1, 2. ¿Achkë ütz yetoʼö jun tijoxel rchë nbʼeʼok testigo de Jehová?

YA Amy, jun qachʼalal ixöq ri kʼo Fiyi, nuʼij: «Kan nqä wä chi nwäch jontir ri najin ntamaj chrij le Biblia. Ntaman wä chë ri najin ntamaj ya riʼ ri kantzij, ye kʼa ma najin ta nsmajij ri najin ntamaj. Ri xitoʼö rchë xinjäl rubʼanik nkʼaslemal chqä rchë xiqasäx pa yaʼ ya riʼ xenwachbʼilaj ri qachʼalal». Ri xbʼanatäj rkʼë ya Amy nukʼüt qa jun naʼoj chqawäch ri kan kʼo rejqalen, ya riʼ chë jun tijoxel chrij le Biblia más ma kʼayewal ta xtuʼän chwäch xtsmajij ri najin nutamaj chqä xtbʼeʼok testigo de Jehová we jontir ri yoj kʼo pa congregación nqtoʼon rchë xtbʼanatäj riʼ.

² Jontir ri publicadores ütz yetoʼon rchë nnmär ri congregación (Efes. 4:16). Jun precursora aj Vanuatu ri rubʼiniʼan Leila * nuʼij: «Ri winäq kʼo jun tzij nkiksaj ri nuʼij chë nkʼatzin rutoʼik jun tinamït rchë nkʼiytisäx jun akʼal. Rïn nbʼij chë kan ya riʼ chqä nbʼanatäj taq yeqatjoj ri winäq rchë yeʼok rutzeqelbʼëy Jesús. Kan ronojel bʼaʼ mul nkʼatzin chë jontir ri ye kʼo chpan ri congregación yetoʼon rchë chë jun winäq nbʼeʼok testigo de Jehová». Kan ye kʼïy yetoʼon rkʼë rukʼiytisaxik jun akʼal, achiʼel ri ru-familiares, ri rachiʼil chqä ri rutijonelaʼ, rma jontir ryeʼ nkikʼuqbʼaʼ rukʼuʼx chqä nkikʼüt utziläj taq naʼoj chwäch. Ke riʼ chqä nbʼanatäj chpan ri congregación. Ri publicadores xkekowin xtkitoʼ jun tijoxel rchë nbʼeʼok testigo de Jehová we xtkiyaʼ utziläj taq naʼoj che rä, xtkikʼuqbʼaʼ rukʼuʼx chqä xtkiyaʼ jun utziläj tzʼetbʼäl chwäch (Prov. 15:22).

3. ¿Achkë nqatamaj chrij ri nuʼij ya Ana, Daniel chqä ya Leila?

³ We najin nqatjoj jun winäq chrij le Biblia, ¿achkë rma kʼo ta chë kiʼ qakʼuʼx nqaʼän taq ri nkʼaj chik nkitoʼ qatijoxel? Tqatzʼetaʼ  ri nuʼij ya Ana, jun precursora especial ri kʼo Moldavia, ryä nuʼij: «Jun tijoxel kan kʼïy nkʼatzin che rä, y rkʼë jbʼaʼ rutijonel ma xtkowin ta xttoʼ rkʼë jontir riʼ». Jun chik precursor especial ri kʼo chqä chpan ri tinamït riʼ, ri rubʼiniʼan Daniel, nuʼij: «Kïy mul, ri nkʼaj chik publicadores kʼo jun nkiʼij ri kan napon pa ran ri tijoxel, jun ri rkʼë jbʼaʼ rïn majun bʼëy xpë ta pa njolon nbʼij che rä». Ya Leila nuʼij chik jun rma ri ütz nakʼän ri toʼïk nkiyaʼ ri qachʼalal. Ryä nuʼij: «Taq ri qachʼalal nkikʼüt chwäch ri tijoxel chë kowan nkajoʼ, ya riʼ xttoʼ rchë xtqʼalajin chwäch chë ya reʼ rutinamit Dios» (Juan 13:35).

