵ Kan jun nimaläj utzil qlon rma yoj kʼo chpan rutinamit Jehová. Rma riʼ, kan rkʼë ronojel qan  nqajäm qawäch rchë yeqaʼän invitar ri winäq rchë keʼok pä pa rutinamit Dios. Ye kʼa kan más nqayaʼ qan chkitoʼik ri qachʼalal ri ma yebʼä ta chik pa qamoloj chqä ma yeʼel ta chik chutzjoxik le Biblia (Gál. 6:10). Nqakʼüt qajowabʼäl chkiwäch taq nqaʼij chkë chë keʼapon pa qamoloj, más taq nnatäx rukamik Jesús. Jehová chqä Jesús janina kiʼkʼuxlal nkinaʼ taq nkitzʼët chë jun winäq ntzolin pä rukʼuʼx, y röj chqä kan ke riʼ nqanaʼ (Mat. 18:14).

16. a) ¿Achkë ütz nqaʼän chpan ri congregación, chqä achkë rubʼanik yojkitoʼ ri qamoloj? b) ¿Achkë rma kan ütz chë chkipan re qʼij reʼ nqanataj ri xuʼij qa Jesús chpan Juan 3:16?

¹⁶ Chkipan ri semanas ri yepetenäq, keqabʼanaʼ invitar ronojel ri winäq rchë keʼapon qkʼë chpan ri moloj chrij Runataxik Rukamik Jesús, ri xtbʼan ri aqʼaʼ chë ri viernes 19 de abril rchë ri junaʼ 2019 (tatzʼetaʼ ri recuadro « ¿Achkë xkeqaʼän invitar?»). Y chpan ri congregación ütz tqatolaʼ qiʼ rchë nqbʼä ronojel mul chkipan ri qamoloj. Rma chë ri qʼij ri xtchup ruwäch ri itzelal xa más naqaj chik kʼo pä, tqatjaʼ qaqʼij chë ronojel mul nqbʼä pa qamoloj. Riʼ xtqrtoʼ chë ronojel mul xtqakʼüt chë nqaqasaj qiʼ, chë ma nqaxiʼij ta qiʼ chqä chë yojajowan (1 Tes. 5:8-11). Tqakʼutuʼ chwäch Jehová chë kantzij nqamatyoxij ri nimaläj ajowabʼäl nunaʼ ryä chqä rukʼajol chqij röj (taskʼij ruwäch Juan 3:16 *).