1. ¿Achkë xuʼän Jehová taq Adán y Eva xemakun? (Génesis 3:15).

 TAQ Adán y Eva xemakun, Jehová kan chanin xkanuj rubʼanik rchë ri kalkʼwal ma yechaʼ ta chiʼ. Rma riʼ, xyaʼ qa jun profecía ri kan kowan rejqalen. Re profecía reʼ nqïl chpan Génesis 3:15 (taskʼij ruwäch).

2. ¿Achkë rma ri profecía kʼo chpan Génesis 3:15 kan kowan ruqʼij?

² Re profecía reʼ kʼo chpan ri naʼäy wuj rchë le Biblia. Y jontir ri wuj ye kʼo chpan le Biblia kikʼwan kiʼ rkʼë re profecía reʼ. Achiʼel jun koloʼ ri nxim chrij jun ejqaʼn siʼ ri nuʼän chë ri siʼ nkikʼwaj kiʼ, ri tzij ye kʼo chpan Génesis 3:15 nkiʼän chë jontir ri wuj ri ye kʼo chpan le Biblia kan junan ri nkitzjoj rij. ¿Achkë rutzjol riʼ? Chë Dios xttäq pä jun ri xtkolö qchë rchë nuchüp ruwäch ri Diablo chqä jontir ri yetzeqelbʼen rchë. * ¡Re rutzjol reʼ kan kowan rejqalen chqawäch röj ri nqjowan Jehová!

3. ¿Achkë xtqatzʼët chpan re tjonïk reʼ?

³ Chpan re tjonïk reʼ xkeqaqʼalajsaj re kʼutunïk reʼ chrij Génesis 3:15: ¿achkë ntzjöx kij chpan re profecía reʼ?, ¿achkë rubʼanik tzʼaqatajnäq pä? y ¿achkë rubʼanik nqrtoʼ chkipan ri qʼij yoj kʼo komä?

4. ¿Achkë riʼ «ri kumätz», y achkë rma qataman riʼ?

⁴ Chpan Génesis 3:14, 15 ntzjöx rij jun «kumätz», ri «rujatzul» ri kumätz riʼ, jun «ixöq» chqä ri «rujatzul» ri ixöq riʼ. ¿Achoq chkij ntzjon wä re profecía reʼ? Le Biblia nqrtoʼ rchë nqatamaj riʼ. * Naʼäy tqatzjoj rij «ri kumätz». Reʼ ma  kan ta jun kumätz, rma ma ta xqʼax pa rujolon ri xuʼij Jehová che rä pa jardín de Edén. Rma riʼ kʼo ta chë ntzjon chrij jun ri nqʼax pa rujolon ri nbʼix che rä. Le Biblia kan nuʼij chqë achkë riʼ. Apocalipsis 12:9 nuʼij chë «ri kumätz ri xjeʼ pa naʼäy» ya riʼ Satanás, ri Diablo. ¿Y achkë riʼ ri rujatzul ri kumätz?

5. ¿Achkë riʼ ri rujatzul ri kumätz?

⁵ Taq le Biblia nuksaj ri tzij «rujatzul», ntzjon chkij ri junan yechʼobʼon chqä junan yekiʼän rkʼë ri nbʼix chrij chë ya riʼ kitataʼ. Rma riʼ nqaʼij chë ri rujatzul ri kumätz ya riʼ ri ángeles ri ma xkinmaj ta rutzij Dios chqä ri winäq ri nkipabʼaʼ kiʼ chwäch Jehová chqä nkitzʼlaʼ rutinamit, kan achiʼel nuʼän Satanás. Chkikojöl ryeʼ ye kʼo ri ángeles ri xepë chwäch le Ruwachʼulew pa ruqʼij qa Noé chqä ri winäq ri itzel kinaʼoj kan achiʼel Satanás, ri kitataʼ (Gén. 6:1, 2; Juan 8:44; 1 Juan 5:19; Jud. 6).

6. ¿Achkë rma nqaʼij chë ma yë ta Eva «ri ixöq» ntzjöx chpan Génesis 3:15?