4. ¿Achkë xtqatzʼët chpan re tjonïk reʼ?

⁴ Ye kʼa, rkʼë jbʼaʼ nqakʼutuj qa reʼ chqawäch: «¿Achkë rubʼanik ntoʼ jun tijoxel we ma yïn ta rïn yiyaʼö rutjonik chrij le Biblia?». Chpan re tjonïk reʼ xtqatzʼët achkë ütz nqaʼän taq nqbʼä rkʼë jun qachʼalal chutjoxik jun winäq chrij le Biblia chqä taq ri tijoxel kʼa naʼäy taq mul najin napon pa qamoloj. Chqä xtqatzʼët achkë ütz nkiʼän ri ukʼwäy taq bʼey rchë yekitoʼ ri tijoxelaʼ rchë yebʼeʼok testigos de Jehová.

5. ¿Achkë kʼo chë ma nqamestaj ta we nqbʼä rkʼë jun qachʼalal taq nbʼerutjoj jun winäq chrij le Biblia?

⁵ Taq ntjöx jun winäq chrij le Biblia, kan pa ruqʼaʼ ri tijonel kʼo wä rchë nutoʼ ri tijoxel rchë nqʼax ri ruchʼaʼäl Dios chwäch. Rma riʼ, taq nqbʼä rkʼë jun qachʼalal chutjoxik jun winäq, tnatäj chqë chë nqbʼä rkʼë rchë nqatoʼ (Ecl. 4:9, 10). Ye kʼa, ¿achkë ütz nqaʼän rchë kan xtqatoʼ ri qachʼalal riʼ?

6. ¿Achkë rubʼanik nqasmajij ri naʼoj kʼo chpan Proverbios 20:18 taq nqbʼä rkʼë jun qachʼalal chuyaʼik jun tjonïk chrij le Biblia?

⁶ Kan ütz tqatjoj äl qiʼ. Naʼäy tqaʼij che rä qachʼalal chë ttzjoj jbʼaʼ chqë chrij rutijoxel (taskʼij ruwäch Proverbios 20:18). Ütz nqakʼutuj che rä achkë najin nuqʼaxaj ri tijoxel chpan rukʼaslemal, achkë naʼoj xtkinukʼuj rkʼë chqä achkë naʼoj nrajoʼ chë rutijoxel nutamaj qa chpan ri tjonïk riʼ. Chqä ütz nqakʼutuj che rä we kʼo jun ri ütz o ma ütz ta nqaʼij o nqaʼän, chqä achkë rubʼanik nqatoʼ ri tijoxel rchë nusmajij ri najin nutamaj. Kantzij na wä chë ri qachʼalal ma xtuʼij ta jontir chqë chrij rutijoxel, ye kʼa ri xtuʼij chqë rkʼë jbʼaʼ xtkʼatzin chqë. Jun misionera ri rubʼiniʼan Joy kan ya riʼ nuʼän kikʼë ri qachʼalal ri yebʼä rkʼë taq yebʼerutjoj rutijoxelaʼ. Ryä nuʼij: «Reʼ nutoʼ ri qachʼalal bʼenäq wkʼë rchë xtkowin xttoʼ ntijoxel chqä rchë xtrïl achkë nuʼij taq najin nqayaʼ ri tjonïk».

7. ¿Achkë rma kowan rejqalen chë kan ütz nqatjoj äl qiʼ chrij ri naʼoj xketzʼet rkʼë ri tijoxel?

