Jaʼ, kan pa millón ye kʼo chwäch jontir le Ruwachʼlew. Ryeʼ ye kʼo chpan ri molaj ixoqiʼ ri nkitzjoj ri utziläj taq rutzjol chrij ri Ruqʼatbʼäl Tzij Dios ri ntzjöx kij chpan ri Salmo 68:11, akuchï Jehová xuʼij reʼ: «Ri ixoqiʼ ri nkitzjoj ri utziläj taq rutzjol kan ye jun mamaʼ ejército».

Tapeʼ ke riʼ, ri nkiʼän ri ixoqiʼ testigos de Jehová kan ma junan ta rkʼë ri nkiʼän ri ixoqiʼ ri ye kʼo chkipan ri nkʼaj chik religiones. ¿Achkë riʼ ri ma junan ta nkiʼän?

Ri ixoqiʼ ri nyaʼöx rusamaj jun sacerdote chkë chpan ki-religión kan ronojel bʼaʼ mul nkikʼüt ri nkinmaj chkiwäch ri yeʼapon chpan ki-iglesia chqä yeyaʼöx rchë nkikʼwaj bʼey chkiwäch. Ye kʼa ri ixoqiʼ testigos de Jehová nkitzjoj le Biblia chkë winäq ri ma ye kʼo ta pa congregación. Ryeʼ nkiʼän riʼ taq yebʼä chuchiʼ taq jay o xa bʼa akuchï ye kʼo wä.

Chqä chpan ki-congregación ri testigos de Jehová xa xuʼ achiʼaʼ yechaʼöx rchë yeʼok tijonelaʼ. Rma riʼ, ri ixoqiʼ ma yekikʼüt ta naʼoj chkipan ri moloj taq jun achï ri qasan chik pa yaʼ kʼo chriʼ (1 Timoteo 3:2; Santiago 3:1).

Chpan le Biblia nqïl chë xa xuʼ achiʼaʼ xeksäx rchë nkikʼwaj bʼey chwäch ri congregación. Y ri xuʼij ri apóstol Pablo che rä jun chik ukʼwäy bʼey ri rubʼiniʼan Tito nuyaʼ ruchqʼaʼ ri naʼoj riʼ. Ryä xuʼij reʼ che rä: «Xatinyaʼ qa Creta [...] rchë yeʼachaʼ qa ukʼwäy taq bʼey chkipan ri tinamït ri akuchï xkaqʼax wä» (Tito 1:​5). Chrij riʼ xuʼij chë ri ukʼwäy bʼey kʼo chë «majun tzij qʼabʼan chrij, xa jun rixjayil njeʼ» (Tito 1:​6). Ri apóstol ke riʼ chqä jbʼaʼ xuʼij äl chpan jun carta ri xtäq äl che rä Timoteo. Ryä xuʼij: «We kʼo jun achï najin nutäj ruqʼij rchë ntok ukʼwäy bʼey, kan ütz ri nrajoʼ nuʼän. Rma riʼ, ri ukʼwäy bʼey kʼo ta chë majun tzij qʼabʼan chrij, xa xuʼ jun rixjayil njeʼ [...] y kʼo chë nkowin yerutjoj ri nkʼaj chik» (1 Timoteo 3:​1, 2).

Ye kʼa, ¿achkë rma xa xuʼ achiʼaʼ yekowin yeʼok ukʼwäy taq bʼey? Pablo xuʼij reʼ: «Ma nyaʼ ta qʼij chë yë ri ixöq ntjon rchë ri achï nixta rchë njeʼ más uchqʼaʼ pa ruqʼaʼ chwäch ryä; pa rukʼexel riʼ, ryä xa xuʼ kʼo chë nukʼoxaj ri nbʼix che rä. Rma yë Adán xbʼan naʼäy, chrij riʼ xbʼan Eva» (1 Timoteo 2:​12, 13). Re tzij reʼ nukʼüt chqawäch chë Dios nrajoʼ chë yë ri achï nekʼwan bʼey chpan ri congregación chqä chë yë ryä ttok ri tijonel chkiwäch rusamajelaʼ.

Rma yë Jesucristo nekʼwan bʼey chkiwäch rusamajelaʼ Jehová, ryeʼ nkikʼän kinaʼoj chrij. Ri discípulo Lucas xuʼij chë Jesús «xbʼä chkipan nmaʼq chqä koköj taq tinamït rchë xbʼetzjoj ri utziläj taq rutzjol chrij ri Ruqʼatbʼäl tzij Dios». Y, ¿achkë xkiʼän rutzeqelbʼëy taq ryä xerutäq rchë nkiʼän ri samaj riʼ? Ryeʼ xebʼä chkipan ri «koköj taq tinamït rchë xkitzjoj ri utziläj taq rutzjol» (Lucas 8:1; 9:​2-6).

Komä chqä, ri rusamajelaʼ Jehová —chë achiʼaʼ chë ixoqiʼ— nkiʼän jontir ri kʼo pa kiqʼaʼ rchë yetoʼon rchë nbʼetzʼaqät ri nuʼij Mateo 24:14. Chriʼ, Jesús xuʼij: «Ri utziläj taq rutzjol chrij ri Ruqʼatbʼäl Tzij Dios xttzjöx chwäch jontir Ruwachʼlew rchë chë ke riʼ jontir winäq xkekʼoxan rchë. Chrij riʼ kʼa riʼ xtchup ruwäch ronojel ri itzelal».