1. ¿Achkë qayaʼon chwäch qan, y achkë rma?

 ¿KʼAYEWAL nuʼän chawäch rït nanmaj chë kʼo ütz qayoʼen apü taq natzʼët jontir ri najin nbʼanatäj chwäch le Ruwachʼulew? Ye kʼïy familias ma nkajoʼ ta chik kiʼ, ri winäq más itzel najin nuʼän kinaʼoj, xuʼ ryeʼ nkiquʼ qa kiʼ chqä nqä chkiwäch nkiʼän chʼaʼoj. Y ye kʼïy kʼayewal nuʼän chkiwäch nkikʼuqbʼaʼ kikʼuʼx chkij ri kʼo uchqʼaʼ pa kiqʼaʼ. Tapeʼ ke riʼ, jontir reʼ nqrtoʼ rchë nqayaʼ chwäch qan chë kʼo ütz qayoʼen apü. ¿Achkë rma? Rma kinaʼoj najin nkikʼüt ri winäq kan ya riʼ nuʼij chpan 2 Timoteo 3:1-5, ri kʼo jun profecía chpan chkij ri «rukʼisbʼäl taq qʼij». Majun ta jun winäq ri ütz ran xtuʼij chë re profecía reʼ ma ta najin ntzʼaqät. Reʼ chqä nukʼüt chë Jesucristo ya najin chik nuqʼät tzij chpan ri Ruqʼatbʼäl Tzij Dios. Ye kʼa kʼo más profecías ri ntzjon chrij re Qʼatbʼäl Tzij reʼ. Rma riʼ tqanukʼuj kij jojun profecías ri ye tzʼaqatajnäq pä chkipan ri junaʼ ye qʼaxnäq pä. Reʼ kan xtkowirsaj ri qakʼuqbʼäl kʼuʼx.

2. ¿Achkë xtqatzʼët chpan re tjonïk reʼ, y achkë rma? (Tatzjoj rij ri achbʼäl ri kʼo pä chwäch re revista reʼ).

² ¿Achkë xtqatzʼët chpan re tjonïk reʼ? Naʼäy, xtqatzjoj rij jun profecía ri nqrtoʼ rchë nqʼax pa qajolon ajän xchäp samaj ri Ruqʼatbʼäl Tzij Dios. Chrij riʼ, xtqakamluj kitzʼetik jojun profecías ri xkojkitoʼ rchë nqʼax chqawäch chë Jesús najin chik nuqʼät tzij chlaʼ chkaj. Y, pa rukʼisbʼäl, xtqatzjoj kij jojun profecías ri nkikʼüt achkë rubʼanik xtchup kiwäch ri ma yejowan ta rchë ri Ruqʼatbʼäl Tzij Dios. Xtqatzʼët chë jontir re profecías reʼ kikʼwan kiʼ kan achiʼel jun rompecabezas y yojkitoʼ rchë nqatamaj achkë tiempo yoj kʼo chwäch Jehová.

3. ¿Achkë nukʼüt ri profecía kʼo chpan Daniel 7:13, 14 chrij ri xtqʼatö tzij chpan Ruqʼatbʼäl Tzij Dios?

³ Chpan Daniel 7:13, 14, kʼo jun profecía ri nukʼüt chë Jesucristo ya riʼ ri más ütz rchë ntok Qʼatöy Tzij chpan Ruqʼatbʼäl Tzij Dios. Re profecía reʼ nuʼij chë winäq ri jalajöj kitinamit kan rkʼë ronojel kan xtkinmaj rutzij chqä chë majun ta chik jun qʼatöy tzij xtkanaj pa rukʼexel. Jun chik profecía ri kʼo chpan ri wuj Daniel, nuʼij chë Jesús xtchäp samaj taq xtbʼekʼis «siete junaʼ». Tqatzʼetaʼ achkë rubʼanik nqatamaj ajän xbʼanatäj riʼ.

4. ¿Achkë rubʼanik nqrtoʼ Daniel 4:10-17 rchë nqatamaj achkë junaʼ xok Qʼatöy Tzij Jesús? (Tatzʼetaʼ chqä ri nota).

⁴ (Taskʼij ruwäch Daniel 4:10-17). Ri «siete junaʼ» nukʼambʼej tzij 2,520 junaʼ. Riʼ xchapatäj pa junaʼ 607 taq majanä tpë Jesús, taq ri babilonios xkichüp ruwäch Jerusalén chqä xkesaj äl ri rukʼisbʼäl qʼatöy tzij ri nqʼatö wä tzij pa rubʼiʼ Jehová. Ri tiempo riʼ xbʼekʼis pa junaʼ 1914, taq Jehová xuʼän chë Jesús —«ri achoq pa ruqʼaʼ kʼo chë nyaʼöx wä ri qʼatbʼäl tzij»— xok Qʼatöy Tzij chpan Ruqʼatbʼäl Tzij Dios (Ezeq. 21:25-27). *

5. ¿Achkë rubʼanik nqrtoʼ ri nqʼax pa qajolon ri profecía chrij ri «siete junaʼ»?