⁷ Taq xtqbʼä rkʼë jun qachʼalal chuyaʼik jun tjonïk chrij le Biblia, ütz chë röj chqä nqatjoj äl qiʼ chrij ri naʼoj xttzʼet rkʼë ri tijoxel ri qʼij riʼ (Esd. 7:10). Daniel, ri xqatzjoj chpan ri peraj 3, nuʼij: «Rïn kan jaʼäl ntzʼët taq wachiʼil  rutjon äl riʼ. Ke riʼ kʼo naʼoj xtuʼij ri kan xttoʼ ri tijoxel». Ya riʼ chqä xtyaʼ qa jun utziläj tzʼetbʼäl chwäch ri tijoxel, rma rkʼë jbʼaʼ xttzʼët chë kan che kaʼiʼ kitjon al kiʼ. Y tapeʼ ma xtqkowin ta xtqatjoj äl qiʼ chkij jontir ri naʼoj xkenukʼüx kij ri qʼij riʼ, ütz yeqatzʼët äl achkë naʼoj ri kan kʼo más kejqalen chpan ri tjonïk.

8. ¿Achkë xtqtoʼö rchë taq xtqchʼö rkʼë Jehová kan xtqakʼutuj achkë qäs nkʼatzin che rä ri tijoxel?

⁸ Ri chʼonïk kan kʼo rejqalen taq ntjöx jun winäq chrij le Biblia. Rma riʼ, tqaquʼ äl rij achkë ütz nqaʼij we nbʼix chqë chë qchʼö rkʼë Jehová taq ntkïr o nkʼis ri tjonïk. Ke riʼ xtqkowin xtqakʼutuj achkë qäs nkʼatzin che rä ri tijoxel (Sal. 141:2). Ya Yuki, jun qachʼalal aj Japón, kʼa nnatäj na che rä ri chʼonïk xeruʼän jun qachʼalal ri nbʼä wä rkʼë rutijonel taq nkiyaʼ rutjonik. Ryä nuʼij: «Rïn xintzʼët chë ri qachʼalal riʼ kan junan rubʼanon ruwäch rkʼë Jehová, y rïn chqä ya riʼ wä nwajoʼ nbʼän. Y taq nuskʼij nbʼiʼ chpan ri chʼonïk, kan nnaʼ wä rïn chë yinkajoʼ».

9. Achiʼel nuʼij chpan Santiago 1:19, ¿achkë ütz nqaʼän rchë xtqkowin xtqatoʼ jun qachʼalal taq najin nutjoj jun winäq chrij le Biblia?

⁹ Tqatoʼ ri tijonel. Jun precursora especial aj Nigeria ri rubʼiniʼan Olivia, nuʼij: «Jun utziläj awachiʼil xtyaʼ ruxkïn taq najin nayaʼ rutjonik jun winäq. Chqä yeruyaʼ apü ütz taq naʼoj, ye kʼa ma xa xuʼ ta ryä ntzjon, rma retaman chë yë ri tijonel ri kʼo chë nekʼwan bʼey chpan ri tjonïk». Rma riʼ, ¿ajän riʼ taq ütz nqtzjon chqä achkë ütz nqaʼij? (Prov. 25:11). Tqayaʼ qaxkïn che rä qachʼalal chqä che rä rutijoxel (taskʼij ruwäch Santiago 1:19). Xa xuʼ ke riʼ xtqkowin xtqtoʼon we xtajowatäj. Ye kʼa kʼo chë nqachajij qiʼ rchë ma xa xuʼ ta röj nqtzjon rchë ma nqaqʼät ta apü rutzij ri qachʼalal o rchë xa jun chik naʼoj nqachäp rutzjoxik. Ye kʼa ri ütz nqaʼän ya riʼ nqaksaj jun naʼoj, jun tzʼetbʼäl o jun kʼutunïk rchë nqatoʼ ri tijoxel rchë nqʼax más pa rujolon ri naʼoj najin nnukʼüx ruwäch. Kïy mul rkʼë jbʼaʼ xtqanaʼ chë ma kan ta xqatoʼ ri qachʼalal. Ye kʼa we nqaʼij che rä ri winäq chë ütz ri najin nuʼän chqä nqakʼüt chwäch chë nqchʼpü chrij, xtqatoʼ rchë xtsmajij ri naʼoj ri najin nutamaj.

10. ¿Achkë rubʼanik xttoʼ jun tijoxel ri xtqaʼij che rä achkë qaqʼaxan pä chpan qakʼaslemal?

