1. ¿Achkë rubʼanik nqrtoʼ 2 Corintios 3:1 kʼa 3 rchë nqʼax chqawäch chë kan jun nüm spanïk ri nqatoʼ jun winäq rchë nbʼeʼok testigo de Jehová? (Tatzʼetaʼ ri achbʼäl ri kʼo pä chwäch re revista reʼ).

¿ACHKË nqanaʼ röj taq jun winäq ri kʼo pa qa-congregación nqasäx pa yaʼ? Kantzij na wä chë kan kiʼ qakʼuʼx nqaʼän (Mat. 28:19). Y kan más nqanaʼ kiʼkʼuxlal we yoj xqyaʼö rutjonik ri winäq riʼ (1 Tes. 2:19, 20). Taq jun winäq nbʼeʼok testigo de Jehová, nqʼalajin chë ri xyaʼö rutjonik chqä ri nkʼaj chik qachʼalal pa congregación kan xkitäj kiqʼij chtoʼik (taskʼij ruwäch 2 Corintios 3:1-3).

2. a) ¿Achkë kʼutunïk ri kan kʼo rejqalen kʼo chë nqaʼän qa chqawäch, y achkë rma? b) ¿Achkë ntel chë tzij nayaʼ jun tjonïk chrij le Biblia? (Tatzʼetaʼ ri nota).

² Kan kiʼ qakʼuʼx nqatzʼët chë chkipan ri kajiʼ junaʼ ri ye qʼaxnäq pä, chwäch jontir le Ruwachʼulew, ronojel ikʼ jun 10,000,000 winäq najin nkïl kitjonik chrij le Biblia. * Chpan chqä ri tiempo riʼ, ronojel junaʼ yeqasan pa yaʼ más ye 280,000 winäq. Achiʼel nqatzʼët, kan pa millón chë winäq ri najin nkïl kitjonik chrij le Biblia kʼa nkʼatzin na yeqasäx pa yaʼ. ¿Achkë rubʼanik yeqatoʼ ri winäq riʼ? Jehová kʼa najin na nuyaʼ qʼij chkë ri winäq rchë nkitzolij kiʼ chqä rchë yeʼok rutzeqelbʼëy Cristo. Ye kʼa ri tiempo xa najin nkʼis. Rma riʼ, nqajoʼ nqaʼän jontir ri kʼo pa qaqʼaʼ rchë yeqatoʼ ri winäq riʼ rchë más chanin nkismajij  ri nrajoʼ Dios rchë ke riʼ ütz yeqasäx pa yaʼ (1 Cor. 7:29a; 1 Ped. 4:7).

3. ¿Achkë xtqatzʼët chpan re tjonïk reʼ?

³ Rma komä janina nkʼatzin yeqatoʼ ri winäq rchë yeʼok rutzeqelbʼëy Jesús, ri Molaj Ukʼwäy Bʼey xkʼutuj chkë ri sucursales achkë nkʼatzin nqaʼän rchë chë más tijoxelaʼ chrij le Biblia yeqasäx pa yaʼ. Rma riʼ, chpan re tjonïk reʼ chqä chpan ri jun chik, xtqatzʼët achkë nqatamaj qa chkij jojun ukʼwäy taq bʼey rchë circuito, misioneros chqä ri ye oknäq pä precursores kʼïy junaʼ (Prov. 11:14; 15:22). * Ri xkiʼij ri qachʼalal riʼ nkikʼüt chqawäch achkë nkʼatzin nkiʼän ri tijonelaʼ chqä ri tijoxelaʼ rchë chë ri tijoxel más rutoʼik xtrïl. Chpan re tjonïk reʼ xtqatzʼët woʼoʼ naʼoj ri nkʼatzin nusmajij jun tijoxel rchë xtkowin xtbʼeʼok testigo de Jehová, chqä achkë rubʼanik ntoʼöx rma ri tijonel.

4. ¿Achkë ütz nqʼax pa qajolon chkij ri tjonïk chrij le Biblia ri yeyaʼöx chuchiʼ kachoch ri winäq?

