TJONÏK 10
Ri ajowabʼäl ri nanaʼ chrij Jehová xtuʼän chawä chë xtawajoʼ xkaqasäx pa yaʼ
«¿Achkë komä yiqʼatö rchë ma yiqasäx ta pa yaʼ?» (HECH. 8:36).
BʼIX 37 Serviré a Jehová con el corazón
RI XTQATZʼËT QA *
1, 2. Achiʼel nuʼij chpan Hechos 8:35 kʼa 38, ¿achkë rma xrajoʼ xqasäx pa yaʼ ri achï aj Etiopía?
¿NARAYIJ rït yaqasäx pa yaʼ rchë yatok jun rutzeqelbʼëy Cristo? Ye kʼïy winäq yeqasäx pa yaʼ rma nkajoʼ Jehová chqä rma nkiloqʼoqʼej jontir ri utzil ruyaʼon pä ryä pa kiwiʼ. Taquʼ na peʼ rij achkë xuʼän jun achï ri nsamäj wä rkʼë ri ixöq ri nqʼatö wä tzij pa Etiopía.
2 Ri achï riʼ kan xrajoʼ xqasäx yän pa yaʼ taq rkʼë rutoʼik ri Ruchʼaʼäl Dios xqʼax chwäch chë nkʼatzin nuʼän riʼ (Hechos 8:27-31; taskʼij ruwäch Hechos 8:35-38 *). Ryä xuʼän riʼ rma kan nuloqʼoqʼej wä ri Ruchʼaʼäl Dios. Nqʼalajin riʼ rma taq bʼenäq wä chpan ri ruchʼichʼ, najin wä nuskʼij jun peraj rchë ri wuj Isaías. Y taq Felipe xqʼalajsaj chwäch jontir ri xuʼän Jesús pa ruwiʼ, ryä kan janina xtyoxin. Y qataman chë ri achï riʼ kan nrajoʼ wä Jehová, rma xtzolin wä pä pa Jerusalén chuyaʼik ruqʼij Dios. Ryä achiʼel ta xyaʼ qa ru-religión rchë xok chpan ri tinamït ri nuyaʼ wä ruqʼij ri kantzij Dios. Y rma janina nrajoʼ Jehová, ryä xuʼän chik jun ri kan kʼo rejqalen, xrajoʼ xqasäx pa yaʼ rchë xok jun rutzeqelbʼëy Cristo (Mat. 28:19).
3. ¿Achkë rkʼë jbʼaʼ nqʼatö jun winäq rchë ma nrajoʼ ta nqasäx pa yaʼ? (Tatzʼetaʼ ri recuadro « ¿Achkë chë ulew njunmatäj wä awan?»).
3 Ri ajowabʼäl ri nanaʼ chrij Jehová xtuʼän chawä chë xtawajoʼ xkaqasäx pa yaʼ. Ye kʼa rkʼë jbʼaʼ kʼo chqä ri ma yeyaʼö ta qʼij chawä rchë naʼän riʼ. Tqatzjoj kij jojun chkë riʼ. Rma janina yeʼawajoʼ ri awachʼalal o awachiʼil ri ma ye Testigos ta, rkʼë jbʼaʼ naquʼ chë ma xkatkajoʼ ta chik we xkaqasäx pa yaʼ (Mat. 10:37). O rkʼë jbʼaʼ kan rukʼulun chawä yeʼaʼän bʼanobʼäl ri ma yeqä ta chwäch Dios y kan kʼayewal nuʼän chawäch yeʼayaʼ qa (Sal. 97:10). Chqä rkʼë jbʼaʼ kan kʼa yït koʼöl na ye abʼanon pä nmaqʼij ri xa ye alenäq pä kikʼë religiones ri ma pa rubʼeyal ta nkiyaʼ ruqʼij Dios. Y rma kan kʼïy yeʼaqʼaxan pä chkipan ri nmaqʼij riʼ, rkʼë jbʼaʼ kʼayewal nuʼän chawäch ma yeʼaʼän ta chik (1 Cor. 10:20, 21). Rma riʼ, ütz nakʼutuj qa chawäch achoq chrij nanaʼ wä más ajowabʼäl.
¿ACHKË TA KOMÄ KʼO CHË MÁS NAWAJOʼ?