¹⁰ Tqatzjoj che rä ri tijoxel achkë qaqʼaxan pä chpan qakʼaslemal. We ütz nuʼän, rkʼë jbʼaʼ ütz nqaʼij che rä ri tijoxel achkë rubʼanik xq-ok pä chpan rutinamit Jehová, achkë rubʼanik xqqʼax chwäch jun kʼayewal o achkë rubʼanik qatzʼeton chë Jehová yojurtoʼon pä chpan qakʼaslemal (Sal. 78:4, 7). Rkʼë jbʼaʼ, ri xtqaʼij kan ya riʼ xtkʼatzin che rä ri tijoxel. Rkʼë jbʼaʼ xtkikowirsaj ri rukʼuqbʼäl kʼuʼx, xtkitoʼ rchë xtuʼän ri najowatäj rchë nbʼeʼok testigo de Jehová o xtkitoʼ rchë xttzʼët achkë rubʼanik nqʼax chwäch jun kʼayewal (1 Ped. 5:9). Gabriel, jun precursor ri kʼo Brasil, nuʼij achkë naʼoj xtoʼö taq najin wä nyaʼöx rutjonik chrij le Biblia.  Ryä nuʼij: «Ri experiencias xkitzjoj ri qachʼalal chwä xkʼüt chi nwäch chë Jehová retaman achkë kʼayewal yeqaqʼaxaj. We ryeʼ xekowin xeqʼax chwäch riʼ, rïn chqä xkikowin».

11, 12. ¿Achkë rma nkʼatzin chë kan rkʼë ajowabʼäl yeqakʼül apü ri tijoxelaʼ ri yeʼapon pa qamoloj?

¹¹ Rchë chë jun tijoxel nusmajij ri nutamaj chqä nbʼeʼok testigo de Jehová, kʼo chë chaq taqïl nbʼä pa qamoloj. ¡Reʼ kan janina xttoʼ! (Heb. 10:24, 25). Rkʼë jbʼaʼ jun tijoxel napon naʼäy mul pa Salón del Reino rma yë rutijonel xbʼin che rä chë tapon. Ye kʼa jontir röj nqkowin nqatoʼ ri winäq riʼ rchë napon ronojel mul. ¿Achkë rubʼanik nqaʼän riʼ?

¹² Kan rkʼë ajowabʼäl tqakʼuluʼ apü ri tijoxel (Rom. 15:7). We nqaʼän chë ri tijoxel jaʼäl nunaʼ njeʼ pa qamoloj, rkʼë jbʼaʼ xtrajoʼ xtapon chkipan ri nkʼaj chik qamoloj. Rma riʼ, kan kiʼ qakʼuʼx tqachʼaʼej apü chqä tqakʼwaj kikʼë ri nkʼaj chik qachʼalal rchë nutamaj kiwäch, ye kʼa ma tqʼax ta ruwiʼ ri ütz qanaʼoj nqaʼän rkʼë rma rkʼë jbʼaʼ xa ma ütz ta xtnaʼ. Ma tqaʼän ta qa chqawäch chë kʼo chik jun achkë najin ntzʼetö rchë, rma rkʼë jbʼaʼ ri qachʼalal ri nyaʼö rutjonik majanä tapon o najin nutzʼët jun samaj chpan ri congregación. Tqayaʼ qaxkïn che rä ri nuʼij chqë chqä tqakʼutuʼ chwäch chë kan kiʼ qakʼuʼx rma kʼo qkʼë. ¿Achkë rubʼanik xttoʼ ri tijoxel we nqaʼän riʼ? Tqatzʼetaʼ achkë nuʼij Dimitri, ri kʼa pa jun kayoxiʼ junaʼ qa xqasäx pa yaʼ ye kʼa toʼonel chik pa congregación. Ryä nuʼij reʼ chrij ri naʼäy mul xbʼä pa jun qamoloj: «Ma xinwajoʼ ta xinok apü chpan ri Salón del Reino rma kan nxiʼin wä wiʼ. Ye kʼa jun qachʼalal xirutzʼët y kan ütz runaʼoj xuʼän wkʼë taq xiruksaj apü. Kan xel nkʼuʼx taq xintzʼët chë ye kʼïy xepë rchë yinkibʼechʼaʼej. Janina xqä chi nwäch, rma riʼ kʼo ta xinwajoʼ rïn chë kan ta ronojel qʼij kʼo moloj. Majun bʼëy nnaʼon ta wä ri xinnaʼ ri qʼij riʼ».

