1. Rkʼë ri nuʼij chpan Mateo 24:9, ¿achkë rma kʼo ta chë ma nsach ta qakʼuʼx taq ri winäq itzel nkinaʼ chqë?

JEHOVÁ xuʼän qa chqë chë nqjowan chqä chë nqjowäx. Rma riʼ kan ntiʼon qan o rkʼë jbʼaʼ kan nqaxiʼij qiʼ taq kʼo jun itzel nunaʼ chqë. Ya Georgina, jun qachʼalal aj Europa, nuʼij: «Rïn 14 wä njunaʼ taq nteʼ kan itzel xnaʼ chwä xa rma nyaʼ ruqʼij Jehová. Rma riʼ kowan xibʼison chqä xinnaʼ chë xa nyonïl yïn kʼo. Rïn xinquʼ chë rkʼë jbʼaʼ xa yïn rïn ri itzel nnaʼoj». * Jun qachʼalal ri rubʼiniʼan Danilo xtzʼibʼaj reʼ: «Taq ri soldados xinkichʼäy, xinkiyöqʼ chqä xkiʼij chwä chë xkinkitzʼlaʼ na más xa rma yïn testigo de Jehová, kan xinxiʼij wiʼ chqä xinnaʼ chë xkitzäq nkʼïx». Tapeʼ kan ma nqä ta chqawäch chë ri nkʼaj chik itzel nkinaʼ chqë, ma nsach ta qakʼuʼx taq nbʼanatäj riʼ qkʼë rma kan yë Jesús bʼiyon qa chë xtbʼanatäj na riʼ (taskʼij ruwäch Mateo 24:9).

2, 3. ¿Achkë rma ri winäq itzel nkinaʼ chqë?

² Ri winäq itzel nkinaʼ chqë rma, achiʼel Jesús, röj ma yoj «rchë ta chik le ruwachʼulew» (Juan 15:17-19). Rma riʼ, tapeʼ ma nqaqasaj ta kiqʼij ri qʼatbʼäl taq tzij, röj ma nqatïtzʼ ta qiʼ pa política, ma nqaʼän ta ri saludo a la bandera chqä ma nqabʼixaj ta ri himno nacional. Röj xa xuʼ Jehová nqayaʼ ruqʼij. Röj chqä nqatzjoj chë xa xuʼ Dios taqäl chrij nuqʼät tzij pa qawiʼ, ye kʼa Satanás chqä ruwinaq nkiʼij chë Dios ma taqäl ta chrij nuʼän riʼ (Gén. 3:1-5, 15). Röj chqä nqatzjoj chë xa xuʼ Ruqʼatbʼäl tzij Dios xtsolö jontir ri kʼayewal kʼo pa qawiʼ chqä chë xa jbʼaʼ chik apü xtchüp kiwäch ri itzel taq winäq (Dan. 2:44; Apoc. 19:19-21). Reʼ kan utziläj taq rutzjol chkiwäch ri winäq ri ütz kinaʼoj, ye kʼa chkiwäch ri itzel taq winäq xa itzel taq rutzjol (Sal. 37:10, 11).

 ³ Ri winäq itzel chqä nkinaʼ chqë rma nqasmajij rupixaʼ Dios pa qakʼaslemal. Nbʼanatäj riʼ rma ri itzel chwäch Dios kan ütz chkiwäch ryeʼ. Jun tzʼetbʼäl chrij riʼ ya riʼ chë ye kʼïy winäq ütz nkitzʼët ri tzʼil taq bʼanobʼäl ri xuʼän chë Dios xchüp kiwäch Sodoma chqä Gomorra (Jud. 7). Ye kʼïy winäq yetzeʼen chqij, yojkiyöqʼ o nkiʼij chë xa nqaqasaj ruqʼij ri nkiquʼ o ri nkiʼän ri nkʼaj chik rma nqasmajij ri naʼoj ye kʼo chpan le Biblia chkij ri tzʼil taq bʼanobʼäl (1 Ped. 4:3, 4).