4. ¿Achkë kʼo ta chë nbʼanö che rä jun winäq chë nrajoʼ nqasäx pa yaʼ?
4 Rkʼë jbʼaʼ kʼo kʼïy ri nawajoʼ chqä naloqʼoqʼej pa akʼaslemal, y riʼ ma itzel ta. Achiʼel taq majanä tatjoj awiʼ kikʼë ri testigos de Jehová, rkʼë jbʼaʼ rït ya naloqʼoqʼej wä chik le Biblia. O rkʼë jbʼaʼ nawajoʼ wä chik Jesús. Y komä ri ataman chik kiwäch ri Testigos, rkʼë jbʼaʼ kan jaʼäl nanaʼ yajeʼ kikʼë. Ye kʼa ri nanaʼ chrij jontir riʼ, ma kan ta xtuʼän chawä chë xtawajoʼ xtajäch awiʼ pa ruqʼaʼ Jehová chqä xkaqasäx pa yaʼ. Ri kʼo ta chë nbʼanö chawä chë nawajoʼ yaqasäx pa yaʼ ya riʼ ri ajowabʼäl ri nanaʼ chrij Jehová. Taq rït xtawajoʼ más Jehová chwäch xa bʼa achkë, riʼ xtuʼän chë majun ta chik achkë xkaqʼatö rchë xtayaʼ ruqʼij. Nqʼalajin kʼa chë ri ajowabʼäl nqanaʼ chrij Jehová ma xa xuʼ ta nuʼän chqë chë nqajoʼ nqqasäx pa yaʼ, xa nqrtoʼ chqä rchë ronojel mul xtqaʼän ri nqä chwäch ryä.
5. ¿Achkë xtqatzʼët chpan re tjonïk reʼ?
5 Jesús xuʼij chë kʼo chë nqajoʼ Jehová rkʼë ronojel qan, ronojel qakʼaslemal, ronojel qachʼobʼonik chqä ronojel qachqʼaʼ (Mar. 12:30). ¿Achkë xkatoʼö rchë xkakowin xtanaʼ riʼ chrij Jehová? Xtanaʼ riʼ we xtaquʼ rij ronojel ri ajowabʼäl ri nunaʼ ryä chawij (1 Juan 4:19). Chpan re tjonïk reʼ, xtqatzʼët achkë kʼo chë naʼän rchë xtanaʼ ri nimaläj ajowabʼäl riʼ chrij Jehová ri xtuʼän chawä chë xtawajoʼ xkaqasäx pa yaʼ.
6. ¿Achkë jun rubʼanik natamaj ruwäch Jehová nuʼij chpan Romanos 1:20?
6 Xtatamaj ruwäch Jehová we xtaquʼ rij ronojel ri rubʼanon qa (taskʼij ruwäch Romanos 1:20 *; Apoc. 4:11). Taquʼ rij achkë rubʼanik rubʼanon qa Jehová chkë ri chköp, ri cheʼ o ri kotzʼiʼj, chqä tatzʼetaʼ achkë rubʼanik nkikʼüt ri runaʼoj Jehová. Takanuj más chrij ri rubʼanik bʼanon che rä ri qachʼakul (Sal. 139:14). Chqä taquʼ rij ronojel ri uchqʼaʼ xksaj Jehová taq xuʼän ri Qʼij, y ma tamestaj chë ri Qʼij xa xuʼ jun chkë ri pa mil chë millón chʼumilaʼ ye kʼo (Is. 40:26). * Taq xtaʼän riʼ, riʼ xtuʼän chawä chë xtawajoʼ xtayaʼ más ruqʼij Jehová. Ye kʼa, tapeʼ kʼo ruqʼij natamaj chë Jehová janina runaʼoj chqä ruchqʼaʼ, ma xa xuʼ ta riʼ nkʼatzin rchë nnmär más ri ajowabʼäl ri nanaʼ chrij. Rchë riʼ, nkʼatzin natamaj más chrij.