⁵ ¿Achkë rubʼanik nqrtoʼ re profecía reʼ? Ri nqʼax pa qajolon ri profecía chrij ri «siete junaʼ» nuʼän chë nqakʼuqbʼaʼ más qakʼuʼx chë Jehová kan pa ruqʼijul nuʼän ri rutzjun. Ryä xuʼij achkë qʼij xtchäp samaj ri Ruqʼatbʼäl Tzij, y kan ke riʼ xbʼanatäj taq xbʼeqä ri qʼij riʼ. Ke riʼ chqä xtbʼanatäj kikʼë ri nkʼaj chik profecías. Ryä xtuʼän chë xkebʼetzʼaqät chkipan ri qʼij ri rujikon chik kij. Rma riʼ ri ruqʼij Jehová «kan pa ruqʼijul xtpë» (Hab. 2:3).

6. a) ¿Achkë nkʼutü chë Jesús najin chik nuqʼät tzij? b) ¿Achkë rma nqaʼij chë ri profecía kʼo chpan Apocalipsis 6:2-8 nuyaʼ ruchqʼaʼ ri xuʼij qa Jesús?

⁶ Taq jbʼaʼ nrajoʼ rchë nkamsäx, Jesús xuʼij jojun ri xkebʼanatäj chwäch le Ruwachʼulew ri xkerutoʼ ri rutzeqelbʼëy rchë nkitamaj chë ryä najin chik nuqʼät tzij chlaʼ chkaj. Ryä xtzjon chkij nmaʼq taq chʼaʼoj, wayjal chqä mamaʼ taq slonel. Ryä chqä xuʼij chë xkejeʼ itzel taq yabʼil «chkipan jalajöj tinamït», achiʼel ri COVID-19. Jontir reʼ retal chë Jesús najin chik nuqʼät tzij (Mat. 24:3, 7; Luc. 21:7, 10, 11). Más 60 junaʼ qʼaxnäq taq Jesús xkäm chqä xbʼä chkaj, ryä xuʼij che rä ri apóstol Juan chë jontir riʼ kan xtbʼanatäj na (taskʼij ruwäch Apocalipsis 6:2-8). Jontir ri xuʼij Jesús kan bʼanatajnäq pä kan xa xuʼ xok Qʼatöy Tzij chpan Ruqʼatbʼäl Tzij Dios pa junaʼ 1914.

7. ¿Achkë rma kowan kʼayewal xpë chwäch le Ruwachʼulew taq Jesús xok Qʼatöy Tzij?

⁷ ¿Achkë rma kowan kʼayewal xpë chwäch le Ruwachʼulew taq Jesús xok Qʼatöy Tzij? Apocalipsis 6:2 nukʼüt jun ri kan kʼo rejqalen. Chriʼ nuʼij chë ri naʼäy samaj xuʼän ri kʼakʼakʼ Qʼatöy Tzij ya riʼ xchʼeyon chpan jun mamaʼ chʼaʼoj. ¿Achoq kikʼë? Rkʼë ri Diablo chqä ru-demonios. Ri capítulo 12 rchë Apocalipsis nuʼij chë Satanás ma xchʼakon ta, rma riʼ ryä chqä ru-demonios xekʼaq pä chwäch le Ruwachʼulew. Rma kan xkatäj ruyowal, ryä resan pä ruyowal chkij ri winäq. Rma riʼ le Biblia nuʼij: «¡Juyuʼ kiwäch ri ye kʼo  chwäch le Ruwachʼulew chqä chpan ri mar!» (Apoc. 12:7-12).

8. ¿Achkë rubʼanik nqrtoʼ ri nqatzʼët chë ri profecías chrij ri Ruqʼatbʼäl Tzij Dios najin chik ntzʼaqät?