⁶ Komä tqatzʼetaʼ achkë riʼ «ri ixöq». ¿Yë komä Eva? Manä. Tqaquʼ rij reʼ. Ri profecía nuʼij chë ri rujatzul ri ixöq xtpaʼeʼ pa ruwiʼ rujolon ri kumätz. Achiʼel xqatzʼët yän pä, ri kumätz ya riʼ Satanás, jun espíritu. Rma riʼ nqaʼij chë jun winäq ri kʼo qa mak chrij, jun rujatzul Eva, ma xtkowin ta xtchüp ruwäch Satanás. Rma riʼ, ¿achkë wä rubʼanik xtchup ruwäch Satanás?

7. ¿Achkë rubʼanik nqrtoʼ Apocalipsis 12:1, 2, 5, 10 rchë nqatamaj achkë riʼ «ri ixöq»?

⁷ Ri rukʼisbʼäl wuj kʼo chpan le Biblia nuʼij chqë achkë riʼ ri ixöq ntzjöx chpan Génesis 3:15 (taskʼij ruwäch Apocalipsis 12:1, 2, 5, 10). Reʼ ma jun ixöq ta ri kʼo chwäch le Ruwachʼulew, rma Apocalipsis nuʼij chë kʼo ri Ikʼ chraqän y kʼo  jun corona chujolon ri kʼo 12 chʼumilaʼ chwäch. Ryä njeʼ jun ral ri kan kʼo ruqʼij: ri Ruqʼatbʼäl Tzij Dios. Rma re Qʼatbʼäl Tzij reʼ chkaj kʼo wä, ri ixöq kʼo ta chqä chë chlaʼ kʼo wä. Re ixöq reʼ nukʼambʼej tzij ri peraj rchë rutinamit Jehová ri kʼo chlaʼ chkaj, ri ruyon utziläj taq ángeles ye kʼo chpan (Gál. 4:26).

8. ¿Achkë riʼ ri rujatzul ri ixöq, y ajän xbʼeʼok rujatzul? (Génesis 22:15-18).

⁸ Ri Ruchʼaʼäl Dios nqrtoʼ chqä rchë nqatamaj achkë riʼ ri rujatzul ri ixöq. Reʼ kʼo ta chë rkʼë rujatzul Abrahán npë wä (taskʼij ruwäch Génesis 22:15-18). Y ri profecía kan xbʼetzʼaqät, rma Jesús kan rujatzul wä Abrahán (Luc. 3:23, 34). Ye kʼa rchë chë rujatzul ri ixöq nkowin nuchüp ruwäch Satanás, kʼo wä chë njeʼ más ruchqʼaʼ chwäch jun winäq. Rma riʼ, taq Jesús kʼo wä jun 30 rujunaʼ, ryä xchaʼöx rkʼë ri loqʼoläj ruchqʼaʼ Dios. Taq xbʼanatäj riʼ, ryä xbʼeʼok ri kʼo más rejqalen chkë ri rujatzul ri ixöq (Gál. 3:16). Taq ryä xkäm chqä xkʼasöx pä, Dios xuʼän chë kan «nimaläj ruqʼij xjeʼ» chqä xyaʼ qa jontir pa ruqʼaʼ, «ri kʼo chkaj chqä ri kʼo chwäch le Ruwachʼulew», ntel chë tzij chë xyaʼöx ri uchqʼaʼ pa ruqʼaʼ «rchë nuyüj ri rusamaj ri Itzel Winäq» (Heb. 2:7; Mat. 28:18; 1 Juan 3:8).

9, 10. a) ¿Achkë chik nkʼaj ye kʼo chpan rujatzul ri ixöq, y ajän yebʼeʼok jun chkë rujatzul? b) ¿Achkë xtqatzʼët qa komä?

