Jojun chkë ri profecías ri ye kʼo chpan re peraj reʼ nkitzjoj kij jojun ri xa junan tiempo xebʼanatäj. Jontir ri profecías riʼ nkikʼüt chë yoj kʼo chik chpan «ri rukʼisbʼäl taq qʼij» (Dan. 12:4).

• Textos bíblicos: Apoc. 11:7; 12:13, 17; 13:1-8, 12.

  Profecía: «Ri itzel chköp» ruqʼaton pä tzij pa ruwiʼ le Ruwachʼulew más 3,000 junaʼ. Chpan ri rukʼisbʼäl taq qʼij, xsokotäj ri séptimo rujolon ri itzel chköp riʼ. Chrij riʼ, xknäx ri jolomäj riʼ y «jontir Ruwachʼulew» xkitzeqelbʼej ri itzel chköp. Satanás nksaj ri itzel chköp riʼ rchë nuʼän «chʼaʼoj kikʼë rujatzul ri ixöq ri kʼa ye kʼo na qa».

  Xtzʼaqät ri profecía: Taq xqʼax yän ri Nimaläj Jöbʼ, xejeʼ qʼatbʼäl taq tzij ri itzel xkinaʼ che rä Jehová. Más 3,000 junaʼ chrij riʼ, chpan ri I Guerra Mundial, Gran Bretaña ma kan ta kʼïy chik ruchqʼaʼ xkanaj. Ye kʼa xkatäj chik jmul taq junan xuʼän kiwäch rkʼë Estados Unidos. Chpan ri rukʼisbʼäl qʼij, Satanás kʼa najin na yeruksaj ri qʼatbʼäl taq tzij rchë nuyaʼ kʼayewal pa ruwiʼ ri rutinamit Dios.

• Texto bíblico: Dan. 11:25-45.

  Profecía: Ri qʼatöy tzij ri kʼo pa norte chqä ri qʼatöy tzij ri kʼo pa sur nkiʼän chʼaʼoj chkiwäch rma jun chkë ryeʼ nrajoʼ ntok ri qʼatöy tzij ri njeʼ más uchqʼaʼ pa ruqʼaʼ.

  Xtzʼaqät ri profecía: Alemania xuʼän chʼaʼoj rkʼë Gran Bretaña chqä Estados Unidos. Chpan ri junaʼ 1945 ri Unión Soviética chqä ri rachiʼil xeʼok ri qʼatöy tzij ri kʼo pa norte. Chpan ri junaʼ 1991 xchaʼ chiʼ ri Unión Soviética y, xqʼax ri tiempo, Rusia chqä ri rachiʼil xeʼok ri kʼakʼakʼ qʼatöy tzij ri kʼo pa norte.

• Textos bíblicos: Is. 61:1; Mal. 3:1; Luc. 4:18.

  Profecía: Jehová xtäq ri rutaqoʼn rchë nuchojmij apü ri bʼey taq jbʼaʼ nrajoʼ rchë nuyaʼ ri Ruqʼatbʼäl Tzij pa ruqʼaʼ Jesús. Ri taqoʼn, ri nukʼambʼej tzij jun molaj qachʼalal, xchäp rutzjoxik ri «utziläj taq rutzjol chkë ri winäq ri ma qʼaqʼ ta kijolon kan».

  Xtzʼaqät ri profecía: Kan pa junaʼ 1870, Charles Russell chqä ri rachiʼil xkitäj kiqʼij chnukʼuxik le Biblia rchë nkitamaj achkë qäs nukʼüt. Chpan ri junaʼ 1881, ryeʼ xqʼax chkiwäch chë janina rejqalen chë ri rusamajelaʼ Dios yeʼel chutzjoxik le Biblia. Rma riʼ, chpan ri wuj Zionʼs Watch Tower (La Torre del Vigía de Sion) xekiyaʼ äl tzijonem achiʼel «Yejowäx 1,000 winäq rchë nkitzjoj Ruchʼaʼäl Dios» chqä «Yoj chaʼon rchë nqatzjoj ri Ruchʼaʼäl Dios».

• Texto bíblico: Mat. 13:24-30, 36-43.

