CHPAN Rupixaʼ Moisés nuʼij chë taq ri israelitas nkiyaʼ wä jun sacrificio, Jehová xyaʼ qʼij chkë rchë nkiyaʼ tórtolas o palomas. Re chköp reʼ ronojel mul ntzjöx kij taq ntzjöx kij ri pixaʼ chkij ri sacrificios (Lev. 1:14; 12:8; 14:30). Ri xkʼutuj Jehová chkë kan ütz, rma ma ronojel ta mul yeʼawïl tórtolas. Tqatzʼetaʼ achkë rma.

Ri tórtolas kan ye junan jbʼaʼ kikʼë ri palomas, ye kʼa xa xuʼ yejeʼ pa Israel chkipan ri ikʼ taq más kʼatän nuʼän. Taq nbʼeqä octubre, re chköp reʼ yebʼä pa sur chkipan tinamït ri akuchï más kʼatän nuʼän, y yetzolin pa Israel taq nchapatäj saqʼij (Cant. 2:11, 12; Jer. 8:7). Rma riʼ, taq ru-tiempo jöbʼ, ri israelitas kʼayewal wä nuʼän chkiwäch yekïl tórtolas rchë nkiyaʼ ki-sacrificios.

Ye kʼa ri palomas majun akuchï yebʼä wä, rma riʼ ronojel mul yeʼawïl wä pa Israel. Chqä re chköp reʼ kan chaq ye kʼo wä pa kachoch ri winäq (tajnamaj rkʼë Juan 2:14, 16). Kʼo jun wuj ri nuʼij chë «ri tinamït ri ye kʼo chlaʼ Palestina, kan konojel bʼaʼ winäq xejeʼ palomas chkachoch. Jontir winäq nkiyaʼ wä jun jül chwäch jun xan rchë kachoch; ya riʼ wä ntok kachoch ri palomas» (tajnamaj rkʼë Isaías 60:8).

¿Achkë nukʼüt qa reʼ chqawäch chrij Jehová? Chë ryä kowan nqrajoʼ chqä ma nukʼutuj ta chqë ri ma nqkowin ta nqayaʼ. Nqʼalajin riʼ rma xyaʼ qʼij chkë ri israelitas nkiyaʼ ajxikʼ taq chköp ri yekowin wä nkïl xa bʼa achkë ikʼ chpan ri junaʼ.