TJONÏK 4
¿Achkë rma röj nqanataj rukamik Jesús?
«Tibʼanaʼ kʼa reʼ rchë natabʼäl wchë rïn» (LUC. 22:19).
BʼIX 20 Enviaste a Jesús, tu Hijo amado
RI XTQATZʼËT QA *
1, 2. a) Taq nkäm jun qachʼalal, ¿ajän riʼ taq más nnatäj chqë? b) Chpan rukʼisbʼäl aqʼaʼ ri xjeʼ kikʼë rutzeqelbʼëy, ¿achkë xuʼän Jesús?
TAQ nkäm jun qachʼalal, tapeʼ kan kʼïy junaʼ xkeqʼax, ronojel mul nnatäj chqë. Ye kʼa, más na chik nnatäj chqë taq nbʼeqä ri fecha xkäm.
2 Ronojel junaʼ, kan pa millón winäq nqamöl qiʼ chwäch jontir le Ruwachʼulew rchë nqanataj rukamik jun achï ri kowan nqajoʼ: Jesucristo (1 Ped. 1:8). Röj nqaʼän riʼ rma nqanataj ri xyaʼö rukʼaslemal pa qawiʼ rchë nqrköl chwäch ri mak chqä ri kamïk (Mat. 20:28). Jesús nrajoʼ chë ri rutzeqelbʼëy nkinataj rukamik. Qataman riʼ rma chpan rukʼisbʼäl aqʼaʼ ri xjeʼ kikʼë rutzeqelbʼëy, ryä xuʼän jun waʼin kikʼë ri kan kʼo ruqʼij chqä xuʼij reʼ chkë: «Tibʼanaʼ kʼa reʼ rchë natabʼäl wchë rïn» (Luc. 22:19).
3. ¿Achkë xtqatzʼët chpan re tjonïk reʼ?
3 Tapeʼ kan pa millón winäq yeʼapon chpan ri moloj chrij Runataxik Rukamik Jesús, xa xuʼ jun koʼöl molaj winäq kiyoʼen yebʼä chkaj; ri nkʼaj chik kiyoʼen yejeʼ qa chwäch le Ruwachʼulew. Chpan re tjonïk reʼ xtqatzʼët achkë rma re kaʼiʼ molaj winäq reʼ kan nkirayij yejeʼ chpan re moloj reʼ ronojel junaʼ. Chqä xtqatzʼët achkë utzil nqïl qa röj rma nqanataj rukamik Jesús. Rma riʼ, naʼäy tqatzʼetaʼ achkë rma ri qachʼalal ri yechaʼon rchë yebʼä chkaj yejeʼ chpan re moloj reʼ.
¿ACHKË RMA RI YECHAʼON RCHË YEBʼÄ CHKAJ YEJEʼ CHPAN RE MOLOJ REʼ?
4. ¿Achkë rma ri yechaʼon rchë yebʼä chkaj ütz nkitäj ri kaxlanwäy chqä ri vino taq nnatäx rukamik Jesús?
4 Ri yechaʼon rchë yebʼä chkaj kan nkirayij yejeʼ chpan re moloj reʼ ronojel junaʼ rchë nkitäj ri kaxlanwäy chqä ri vino. ¿Achkë rma ryeʼ ütz nkiʼän riʼ? Rchë nqatamaj riʼ, tqanataj achkë xuʼän Jesús ri rukʼisbʼäl aqʼaʼ xjeʼ kikʼë rutzeqelbʼëy. Taq xuʼän yän ri Pascua, Jesús xuʼän ri Loqʼoläj Waʼin kikʼë rutzeqelbʼëy. Ryä xqʼaxaj apü ri kaxlanwäy chqä ri vino chkë ri 11 ru-apóstoles ri majun bʼëy xkiyaʼ ta qa y xuʼij chkë chë tkitjaʼ chqä tkiqmuʼ. Ryä xtzjoj kaʼiʼ jikibʼäl tzij chkë: ri kʼakʼakʼ jikibʼäl tzij chqä ri jikibʼäl tzij xuʼän kikʼë rchë nkiqʼät tzij rkʼë chlaʼ chkaj (Luc. 22:19, 20, 28-30). * Re jikibʼäl taq tzij reʼ xkiʼän chë ri apóstoles chqä jun molaj winäq ri xa yejlatäl ütz yeʼok qʼatöy taq tzij chqä sacerdotes chlaʼ chkaj (Apoc. 5:10; 14:1). Ri yechaʼon rchë yebʼä chkaj ye kʼo chkipan re kaʼiʼ jikibʼäl tzij reʼ. Rma riʼ xa xuʼ ryeʼ ütz nkitäj ri kaxlanwäy chqä ri vino taq nnatäx rukamik Jesús.