4. ¿Achkë naʼoj yetoʼö qchë rchë nqkochʼon taq ri winäq itzel nkinaʼ chqë?

⁴ ¿Achkë naʼoj nkʼatzin yejeʼ qkʼë rchë nqkochʼon taq ri winäq itzel nkinaʼ chqë o yojkiyöqʼ? Röj nkʼatzin nqakʼuqbʼaʼ qakʼuʼx chë Jehová xtqrtoʼ pä. Ri kʼuqbʼäl kʼuʼx achiʼel ta jun escudo ri nqrtoʼ chkiwäch jontir ri kʼayewal ri nuyaʼ pä ri itzel winäq chqij (Efes. 6:16). Ye kʼa nkʼatzin chqä nqjowan. ¿Achkë rma? Rma ri winäq ri najowan ma chanin ta nkatäj ruyowal chqä nuköchʼ ri kʼayewal ri nkiyaʼ tijöj poqonal pa ruwiʼ (1 Cor. 13:4-7, 13). Tqatzʼetaʼ achkë rubʼanik ri nqajoʼ Jehová chqä ri yeqajoʼ ri qachʼalal, yajün ri winäq ri itzel nkinaʼ chqë, xkojkitoʼ rchë ma xtqayaʼ ta qa Jehová tapeʼ xtqtzeläx.

5. ¿Achkë xkowin xuʼän Jesús rma kowan xrajoʼ Rutataʼ kʼo chkaj?

⁵ Ri rukʼisbʼäl aqʼaʼ xjeʼ Jesús kikʼë rutzeqelbʼëy, ryä xuʼij reʼ chkë: «Rchë chë ri winäq nkitamaj chë kowan nwajoʼ ri Ntataʼ, nbʼän jontir ri ruchlaʼen pä Ntataʼ chwä» (Juan 14:31). Rma Jesús kan kowan xrajoʼ Rutataʼ, riʼ xuʼän chë xkowin xeruköchʼ ri kʼayewal xyaʼöx pa ruwiʼ. Röj chqä xtqkowin xtqaʼän riʼ we kowan nqajoʼ Jehová.

6. Achiʼel nuʼij Romanos 5:3 kʼa 5, ¿achkë nqanaʼ röj, ri rusamajelaʼ Jehová, taq ri winäq itzel nkinaʼ chqë?

⁶ Rma ri rusamajelaʼ Dios kan kowan nkajoʼ Jehová, reʼ yerutoʼon rchë nkiköchʼ ri kʼayewal nyaʼöx pa kiwiʼ. Jun tzʼetbʼäl chrij riʼ ya riʼ ri xbʼanatäj kikʼë ri apóstoles. Taq ri qʼatöy taq tzij judíos xkiʼij chkë chë ma tkitzjoj ta chik ri utziläj taq rutzjol, ryeʼ, rma kowan xkajoʼ Jehová, xkinmaj rutzij ryä pa rukʼexel xkinmaj kitzij ri winäq (Hech. 5:29; 1 Juan 5:3). Komä, ye kʼïy qachʼalal najin nyaʼöx kʼayewal pa kiwiʼ kimä qʼatbʼäl taq tzij ri kʼo uchqʼaʼ pa kiqʼaʼ chqä itzel kinaʼoj. Ye kʼa ryeʼ ma kiyaʼon ta qa Jehová rma kan kowan nkajoʼ. Taq ri winäq itzel nkinaʼ chqë, röj ma nqbʼison ta, xa kan kiʼ qakʼuʼx nqaʼän (Hech. 5:41; taskʼij ruwäch Romanos 5:3-5).

7. ¿Ütz komä chë röj nsach qakʼuʼx we ri qachʼalal pa qachoch ma nkiyaʼ ta qʼij chqë rchë nqayaʼ ruqʼij Dios? Taqʼalajsaj.