13. ¿Achkë rubʼanik xkerutoʼ ri tijoxelaʼ ri rubʼanik nqakʼwaj qakʼaslemal?

¹³ Tqayaʼ jun utziläj tzʼetbʼäl. Ri rubʼanik nqakʼwaj qakʼaslemal rkʼë jbʼaʼ xttoʼ jun tijoxel rchë nutzʼët chë xrïl rutinamit Dios (Mat. 5:16). Víctor, jun precursor aj Moldavia, nuʼij: «Taq xintzʼët kinaʼoj ri qachʼalal pa congregación chqä ri rubʼanik kʼaslemal kikʼwan, ya riʼ xitoʼö rchë xqʼax chi nwäch che ri testigos de Jehová ya riʼ ri kantzij religión».

14. ¿Achkë rubʼanik ri tzʼetbʼäl nqayaʼ röj nutoʼ jun tijoxel rchë nusmajij ri najin nutamaj?

¹⁴ We jun tijoxel nrajoʼ nqasäx pa yaʼ, kʼo chë nusmajij ri najin nutamaj. Ye kʼa ya riʼ kʼo mul kan kʼayewal nuʼän. Tapeʼ ke riʼ, taq xttzʼët chë röj ruyon utzil qlon pa qakʼaslemal rma nqasmajij ri naʼoj ye kʼo chpan le Biblia, ryä rkʼë jbʼaʼ xtrajoʼ xtkʼän runaʼoj chqij (1 Cor. 11:1). Tqatzʼetaʼ achkë xbʼanatäj rkʼë ya Yuki, ri qachʼalal xqatzjoj qa chpan ri peraj 8. Ryä nuʼij:  «Rïn xintzʼët chkij ri qachʼalal chë kan najin wä nkismajij ri naʼoj najin ntamaj. Riʼ xirutoʼ rchë xinkʼuqbʼaʼ kikʼuʼx ri nkʼaj chik, rchë xinküy kimak chqä rchë xinkʼüt chë yenwajoʼ. Ryeʼ kan ronojel mul kʼo wä ütz nkiʼij chkij ri nkʼaj chik, rma riʼ kan xinwajoʼ xinok achiʼel ryeʼ».

15. Rkʼë ri nuʼij chpan Proverbios 27:17, ¿achkë rma röj ütz nq-ok kichiʼil ri tijoxelaʼ ri yeʼapon pa qamoloj?

¹⁵ Q-ok rachiʼil ri tijoxel. Ronojel mul ri napon ri tijoxel pa qamoloj tqakʼutuʼ chwäch chë kan nqchʼpü chrij (Filip. 2:4). Rkʼë jbʼaʼ, xtqatamaj más ruwäch we xtqakʼutuj che rä chrij ru-familia, rusamaj o chrij ri achkë rubʼanon rutjonik chrij le Biblia, ye kʼa ma nqajoʼ ta chë ryä nunaʼ chë najin nqakʼöt ruchiʼ. Chqä ütz nqaʼij che rä chë kan kiʼ qakʼuʼx rkʼë rma kʼo jun xjäl pa rukʼaslemal. We xtqaʼän riʼ, xtqkowin xtq-ok rachiʼil ri tijoxel chqä xtqkowin xtqatoʼ rchë xtbʼeʼok testigo de Jehová (taskʼij ruwäch Proverbios 27:17). Ya Yuki, ri komä precursora regular chik, nuʼij achkë xnaʼ taq xapon naʼäy taq mul pa qamoloj. Ryä nuʼij: «Taq xinwïl wachiʼil chpan ri congregación, más xinrayij xibʼä chkipan ri moloj. Kan ronojel mul xibʼä tapeʼ janina yïn kosnäq. Kan jaʼäl xinnaʼ xijeʼ kikʼë ri kʼakʼakʼ wachiʼil. Riʼ chqä xirutoʼ rchë eqal eqal ma xenwachbʼilaj ta chik winäq ri ma nkiyaʼ ta ruqʼij Jehová. Y rma nwajoʼ wä chë más junan nuʼän nwäch rkʼë Jehová chqä kikʼë ri qachʼalal, xinwajoʼ xiqasäx pa yaʼ».