⁹ Ye kaʼ ma xuʼ ta Jesús rujatzul ri ixöq. Qataman riʼ rma ri apóstol Pablo xuʼij reʼ chkë ri cristianos judíos chqä ri ma ye judíos ta ri yechaʼon rchë yebʼä chkaj: «We rïx yïx rchë Cristo, ntel chë tzij chë yïx rujatzul Abrahán, ri nuʼän chë xtikʼül ri xtzuj che rä ryä» (Gál. 3:28, 29). Taq Jehová nuksaj ri loqʼoläj ruchqʼaʼ rchë nuchaʼ jun cristiano rchë nbʼä chkaj, re winäq reʼ ntok jun chkë rujatzul ri ixöq. Achiʼel nqatzʼët, ri rujatzul ri ixöq ya riʼ Jesucristo chqä ri 144,000 ri xtkiqʼät tzij rkʼë ryä (Apoc. 14:1). Jontir ryeʼ nkitäj kiqʼij rchë ri kinaʼoj nuʼän kan achiʼel runaʼoj Jehová, ri kitataʼ.

¹⁰ Komä qataman chik achoq chkij ntzjon wä Génesis 3:15. Rma riʼ tqakamluj rutzʼetik achkë rubʼanon pä Jehová rchë nbʼetzʼaqät ri rubʼin qa, y chrij reʼ xtqatzʼët achkë rubʼanik nqrtoʼ re profecía reʼ.

11. ¿Achkë rubʼanik xsök ri kumätz «pa rutxil» ri rujatzul ri ixöq?

¹¹ Génesis 3:15 nuʼij chë ri kumätz xtsök «pa rutxil» ri rujatzul ri ixöq. Ya riʼ xbʼanatäj taq Satanás xuʼän chë ri judíos chqä ri romanos xkikamsaj Rukʼajol Dios (Luc. 23:13, 20-24). Taq jun winäq nsokotäj pa rutxil, rkʼë jbʼaʼ kʼo jojun qʼij ri ma xtkowin ta xtbʼiyïn. Ke riʼ chqä jbʼaʼ xbʼanatäj taq Jesús xkäm. Xqʼax jun tiempo ri majun xkowin xuʼän ta, y jbʼaʼ ma oxiʼ qʼij xjeʼ qa pa jül (Mat. 16:21).

12. ¿Ajän xtpalbʼëx rujolon ri kumätz, y achkë rubʼanik xtbʼanatäj riʼ?

¹² Rchë nbʼetzʼaqät Génesis 3:15, Jesús kʼo wä chë ma nkanaj ta qa pa jül, rma ri profecía nuʼij chë ri rujatzul ri ixöq xtpaʼeʼ pa ruwiʼ rujolon ri kumätz. Rma riʼ, ri sokotajïk xbʼan pa rutxil Jesús kʼo wä chë nuknaj riʼ (nuqʼomaj riʼ). ¡Y kan ya riʼ xbʼanatäj! Taq oxiʼ qʼij kamnäq, Jesús xkʼasöx chlaʼ chkaj chqä xyaʼöx jun rukʼaslemal ri majun ta chik jun nkowin nchpü rchë. Taq xtbʼeqä ri qʼij ri ruchaʼon Dios, ryä xtchüp ruwäch Satanás (Heb.  2:14). Ri xkeqʼatö tzij rkʼë Cristo xtkitoʼ rchë xtkichüp kiwäch jontir ri rukʼulel Dios, ntel chë tzij, ri rujatzul ri kumätz (Apoc. 17:14; 20:4, 10). *

13. ¿Achkë rubʼanik nqrtoʼ ri rubʼanik tzʼaqatajnäq pä ri profecía kʼo chpan Génesis 3:15?