⁷ Rkʼë jbʼaʼ jun chkë ri kan nüm kʼayewal nuʼän chqawäch ya riʼ taq qachʼalal pa qachoch ma nkiyaʼ ta qʼij chqë nqayaʼ ruqʼij Jehová. Taq ryeʼ nkitzʼët chë röj nqajoʼ nqatamaj ruwäch Jehová, jojun chkë ryeʼ rkʼë jbʼaʼ nkiquʼ chë xa xqqʼol o rkʼë jbʼaʼ chë xa xuʼän itzel qajolon (tajnamaj rkʼë Marcos 3:21). Rkʼë jbʼaʼ kan xtkiyaʼ kʼayewal pa qawiʼ. Ye kʼa reʼ majun ta rma nuʼän chë nsach qakʼuʼx, rma Jesús xuʼij qa chë ri winäq ri ye kʼo pa qachoch kan ya riʼ ri itzel xtkinaʼ chqë (Mat. 10:36). Ye kʼa, xa bʼa achkë na kʼa kinaʼoj nkiʼän qkʼë, röj ma itzel ta nqanaʼ chkë. Pa rukʼexel riʼ, taq más nqajoʼ Jehová, riʼ nuʼän chë más yeqajoʼ ri nkʼaj chik (Mat. 22:37-39). Tapeʼ ke riʼ, röj majun bʼëy xtqaqʼäj ta rutzij Jehová xa rma nqajoʼ chë jun winäq kiʼ rukʼuʼx nuʼän qkʼë.

8, 9. ¿Achkë xtoʼö jun qachʼalal rchë xkowin xpabʼaʼ riʼ chkiwäch ri kʼayewal xyaʼöx chrij?

⁸ Ya Georgina, ri xqatzjoj chpan ri peraj 1, xkowin xpabʼaʼ riʼ chwäch ri kʼayewal xyaʼöx pa ruwiʼ rmä ruteʼ. Ryä nuʼij: «Chöj kaʼiʼ junan xqachäp qatjonik chrij le Biblia kikʼë ri Testigos. Ye kʼa 6 ikʼ chrij riʼ, taq ryä xtzʼët chë rïn ya nwajoʼ yibʼä chkipan ri moloj, chaq kʼateʼ xjäl runaʼoj wkʼë. Xuʼän riʼ rma najin wä nuskʼij kiwäch wuj ri yebʼanon pä kimä ri apóstatas, y yeruksaj wä ri naʼoj riʼ taq ntzjon wkʼë. Rma riʼ xchäp nyoqʼik, rumichʼik nwiʼ chqä kuw wä nuchäp  chë nqül, y xerukʼäq äl n-publicaciones pa mes. Tapeʼ ke riʼ, taq xuʼän 15 njunaʼ xiqasäx pa yaʼ. Ye kʼa rma ma nrajoʼ ta chë rïn nyaʼ ruqʼij Jehová, ri nteʼ xirujuʼ chpan jun jay ri akuchï yeyaʼöx wä ri qʼopojiʼ ri kʼo kimak kibʼanon. Jojun chkë ri qʼopojiʼ riʼ yekitäj wä drogas chqä yekiʼän wä itzel taq bʼanobʼäl. Kantzij na wä chë kan más kʼayewal nanaʼ taq kan yë jun winäq ri kʼo ta chë yatrajoʼ chqä yaturchajij ri nyaʼö kʼayewal pan awiʼ».

⁹ ¿Achkë xtoʼö ya Georgina rchë ma xyaʼ ta qa Jehová? Ryä nuʼij: «Ri qʼij taq nteʼ itzel runaʼoj xuʼän wkʼë ya riʼ taq xinkʼïs ruskʼixik le Biblia. Riʼ xirutoʼ rchë xintzʼët chë kan xinwïl rutinamit Dios chqä rchë xijeʼ más naqaj rkʼë Jehová. Chaq taqïl xichʼö rkʼë y ryä kan xirutoʼ pä. Taq kʼa yïn kʼo na wä chpan ri jay riʼ, jun qachʼalal ixöq xyaʼ qʼij chwä rchë chaq taqïl xinapon rkʼë rchë junan xqatjoj qiʼ chrij le Biblia. Chkipan ri qʼij riʼ, ri qachʼalal pa congregación janina xkikʼuqbʼaʼ nkʼuʼx chqä xkiʼän chë achiʼel ta yïn jun chkë ri ki-familia. Xqʼax chi nwäch chë Jehová más ruchqʼaʼ chwäch xa bʼa achkë winäq ri nyaʼö kʼayewal pa qawiʼ».