5. ¿Achkë kitaman ri yechaʼon rchë yebʼä chkaj chrij ri kiyoʼen apü?
5 Jun chik rma chë ri yechaʼon rchë yebʼä chkaj kan nkirayij nkinataj rukamik Jesús, ya riʼ chë re moloj reʼ nuyaʼ qʼij chkë rchë nkiquʼ rij ri kiyoʼen chkiwäch apü. ¿Achkë rutzjun Jehová chkë re cristianos reʼ? Ryeʼ kiyoʼen jun kʼaslemal chlaʼ chkaj ri majun ta jun nkowin nchpü rchë, kiyoʼen chqä nkiqʼät tzij rkʼë Cristo chqä kikʼë ri nkʼaj chik ri ye kʼo chpan ri 144,000 y, ri más ruqʼij, ryeʼ kiyoʼen yejeʼ rkʼë Jehová (1 Cor. 15:51-53; 1 Juan 3:2). Re qachʼalal reʼ kitaman chë Jehová ruyaʼon qʼij chkë rchë nkibʼewlaʼ riʼ we majun bʼëy nkiqʼäj ta rutzij tapeʼ kan xtkïl kamïk (2 Tim. 4:7, 8). Ryeʼ kan jaʼäl nkinaʼ taq nkiquʼ rij jontir ri kiyoʼen apü (Tito 2:13). Ye kʼa, ri nbʼix «nkʼaj chik nkarneʼl» chkë rma Jesús, ¿achkë rma nkinataj rukamik? (Juan 10:16). Tqatzʼetaʼ jojun rma.
¿ACHKË RMA YEBʼÄ CHPAN RE MOLOJ REʼ RI MA XKEBʼÄ TA CHKAJ?
6. ¿Achkë rma ri xkejeʼ qa chwäch le Ruwachʼulew ronojel junaʼ yeʼapon chpan ri moloj chrij Runataxik Rukamik Jesús?
6 Jun rma ri yejeʼ chpan re moloj reʼ ri xkekanaj qa chwäch le Ruwachʼulew ya riʼ nkinataj rukamik Jesús tapeʼ ma nkitäj ta ri kaxlanwäy nixta ri vino. Ri naʼäy mul ri xbʼix chkë chë ütz yejeʼ chpan re moloj reʼ ya riʼ pa junaʼ 1938. Ri wuj La Torre del Vigía rchë abril, 1938, xuʼij chë ri ye kʼo chpan ri molaj ri nbʼix «nkʼaj chik nkarneʼl» chkë rma Jesús «ma itzel ta we yejeʼ chpan re moloj reʼ chqä nkitzʼët achkë nbʼan chpan». Re wuj reʼ xuʼij chqä: «Ryeʼ chqä kʼo ta chë kiʼ kikʼuʼx ri qʼij riʼ». Achiʼel nkiʼän ri yeskʼïx chpan jun kʼlanen, ri kan kiʼ kikʼuʼx yeʼapon rchë nkitzʼët achkë nbʼanatäj chpan ri kʼlanen, ri cristianos ri ma yechaʼon ta rchë yebʼä chkaj kan kiʼ kikʼuʼx yejeʼ chpan ri moloj chrij Runataxik Rukamik Jesús.
7. ¿Achkë rma ri xkekanaj qa chwäch le Ruwachʼulew nkajoʼ nkikʼoxaj ri tzijonem nyaʼöx taq nnatäx rukamik Jesús?