¹³ We rït ajachon chik akʼaslemal che rä Jehová, ri rubʼanik tzʼaqatajnäq pä re profecía reʼ kʼo chik utzil najin nuyaʼ qa pan awiʼ. Jesús xok jun achï taq xpë chwäch le Ruwachʼulew, y kan achiʼel runaʼoj Rutataʼ, kan ke riʼ chqä runaʼoj xkʼüt ryä (Juan 14:9). Rkʼë ri tzʼetbʼäl xyaʼ qa, ryä yojurtoʼon rchë nqatamaj ruwäch Jehová chqä rchë nqajoʼ rkʼë ronojel qan. Jesús chqä yojurtoʼon rkʼë ri naʼoj xerukʼüt qa chqä rkʼë ri rubʼanik rukʼwan bʼey chwäch rutinamit Dios komä. Ryä rukʼutun chqawäch achkë rubʼanik kʼaslemal nqakʼwaj rchë Jehová kiʼ rukʼuʼx nuʼän. Chqä ri sokotajïk xbʼan pa rutxil Jesús —ri rukamik— kan kʼo utzil nuyaʼ qa pa qawiʼ jontir. Taq Jesús xkʼasöx, ryä xtzüj apü chwäch Dios ri rukʼaslemal xyaʼ pa kamïk ri majun ta wä mak chrij. Rma riʼ, ri rukikʼel «nqrchʼajchʼobʼej chwäch xa bʼa achkë mak» (1 Juan 1:7).

14. ¿Achkë rma qataman chë ri xuʼij Jehová pan Edén ma kan ta chanin wä xtbʼetzʼaqät?

¹⁴ Ri xuʼij Jehová pan Edén xkʼüt chë re profecía reʼ ma kan ta chanin wä xtbʼanatäj. Kʼo wä chë xtqʼax kʼïy tiempo rchë chë ri ixöq xtbʼejeʼ rujatzul achiʼel wä bʼin qa, rchë chë ri Diablo yejeʼ rutzeqelbʼëy chqä rchë njeʼ chʼaʼoj chkiwäch re kaʼiʼ molaj reʼ. ¿Achkë rubʼanik nqrtoʼ ri nqatamaj riʼ? Nqrtoʼ rchë nqʼax pa qajolon chë re ruwachʼulew reʼ, ri kʼo pa ruqʼaʼ Satanás, itzel xtnaʼ chkë rusamajelaʼ Jehová. Kʼïy junaʼ chrij riʼ, Jesús ke riʼ chqä jbʼaʼ xuʼij chkë rutzeqelbʼëy (Mar. 13:13; Juan 17:14). Kantzij na wä chë qatzʼeton chik achkë rubʼanik tzʼaqatajnäq pä re peraj reʼ rchë ri profecía, y kan más qatzʼeton chkipan ri 100 junaʼ ye qʼaxnäq pä. ¿Achkë rma nqaʼij riʼ?

15. a) ¿Achkë rma ri winäq kan itzel nkinaʼ chqë? b) ¿Achkë rma majun rma nqaxiʼij qiʼ chwäch Satanás?

¹⁵ Jesús xok Qʼatöy Tzij chpan Ruqʼatbʼäl Tzij Dios pa junaʼ 1914 y jbʼaʼ chrij riʼ xresaj pä Satanás chlaʼ chkaj. Komä, ri Diablo xa xuʼ chik nkowin nuksaj ruchqʼaʼ chwäch le Ruwachʼulew, y xuʼ chik ruyoʼen ri qʼij taq xtchup ruwäch (Apoc. 12:9, 12). Ye kʼa, ma chaq ke riʼ ta ruyoʼen ri qʼij riʼ. Ryä najin nuyaʼ kʼayewal pa ruwiʼ rutinamit Dios, rma kan katajnäq ruyowal (Apoc. 12:13, 17). Ya riʼ nbʼanö chë komä kan más itzel nkinaʼ ri winäq chqë. Ye kʼa majun ta rma nqaxiʼij qiʼ chwäch Satanás nixta chkiwäch rutzeqelbʼëy. Pa rukʼexel nqaxiʼij qiʼ, röj ütz nqayaʼ chwäch qan ri ruyaʼon wä chwäch ran ri apóstol Pablo, ri xtzʼibʼaj reʼ: «We Dios kʼo qkʼë röj, ¿achkë ta komä xtkowin chqij?» (Rom. 8:31). Röj ütz nqakʼuqbʼaʼ qakʼuʼx chë Jehová kan xtuʼän ri nutzüj, rma achiʼel qatzʼeton pä, kʼïy chë ri nuʼij chpan Génesis 3:15 ya xtzʼaqät yän.

16-18. ¿Achkë rubʼanik rutoʼon Curtis, ya Ursula chqä ya Jessica ri qʼaxnäq pa kijolon Génesis 3:15?