16. ¿Achkë chik nkʼaj ütz nqaʼän rchë chë jun tijoxel kan jaʼäl nunaʼ njeʼ chpan ri congregación?

¹⁶ Taq ri tijoxel eqal eqal xtkʼuqeʼ pä rukʼuʼx pa ruchʼaʼäl Dios, tqabʼanaʼ chë nunaʼ chë kan qachiʼil pa congregación. Jun rubʼanik nqaʼän riʼ ya riʼ taq nqaskʼij rchë njeʼ qkʼë (Heb. 13:2). Denís, jun qachʼalal achï ri kʼo Moldavia, nnatäj che rä achkë kinaʼoj xkiʼän ri qachʼalal rkʼë taq kʼa najin na nutjoj riʼ chrij le Biblia. Ryä nuʼij: «Ri qachʼalal pa congregación kan kïy mul xinkiskʼij rïn chqä ri wixjayil rchë nqjeʼ kikʼë. Kan xkʼuqbʼaʼ qakʼuʼx taq ryeʼ xkitzjoj chqë achkë rubʼanik yerutoʼon pä Jehová chpan kikʼaslemal. Ronojel riʼ xkiʼän chë röj kan xqajoʼ xqayaʼ ruqʼij Jehová chqä xqrtoʼ rchë xqayaʼ chwäch qan chë ruyon utzil xtqïl we xtqaʼän riʼ». Taq jun tijoxel ntok publicador, röj ütz nqaʼij che rä chë tbʼä qkʼë chutzjoxik le Biblia. Jun qachʼalal aj Brasil ri rubʼiniʼan Diego, nuʼij: «Ye kʼïy qachʼalal xinkiskʼij rchë yinel kikʼë chutzjoxik le Biblia. Ya riʼ janina xirutoʼ rchë xintamaj más kiwäch. Chqä xirutoʼ rchë xintamaj kʼïy naʼoj ri xkiʼän chë xijelun más rkʼë Jehová chqä rkʼë Jesús».

17. ¿Achkë ütz nkiʼän ri ukʼwäy taq bʼey rchë yekitoʼ ri tijoxelaʼ?

¹⁷ Nkijäm kiwäch rchë yekichʼaʼej ri tijoxelaʼ. Rïx, ri yïx ukʼwäy taq bʼey, rkʼë ri inaʼoj xtiʼän xkixkowin xtitoʼ jun tijoxel rchë nbʼeʼok testigo de Jehová. Taq kʼo qamoloj, rkʼë jbʼaʼ ütz nijäm  iwäch rchë yeʼichʼaʼej. Ryeʼ xtkitzʼët chë kan yixchʼpü chkij we nnatäj kibʼiʼ chiwä, más taq ya nkiyaʼ chik comentarios. Chqä rkʼë jbʼaʼ ütz nijäm iwäch rchë yixbʼä jojun mul rkʼë jun publicador taq nbʼerutjoj jun winäq chrij le Biblia. Tapeʼ rïx xtinaʼ chë ma jaruʼ ta xtiʼän, we xkixbʼä kikʼë, kan xttoʼ ri tijoxel. Ya Jackie, jun precursora ri kʼo Nigeria, nuʼij: «Ye kʼïy winäq ri yentjoj chrij le Biblia kan ntel kikʼuʼx taq nkitamaj chë ri qachʼalal bʼenäq wkʼë jun ukʼwäy bʼey pa congregación. Jun chkë ri winäq riʼ xuʼij chwä: ‹Ri n-pastor majun bʼëy xtuʼän ta riʼ. Ryä xa xuʼ napon chkachoch ri bʼeyomaʼ, y xa xuʼ we ntoj che rä›». Re winäq reʼ ya nbʼä chik chkipan qamoloj.