7 Ri xkekanaj qa chwäch le Ruwachʼulew nkiquʼ chqä rij ri kiyoʼen apü. Ryeʼ nkajoʼ nkikʼoxaj ri tzijonem nyaʼöx chpan re moloj reʼ, rma chpan ri tzijonem riʼ ntzjöx chqä achkë xtuʼän Jesús chqä ri 144,000 pa kiwiʼ ri winäq chkipan ri Mil Junaʼ ri Xkeqʼatö Tzij. Ri qʼatöy taq tzij riʼ chqä Jesucristo, ri ukʼwayon bʼey chkiwäch, xtkiʼän chë le Ruwachʼulew xtbʼeʼok jun Kotzʼijaläj Ulew chqä chë ri winäq xttel ri mak chkij. Ri pa millón winäq ri yejeʼ chpan re moloj reʼ, kan jaʼäl nkinaʼ taq nkiquʼ rij ri qʼij taq xkebʼetzʼaqät ri profecías ye kʼo chpan le Biblia, achiʼel ri kʼo chpan Isaías 35:5, 6; 65:21-23 y Apocalipsis 21:3, 4. Taq nkiquʼ rij ri kʼaslemal xtkïl chwäch ri kʼakʼakʼ Ruwachʼulew kikʼë kichʼalal, ryeʼ más nkowïr ri kikʼuqbʼäl kʼuʼx chqä más nkiyaʼ chwäch kan majun bʼëy nkiqʼäj ta rutzij Jehová (Mat. 24:13; Gál. 6:9).
8. ¿Achkë chik jun rma ri xkekanaj qa chwäch le Ruwachʼulew yeʼapon taq nnatäx rukamik Jesús?
8 Ryeʼ chqä yeʼapon chpan re moloj reʼ rma nkajoʼ nkikʼüt chkiwäch ri yechaʼon rchë yebʼä chkaj chë yekajoʼ chqä chë nkajoʼ yekitoʼ. Chpan ri Ruchʼaʼäl Dios bʼin qa chë ri yechaʼon rchë yebʼä chkaj chqä ri xkekanaj qa chwäch le Ruwachʼulew kan junan xtuʼän kiwäch. Keqatzʼetaʼ jojun profecías ri nkikʼüt riʼ.
9. Achiʼel nuʼij chpan ri profecía kʼo chpan Zacarías 8:23, ¿achkë nkinaʼ ri xkekanaj qa chwäch le Ruwachʼulew chkij ri yechaʼon rchë yebʼä chkaj?
9 (Taskʼij ruwäch Zacarías 8:23). Re profecía reʼ kan jaʼäl rubʼanik nukʼüt achkë nkinaʼ ri xkekanaj qa chwäch le Ruwachʼulew chkij ri yechaʼon rchë yebʼä chkaj. Ri tzij «jun judío» chqä ri tzij «rïx» ntzjon chkij ri yechaʼon rchë yebʼä chkaj (Rom. 2:28, 29). Ri «10 achiʼaʼ ri yetzjon ronojel ruwäch chʼaʼäl» nkikʼambʼej tzij ri xkekanaj qa chwäch le Ruwachʼulew. Ryeʼ kan kuw nkichäp kitzyaq ri yechaʼon rchë yebʼä chkaj, ntel chë tzij, chë junan nkajoʼ nkiyaʼ ruqʼij Jehová kikʼë. Achiʼel nqatzʼët, ri xkekanaj qa chwäch le Ruwachʼulew yebʼä chpan re moloj reʼ rchë nkikʼüt chë kan junan rubʼanon kiwäch kikʼë ri yechaʼon rchë yebʼä chkaj.
10. ¿Achkë rubʼanon Jehová rchë tzʼaqatajnäq pä ri profecía kʼo chpan Ezequiel 37:15-19, 24, 25?