⁴ Ye kʼïy qachʼalal nkiyaʼ tjonïk chrij le Biblia chuchiʼ kachoch ri winäq. Tapeʼ ri ke riʼ rubʼanik ntjöx jun winäq xtuʼän chë xtrajoʼ xttamaj más, kʼïy mul ri tzij yebʼan rkʼë ma kan ta yeyalöj chqä rkʼë jbʼaʼ ma kan ta ronojel semanas nbʼan riʼ. Y rchë nkitoʼ más ri kitijoxel, jojun qachʼalal nkikʼutuj ru-número de teléfono ri winäq rchë ke riʼ nkiskʼij o nkitäq jun ru-mensaje rchë nkitzjoj äl jun naʼoj che rä ri kʼo chpan le Biblia. Rkʼë jbʼaʼ kan kʼïy ikʼ nkiʼän riʼ, y riʼ nuʼän chë ma kan ta yekowin nkikʼüt kʼïy naʼoj chrij le Biblia chwäch ri winäq riʼ. Rma ronojel riʼ, ütz nqʼax pa qajolon chë ri winäq riʼ rkʼë jbʼaʼ majun bʼëy xtjäch ta riʼ pa ruqʼaʼ Dios chqä xtqasäx pa yaʼ we ma kan ta nujäm ruwäch chqä ma kan ta nutäj ruqʼij rchë nutjoj riʼ chrij ri Ruchʼaʼäl Dios.

5. ¿Achkë naʼoj xkʼüt qa Jesús chpan Lucas 14:27 kʼa 33 ri ütz xtqaksaj rchë yeqatoʼ ri qatijoxelaʼ chrij le Biblia?

⁵ Kʼo jun qʼij, Jesús xksaj kaʼiʼ tzʼetbʼäl rchë xkʼüt chkiwäch ri winäq achkë nkʼatzin nkiʼän rchë yeʼok rutzeqelbʼëy. Xtzjoj chrij jun winäq ri nrajoʼ nuyäk jun jay chqä chrij jun qʼatöy tzij ri nbʼerubʼanaʼ chʼaʼoj rkʼë jun chik. Ryä xuʼij chë ri winäq ri nrajoʼ nuyäk jun jay kʼo chë naʼäy ntzʼyeʼ rchë «nutzʼët jaruʼ päq xtkʼatzin che rä chqä we xtqʼiʼ apü rchë xtkʼïs ruyakik ri jay», chqä chë ri qʼatöy tzij naʼäy kʼo chë ntzʼyeʼ rchë nutzʼët we nkowin nuchʼäk ri chʼaʼoj rkʼë ri soldados ye kʼo rkʼë (taskʼij ruwäch Lucas 14:27-33). Jesús retaman wä chë xa bʼa achkë winäq ri nrajoʼ  ntok rutzeqelbʼëy, kʼo chë nutzʼët achkë samaj rukʼwan ri naʼän riʼ. Ye kʼa rchë chë ri winäq nkowin nuʼän ri xuʼij qa Jesús, kʼo chë nqaʼij che rä chë nkʼatzin nukʼül rutjonik ronojel semanas. ¿Achkë rubʼanik xtqaʼän riʼ?

6. ¿Achkë ütz nqaʼän rchë chë ri qatijoxel kan chanin xkerutamaj chqä xkerusmajij ri naʼoj ye kʼo chpan ri Ruchʼaʼäl Dios?

⁶ Ri naʼäy nkʼatzin nqaʼän ya riʼ nqyalöj chik jbʼaʼ rkʼë ri winäq taq nqayaʼ rutjonik chuchiʼ rachoch. Rkʼë jbʼaʼ, ütz nqanukʼuj qa kaʼiʼ versículos rkʼë, pa rukʼexel xa xuʼ jun. Taq ri winäq xtkʼuluj che rä chë más yalöj nqayaʼ rutjonik, tqakʼutuj che rä we kʼo jun akuchï ütz nqtzʼyeʼ wä rkʼë rchë nqanukʼuj más ruwäch le Biblia. Ri xtuʼij ri winäq chqë xtkʼüt chqawäch we kantzij nuloqʼoqʼej ri rutjonik. Y xtqʼax ri tiempo, rkʼë jbʼaʼ ütz nqakʼutuj che rä we nrajoʼ nutjoj riʼ jun kaʼiʼ mul pa jun semana. Riʼ xttoʼ rchë más chanin xkerutamaj chqä xkerusmajij ri naʼoj ye kʼo chpan ri Ruchʼaʼäl Dios. Tqatzʼetaʼ achkë chik jun nkʼatzin nuʼän ri tijoxel.

7. ¿Achkë rubʼanik kʼo chë nutjoj äl riʼ jun tijonel taq nbʼeruyaʼ jun tjonïk chrij le Biblia?