10. ¿Achkë ütz nqayaʼ chwäch qan?

¹⁰ Ri apóstol Pablo xtzʼibʼaj qa chë majun ta jun xtkowin xtqjachö rkʼë «ri rajowabʼäl Dios, ri kʼo rkʼë Cristo Jesús ri Qajaw» (Rom. 8:38, 39). Tapeʼ kʼo mul xtqatäj poqän, Jehová majun bʼëy xtqryaʼ ta qa qayonïl. Ryä ronojel mul xtkʼuqbʼaʼ pä qakʼuʼx chqä xtyaʼ qachqʼaʼ. Y achiʼel xbʼanatäj rkʼë ya Georgina, ryä xkeruksaj chqä qachʼalal pa congregación rchë xtqrtoʼ pä.

11. ¿Achkë rubʼanik xerutoʼ ri cristianos pa naʼäy siglo ri xkajoʼ kiʼ achiʼel wä xuʼij qa Jesús chpan Juan 15:12 chqä 13? Tayaʼ jun tzʼetbʼäl.

¹¹ Ri rukʼisbʼäl aqʼaʼ xjeʼ Jesús kikʼë rutzeqelbʼëy, ryä xuʼij chkë chë tkajowalaʼ kiʼ chkiwäch (taskʼij ruwäch Juan 15:12, 13). Ryä retaman wä chë ya riʼ kan xkerutoʼ rchë junan xtuʼän kiwäch chqä rchë ma xtkiyaʼ ta qa Jehová tapeʼ itzel xketzʼet kimä ri winäq. Tqaquʼ rij achkë xbʼanatäj rkʼë ri congregación ri xjeʼ Tesalónica. Re congregación reʼ kan xyaʼöx kʼayewal pa ruwiʼ kan xa xuʼ xchapatäj pä. Ri cristianos riʼ kan xkiyaʼ qa jun utziläj tzʼetbʼäl chqawäch chrij ri yajowan chqä yakochʼon (1 Tes. 1:3, 6, 7). Pablo xuʼij chkë chë ronojel qʼij xa más tkajoʼ kiʼ (1 Tes. 4:9, 10). Riʼ xkerutoʼ rchë xtkikʼuqbʼaʼ kikʼuʼx ri cristianos ri kʼo wä jun nimaläj bʼis pa kan chqä rchë xkekitoʼ ri majun ta wä chik kichqʼaʼ (1 Tes. 5:14). Ryeʼ kan xkismajij ri xbʼix  chkë. Nqaʼij riʼ, rma jun junaʼ chrij riʼ Pablo xtzʼibʼaj äl reʼ chkë chpan ri rukaʼn wuj ri xtäq äl chkë: «Kan nqʼalajin chiwij chë más niwajoʼ iwiʼ» (2 Tes. 1:3-5). Ri xkiʼän riʼ xerutoʼ rchë xekowin xkipabʼaʼ kiʼ chkiwäch ri kʼayewal xyaʼöx pa kiwiʼ.

12. ¿Achkë rubʼanik xkikʼüt chë nkajowalaʼ kiʼ ri qachʼalal ri ye kʼo chpan jun tinamït ri najin chʼaʼoj chpan?

