Eclesiastés 5:8 kan nuʼän chqë chë nqaquʼ rij ri tzij ye kʼo chpan. Chriʼ nuʼij: «We natzʼët chë chpan ri atinamit ri qʼatöy tzij yerutzʼlaʼ ri ye kʼo pa mebʼaʼïl, ma pa rubʼeyal ta nqʼatö tzij chqä ma nuyaʼ ta chkë ruwinaq ri kʼo chë nuyaʼ chkë, ma tchʼpü ta akʼuʼx. Ri qʼatöy tzij riʼ kʼo chik jun ri kʼo más uchqʼaʼ pa ruqʼaʼ ri ntzʼetö rchë, y pa kiwiʼ ryeʼ ye kʼo chik nkʼaj ri kan más na chik uchqʼaʼ kʼo pa kiqʼaʼ».

Chqawäch röj winäq, rkʼë jbʼaʼ re tzij reʼ kan xa xuʼ ntzjon chkij ri achiʼaʼ ri kʼo qʼatbʼäl taq tzij pa kiqʼaʼ. Ye kʼa we röj nqaquʼ más rij re texto reʼ, nukʼüt jun naʼoj chqawäch chrij Jehová ri kan nukʼuqbʼaʼ qakʼuʼx.

Eclesiastés 5:8 ntzjon chrij jun qʼatöy tzij ri yerutzʼlaʼ ri ye kʼo pa mebʼaʼïl chqä ma pa rubʼeyal ta nuʼän kikʼë. Ri achï riʼ kʼo ta chë ma numestaj ta chë rkʼë jbʼaʼ kʼo jun ri kʼo más uchqʼaʼ pa ruqʼaʼ ri najin nchajin pä rchë. Y pa kiwiʼ ryeʼ, rkʼë jbʼaʼ kʼa ye kʼo na chik nkʼaj ri kʼo más uchqʼaʼ pa kiqʼaʼ ri yetzʼetö pä kichë. Tapeʼ ke riʼ, chkipan ri qʼatbʼäl taq tzij rkʼë jbʼaʼ jontir ri qʼatöy taq tzij xa itzel kinaʼoj, y riʼ nuʼän chë ri winäq nkitäj poqän pa kiqʼaʼ.

Ye kʼa, tapeʼ kan kʼayewal rubʼanon jontir, kan nukʼuqbʼaʼ qakʼuʼx nqatamaj chë Jehová yerutzʼët pä ri winäq, yajün ri qʼatöy taq tzij ri kan kʼo más uchqʼaʼ pa kiqʼaʼ. Rma riʼ, tqakʼutuj che rä Jehová chë tqrtoʼ pä y tqayaʼ qa pa ruqʼaʼ ronojel ri kʼayewal najin nqaqʼaxaj (Sal. 55:22; Filip. 4:6, 7). Röj qataman chë «Jehová najin nutzʼët jontir ri najin nbʼanatäj chwäch le Ruwachʼulew rchë yerutoʼ ri winäq ri kan rkʼë ronojel kan nkiyaʼ ruqʼij» (2 Crón. 16:9).

Achiʼel nqatzʼët, Eclesiastés 5:8 nukʼüt qa re naʼoj reʼ chqawäch: chë pa kiwiʼ ri qʼatöy taq tzij ronojel mul kʼo jun ri kan kʼo más uchqʼaʼ pa ruqʼaʼ. Y ri más rejqalen, ya riʼ chë re versículo reʼ nunataj chqë chë Jehová ya riʼ ri kʼo ronojel uchqʼaʼ pa ruqʼaʼ. Kan komä yän riʼ, ri Ruqʼatbʼäl Tzij ya najin chik nuqʼät tzij, y Jesús, ri Rukʼajol, ya riʼ ri Qʼatöy Tzij chpan ri Qʼatbʼäl Tzij riʼ. Jehová, ri kʼo ronojel uchqʼaʼ pa ruqʼaʼ chqä jontir nkowin nutzʼët, kan pa ruchojmil nuʼän che rä ronojel, y Jesús, ri Rukʼajol, ke riʼ chqä runaʼoj.