YA Yomara chqä kaʼiʼ ruxbʼal, Marcelo chqä Hiver, ma yekowin ta yetzuʼun chqä ye kʼo chpan jun koʼöl tinamït ri kʼo Guatemala. Ya Yomara xchäp jun rutjonik chrij le Biblia kikʼë ri Testigos, y chrij riʼ, ri ruxbʼal chqä xkiʼän riʼ. Ye kʼa kʼo wä jun kʼayewal kilon: ma yekowin ta wä nkiskʼij ruwäch braille. Rma riʼ, ri xtjon kichë kʼo wä chë nuskʼij ri textos chqä ri párrafos chkiwäch.

Ryeʼ chqä kʼayewal xuʼän chkiwäch xebʼä pa moloj, rma ri Salón del Reino ri más wä naqaj nkanaj chkë kʼa pa jun 40 minutos kʼo wä, y kiyonïl ma yekowin ta wä yeʼapon. Rma riʼ, ri qachʼalal ri ye kʼo chpan ri congregación ri akuchï xebʼä wä xkijäl kiʼ chkiwäch rchë yekikʼwaj äl chkipan ri moloj. Y taq che oxiʼ xyaʼöx ki-asignaciones chkipan ri moloj ri yebʼan chukojöl qʼij, ri qachʼalal yekitoʼ wä rchë nkanaj qa pa kijolon jontir ri kʼo wä chë nkiʼij.

Pa mayo rchë ri junaʼ 2019, ri congregación xchäp xeruʼän moloj pa kitinamit ryeʼ, chqä jun kʼlaj precursores regulares xeqʼax chpan ri tinamït riʼ. Re kʼlaj qachʼalal reʼ xkiyaʼ chkiwäch yekitjoj che oxiʼ ryeʼ rchë nkiskʼij chqä nkitzʼibʼaj braille, tapeʼ ryeʼ ma kitaman ta chqä nkiʼän riʼ. Rma riʼ, xebʼä akuchï ye kʼo wä libros rchë nkitamaj más chrij braille chqä achkë rubʼanik nakʼüt chkiwäch ri nkʼaj chik.

Xa pa jun kayoxiʼ ikʼ, ri oxiʼ kichʼalal kiʼ ya kitaman wä chik nkiskʼij ruwäch braille, ya riʼ xerutoʼ rchë más xkʼuqeʼ kikʼuʼx chpan ruchʼaʼäl Dios. a Komä, ya Yomara, Marcelo chqä Hiver ye precursores regulares, y Marcelo jun toʼonel pa congregación. Ryeʼ kan kʼïy tiempo nkiksaj rchë nkiyaʼ ruqʼij Jehová ronojel semanas. Y rma kan nkiyaʼ kan chubʼanik rusamaj Jehová, ri ye kʼo chkinaqaj kan ke riʼ chqä nkiʼän.

Ya Yomara chqä ri kaʼiʼ ruxbʼal kan kowan yetyoxin rma ri rubʼanon ri congregación pa kiwiʼ chqä ri rubʼanik rukʼutun chkiwäch chë kowan yekajoʼ. Ya Yomara nuʼij: «Kan chpan qa ri qʼij ri xqatamaj kiwäch, ri qachʼalal kikʼutun chqawäch chë kantzij yojkajoʼ». Y Marcelo nuʼij: «Röj qlon utziläj qachiʼil pa congregación y yoj kʼo chpan jun familia ri kʼo chwäch ronojel le Ruwachʼlew ri kan junan rubʼanon kiwäch rma kan jontir nkajoʼ kiʼ». Ya Yomara chqä ruxbʼal kan nkirayij chë nbʼeqä ta yän ri qʼij taq xkekowin xtkitzʼët chë le Ruwachʼlew ya kotzʼijaläj chik rubʼanon ruwäch (Sal. 37:10, 11; Is. 35:5).