10 (Taskʼij ruwäch Ezequiel 37:15-19, 24, 25). Jehová rubʼanon chë tzʼaqatajnäq pä re profecía reʼ, rma rubʼanon chë ri yechaʼon rchë yebʼä chkaj chqä ri xkekanaj qa chwäch le Ruwachʼulew kan junan rubʼanon kiwäch. Re profecía reʼ ntzjon chkij kaʼiʼ cheʼ. Ri rucheʼ «Judá» nukʼambʼej tzij ri yechaʼon rchë yebʼä chkaj —chpan re ijatzul reʼ xechaʼöx ri xeʼok qʼatöy tzij pa Israel—. Y ri rucheʼ «Efraín» nukʼambʼej tzij ri xkekanaj chwäch le Ruwachʼulew. * Jehová xkerutün re molaj reʼ rchë yeʼok «xa jun» cheʼ. Reʼ ntel chë tzij chë junan xkesamäj chuxeʼ ruqʼatbʼäl tzij Cristo. Ronojel junaʼ, ri yechaʼon rchë yebʼä chkaj chqä ri xkekanaj qa chwäch le Ruwachʼulew junan nkinataj rukamik Jesús kan achiʼel ta jun molaj karneʼl ri xa jun nyuqʼun kichë (Juan 10:16).
11. ¿Achkë rubʼanik kan más najin yetoʼon ri «karneʼl» yetzjöx chpan Mateo 25:31-36, 40?
11 (Taskʼij ruwäch Mateo 25:31-36, 40). Ri «karneʼl» yetzjöx chpan re kʼambʼäl tzij reʼ ntzjon chkij ri winäq ri kikʼwan jun jïk kʼaslemal ri ye kʼo chkipan ri rukʼisbʼäl taq qʼij. Re molaj reʼ nbʼix chqä «nkʼaj chik nkarneʼl» chkë rma Jesús. Ryeʼ kan rkʼë ronojel kan yekitoʼ ri yechaʼon rchë yebʼä chkaj. Jun rubʼanik ri kan más kibʼanon riʼ ya riʼ rkʼë rutzjoxik le Biblia (Mat. 24:14; 28:19, 20).
12, 13. ¿Achkë chik nkʼaj rubʼanik najin yetoʼöx ri yechaʼon rchë yebʼä chkaj?
12 Ronojel junaʼ, chkipan ri semanas taq jbʼaʼ nrajoʼ rchë nnatäx rukamik Jesús, ri kiyoʼen yekanaj qa chwäch le Ruwachʼulew nkikʼüt chë nkajoʼ yekitoʼ ri yechaʼon rchë yebʼä chkaj. ¿Achkë rubʼanik nkikʼüt riʼ? Taq nkiʼän jontir ri kʼo pa kiqʼaʼ rchë nkiskʼij xa bʼa achkë winäq chpan re moloj reʼ (tatzʼetaʼ ri recuadro « ¿Achʼobʼon chik rït achkë xtaʼän?»). Chwäch jontir Ruwachʼulew, ryeʼ nkiʼän ri najowatäj rchë nkinataj rukamik Jesús, tapeʼ chpan ki-congregación majun ta jun chaʼon rchë nbʼä chkaj. Ri kiyoʼen yekanaj qa chwäch le Ruwachʼulew kan kiʼ kikʼuʼx ke riʼ rubʼanik yekitoʼ ri yechaʼon rchë yebʼä chkaj. Ryeʼ kitaman chë jontir ri xtkiʼän rchë xkekitoʼ ruchʼalal Cristo, chwäch ryä, kan achiʼel ta che rä ryä xtkiʼän wä (Mat. 25:37-40).
13 Xa bʼa akuchï qayoʼen wä qakʼaslemal, ¿achkë rma röj nqajoʼ nqanataj rukamik Jesús?
¿ACHKË RMA KAN JONTIR NQBʼÄ CHPAN RE MOLOJ REʼ?
14. ¿Achkë rubʼanik kikʼutun Jehová chqä Jesús chë kowan yojkajoʼ?