⁸ ¿Achkë rubʼanik yojkitoʼ re profecías reʼ? Ri najin nbʼanatäj chwäch le Ruwachʼulew chqä ri kinaʼoj ri winäq nukʼüt chë Jesús Qʼatöy Tzij chik. Rma riʼ ma kan ta kowan nqbʼison taq nqatzʼët chë ri winäq kan nkitzelaj kiʼ chqä xa xuʼ ryeʼ nkiquʼ qa kiʼ. Pa rukʼexel riʼ, nnatäj chqë chë ri nkiʼän nukʼüt chë najin ntzʼaqät ri nuʼij le Biblia. Chqawäch röj kan qʼalaj chë ri Ruqʼatbʼäl Tzij Dios ya najin chik nuqʼät tzij (Sal. 37:1). Chqä qayoʼen chë ri winäq más na chik lawaloʼ xtuʼän kinaʼoj loman nbʼeqä ri Armagedón (Mar. 13:8; 2 Tim. 3:13). Ri Qatataʼ kʼo chkaj janina nqrajoʼ, rma riʼ nuʼij pä chqë achkë rma kowan kʼayewal najin yebʼanatäj komä. ¡Kantzij na wä chë kʼo rma nqtyoxin che rä!

9. ¿Achkë nuʼij Daniel 2:28, 31-35, chrij ri rukʼisbʼäl mamaʼ qʼatbʼäl tzij, y ajän xbʼeqʼalajin pä?

⁹ (Taskʼij ruwäch Daniel 2:28, 31-35). Komä nqatzʼët chë re profecía reʼ najin ntzʼaqät. Nabucodonosor xtzʼët chpan jun achïkʼ achkë xtbʼanatäj «chkipan ri rukʼisbʼäl taq qʼij» taq Jesús najin chik nuqʼät tzij. Chpan rachïkʼ, Nabucodonosor xtzʼët jun mamaʼ achbʼäl ri bʼanon rkʼë jalajöj kiwäch chʼichʼ. Ri raqän re achbʼäl reʼ, ri bʼanon rkʼë hierro chqä chʼabʼäq, nukʼambʼej tzij ri rukʼisbʼäl mamaʼ qʼatbʼäl tzij ri ntzjöx chpan le Biblia. Re qʼatbʼäl tzij reʼ, ri ya kʼo chik, ya riʼ jun chkë ri rukʼlel Jesús chwäch le Ruwachʼulew. Reʼ xbʼeqʼalajin pä pa Primera Guerra Mundial, taq ri Reino Unido chqä Estados Unidos kan junan xuʼän kiwäch. Ri achbʼäl xrachikʼaj Nabucodonosor kʼo  kaʼiʼ nukʼüt chrij re qʼatbʼäl tzij reʼ ri nuʼän chë ma junan ta kikʼë ri qʼatbʼäl taq tzij ri xejeʼ naʼäy chwäch ryä.

10. a) Achiʼel xuʼij Daniel, ¿achkë najin nbʼanatäj rkʼë ri qʼatbʼäl tzij kibʼanon Reino Unido chqä Estados Unidos? b) ¿Achoq chwäch kʼo chë nqachajij wä qiʼ? (Tatzʼetaʼ ri recuadro « ¡Tachajij awiʼ chwäch ri chʼabʼäq!»).

¹⁰ Ri naʼäy ri nbʼanö chë ri Reino Unido chqä Estados Unidos ma junan ta kikʼë ri qʼatbʼäl taq tzij ri xejeʼ naʼäy chwäch ryä, ya riʼ chë ma xa xuʼ ta rkʼë jun ruwäch chʼichʼ njnamäx wä, achiʼel oro o plata, xa kan njnamäx rkʼë hierro ri xolon rkʼë chʼabʼäq. Ri chʼabʼäq nukʼambʼej tzij ri winäq (Dan. 2:43). Komä chöj nqʼalajin chë re qʼatbʼäl tzij reʼ kʼayewal nuʼän chwäch nuʼän ri nrajoʼ rma ri winäq nkimöl kiʼ rchë nkichʼojij ri nkajoʼ, yë ryeʼ yechaʼö ri qʼatöy tzij chqä ye kʼïy samajelaʼ yekiʼän molaj rchë nkichʼojij ri nkajoʼ.

11. ¿Achkë chik jun nbʼanö chë kan qanman chë yoj kʼo chik chkipan ri rukʼisbʼäl taq qʼij?

¹¹ Ri rukaʼn, ya riʼ chë ri qʼatbʼäl tzij kibʼanon Reino Unido chqä Estados Unidos ya riʼ raqän ri achbʼäl xtzʼët Nabucodonosor. Reʼ ntel chë tzij chë ya reʼ ri rukʼisbʼäl mamaʼ qʼatbʼäl tzij ntzjöx chpan le Biblia, chqä chë majun ta chik jun xtpë chrij reʼ. Re mamaʼ qʼatbʼäl tzij reʼ chqä ri nkʼaj chik qʼatbʼäl taq tzij xtchup kiwäch rma ri Ruqʼatbʼäl Tzij Dios chpan Armagedón (Apoc. 16:13, 14, 16; 19:19, 20). *

12. ¿Achkë chik nkʼaj nqatamaj chrij ru-profecía Daniel, y achkë rma kan nukʼuqbʼaʼ qakʼuʼx?