7. Rchë nawajoʼ Jehová rkʼë ronojel awan, ¿achkë nkʼatzin nayaʼ chwäch awan?
7 Janina nkʼatzin chë njeʼ chwäch awan chë Jehová kantzij yarajoʼ. ¿Kʼayewal nuʼän chawäch nanmaj chë ri xbʼanö ri kaj chqä le Ruwachʼulew kan kʼo aqʼij chwäch? We ke riʼ, ma tamestaj chë Jehová ma näj ta kʼo wä chqë röj (Hech. 17:26-28). Ryä nutzʼët achkë kʼo pa kan ri winäq, y nuʼij chë we rït nakanuj, ryä xtyaʼ qʼij chawä rchë xtawïl (1 Crón. 28:9). Nqʼalajin riʼ rma we rït najin natjoj awiʼ chrij le Biblia, ntel chë tzij chë Jehová najin nuyaʼ qʼij chawä rchë yajelun rkʼë (Jer. 31:3). We más xtqʼax chawäch achkë rubʼanon pä Jehová pa awiʼ, más ajowabʼäl xtanaʼ chrij.
8. ¿Achkë rubʼanik nakʼüt chë natyoxij ri rajowabʼäl Jehová?
8 Jun rubʼanik rchë nakʼüt chwäch Jehová chë natyoxij ri rajowabʼäl ya riʼ taq yachʼö qʼanäj rkʼë. Ri ajowabʼäl ri nanaʼ chrij Jehová más xtnmär taq xtaʼij che rä ronojel ri nbʼanö chë nchʼpü akʼuʼx chqä taq xtatyoxij che rä ronojel ri rubʼanon pä pa awiʼ. Y ri awachbʼilanïk rkʼë ryä más xtkowïr taq xtatzʼët chë nuyaʼ pä ri nakʼutuj che rä (Sal. 116:1). Ya riʼ xkatoʼö rchë xtayaʼ chwäch awan chë Jehová nqʼax chwäch ri nanaʼ. Ye kʼa rchë yajelun más rkʼë Jehová, nkʼatzin natamaj achkë rubʼanik nchʼobʼon chqä achkë nrajoʼ ryä chë naʼän. Y xa xuʼ natamaj riʼ we nanukʼuj ruwäch le Biblia, ri Ruchʼaʼäl Dios.
Ri nqatjoj qiʼ chrij le Biblia ya riʼ ri más ütz rubʼanik rchë nqjelun rkʼë Dios chqä rchë nqatamaj achkë ruraybʼal chqij röj. (Tatzʼetaʼ ri peraj 9). *
9. ¿Achkë rubʼanik nakʼüt chë naloqʼoqʼej le Biblia?
9 Tayaʼ ruqʼij ri Ruchʼaʼäl Dios. Xa xuʼ chpan le Biblia nawïl wä ri kantzij chrij Jehová chqä chrij ri ruraybʼal chawij rït. ¿Achkë rubʼanik nakʼüt chë naloqʼoqʼej? Xtakʼüt riʼ we xtaskʼij ruwäch ronojel qʼij, we xtatjoj apü awiʼ chrij ri tjonïk nyaʼöx chawä chqä we xkeʼasmajij ri naʼoj ye kʼo chpan (Sal. 119:97, 99; Juan 17:17). Rma riʼ, ¿najin naskʼij rït ruwäch le Biblia ronojel qʼij?
10. ¿Achkë jun nbʼanö chë le Biblia kan kʼo ruqʼij?
10 Jun ri nbʼanö chë le Biblia kan kʼo ruqʼij, ya riʼ chë ye kʼo peraj chpan ri xetzʼibʼäx qa kimä winäq ri kan xkitzʼët Jesús. Majun ta chik jun wuj ri kan tzʼaqät rubʼanik nuʼij achkë xuʼän Jesús pa qawiʼ. Taq xtatamaj achkë xuʼij chqä xuʼän Jesús, rït xtawajoʼ xkatok rachiʼil.
11. ¿Achkë xkatoʼö rchë xtawajoʼ más Jehová?
11 We xtawajoʼ Jesús, más xtawajoʼ Jehová. Nbʼanatäj riʼ rma Jesús kan chöj xkʼüt ri runaʼoj Rutataʼ (Juan 14:9). Rma riʼ, we xtatamaj más chrij Jesús, más xtqʼax chawäch achkë runaʼoj Jehová chqä más xtnmär ri ajowabʼäl ri nanaʼ chrij. Taquʼ rij ri joyowanïk xkʼüt Jesús. Ryä xjyowaj kiwäch ri winäq ri itzel wä yetzʼet kimä ri nkʼaj chik, achiʼel ri ye kʼo pa mebʼaʼïl, ri yawaʼiʼ chqä ri ma yekowin ta nkitoʼ kiʼ. Taquʼ chqä rij ri utziläj taq naʼoj xeruyaʼ qa chqä achkë rubʼanik más ütz yabʼä pa akʼaslemal we yeʼasmajij ri naʼoj riʼ (Mat. 5:1-11; 7:24-27).