⁷ Kan janina ruqʼij chë ri tijonel ütz ütz nutjoj äl riʼ taq nbʼeruyaʼ jun tjonïk chrij le Biblia. ¿Achkë rubʼanik xtqaʼän riʼ? Ütz nqaskʼij ruwäch ri naʼoj xtqatzʼët rkʼë ri winäq chqä keqanukʼuj ri textos ri kʼo chpan. Keqatzʼetaʼ ri naʼoj ri kʼo más kejqalen. Tqaquʼ rij ri rubʼiʼ ri naʼoj, ri subtítulos, ri kʼutunïk, ri textos «taskʼij ruwäch», ri achbʼäl y xa bʼa achkë video ri nqrtoʼ rchë nqaqʼalajsaj ri naʼoj. Chrij riʼ, tqaquʼ rij ri qatijoxel chqä achkë rubʼanik xtqaqʼalajsaj ri naʼoj chë ma kʼayewal ta xtqʼax chwäch chqä rchë xtkowin xtsmajij pa rukʼaslemal (Neh. 8:8; Prov. 15:28a).

8. Achiʼel xuʼij Pablo chpan Colosenses 1:9 chqä 10, ¿achkë kʼo chë nqaʼän pa kiwiʼ ri qatijoxelaʼ?

⁸ Chqä taq nqatjoj qiʼ, janina rejqalen chë nqatzjoj che rä Jehová ri nkʼatzin che rä ri qatijoxel. Chqä tqaʼij che rä chë tqrtoʼ pä rchë kan pa rubʼeyal nqaksaj le Biblia rchë ke riʼ ri naʼoj xtapon pa ran (taskʼij ruwäch Colosenses 1:9, 10). Tqaquʼ rij we kʼo jun naʼoj ri kan kʼayewal nuʼän chwäch nqʼax pa rujolon o kʼayewal nuʼän chwäch nunmaj. Ma tqamestaj ta chë ri nqajoʼ, ya riʼ chë ri qatijoxel nbʼeʼok testigo de Jehová.

9. ¿Achkë ütz nqaʼän rchë nqatoʼ qatijoxel rchë nutjoj apü riʼ?

⁹ We qatijoxel chaq taqïl nukʼül rutjonik, riʼ rkʼë jbʼaʼ xttoʼ rchë xtloqʼoqʼej jontir ri kibʼanon  Jehová y Jesús chqä xtrajoʼ xttamaj más (Mat. 5:3, 6). Rchë kan kʼo nutamaj qa, ri tijoxel kʼo chë nuyaʼ ran chrij ri achkë najin nutamaj. Rchë nuʼän riʼ, tqaʼij che rä chë kowan nkʼatzin chë nutjoj apü riʼ chrij ri naʼoj ri xtqatzʼët rkʼë chqä chë tquʼ rij achkë rubʼanik nusmajij pa rukʼaslemal. Rma riʼ, ütz nqakʼüt chwäch achkë rubʼanik nutjoj riʼ. * Tqakʼutuʼ chwäch achkë rubʼanik nrïl kiqʼalajsaxik ri kʼutunïk chqä tqaʼij che rä chë taq xa xuʼ jojun chʼaʼäl nuyaʼ ketal, riʼ xttoʼ rchë xtnatäj kiqʼalajsaxik ri kʼutunïk che rä. Chrij riʼ, tqaʼij che rä chë tqʼalajsaj ri kʼutunïk rkʼë ri xqʼax pa rujolon, ke riʼ xtqatamaj we kantzij xqʼax ri naʼoj chwäch. Tqatzʼetaʼ ri rox naʼoj ri nkʼatzin nusmajij jun tijoxel.

10. ¿Achkë rma kan kowan rejqalen chë ri tijoxel nuskʼij ruwäch le Biblia ronojel qʼij, y achkë kʼo chë nuʼän rchë nrïl qa utzil taq nuʼän riʼ?

¹⁰ Ri tijoxel ma xa xuʼ ta nkʼatzin nyaʼöx rutjonik chrij le Biblia ronojel semanas, ryä chqä kʼo nkʼatzin nuʼän pa ruyonïl. Ryä kʼo chë nchʼö qʼanäj rkʼë Jehová chqä nuyaʼ ruxkïn che rä. Ri rubʼanik nuyaʼ ruxkïn che rä Jehová ya riʼ taq nuskʼij ruwäch le Biblia ronojel qʼij (Jos. 1:8; Sal. 1:1-3). Tqakʼutuʼ chwäch ri rubʼanik nuksaj ri programa rchë ruskʼixik ruwäch le Biblia ri kʼo chpan jw.org^® chqä ri ütz nesäx chwäch wuj. * Rchë kan kʼo utzil nrïl qa taq nuskʼij ruwäch le Biblia, tqaʼij che rä chë tquʼ rij achkë nutamaj qa chrij Jehová rkʼë ri nuskʼij ruwäch chqä achkë rubʼanik ütz yerusmajij pa rukʼaslemal (Hech. 17:11; Sant. 1:25).