¹⁶ Ri xtzüj Jehová chpan Génesis 3:15 nqrtoʼ rchë nqaköchʼ xa bʼa achkë kʼayewal npë chqij. Curtis, jun qachʼalal achï ri misionero pa tinamït Guam, nuʼij: «Kʼo mul, kʼo kʼayewal wlon ri kibʼanon chë kʼayewal  nuʼän chi nwäch nyaʼ ruqʼij Jehová. Ye kʼa taq nquʼ rij ri profecía kʼo chpan Génesis 3:15 yirutoʼon rchë ma nuʼän ta kaʼiʼ nkʼuʼx chrij ri Ntataʼ kʼo chkaj». Curtis kan ruyoʼen ri qʼij taq Jehová xtsöl jontir ri kʼayewal qlon.

¹⁷ Ya Ursula, jun qachʼalal aj Baviera (Alemania), nuʼij chë ri xqʼax pa rujolon ri profecía kʼo chpan Génesis 3:15 xtoʼ rchë xyaʼ chwäch ran chë le Biblia ya riʼ Ruchʼaʼäl Dios. Jun ri kan xapon pa ran ya riʼ xtzʼët chë ri nkʼaj chik profecías ye kʼo chpan le Biblia kan kikʼwan kiʼ rkʼë ri nuʼij chpan Génesis 3:15. Ryä nuʼij: «Kan xsloj wan taq xintamaj chë Jehová kan chanin xkanuj rubʼanik rchë chë ri winäq kʼo jun nkolö kichë».

¹⁸ Ya Jessica, jun qachʼalal aj Micronesia, nuʼij: «Kʼa nnatäj na chwä achkë xinnaʼ taq xintzʼët chë xinwïl rutinamit Dios. ¡Kan najin wä ntzʼaqät ri profecía kʼo chpan Génesis 3:15! Re profecía reʼ nunataj chwä chë ri kʼayewal najin nqaqʼaxaj komä ma ya riʼ ta nrajoʼ Jehová pa qawiʼ. Chqä re profecía reʼ yirutoʼ rchë nyaʼ más chwäch wan chë ri nayaʼ ruqʼij Jehová nuʼän chë kan ütz qakʼaslemal nqakʼwaj komä, y chë chqawäch apü, xtqïl jun qakʼaslemal ri kan más na chik ütz».

19. ¿Achkë rma ütz nqayaʼ chwäch qan chë xtbʼetzʼaqät na ri peraj nrajoʼ na che rä ri profecía?

¹⁹ Achiʼel qatzʼeton pä, Génesis 3:15 najin chik ntzʼaqät. Qataman chik achkë riʼ ri rujatzul ri ixöq chqä achkë riʼ ri rujatzul ri kumätz. Ri sokotajïk xrïl Jesús, ri kʼo más rejqalen chkë ri rujatzul ri ixöq, ya xknaj yän riʼ. Komä, ryä jun Qʼatöy Tzij ri kan kowan ruqʼij chqä majun chik nkowin nchpü rukʼaslemal. Chqä yechaʼon chik jbʼaʼ ma jontir chkë ri xkeqʼatö tzij rkʼë Jesús chlaʼ chkaj. Rma ya xtzʼaqät yän ri naʼäy peraj rchë ri profecía, kan qayaʼon chwäch qan chë xtbʼetzʼaqät ri peraj nrajoʼ na: ¡ri rujatzul ri ixöq xtpaʼeʼ pa ruwiʼ ri rujolon ri kumätz! Jontir ri rusamajelaʼ Jehová kan xttel kikʼuʼx taq Satanás xtchup ruwäch. Loman nbʼeqä ri qʼij riʼ, ma tikʼo ta qakʼuʼx. Ri qa-Dios kan taqäl chrij nqakʼuqbʼaʼ qakʼuʼx chrij. Ryä xtksaj ri rujatzul ri ixöq rchë xtyaʼ kʼïy utzil pa kiwiʼ «jontir ri tinamït chwäch le Ruwachʼulew» (Gén. 22:18).