18. ¿Achkë ütz nkiʼän ri ukʼwäy taq bʼey rchë nkismajij ri nuʼij chpan Hechos 20:28?

¹⁸ Yekitoʼ chqä nkikʼuqbʼaʼ kikʼuʼx ri tijonelaʼ. Qachʼalal ukʼwäy taq bʼey, pan iqʼaʼ rïx yaʼon wä qa yeʼitjoj ri qachʼalal rchë ütz rubʼanik nkiʼän che rä rutzjoxik le Biblia chqä rchë yeʼok utziläj taq tijonelaʼ (taskʼij ruwäch Hechos 20:28). We kʼo jun qachʼalal nuxiʼij riʼ yixjeʼ rkʼë taq nutjoj jun winäq chrij le Biblia, ütz niʼij che rä chë yïx xkixtjon ri winäq ri qʼij riʼ. Ya Jackie, ri xqatzjoj chpan ri jun párrafo qa, nuʼij: «Ri ukʼwäy taq bʼey chaq taqïl nkikʼutuj chwä achkë kibʼanon ri ntijoxelaʼ chrij le Biblia. Taq kʼo jun kʼayewal najin nuʼän chi nwäch, ryeʼ nkikanuj rubʼanik rchë yinkitoʼ». Ri ukʼwäy taq bʼey ütz nkikʼuqbʼaʼ kikʼuʼx ri qachʼalal chqä ütz yekitoʼ rchë ma nikʼo ta kikʼuʼx kikʼë ri kitijoxelaʼ (1 Tes. 5:11). Ya Jackie nuʼij: «Kan jaʼäl nunaʼ wan taq ri ukʼwäy taq bʼey nkikʼuqbʼaʼ nkʼuʼx chqä nkiʼij chwä chë nkiloqʼoqʼej ri samaj najin nbʼän. Reʼ nuʼän chë nnaʼ chë kan ütz najin nbʼän kikʼë ri winäq ri najin yentjoj chrij le Biblia, chqä nuʼän chë kan más kiʼ nkʼuʼx nbʼän re samaj reʼ» (Prov. 25:25).

19. ¿Achkë jun ri kan kowan kiʼkʼuxlal xtyaʼ chqë?

¹⁹ Rkʼë jbʼaʼ komä majun ta jun winäq najin nqatjoj chrij le Biblia, ye kʼa nqkowin nqatoʼ chik jun rchë nkʼuqeʼ pä rukʼuʼx chpan ruchʼaʼäl Dios. Taq yoj bʼenäq rkʼë jun qachʼalal chutjoxik jun winäq chrij le Biblia, röj ütz nqatoʼ apü taq yeqayaʼ apü naʼoj ri kan ütz qatjon äl qiʼ chkij, ye kʼa tqachajij qiʼ rchë ma xa xuʼ ta röj nqtzjon. Chqä ütz q-ok kichiʼil ri tijoxelaʼ taq yeʼapon pa Salón del Reino y kan tqayaʼ jun utziläj tzʼetbʼäl chkiwäch. Ri ukʼwäy taq bʼey ütz yekitoʼ ri tijoxelaʼ taq nkijäm kiwäch rchë yejeʼ kikʼë, chqä xkekitoʼ ri tijonelaʼ taq yekitjoj chqä nkiʼij chkë chë ütz samaj najin nkiʼän. Majun ta jun ri nyaʼö más kiʼkʼuxlal pa qan chwäch ri nqtoʼon rchë chë jun winäq nrajoʼ ri Qatat Jehová chqä nuyaʼ ruqʼij.