12. ¿Achkë xkarutoʼ wä taq xtatamaj más chrij Jesús?
12 Ri ajowabʼäl ri nanaʼ chrij Jesús más xtnmär we xtaquʼ rij ronojel ri xuʼän ryä pa qawiʼ rchë chë ütz nkuy qamak (Mat. 20:28). Taq xtqʼax chawäch chë ryä xrajoʼ xkäm awumä rït, riʼ xtuʼän chë xtawajoʼ xtatzolij awiʼ chqä rchë xtakanuj rubʼanik rchë nkuy amak rma Jehová (Hech. 3:19, 20; 1 Juan 1:9). Taq más xkeʼawajoʼ Jehová chqä Jesús, más xtawajoʼ xkajeʼ kikʼë ri winäq ri nkinaʼ achiʼel nanaʼ rït.
13. ¿Achkë ruyaʼon Jehová chawä?
13 Tawajoʼ ri ru-familia Jehová. Rkʼë jbʼaʼ ri xeʼok awachiʼil chqä ri awachʼalal ri ma ye Testigos ta ma nqʼax ta chkiwäch achkë rma rït nawajoʼ najäch awiʼ pa ruqʼaʼ Dios, y rkʼë jbʼaʼ xkatkiqʼät rchë naʼän riʼ. Ye kʼa Jehová yeruyaʼ ye kʼïy awachʼalal chpan ri congregación ri ye achiʼel ta a-familia. We rït xkajeʼ chnaqaj re familia reʼ, xtawïl kʼuqbʼäl kʼuʼx chqä ri toʼïk ri nkʼatzin chawä (Mar. 10:29, 30; Heb. 10:24, 25). Y rkʼë jbʼaʼ jun qʼij ri awachʼalal pa awachoch xtkajoʼ chqä xtkiyaʼ ruqʼij Jehová chqä xtkismajij ri rupixaʼ (1 Ped. 2:12).
14. Achiʼel nuʼij chpan 1 Juan 5:3, ¿achkë qʼaxnäq chik chawäch rït chrij ri rupixaʼ Jehová?
14 Keʼaloqʼoqʼej chqä keʼasmajij ri naʼoj yeruyaʼ Jehová. Rkʼë jbʼaʼ, taq majanä ataman ta ruwäch Jehová, ayonïl wä natzʼët qa achkë ütz naʼän y achkë ma ütz ta. Ye kʼa komä, ya xqʼax chawäch chë ri rupixaʼ Jehová ya riʼ ri más ütz (Sal. 1:1-3; taskʼij ruwäch 1 Juan 5:3 *). Taquʼ kij ri pixaʼ nuyaʼ le Biblia chkë ri achijilonel, ri ixjayilonel, ri teʼej tataʼaj chqä ri akʼalaʼ (Efes. 5:22–6:4). Rma yeʼasmajin ri naʼoj riʼ, ¿atzʼeton rït chë más ütz akʼwan awiʼ rkʼë a-familia? ¿Najin nakʼüt más ütz taq naʼoj rma najin yeʼasmajij ri naʼoj ri ntzjon chkij ri ütz chqä ri itzel taq achbʼilanïk? ¿Más kiʼ akʼuʼx rubʼanon komä? (Prov. 13:20; 1 Cor. 15:33). Rkʼë jbʼaʼ najin chik yebʼanatäj ronojel riʼ chpan akʼaslemal.
15. ¿Achkë ütz naʼän we nkʼatzin atoʼik rchë nasmajij jun naʼoj ri kʼo chpan le Biblia?