¹² ¿Achkë rubʼanik nqrtoʼ re profecía reʼ? Ru-profecía Daniel nukʼüt chë yoj kʼo chik chkipan ri rukʼisbʼäl taq qʼij. Pa más 2,500 junaʼ qa, ryä xuʼij chë taq xtchaʼ chiʼ Babilonia, kajiʼ mamaʼ qʼatbʼäl taq tzij xtkiqʼät tzij o xtkiyaʼ kʼayewal pa ruwiʼ rutinamit Dios. Ryä chqä xuʼij chë ri qʼatbʼäl tzij kibʼanon Reino Unido chqä Estados Unidos ya riʼ ri rukʼisbʼäl. Ri nqatamaj riʼ kan nukʼuqbʼaʼ qakʼuʼx, rma qataman chë xa jbʼaʼ chik apü ri Ruqʼatbʼäl Tzij Dios xtchüp kiwäch jontir ri qʼatbʼäl taq tzij chqä xtqʼät tzij pa ruwiʼ le Ruwachʼulew (Dan. 2:44).

13. ¿Achkë riʼ ri «octavo qʼatöy tzij» chqä ri «10 qʼatöy taq tzij» ri yetzjöx chpan Apocalipsis 17:9-12, y achkë rubʼanik najin nbʼetzʼaqät re profecía reʼ?

¹³ (Taskʼij ruwäch Apocalipsis 17:9-12). Ri Primera Guerra Mundial kan kowan kʼïy xtzʼlaʼ, ya riʼ xuʼän chë xbʼetzʼaqät jun chik profecía chkij ri rukʼisbʼäl taq qʼij. Rma ri qʼatöy taq tzij ma nkajoʼ ta wä chik chë njeʼ chʼaʼoj chkiwäch, pa enero rchë ri junaʼ 1920 xkiʼän ri Sociedad de Naciones, ri xkanaj qa ri Naciones Unidas pa rukʼexel pa octubre rchë ri junaʼ 1945. Le Biblia nuʼij chë re organización reʼ «jun octavo qʼatöy tzij», ye kʼa ma jun mamaʼ qʼatbʼäl tzij ta. Re organización reʼ kʼo ruchqʼaʼ rma ri qʼatbʼäl taq tzij nkitoʼ. Re qʼatbʼäl taq tzij reʼ nbʼix ri «10 qʼatöy taq tzij» chkë chpan le Biblia.

14, 15. a) ¿Achkë nuʼij Apocalipsis 17:3-5 chrij «Babilonia la Grande»? b) ¿Achkë najin nbʼanatäj kikʼë ri religiones ri ma yeqä ta chwäch Dios?

¹⁴ (Taskʼij ruwäch Apocalipsis 17:3-5). Chpan jun visión, Jehová xuʼän chë ri apóstol Juan xtzʼët jun ixöq ri rukʼwan jun tzʼil kʼaslemal ri rubʼiniʼan «Babilonia la Grande». Re ixöq reʼ nukʼambʼej tzij jontir ri religiones ri ma yeqä ta chwäch Dios. ¿Achkë nukʼüt re visión reʼ chqawäch? Re religiones reʼ kan kʼïy junaʼ junan rubʼanon kiwäch kikʼë ri qʼatbʼäl taq tzij chqä kan yekitoʼon. Ye kʼa, xa jbʼaʼ chik apü, Jehová xtyaʼ pa kan ri qʼatöy taq tzij  «nkiʼän ri ruchʼobʼon ryä». ¿Achkë xtkʼäm pä ya riʼ? Chë ri «10 qʼatöy taq tzij» —ntel chë tzij, ri qʼatbʼäl taq tzij— xkekatäj pä chkij ri religiones ri ma yeqä ta chwäch Dios chqä xtkichüp kiwäch (Apoc. 17:1, 2, 16, 17).