¹² Tqatzʼetaʼ achkë xbʼanatäj rkʼë Danilo, ri xqatzjoj chpan ri peraj 1, chqä rkʼë rixjayil. Taq xchapatäj jun chʼaʼoj chpan kitinamit, ryeʼ ronojel mul xebʼä chkipan qamoloj, xkiʼän jontir ri kʼo pa kiqʼaʼ chutzjoxik le Biblia chqä ma xkikʼewaj ta xkispaj kiway ri qachʼalal. Kʼo jun qʼij, jojun soldados ri kikʼwan äl kiqʼaqʼ xeʼapon chrachoch Danilo. Ryä nuʼij: «Xkiʼij chwä chë tinmalij qa Jehová. Rma ma xinwajoʼ ta, xinkichʼäy chqä xkiʼän chë achiʼel ta xkajoʼ xinkikamsaj rkʼë kiqʼaqʼ, ye kʼa xa pa ruwiʼ njolon xqʼax wä äl rupan ri qʼaqʼ. Taq xebʼä äl, xkiʼij qa chwä chë xketzolin na pä rchë xtkitzʼlaʼ wixjayil. Rma riʼ, ri qachʼalal kan chanin xojkitäq äl jukʼan chik tinamït chpan tren. Ryeʼ kan xkikʼüt chqawäch chë kowan yojkajoʼ. Reʼ majun bʼëy xtinmestaj ta. Taq xqapon chpan ri jun chik tinamït, ri qachʼalal xkiyaʼ qaway, y xinkitoʼ rchë xinwïl nsamaj chqä jun qachoch. Rma ri xbʼan qkʼë, jun tiempo chrij riʼ, röj chqä xeqakʼül apü jojun qachʼalal ri ye anmajnäq pä chwäch ri chʼaʼoj». Tzʼetbʼäl achiʼel reʼ yojkitoʼ rchë nqatzʼët chë ri yeqajoʼ ri qachʼalal nuʼän chë nqkowin nqapabʼaʼ qiʼ chwäch xa bʼa achkë kʼayewal nyaʼöx pa qawiʼ.

13. ¿Achkë rubʼanik nqrtoʼ ri loqʼoläj ruchqʼaʼ Dios rchë ma nqayaʼ ta qa Jehová taq ri winäq itzel nkinaʼ chqë?

¹³ Jesús xuʼij qa chë kʼo chë yeqajoʼ ri winäq ri itzel nkinaʼ chqë (Mat. 5:44, 45). Reʼ kʼo mul kʼayewal nuʼän chqawäch. Ye kʼa rkʼë rutoʼik ri loqʼoläj ruchqʼaʼ Dios, röj xtqkowin xtqaʼän riʼ. ¿Achkë rma nqaʼij riʼ? Rma rkʼë ri loqʼoläj ruchqʼaʼ Dios yewachin utziläj taq naʼoj ri xkojkitoʼ rchë xtqkowin xtqapabʼaʼ qiʼ chkiwäch ri kʼayewal yeyaʼöx pa qawiʼ. Naʼoj achiʼel ri yajowan, ri yakochʼon, ri ütz anaʼoj naʼän kikʼë ri nkʼaj chik, ri ma qʼaqʼ ta ajolon chqä ri naqʼïl awiʼ (Gál. 5:22, 23). Ye kʼïy winäq ri rubʼanon qa itzel nkinaʼ chqë xkijäl kinaʼoj rma ri kikʼlaj, jun kalkʼwal o jun ki-vecino xkikʼüt ri naʼoj chkiwäch ri yewachin rkʼë ri loqʼoläj ruchqʼaʼ Dios. Reʼ chqä rubʼanon chë kïy chkë ryeʼ ye oknäq testigos de Jehová. Rma riʼ, we kan kʼayewal nuʼän chqawäch yeqajoʼ ri winäq ri itzel nkinaʼ chqë xa rma nqayaʼ ruqʼij Dios, tqakʼutuj che rä Jehová  chë tyaʼ pä ri loqʼoläj ruchqʼaʼ pa qawiʼ (Luc. 11:13). Majun bʼëy tqamestaj ta chë ri nqanmaj rutzij Jehová ya riʼ ri más ütz nqaʼän (Prov. 3:5-7).

14, 15. ¿Achkë rubʼanik xtoʼ jun qachʼalal ri nuʼij Romanos 12:17 kʼa 21 rchë xkʼüt chwäch rachjil chë nrajoʼ tapeʼ kan kʼïy kʼayewal xyaʼöx pa ruwiʼ?