  Profecía: Jun achï nutïk trigo chpan rujuyuʼ. Ye kʼa jun winäq ri itzel nunaʼ che rä nutïk qa itzel qʼayis chpan ri trigo. Ri itzel qʼayis nkʼïy chqä nuküch ruwäch ri trigo. Taq nbʼeqä ri qʼij rchë nmol ri trigo, njach ri trigo rkʼë ri itzel qʼayis.

  Xtzʼaqät ri profecía: Kan pa junaʼ 1870, eqal eqal xqʼalajin pä achkë riʼ ri kantzij chë ye cristianos y achkë riʼ manä. Chpan ri rukʼisbʼäl taq qʼij, xemol ri winäq ri kantzij chë ye cristianos y xejach kikʼë ri ma tzij ta chë ye cristianos.

• Texto bíblico: Dan. 2:31-33, 41-43.

  Profecía: Ri ajqanaj ri bʼanon rkʼë chʼichʼ chqä ulew jun peraj rchë ri achbʼäl ri bʼanon kikʼë jalajöj kiwäch chʼichʼ.

  Xtzʼaqät ri profecía: Ri ulew nukʼambʼej tzij ri winäq ri ye kʼo pa ruqʼaʼ Gran Bretaña chqä Estados Unidos ri ma yenman ta tzij chqä yechʼojin chkij ri yeqʼatö tzij pa kiwiʼ. Riʼ rubʼanon chë ri qʼatbʼäl taq tzij riʼ ma yekowin ta nkiksaj jontir kichqʼaʼ pa kiwiʼ ri winäq.

• Textos bíblicos: Mat. 13:30; 24:14, 45; 28:19, 20.

  Profecía: «Ri trigo» nmol chqä nyaʼöx pa «kʼjay» (granero). Chqä nyaʼöx «ri utziläj samajel ri kan kʼo runaʼoj [...] pa kiwiʼ ri nkʼaj chik samajelaʼ». «Ri utziläj taq rutzjol chrij ri Ruqʼatbʼäl Tzij Dios» eqal eqal nbʼä rutzjoxik «chwäch jontir Ruwachʼulew».

  Xtzʼaqät ri profecía: Chpan ri junaʼ 1919, ri samajel ri kan kʼo runaʼoj xyaʼöx qa pa ruwiʼ ri rutinamit Dios. Kan chpan qa ri junaʼ riʼ, ri Tijoxelaʼ chrij le Biblia xkiyaʼ más kan chutzjoxik le Biblia. Chkipan ri qʼij yoj kʼo komä, ri testigos de Jehová nkitzjoj ri Ruchʼaʼäl Dios pa más 200 tinamït chqä nkiqʼaxaj publicaciones pa más 1,000 chʼaʼäl.

• Textos bíblicos: Dan. 12:11; Apoc. 13:11, 14, 15.

  Profecía: Jun itzel chköp ri kaʼiʼ rukʼaʼ nuʼij chkë ri winäq chë «tkibʼanaʼ jun rachbʼäl ri itzel chköp» y ri itzel chköp riʼ nuyaʼ rukʼaslemal ri achbʼäl riʼ.

  Xtzʼaqät ri profecía: Gran Bretaña chqä Estados Unidos —kaʼiʼ nmaʼq qʼatbʼäl taq tzij ri kitnun kichqʼaʼ— xkiʼän ri Sociedad de Naciones. Nkʼaj chik tinamït xkitün kiʼ kikʼë. Chkipan ri junaʼ 1926 kʼa 1933, ri qʼatöy tzij ri kʼo pa norte xjeʼ chpan ri Sociedad de Naciones. Ri winäq xkinmaj wä chë ri Sociedad de Naciones xtkowin wä xtkʼäm pä uxlanen pa ruwiʼ le Ruwachʼulew, ye kʼa xa xuʼ ri Ruqʼatbʼäl Tzij Dios nkowin nuʼän riʼ. Ri winäq nkinmaj chë ri ONU xtuʼän riʼ chqä.

• Texto bíblico: Dan. 8:23, 24.

  Profecía: Jun qʼatöy tzij ri kan itzel ntzuʼun nuyaʼ tijöj poqonal pa kiwiʼ ri nkʼaj chik.

  Xtzʼaqät ri profecía: Gran Bretaña chqä Estados Unidos kan kʼïy tijöj poqonal kiyaʼon pa kiwiʼ ri nkʼaj chik. Jun tzʼetbʼäl, chpan ri II Guerra Mundial, Estados Unidos xkʼäm pä jun mamaʼ tijöj poqonal taq xkʼäq kaʼiʼ bombas atómicas pa ruwiʼ jun tinamït ri rukʼulel wä ryä chqä Gran Bretaña.