¹⁵ ¿Achkë rma nqaʼij chë xa jbʼaʼ chik nrajoʼ rchë nchup ruwäch Babilonia la Grande? Rchë nqaqʼalajsaj re kʼutunïk reʼ, tnatäj chqë chë jun ri xtoʼö ri tinamït Babilonia chkiwäch rukʼulel ya riʼ ri mamaʼ raqän yaʼ Éufrates. Apocalipsis yerujnamaj ri winäq ri kan pa millón ye kʼo chpan Babilonia la Grande rkʼë «yaʼ» ri ma nuyaʼ ta qʼij chë kʼo nbʼanatäj rkʼë (Apoc. 17:15). Ye kʼa nuʼij chqä chë ri yaʼ riʼ xa xtchaqiʼj qa. Reʼ nukʼüt chë ri religiones riʼ ma xketoʼöx ta chik kimä ye kʼïy winäq (Apoc. 16:12). Re profecía reʼ najin chik ntzʼaqät. Ye kʼïy winäq ye lenäq qa chkipan kiʼ-religiones chqä jukʼan chik nkikanuj wä kitoʼik.

16. ¿Achkë rubʼanik yojkitoʼ ri profecías chrij ri rubʼanik xbʼan ri Naciones Unidas chqä ri rubʼanik xtchup ruwäch Babilonia la Grande?

¹⁶ ¿Achkë rubʼanik yojkitoʼ re profecías  reʼ? Ri xbʼan ri Organización de las Naciones Unidas chqä ri najin nkʼis kichqʼaʼ ri religiones ya riʼ chik jojun retal ri nkikʼüt chë yoj kʼo chkipan ri rukʼisbʼäl taq qʼij. Tapeʼ ri «yaʼ» ri nbʼanö chë majun ta nbʼanatäj rkʼë Babilonia la Grande najin nchaqiʼj, ma ya riʼ ta xtbʼanö chë xtchup ruwäch. Achiʼel qatzʼeton pä chik, Jehová xtyaʼ pa kan ri «10 qʼatöy taq tzij» —ri qʼatbʼäl taq tzij ri yetoʼö ri Naciones Unidas— rchë xtkiʼän «ri ruchʼobʼon ryä». Ri qʼatbʼäl taq tzij chaq kʼateʼ xtkichüp kiwäch ri religiones ri ma yeqä ta chwäch Dios. Kan konojel bʼaʼ winäq ma xtkiyoʼej ta chë xtbʼanatäj riʼ (Apoc. 18:8-10). * Taq Babilonia la Grande xtchup ruwäch, xtuʼän chë kan ye kʼïy winäq xtsach kikʼuʼx, rma riʼ rkʼë jbʼaʼ xkepë kʼayewal. Ye kaʼ röj, ri nqayaʼ ruqʼij Jehová, kʼo kaʼiʼ rma ri kiʼ qakʼuʼx xtqaʼän taq xtbʼanatäj riʼ. Naʼäy, chë re rukʼulel Dios reʼ jurayil xtchup ruwäch. Y, rukaʼn, chë xa jbʼaʼ chik xtrajoʼ rchë xtqkol chkiwäch ri winäq ri ma nkiyaʼ ta ruqʼij Dios (Luc. 21:28).

17, 18. a) ¿Achkë kʼo chë nqaʼän rchë nqakowirsaj ri qakʼuqbʼäl kʼuʼx? b) ¿Achkë xtqatzʼët chpan ri jun chik tjonïk?

¹⁷ Daniel xuʼij: «Ri kantzij etamabʼäl kowan xtkʼiyär». Y kan ke riʼ bʼanatajnäq pä. Komä kan nqʼax pa qajolon ri profecías chkij ri qʼij yoj kʼo komä (Dan. 12:4, 9, 10). Re profecías reʼ ye tzʼaqatajnäq pä kan achiʼel bʼin qa. Reʼ nuʼän chë nqayaʼ ruqʼij Jehová chqä nqayaʼ rejqalen ri Ruchʼaʼäl (Is. 46:10; 55:11). Rma riʼ, ronojel mul tqakowirsaj ri qakʼuqbʼäl kʼuʼx. ¿Achkë rubʼanik nqaʼän riʼ? Taq nqatäj qaqʼij rchë nqatjoj qiʼ chrij le Biblia chqä taq yeqatoʼ ri nkʼaj chik rchë yeʼok rachiʼil Jehová. Ri qa-Dios kan xkeruchajij jontir ri kan rkʼë ronojel kan nkikʼuqbʼaʼ kikʼuʼx chrij y kan xtyaʼ «uxlanen pa qan» (Is. 26:3).

¹⁸ Chpan ri jun chik tjonïk, xtqanukʼuj kij jojun profecías ri yetzjon chrij ri congregación cristiana pa rukʼisbʼäl taq qʼij. Xtqatzʼët chë ri profecías riʼ xtkikʼüt chqä chë yoj kʼo chik chkipan ri rukʼisbʼäl taq qʼij. Xtqanukʼuj kij jojun chik ri nkʼutü chë Jesús, ri Qaqʼatöy Tzij, najin nukʼwaj bʼey chkiwäch ri rutzeqelbʼëy.