14 Rma nqtyoxin chë Jehová chqä Jesús kowan yojkajoʼ. Jehová kan kʼïy rubʼanik rukʼutun chqawäch chë nqrajoʼ. Ye kʼa ri más nüm rubʼanik xkʼüt chë nqrajoʼ ya riʼ taq xtäq pä Rukʼajol rchë xtäj poqän chqä xbʼekäm xa qmä röj (Juan 3:16). Jesús chqä xkʼüt chë kowan nqrajoʼ rma ma xkʼewaj ta xyaʼ rukʼaslemal pa qawiʼ (Juan 15:13). Tapeʼ ma nqkowin ta nqatöj jontir chkë ri kibʼanon pa qawiʼ, rkʼë ri rubʼanik kʼaslemal nqakʼwaj, röj nqkowin nqakʼüt chkiwäch chë nqtyoxin chkë (Col. 3:15). Taq nqanataj rukamik Jesús, nqakʼüt chkiwäch chë nqtyoxin chkë chqä chë kowan yeqajoʼ.
15. ¿Achkë rma ri yechaʼon rchë yebʼä chkaj chqä ri xkekanaj qa chwäch le Ruwachʼulew kowan yetyoxin rma ri xuʼän Jesús pa kiwiʼ?
15 Rma kowan nqtyoxin chë Jesús xyaʼ rukʼaslemal pa qawiʼ (Mat. 20:28). Ri yechaʼon rchë yebʼä chkaj kan nkiloqʼoqʼej ri xuʼän Jesús pa kiwiʼ, rma ya riʼ nuʼän chë yekowin nkïl ri kiyoʼen apü. Rma kan kikʼuqbʼan kikʼuʼx chrij ri xuʼän Jesús, chwäch Jehová ryeʼ kikʼwan jun jïk kʼaslemal chqä yeʼok ralkʼwal (Rom. 5:1; 8:15-17, 23). Ri xkekanaj qa chwäch le Ruwachʼulew kowan chqä nkiloqʼoqʼej ri xuʼän Jesús pa kiwiʼ, rma taq nkikʼuqbʼaʼ kikʼuʼx chrij riʼ, Dios kiʼ rukʼuʼx nuʼän kikʼë, yekowin nkiyaʼ ruqʼij chqä yekowin yekolotäj qa taq xtqʼax «ri nimaläj tijöj poqonal» (Apoc. 7:13-15). Taq re kaʼiʼ molaj reʼ ronojel junaʼ nkimöl kiʼ rchë nkinataj rukamik Jesús, nkikʼüt chë kowan nkityoxij ri xuʼän ryä pa kiwiʼ.
16. ¿Achkë chik jun rma nqanataj rukamik Jesús?
16 Rma nqajoʼ nqanmaj rutzij Jesús. Xa bʼa akuchï xtqïl wä qakʼaslemal, jontir röj nqajoʼ nqasmajij ri xuʼij qa Jesús ri aqʼaʼ taq xuʼän ri Loqʼoläj Waʼin. Ryä xuʼij: «Tibʼanaʼ kʼa reʼ rchë natabʼäl wchë rïn» (1 Cor. 11:23, 24).
¿ACHKË RMA JONTIR NQÏL UTZIL TAQ NQJEʼ CHPAN RE MOLOJ REʼ?
17. ¿Achkë rma ri moloj chrij Runataxik Rukamik Jesús nuʼän chë nqjelun más rkʼë Jehová?
17 Rma nqrtoʼ rchë nqjelun más rkʼë Jehová (Sant. 4:8). Achiʼel qatzʼeton pä, re moloj reʼ nqrtoʼ rchë nqaquʼ rij ri rutzjun Jehová chqë y ri jaruʼ nqrajoʼ (Jer. 29:11; 1 Juan 4:8-10). Röj kan qayaʼon chwäch qan chë xtqakʼül ri rutzjun chqë y chë ronojel mul xtqrajoʼ. Taq nqaquʼ rij jontir riʼ, röj más nqajoʼ Jehová chqä más junan nuʼän qawäch rkʼë (Rom. 8:38, 39).
18. ¿Achkë rubʼanik nqrtoʼ röj ri nqaquʼ rij ri xuʼän Jesús?