15 Rkʼë jbʼaʼ kʼo mul ma nawïl ta achkë rubʼanik nasmajij jun naʼoj ri kʼo chpan le Biblia. Rma riʼ, Jehová nuksaj rutinamit, ri yeruyaʼ pä publicaciones, rchë nuqʼalajsaj ri naʼoj riʼ chawäch. Ri publicaciones riʼ xkatkitoʼ rchë xtqʼax chawäch achkë riʼ ri ütz chqä ri ma ütz ta (Heb. 5:13, 14). Taq xtaskʼij chqä xtanukʼuj kiwäch, xtatzʼët chë kan xkatkitoʼ rchë xkeʼasmajij ri naʼoj ye kʼo chpan le Biblia. Riʼ xtuʼän chë xtarayij xkatok chpan rutinamit Jehová.
16. ¿Achkë rubʼanon Jehová chpan rutinamit rchë yaruchajij?
16 Tawajoʼ chqä katoʼon rkʼë rutinamit Dios. Jehová rubʼanon chë chpan rutinamit yejeʼ congregaciones, y Jesús, ri rukʼajol, ya riʼ ri ukʼwäy bʼey pa kiwiʼ jontir ri congregaciones riʼ (Efes. 1:22; 5:23). Jesús chqä yeruyaʼon qa jun molaj achiʼaʼ ri yechaʼon rchë yebʼä chkaj rchë nkitzʼët ri samaj ri nrajoʼ ryä chë nbʼan pa qaqʼij röj komä. Chkë ri cristianos riʼ, Jesús xuʼij «ri utziläj samajel ri kan kʼo runaʼoj» chkë. Ryeʼ kan nkitäj kiqʼij rchë yatkichajij chqä rchë yatkitoʼ rchë nkʼuqeʼ más akʼuʼx pa ruchʼaʼäl Dios (Mat. 24:45-47). Jun rubʼanik ri yaruchajij ri utziläj samajel riʼ, ya riʼ yeruksan utziläj taq achiʼaʼ rchë nkikʼwaj bʼey chpan jun congregación (Is. 32:1, 2; Heb. 13:17; 1 Ped. 5:2, 3). Ri ukʼwäy taq bʼey riʼ kan nkiʼän ri kʼo pa kiqʼaʼ rchë nkikʼuqbʼaʼ akʼuʼx chqä rchë más junan nuʼän awäch rkʼë Jehová. Ye kʼa jun ri kan kʼo rejqalen ri nkiʼän ryeʼ pa awiʼ, ya riʼ yatkitoʼ rchë yakowin natzjoj runaʼoj Jehová chkë ri nkʼaj chik winäq (Efes. 4:11-13).
17. Achiʼel nuʼij chpan Romanos 10:10 chqä 13 y 14, ¿achkë rma yeqatoʼ ri winäq rchë nkitamaj ruwäch Jehová?
17 Keʼatoʼ ri nkʼaj chik rchë nkajoʼ Jehová. Jesús xuʼij chkë ri rutzeqelbʼëy chë kekitoʼ ri nkʼaj chik rchë nkitamaj ruwäch Dios (Mat. 28:19, 20). Rkʼë jbʼaʼ nqasmajij ri pixaʼ riʼ rma qataman chë kʼo chë nqaʼän. Ye kʼa, we ri ajowabʼäl ri nanaʼ chrij Dios más xtnmär, rït xtanaʼ achiʼel xnaʼ ri apóstol Pedro y ri apóstol Juan, ri xkiʼij: «Ma nqkowin ta nqayaʼ qa rutzjoxik ronojel ri qatzʼeton pä chqä ri qakʼoxan pä» (Hech. 4:20). Majun ta jun ri nyaʼö más kiʼkʼuxlal chwäch ri natoʼ jun winäq rchë nrajoʼ Jehová. Taquʼ na peʼ achkë xnaʼ Felipe taq xtoʼ ri achï aj Etiopía rchë xrajoʼ xqasäx pa yaʼ rma xqʼax ri Ruchʼaʼäl Dios chwäch. ¡Kantzij na wä chë janina kiʼkʼuxlal xnaʼ! Taq xtaʼän achiʼel xuʼän Felipe chqä xtatzjoj ri utziläj taq rutzjol chkë ri winäq achiʼel xuʼij qa Jesús, xtakʼüt chë nawajoʼ yatok jun testigo de Jehová (taskʼij ruwäch Romanos 10:10, 13, 14 *). Taq xtbʼanatäj riʼ, rkʼë jbʼaʼ xtaʼän qa ri kʼutunïk chawäch ri xuʼän ri achï aj Etiopía taq xuʼij: «¿Achkë komä yiqʼatö rchë ma yiqasäx ta pa yaʼ?» (Hech. 8:36).