11. ¿Achkë xttoʼö jun tijoxel rchë xttamaj xtchʼö qʼanäj rkʼë Jehová, y achkë rma nkʼatzin ronojel qʼij nuʼän riʼ?

¹¹ Tqaʼij che rä qatijoxel chë ttzjon rkʼë Jehová ronojel qʼij. Rma riʼ, taq nqachäp chqä taq nqakʼïs jun tjonïk, kan rkʼë ronojel qan qchʼö qʼanäj rkʼë Jehová, chqä tqakʼutuj pa ruwiʼ ri qatijoxel. Ke riʼ, qatijoxel xttamaj xtchʼö rkʼë Jehová rkʼë ronojel ran chqä pa rubʼiʼ Jesucristo (Mat. 6:9; Juan 15:16). ¿Achkë komä xtbʼanatäj we ri tijoxel ronojel qʼij nuskʼij ruwäch le Biblia chqä nchʼö qʼanäj rkʼë Jehová? Kantzij na wä chë más junan xtuʼän ruwäch rkʼë (Sant. 4:8). Ri nuʼän riʼ xttoʼ rchë xtkowin xtjäch riʼ pa ruqʼaʼ Jehová chqä rchë xtqasäx pa yaʼ. ¿Achkë chik jun xttoʼö rchë?

12. ¿Achkë rubʼanik xtqatoʼ ri qatijoxel rchë ntok rachiʼil Jehová?

¹² Röj nqajoʼ chë ri qatijoxel nutamaj chrij Jehová. Ye kʼa nqajoʼ chqä chë ri naʼoj ri yerutamaj yeʼapon kʼa pa ran, rchë ke riʼ xkerusmajij ri naʼoj riʼ. Jesús kan kʼïy naʼoj xkʼüt chkiwäch ri winäq y ryeʼ kan xqä chkiwäch xkitamaj ri naʼoj riʼ. Ye kʼa ri winäq kan xkitzeqelbʼej Jesús rma ri naʼoj ri xerukʼüt kan xeʼapon pa kan (Luc. 24:15, 27, 32). Ri tijoxel kʼo ta chë achiʼel ta kan nutzʼët Jehová. Chqä kʼo chë nqʼax chwäch chë Jehová nkowin ntok Rutataʼ, ru-Dios chqä Rachiʼil (Sal. 25:4, 5). Rma riʼ, taq nqayaʼ rutjonik, tqayaʼ kiqʼij ri utziläj taq naʼoj ye kʼo rkʼë ri qa-Dios (Éx. 34:5, 6; 1 Ped. 5:6, 7). Xa bʼa achkë na kʼa naʼoj najin nqatzjoj rkʼë, tqakʼutuʼ chwäch achkë runaʼoj Jehová. Chqä tqatoʼ rchë yeruloqʼoqʼej ri naʼoj riʼ, achiʼel ri kowan nqrajoʼ, chë ütz runaʼoj qkʼë chqä chë kan nujyowaj qawäch. Jesús xuʼij chë «ri naʼäy pixaʼ chqä ri más ruqʼij» ya riʼ «tawajoʼ Jehová ri a-Dios» (Mat. 22:37, 38). Rma riʼ, tqatjaʼ qaqʼij rchë chë ri qatijoxel nrajoʼ Jehová rkʼë ronojel ran.

13. ¿Achkë rubʼanik nqatoʼ jun tijoxel rchë nutzʼët achkë runaʼoj Jehová? Taqʼalajsaj rkʼë jun tzʼetbʼäl.

¹³ Taq nqtzjon rkʼë qatijoxel, tqaʼij che rä achkë nqanaʼ röj chrij Jehová. Riʼ rkʼë jbʼaʼ xtuʼän chë ryä chqä xttzʼët chë nkʼatzin nnmär rajowabʼäl chrij Dios rchë ke riʼ xttok rachiʼil (Sal. 73:28). Tqayaʼ jun tzʼetbʼäl. Tqabʼanaʼ che rä chë chpan jun publicación o jun texto ri najin nqanukʼuj ruwäch kʼo jun naʼoj ri kan napon pa qan rma kʼo jun nukʼüt qa chqawäch chrij ri rajowabʼäl Jehová, ri ruchojmilal, ri ruchqʼaʼ o chë kan kʼo runaʼoj. Taq nbʼanatäj riʼ, ütz nqaʼij che rä qatijoxel chë ya riʼ jun rma ri nbʼanö chqë chë kan kowan nqajoʼ ri Qatataʼ kʼo chkaj. Komä tqatzʼetaʼ ri rukʼisbʼäl naʼoj ri kʼo chë nuʼän jun tijoxel rchë xtkowin xtbʼeʼok testigo de Jehová.