18 Rma nqrtoʼ rchë nqaʼän kan achiʼel xuʼän Jesús (1 Ped. 2:21). Jojun qʼij taq majanä tbʼeqä re moloj reʼ, röj nqanukʼuj rij ri xuʼän Jesús chpan rukʼisbʼäl semana ri xjeʼ kikʼë rutzeqelbʼëy, ri xbʼanatäj taq xkäm chqä taq xkʼasöx pä. Taq yoj kʼo chik chpan re moloj reʼ, ri tzijonem nyaʼöx nunataj chqë chë Jesús kowan nqrajoʼ (Efes. 5:2; 1 Juan 3:16). Taq nqaskʼij ruwäch jontir ri xuʼän Jesús pa qawiʼ chqä nqchʼobʼon chrij, nuʼän chë ronojel mul nqaʼän «jontir ri xuʼän ryä» (1 Juan 2:6).
19. ¿Achkë nkʼatzin nqaʼän rchë Jehová ronojel mul xtqrajoʼ?
19 Rma nuʼän chë nqayaʼ más chwäch qan nqaʼän jontir ri najowatäj rchë ronojel mul nq-ok rachiʼil Dios (Jud. 20, 21). Taq nqaʼän jontir ri kʼo pa qaqʼaʼ rchë nqanmaj rutzij, rchë nqachʼajchʼobʼej rubʼiʼ chqä rchë kiʼ rukʼuʼx nuʼän qkʼë, ryä ronojel mul xtqrajoʼ (Prov. 27:11; Mat. 6:9; 1 Juan 5:3). Ri nqjeʼ chpan ri moloj chrij Runataxik Rukamik Jesús nuyaʼ qachqʼaʼ rchë ronojel qʼij nqaʼän ri nqä chwäch ryä, kan achiʼel ta nqaʼij che rä: «¡Nwajoʼ yinok awachiʼil xa bʼa jaruʼ junaʼ xkeqʼax!».
20. ¿Achkë rma röj nqajoʼ nqjeʼ chpan ri moloj chrij Runataxik Rukamik Jesús?
20 Xa bʼa akuchï na kʼa qayoʼen wä qakʼaslemal, röj kan kʼo kʼïy rma nqanataj rukamik Jesús ronojel junaʼ. Ronojel mul ri nqamöl qiʼ chpan re moloj reʼ, nqanataj rukamik jun achï ri kowan nqajoʼ: Jesucristo. Y ri más rejqalen, ya riʼ chë nqanataj chë majun ta chik jun ri más nqrajoʼ chwäch Jehová, rma ma xkʼewaj ta xyaʼ Rukʼajol pa qawiʼ rchë nqrköl. Re junaʼ reʼ, xtqanataj rukamik Jesús ri aqʼaʼ rchë ri viernes 15 de abril, 2022. Röj kowan nqajoʼ Jehová chqä Jesús. Rma riʼ majun ta chik jun ri kʼo más rejqalen chwäch ri nqjeʼ chpan re moloj reʼ, ri kan kowan ruqʼij.
BʼIX 16 Alabemos a Jehová por su Hijo, el Ungido
^ Xa bʼa akuchï qayoʼen wä chë xtyaʼöx qakʼaslemal, chlaʼ chkaj o chwäch le Ruwachʼulew, ronojel junaʼ nqajoʼ nqanataj rukamik Jesús. Chpan re tjonïk reʼ xtqatzʼët ri nuʼij le Biblia chrij ri achkë rma kʼo chë nqjeʼ chpan re moloj reʼ y achkë utzil nqïl rma nqaʼän riʼ.
^ Xtatamaj más chrij ri kʼakʼakʼ jikibʼäl tzij chqä chrij ri jikibʼäl tzij ri xuʼän Jesús kikʼë rutzeqelbʼëy rchë nkiqʼät tzij rkʼë chlaʼ chkaj chpan ri tzijonem «Llegarán a ser ‘un reino de sacerdotesʼ», ri xpë chpan ri wuj La Atalaya rchë 15 de octubre, 2014, ruxaq 15 kʼa 17.
^ Xtatamaj más chrij ri profecía ri ntzjon chkij ri kaʼiʼ cheʼ ri kʼo chpan ri capítulo 37 rchë Ezequiel chpan ri wuj La adoración pura de Jehová: ¡por fin restaurada!, ruxaq 130 kʼa 135, peraj 3 kʼa 17.