¹⁴ Tqatzʼetaʼ achkë xbʼanatäj rkʼë jun qachʼalal ri rubʼiniʼan Yasmín. Taq xok testigo de Jehová, ri rachjil xquʼ chë ri qachʼalal riʼ xa xqʼol. Rma riʼ xkanuj rubʼanik rchë rixjayil ma tyaʼ ta chik ruqʼij Jehová. Ryä xchäp ruyoqʼik ri qachʼalal riʼ. Ryä chqä xuʼij chkë ri ru-familiares, che rä jun ukʼwäy bʼey pa jun religión chqä che rä jun ajqʼij chë tkiʼij che rä rixjayil che xtkiʼän jun itzelal che rä we ma xtyaʼ ta qa ruyaʼik ruqʼij Jehová, chqä chë rumak ryä ri ru-familia najin nkijäch kiʼ. Ri rachjil qachʼalal riʼ kan xapon chqä chpan jun qamoloj rchë xeruyöqʼ ri qachʼalal. Ya Yasmín kan kʼïy mul xoqʼ rma rachjil kan itzel runaʼoj xuʼän rkʼë.

¹⁵ Chkipan ri qamoloj, ri qachʼalal kan xkikʼuqbʼaʼ rukʼuʼx. Ri ukʼwäy taq bʼey xkiʼij che rä chë tsmajij ri naʼoj kʼo chpan Romanos 12:17 kʼa 21 (taskʼij ruwäch). Ya Yasmín nuʼij: «Kʼayewal xuʼän chi nwäch xinsmajij ri naʼoj kʼo chpan le Biblia. Ye kʼa xinbʼij che rä Jehová chë kirutoʼ pä chqä kan xintäj nqʼij rchë xinsmajij ri naʼoj riʼ. Rma riʼ, taq wachjil kan chbʼanik nuʼän napon pa cocina rchë nuʼän tzʼil che rä ri piso, rïn ma xinkʼewaj ta xinsuʼ; taq xiruyöqʼ, ma xkatäj ta nyowal chrij; y taq xyawäj, kan xinwlij».

16, 17. ¿Achkë nukʼüt qa chawäch rït ri xbʼanatäj rkʼë ya Yasmín?

¹⁶ Ya Yasmín nuʼij chë kan kʼo utzil xkʼäm pä pa ruwiʼ rma xkʼüt chwäch rachjil chë nrajoʼ. Ryä nuʼij: «Ri wachjil xkʼuqbʼaʼ más rukʼuʼx chwij rma retaman chë rïn ma yitzʼukü ta tzij. Eqal eqal xyaʼ ruxkïn chwä taq nqtzjon chrij religión, y xuʼij chwä chë ma xtuʼän ta chik chʼaʼoj wkʼë. Komä kan yë chik ryä nbʼin chwä chë kibʼä chkipan qamoloj. Chqä más junan rubʼanon qawäch y majun ta chik chʼaʼoj pa qakʼlajil. Rïn kan nyoʼen chë jun qʼij ryä xttok pä chpan rutinamit Dios, ke riʼ junan xtqayaʼ ruqʼij».

¹⁷ Ri xbʼanatäj rkʼë ya Yasmín nukʼüt chqawäch chë jun winäq ri najowan yeruköchʼ ri kʼayewal chqä ma nikʼo ta rukʼuʼx nyoʼen (1 Cor. 13:4, 7). We röj nqakʼüt chë nqjowan, xtqkowin xtqaʼän chë ri winäq ri itzel nkinaʼ chqë xtkijäl ri nkinaʼ chqij röj chqä chrij Jehová. Taq röj nqakʼüt chë nqjowan, nqaʼän chë Jehová kiʼ rukʼuʼx nuʼän. Ye kʼa, tapeʼ ri winäq ri itzel nkinaʼ chqë ma xtkijäl ta kinaʼoj, röj kan xtqkowin na xtqanaʼ kiʼkʼuxlal. Tqatzʼetaʼ achkë rubʼanik nqaʼän riʼ.