14. Achiʼel nuʼij Hebreos 10:24 chqä 25, ¿achkë xttoʼö ri qatijoxel rchë más chanin xtchäp kisamajxik ri naʼoj ye kʼo chpan ri Ruchʼaʼäl Dios?

¹⁴ Jontir röj nqajoʼ chë ri qatijoxelaʼ yebʼeʼok testigos de Jehová. Ye kʼa rchë xkekowin xtkiʼän riʼ, nkʼatzin nqaʼij chkë chë kebʼä pa qamoloj. Ri tijonelaʼ ri ya kʼo chik junaʼ kiyaʼon pä tjonïk nkiʼij chë ri tijoxelaʼ ri yebʼä pa qamoloj más chanin nkichäp kisamajxik ri naʼoj nkitamaj (Sal. 111:1). Ye kʼo qachʼalal nkiʼij chkë ri kitijoxelaʼ chë tapeʼ kan kïy najin nkitamaj chpan ri tjonïk ri najin nkikʼül,  kʼo naʼoj ri xa xuʼ pa qamoloj xtkitamaj wä. Tqaskʼij Hebreos 10:24 chqä 25 chwäch ri qatijoxel chqä tqaʼij che rä achkë utzil nukʼäm pä pa ruwiʼ we nbʼä pa qamoloj (taskʼij ruwäch). Chqä ütz nqakʼüt ri video chwäch ¿Achkë yebʼan pa qamoloj? * Tqatoʼ ri qatijoxel rchë nuyaʼ chwäch ran chë ronojel mul nbʼä pa qamoloj.

15. ¿Achkë ütz nqaʼän rchë nqatoʼ qatijoxel rchë nbʼä chpan jontir qamoloj?

¹⁵ ¿Achkë ütz nqaʼän we ri qatijoxel majun bʼëy bʼenäq ta pa jun moloj o kʼa chaq jantäq na nbʼä? Kan rkʼë kiʼkʼuxlal tqatzjoj jun naʼoj che rä ri xqatamaj chpan jun moloj ri kʼa xbʼan qa. Ya riʼ más xttoʼ chwäch ri xa xuʼ nqaʼij che rä chë tapon pa qamoloj. Tqayaʼ jun wuj Ri Chajinel che rä o ri Wuj rchë ri qamoloj ri najin nqatzʼët ri semana riʼ. Tqakʼutuʼ chwäch achkë xttzʼet chpan ri qamoloj ri semana riʼ chqä tqakʼutuj che rä achkë naʼoj más nqä chwäch ryä. Ri xttzʼët chqä ri xtkʼoxaj chpan ri naʼäy qamoloj ri xtbʼä wä chöj ma xtjunmatäj ta rkʼë ri rutzʼeton chqä ri rukʼoxan chpan jun chik religión (1 Cor. 14:24, 25). Xttamaj kiwäch utziläj taq winäq ri xtkitoʼ rchë xtbʼeʼok testigo de Jehová.

16. a) ¿Achkë kʼo chë nqaʼän rchë chë ri qatijoxel xtbʼeʼok testigo de Jehová? b) ¿Achkë xtqatamaj chpan ri jun chik tjonïk?

¹⁶ Rkʼë jontir ri qatzʼeton pä, ¿achkë komä rubʼanik nqatoʼ jun qatijoxel rchë xtbʼeʼok testigo de Jehová? Röj nkʼatzin nqatoʼ qatijoxel rchë nqʼax chwäch chë kan kʼo rejqalen ri tjonïk najin nukʼül. Rchë riʼ, nkʼatzin nqatoʼ rchë ronojel semanas nukʼül rutjonik chqä rchë ütz ütz nutjoj riʼ chkij ri naʼoj ri xkeqatzʼët rkʼë. Tqaʼij che rä chë ronojel qʼij nkʼatzin nuyaʼ ruxkïn che rä Jehová chqä nchʼö qʼanäj rkʼë, rchë ke riʼ xtkowin xttok rachiʼil. Chqä tqaʼij che rä chë ütz nbʼä qkʼë pa qamoloj. (Tatzʼetaʼ ri recuadro ri kʼo pa ruxaq 12 ri rubʼiniʼan « Ri tijoxel kʼo chë...»). Ye kʼa, achiʼel xtqatzʼët chpan ri jun chik tjonïk, kʼo woʼoʼ naʼoj ri nkʼatzin nkiʼän ri tijonelaʼ rchë chë ri kitijoxelaʼ xkebʼeʼok testigos de Jehová.