18. ¿Achkë xtqatzʼët chpan ri jun chik tjonïk?
18 Majun ta jun ri kʼo más rejqalen chpan ri akʼaslemal chwäch ri yaqasäx pa yaʼ. Rma riʼ kʼo chë najäm awäch rchë naquʼ apü jontir ri xtkʼatzin xtaʼän taq xkaqasäx pa yaʼ. Ye kʼa, ¿achkë nkʼatzin natamaj chrij ri bautismo? ¿Chqä achkë kʼo chë naʼän taq majanä kaqasäx pa yaʼ chqä taq xaqasäx yän pa yaʼ? Xkeqaqʼalajsaj ri kʼutunïk riʼ chpan ri jun chik tjonïk.
BʼIX 2 Tu nombre es Jehová
^ pàrr. 5 Ye kʼo jojun winäq ri nkajoʼ Jehová nkinaʼ chë majanä ütz ta yeqasäx pa yaʼ o chë yeʼok testigos de Jehová. We rït ke riʼ nanaʼ, re tjonïk reʼ xkarutoʼ rchë natzʼët achkë ütz naʼän rchë ütz xkaqasäx pa yaʼ.
^ pàrr. 2 Hechos 8:35-38: «Rkʼë ri peraj riʼ rchë ri Ruchʼaʼäl Dios, Felipe xqʼalajsaj chwäch ri achï riʼ ri utziläj taq rutzjol chrij Jesús. Taq ye bʼenäq wä pa bʼey, xeʼapon akuchï kʼo wä yaʼ. Kʼa riʼ taq ri eunuco xuʼij: ‹¡Tatzʼetaʼ! Aweʼ kʼo yaʼ. ¿Achkë komä yiqʼatö rchë ma yiqasäx ta pa yaʼ?›. Rma riʼ, ri eunuco xuʼij chë tpabʼäx ri chʼichʼ, y Felipe chqä ryä xeqä qa pa yaʼ. Chrij riʼ Felipe xuʼän bautizar ri eunuco».
^ pàrr. 6 Romanos 1:20: «Ronojel ri naʼoj ye kʼo rkʼë Dios xeqʼalajin pä kan xa xuʼ xbʼan le Ruwachʼulew, y kan yeqatzʼët rkʼë ronojel ri rubʼanon qa, yajün ri ruchqʼaʼ chqä ri nimaläj ruqʼij».
^ pàrr. 6 Xkeʼawïl más tzʼetbʼäl chpan ri folletos ¿Es la vida obra de un Creador? chqä El origen de la vida. Cinco cuestiones dignas de análisis.
^ pàrr. 14 1 Juan 5:3: «Ri ajowabʼäl chrij Dios ya reʼ ntel chë tzij: chë keqasmajij ri rupixaʼ; y ri rupixaʼ ma jun ejqaʼn ta».
^ pàrr. 17 Romanos 10:10, 13, 14: «Rma rkʼë qan nqakʼüt ri qakʼuqbʼäl kʼuʼx ri nqekʼwan pa jun chöj kʼaslemal, ye kʼa rkʼë ri qachiʼ nqatzjoj ri utziläj taq rutzjol ri nyaʼö kolotajïk». «Rma ‹xa bʼa achkë ri xtskʼin rubʼiʼ Jehová xtkolotäj›. Ye kʼa, ¿achkë komä rubʼanik xtkiskʼij rubʼiʼ we ma kikʼuqbʼan ta kikʼuʼx chrij? ¿Y achkë komä rubʼanik xtkikʼuqbʼaʼ kikʼuʼx chrij we majun kikʼoxan ta chrij? ¿Y achkë komä rubʼanik xtkikʼoxaj chrij we majun ta jun nyaʼö rutzjol chkë?».
^ pàrr. 64 RUQʼALAJSAXIK RI ACHBʼÄL: Jun qachʼalal ixöq ri najin nuʼän ruloqʼoj najin nuyaʼ jun tratado che rä jun qʼopoj.