• Textos bíblicos: Dan. 11:31; Apoc. 17:3, 7-11.

  Profecía: Ri «itzel chköp ri këq rij» chqä 10 rukʼaʼ ntel pä chpan ri mamaʼ jül, y ntok jun octavo qʼatöy tzij. Ri qʼatöy tzij riʼ ya riʼ ri xuʼij Daniel chë «kan janina tzʼil chqä kan nuchüp ruwäch jontir».

  Xtzʼaqät ri profecía: Ri Sociedad de Naciones xchaʼ chiʼ chpan ri II Guerra Mundial. Taq xkʼis ri chʼaʼoj riʼ, xbʼan ri ONU. Achiʼel wä xbʼanatäj rkʼë ri Sociedad de Naciones, ri winäq chqä nkiquʼ chë ri ONU xtkʼäm pä uxlanen pa ruwiʼ le Ruwachʼulew, ri xa xuʼ ri Ruqʼatbʼäl Tzij Dios nkowin nuʼän. Ri qʼatbʼäl taq tzij ri ye kʼo chpan ri ONU xkekatäj pä chkij ri religiones.

• Textos bíblicos: 1 Tes. 5:3; Apoc. 17:16.

  Profecía: Ri qʼatöy taq tzij xtkiʼij chë «¡kʼo uxlanen chqä ronojel ütz rubʼanon!». Chrij riʼ, ri 10 ukʼaʼ chqä «ri itzel chköp» xkekatäj chrij «ri ixöq ri rukʼwan jun tzʼil kʼaslemal» chqä xtkichüp ruwäch. Y taq xtbʼanatäj riʼ, xtchup kiwäch ri qʼatöy taq tzij.

  Xttzʼaqät ri profecía: Ri qʼatöy taq tzij xtkiʼij chë xekowin xkiyaʼ uxlanen chwäch le Ruwachʼulew chqä chë jontir ütz xttel apü. Chrij riʼ, ri qʼatöy taq tzij ri ye kʼo chpan ri ONU xtkichüp kiwäch jontir ri religiones ri ma pa rubʼeyal ta nkiyaʼ ruqʼij Dios. Chriʼ xtchapatäj wä ri nimaläj tijöj poqonal. Ri nimaläj tijöj poqonal riʼ xtbʼekʼis taq Jesús xtchüp ruwäch ronojel ri itzelal chwäch le Ruwachʼulew chpan Armagedón.

• Textos bíblicos: Ezeq. 38:11, 14-17; Mat. 24:31.

  Profecía: Gog nkatäj chrij ri rutinamit Dios. Chrij riʼ, ri ángeles xkekimöl ri «yechaʼon».

  Xttzʼaqät ri profecía: Ri qʼatöy tzij ri kʼo pa norte, rkʼë kitoʼik ri nkʼaj chik qʼatöy taq tzij, xkekatäj chrij ri rutinamit Dios. Taq najin ri kʼayewal riʼ, ri qachʼalal ri yechaʼon rchë yebʼä chkaj ri kʼa ye kʼo na chwäch le Ruwachʼulew, xkeʼukʼwäx äl chkaj.

• Textos bíblicos: Ezeq. 38:18-23; Dan. 2:34, 35, 44, 45; Apoc. 6:2; 16:14, 16; 17:14; 19:20.

  Profecía: Ri winäq ri bʼenäq chrij ri «säq kej» xtchʼakon taq xtchüp ruwäch Gog chqä ru-ejército. Xtkʼaq «ri itzel chköp» chpan ri «choy ri kan nbʼrö pa qʼaqʼ» chqä xtwuläx ri mamaʼ achbʼäl.

  Xttzʼaqät ri profecía: Jesús, ri qʼatöy tzij rchë ri Ruqʼatbʼäl Tzij Dios, xtpë chkitoʼik ri rutinamit Dios. Rkʼë kitoʼik ri 144,000 chqä ri ángeles, ryä xtchüp ruwäch ri molaj qʼatöy taq tzij. Ke riʼ xtchup ruwäch ronojel ri kʼo pa ruqʼaʼ Satanás.