18. ¿Achkë rma röj ütz nqanaʼ kiʼkʼuxlal tapeʼ ri winäq itzel nkinaʼ chqë?

¹⁸ Jesús xuʼij qa: «Kan kiʼ ikʼuʼx tibʼanaʼ taq [...] ri winäq itzel xtkinaʼ chiwä» (Luc. 6:22). Röj ma nqä ta chqawäch chë ri winäq itzel nkinaʼ chqë, chqä ma nqajoʼ ta chë nkiquʼ chë jaʼäl nqanaʼ nyaʼöx kʼayewal pa qawiʼ xa rma nqayaʼ ruqʼij Dios. Rma riʼ, ¿achkë rma kan nqanaʼ kiʼkʼuxlal tapeʼ nqtzeläx? Tqatzʼetaʼ oxiʼ rma. Naʼäy, taq röj yeqaköchʼ ri kʼayewal, Jehová kiʼ rukʼuʼx nuʼän qkʼë (1 Ped. 4:13, 14). Rukaʼn, ri qakʼuqbʼäl kʼuʼx más nkowïr (1 Ped. 1:7). Y rox, xtyaʼöx jun nimaläj spanïk chqë: ri kʼaslemal ri majun bʼëy xtkʼis ta (Rom. 2:6, 7).

19. ¿Achkë rma ri apóstoles xkinaʼ kiʼkʼuxlal tapeʼ xechʼay?

¹⁹ Taq Jesús ya xkʼasöx yïn chkikojöl ri kamnaqiʼ, ri rutzeqelbʼëy xkinaʼ ri kiʼkʼuxlal ri xtzjoj qa ryä chkë. Tapeʼ xechʼay chqä xbʼix chkë chë ma tkitzjoj ta chik ri utziläj taq rutzjol, ryeʼ kan xkinaʼ kiʼkʼuxlal «rma Dios xyaʼ qʼij chkë rchë xkitäj poqän rma ri rubʼiʼ Jesús» (Hech. 5:40-42). Ryeʼ kan kowan xkajoʼ Jesús, ri Kitijonel. Rma riʼ kan ma xkixiʼij ta kiʼ chkiwäch ri winäq ri itzel xkinaʼ chkë. Y xkikʼüt ri ajowabʼäl riʼ taq kan xkitäj kiqʼij chutzjoxik ri utziläj taq rutzjol. Komä chqä, ye kʼïy qachʼalal najin nkiyaʼ na ruqʼij Dios tapeʼ kan kʼïy kʼayewal yaʼon pa kiwiʼ. Ryeʼ kitaman chë Dios ma xtmestaj ta ri samaj xtkiʼän nixta ri ajowabʼäl nkikʼüt chrij rubʼiʼ (Heb. 6:10).

20. ¿Achkë xtqatzʼët chpan ri jun chik tjonïk?

²⁰ Rma kʼa yoj kʼo na chkikojöl winäq ri ma nkiyaʼ ta ruqʼij Dios, ye kʼïy kan itzel na xtkinaʼ chqë (Juan 15:19). Ye kʼa majun rma nqaxiʼij qiʼ, achiʼel xtqatzʼët chpan ri jun chik tjonïk, Jehová xkerutoʼ chqä xtyaʼ kichqʼaʼ ri rusamajelaʼ ri ma xtkiyaʼ ta qa (2 Tes. 3:3). Rma riʼ, kan tqajoʼ Jehová rkʼë ronojel qan chqä keqajoʼ ri qachʼalal, yajün ri winäq ri itzel nkinaʼ chqë. We xtqaʼän riʼ, junan xtuʼän qawäch kikʼë ri qachʼalal chqä kuw xtuʼän ri qakʼuqbʼäl kʼuʼx. Chqä xtqayaʼ ruqʼij Jehová y xtqakʼüt chë ri ajowabʼäl nkowin chrij xa bʼa achkë kʼayewal nyaʼöx pa qawiʼ.